17
Det preya blanga sambodi hu nomo bin dum enijing rong
Preya blanga Deibid.
YAWEI, ai nomo bin dum enijing rong!
Kaan yu irrim wen mi prei en askim yu blanga album mi?
Mi trubala dijan!
Wal yu irrim main preya.
Oni yu gin tok mi nomo gilti,
dumaji oni yu gin luk wanim trubala.
 
Yu sabi main hat.
Nomeda naitaim du yubin testim mi, yubin faindim mi nomo gilti.
Aibin jinggabat nomo blanga dalim laiya.
Ai nomo dum wanim najalot pipul dumbat.
Ai duwit langa yu,
en ai nomo krulbala.
Aibin pudum main fut ontop langa yu trek en aibin bulurrum yu olawei.
Ai nomo bin tenawei.
 
Ai prei langa yu God,
dumaji yu garra album mi.
Irrim en ensim main preya!
Shoum hau yu kipgon laigim pipul.
Garram yu strongwan raiden yu oldei maindimbat detlot pipul hu go langa yu blanga seibum olabat brom olabat enami.
Yu luk mi en maindim mi brabliwei,
jis laik det bard wen im kipum im beibi seif andanith langa im wing.
 
Yu nomo larram main enami olabat kaman brom ebri said blanga kilim mi ded,
10 dumaji olabat jinggabat olabat ronselp en dei tok praudbalawei.
11 Deibin gajimap mi!
Main enami olabat ebriweya.
Dei weidabat blanga det rait taim blanga berrim mi langa graun.
12 Dei jis laiga hanggriwan laiyan weya hanting blanga daga.
Dei jis laiga strongwan laiyan weya blandim miselp en lukinat mi.
 
13 YAWEI, yu album mi.
Yu fait en bidim olabat.
Gajim yu bigwan naif en seibum mi brom detlot brabli nogudbala pipul.
14 Garram yu strongwan raiden yu seibum mi brom detlot pipul hu jinggabat oni blanga dijan wel.
Yu gibit daga langa detlot pipul yu laigim.
Olabat biginini garra oldei abum blendi daga,
en ola biginini blanga olabat garra abum detmatj daga du.
 
15 YAWEI, mi nomo gilti,
en ai garra luk yu!
Wen ai garra weikap, ai garra luk yu,
en tharran na garra meigim mi gudbinji.