31
Preya blanga trastim langa God
Song blanga Deibid.
1 YAWEI, ai kaman langa yu blanga kipum mi seifwan.
Nomo larram enibodi bidim mi en meigim mi sheim.
Yu na det brabli haibala God, nomo garram enijing rong.
Mi prei langa yu blanga seibum mi.
2 Irrim mi na en seibum mi.
YAWEI, yu jis laiga bigwan ston weya kipum mi seifwan.
Yu jandap lida langa mi jis laiga bigwan wol blanga seibum mi.
3 Yu na main seifhaus en yu maindimbat mi.
Yu shoum mi wanim blanga dum, en lidim mi jis laik yubin pramis.
4 Deigimat mi brom det trep weya ol main enami bin meigim blanga mi,
dumaji oni yu na kipum mi seif.
5 YAWEI, langa yu bingga na ai libum main spirit.
Yu garra seibum mi, YAWEI.
Yu na det brabli trubalawan God.
6 Yu nomo laigim ol detlot hu weship ola drimin sheip,
bat mi oldei trastim yu.
7 Ai garra jidan brabli gudbinji en preisim yu dumaji yu garram olagijawan filing blanga laigimbat mi.
Yu sabi main pein en ol main trabul.
8 Yu nomo bin larram main enami olabat deigim mi prisana.
Yubin kipum mi fri en seifwan.
9 YAWEI, yu jidan kainbala langa mi dumaji mi brabli nogudbinji.
Aibin kraikrai detmatj en mi brabli wikwan.
10 Mi wikwan dumaji mi oldei jidan sedwan.
Aibin kraikrai detmatj ai kaan jidan longtaim na.
Ol main trabul bin meigim mi wikwan.
Main bodi im brabli wikwan en ai kaan dum enijing mowa.
11 Main enami olabat tok langa mi, “Yu najing!”
Ola pipul weya jidan wansaid langa mi reken mi rabishwan du.
Main frenmob bradin blanga kaman gulijap langa mi.
Wen olabat luk mi eniweya dei gibit mi bekboun.
12 Mi jis laiga breikinwan kap weya dei tjakidawei.
Olabat nomo jinggabat mi. Im jis laik mi dedbala.
13 Main enami olabat majurrumap miselp en tok blanga kilim mi.
Mi brabli bradin.
Olabat meigimbat plen blanga kilim mi ded.
14 YAWEI, ai trastim langa yu.
Yu na main God.
15 Yu holdim main laif langa yu bingga.
Seibum mi brom ol main enami, en brom detlot hu ranimap mi.
16 Mi na blanga yu wekinmen.
Yu luk langa mi.
Seibum mi dumaji yu laigim mi olagijawan.
17 YAWEI, mi jingat langa yu.
Yu ensim mi en nomo meigim mi sheim.
Yu meigim main enami olabat sheim, en binijimap olabat.
18 Jadimap olabat mawus weya dei oldei dalimbat laiya,
en wen dei oldei reken miselp en tok nogudwei blanga detlot pipul hu oldei jidan raitwei.
19 Yu brabli gudwan en yu garram ola gudbala ting blanga detlot hu rispek langa yu.
En detlot hu trastimbat yu, yu oldei lukaftumbat olabat.
Pipul ebriweya luk wanim yu dumbat.
20 Yu oldei maindimbat yu pipul olabat wen najalot pipul meigimbat plen blanga dum nogudbala ting langa olabat.
Yu nomo larram eni nogudbala wed kaman en ardim langa olabat.
21 Preisim YAWEI det trubala God.
Imbin laigim mi detmatj en imbin shoum mi tharran na wen main enami olabat bin olaran en fait langa melabat langa det bigbala taun weya aibin jidan.
22 Aibin bradin nomo lilbit, en aibin reken imbin andimwei mi.
Bat imbin irrim mi en album mi wen aibin jingat langa im.
23 Kipgon jidan trubala langa YAWEI ol yumob pipul hu oldei trastimbat im.
YAWEI oldei lukaftumbat ol im pipul, bat im panishim detlot pipul hu laigimbat miselp.
24 Ol yumob pipul hu oldei trastimbat langa YAWEI,
yumob jidan strongbala en nomo bradin blanga enijing.