21
Preisim God dumaji imbin bidim im enami olabat
Song blanga Deibid.
1 YAWEI, melabat king im gudbinji dumaji yu strongbala.
Im singim song en im dens dumaji yubin meigim im win.
2 Yubin gibit im wanim imbin wandimbat brabliwei.
Yu nomo bin nokambek im wen imbin askim yu.
3 Yubin kaman langa im garram ola gudwan ting,
en yubin pudum speshalwan golwan het langa im hed.
4 Imbin askim yu blanga jidan laibala longtaim,
en yubin gibit im det olagijawan laif.
5 Im brabli haibalawan dumaji yubin album im.
Yubin meigim im jidan haibala en pipul ebriweya sabi im.
6 Ola gudwan ebrijing weya yubin gibit langa im garra jidan olagijawan.
En im oldei jidan gudbinjiwei dumaji yu na oldei jidan garram im.
7 YAWEI det Boswan God, det king im trastim yu.
Yu garram det olagijawan filing blanga laigimbat det king,
en blanga tharran na nomo enijing kaan pudumdan im.
8 Det king garra grebum im enami olabat en meigim olabat jidan prisana.
Im garra grebum ol detlot hu heidim im du.
9 Wen im kaman langa olabat im garra binijimap olabat laiga bigwan faiya weya im barnbarn.
YAWEI garra gitwail en binijimap olabat brabliwei jis laiga bigwan faiya weya barnimap ebrijing brabliwei.
10 Nobodi langa olabat femili garra jidan laibala. Najing.
Det king garra kilim ded ol detlot na.
11 Detlot enami meigimbat nogudwan plen blanga ardim im,
bat dei kaan win. Najing.
12 Im garra shudum im erro langa olabat,
en olabat garra tenaran en ranawei.
13 YAWEI, melabat preisim yu dumaji yu brabli strongbala.
Melabat garra singim song en preisim det brabli strongwan pawa blanga yu.