114
Dijan song blanga Pasoba Serramoni
1 Wen detlot Isreil pipul hubin det femilimob blanga Jeikob bin libum det kantri Ijip weya pipul deya tok najawan langgus,
2 ola Juda pipul bin jidan seikridwan blanga YAWEI,
en ola Isreil pipul bin jidan ronwan pipul blanga YAWEI.
3 God bin kaman langa det Redsi en imbin draiyimap det woda,
en det Jodan Riba bin stap randan.
4 Detlot bigwan hil bin jampjamp wulijim nenigout,
en najalot hil bin jamparanbat wulijim yangwan ship.
5 Wanim bin hepin langa yu solwoda blanga meigim yu draiyap?
En yu Jodan Riba, wotfo yubin stap randanbat?
6 Ol yumob bigwan hil, wotfo yumob bin jampjamp wulijim nenigout?
En ol yumob hil, wotfo yumob bin jamparanbat wulijim yangwan ship?
7 Sheiksheik graun! YAWEI im kaminap.
Sheik lida langa YAWEI det God blanga Jeikob.
8 Im na bin meigim woda kamat brom bigwan rok,
en bin meigim springwoda ranat brom ola adwan rok.