28
Preya blanga album
Preya blanga Deibid.
1 YAWEI, oni yu na main strongwan ston.
Yu irrim mi kraikraibat.
Mi askimbat yu blanga albumbat mi.
If yu kaan irrim mi wal ai garra dai en go langa greib.
2 Ai tenaran en luk langa det Serramoni Pleis weya yu jidanbat,
en ai lidimap main bingga blanga prei langa yu.
Mi jingat langa yu blanga album mi.
3 Yu nomo kilim mi ded garram detlot nogudbala pipul.
Dei oldei tok gudwei garram enibodi,
bat stil dei heidimbat pipul insaid langa olabat hat.
4 Yu panishim olabat na,
dumaji olabat bin dum loda nogudbala ting.
Olabat laigim lukaranbat blanga trabul olataim.
YAWEI, yu meigim trabul blanga olabat na.
5 Dei nomo teiknodis wanim YAWEI bin dum.
Dei nomo sabi weya imbin meigim ebrijing.
Wal YAWEI garra panishim en binijimap olabat olagijawan.
6 YAWEI, mi gibit preis langa yu dumaji wen aibin jingat langa yu, yubin duwit langa mi.
7 Yu jis laiga det strongwan shild weya oldei stapam enijing weya gin ardim mi.
Mi oldei trastim oni langa yu.
Oni yu na gin album mi.
Yu oldei meigim mi gudbinji.
Wal ai garra kipgon preisimbat langa yu.
Ai garra kipgon singsing ola song blanga yu.
8 YAWEI, oni yu na oldei seibum ola pipul blanga yu.
Yu oldei lukaftumbat melabat brabliwei,
dumaji yu na bin pikimat melabat.
9 YAWEI, yu na oldei seibum melabat,
en album melabat.
En jis laik det boswan stakmen weya im oldei maindimbat ola ship blanga im,
wal lagijat na yu lukaftumbat melabat olagijawan.