3
God garra sori langa wi bambai
Det speshalwan mesinja bin tok,
1 “Wal mi sabi weya God bin jandim loda panishmen langa mi.
2 Imbin meigim mi godan langa dakbala pleis.
3 Imbin kilimbat mi oldei raidap main bodi bin ardim brabliwei.
4 YAWEI imbin weistim main bodi eniwei na, en imbin breigimap main boun du.
5 Imbin gibit mi adtaim en mi jidan brabli nogudbinji jis laiga prisana.
6 Imbin meigim mi jidanbat longtaim langa dakwan pleis jis laiga dedwan.
7 “Imbin taiyimap mi garram tjein, en mi jidan laiga prisana en mi nomo sabi wujeiwujei blanga kamat en ranawei.
8 Mi oldei jingat adbalawei langa God blanga album mi, bat im nomo oldei irrim mi, najing.
9 Mi oldei wokwokbat laiga drangginbala, en im wol oldei blokimbat mi brom ebri said.
10 Imbin weidabat blanga mi laik det hanggriwan enimul gulum beya.
En imbin jamp langa mi laik det jigiwan laiyan.
11 Im jis laik YAWEI bin ranimap mi en terrimap main bif en libum mi blanga dai.
12 Imbin git redi blanga kilim mi garram det shapwan spiya,
13 en imbin tjakam det spiya rait langa main hat.
14 “Detlot najalot pipul oldei mokimbat langa mi,
en dei oldei meigimbat fan langa mi garram olabat song.
15 God bin panishim mi nomo lilbit en imbin jis laik imbin gibit mi adwan daga en soltiwan woda.
16 Imbin rabum main feis langa graun, en imbin bitsimap ol main tuth garram ston.
17 Basdam aibin gudbinji, bat tudei na ai nomo sabi hau blanga jidan gudbinjiwei, najing.
18 “Longtaim aibin tok,
‘YAWEI det trubala God im oldei garra lukaftumbat mi en im garra kain langa mi.’
Bat ai kaan tok lagijat enimo, dumaji im nomo lukaftumbat mi.
Wal maitbi ai kaan jidan blanga longtaim. Ai mait libum yu enitaim.
19 Wal wen mi oldei jinggabat ol det trabul mi abumbat, en hau mi nomo garram kemp blanga jidan, im jis laik sambodi bin poisinim mi.
20 Ai oldei kipgon jinggabat lagijat, en mi brabli nogudbinji.
21 Bat mi jidan gudbinjiwei igin wen mi jinggabat dijan gudbala ting.
22 “Nomeda YAWEI det trubala God bin brabli wail langa mi bat stil im laigim mi detmatj en im kaan neba stap laigimbat mi, en im oldei kain langa mi.
23 Ebri ailibala ai sabi YAWEI im oldei album mi en kain langa mi.
24 YAWEI im ebrijing langa mi, en ai sabi ai gin trastimbat im.
25 “YAWEI im oldei kain langa ebribodi hu oldei jinggabat en trastimbat im,
26 en blanga tharran na im brabli gudwan ting blanga weidabat raidap God garra album wi en seibum wi.
27 Im gudwan du blanga lenlenbat lagijat wen wi stil yangbala.
28 Wen wi nomo gudbinji en abum trabul, wal wi garra lafta jidan miselp kwaitbala en weidabat blanga YAWEI garra album wi.
29 Wi garra meigim miselp lobala dumaji wi brabli nogudbala, en maitbi YAWEI garra album wi.
30 Nomeda najalot kilim wi en tok brabli nogudbalawei langa wi, bat wi kaan duwit du.
31 “Wal nomeda YAWEI bin libum wi, bat stil im garra sori langa wi bambai.
32 Nomeda imbin meigim wi brabli nogudbinji, bat stil im oldei sori langa wi, dumaji im laigim wi detmatj.
33 Im nomo wandim meigim wi blanga abumbat loda trabul en pein.
34 “YAWEI im sabi wen wi laif im nomo strongbala, dumaji wi oldei jidan prisanawei.
35 YAWEI det brabli haibalawan God sabi wen sambodi nomo gibit feyago langa enibodi.
36 Im sabi wen enibodi tok brabli laiyinbalawei insaid langa kothaus.
Wal im sabi ebrijing en im gin panishim detlot hu dumbat ol detlot ting.
37 Nobodi kaan dum enijing if YAWEI nomo larram im.
38 Wal gudwan ting en nogudwan ting gin hepin oni wen YAWEI det brabli haibala God tok.
39 If wi kipgon jidanbat laibala afta God panishim wi, wal wi kaan tok nogudbalawei blanga im.
40 “Wi garra lafta jinggabat wen wi dumbat nogudbala ting en nomo bulurrum God,
en wi garra tenbek langa im.
41 Wal wi garra opinim wi hat langa YAWEI det trubala God hu jidan langa top, en wi garra prei langa im.
42 Wi garra prei,
‘YAWEI, dumaji melabat bin oldei dumbat nogudbala ting, yu nomo bin larramgo melabat fri brom melabat nogudbalawei.
43 Yubin lukabat melabat en yubin kilim melabat ded wen yubin brabli wail langa melabat.
Yu nomo bin kain langa melabat.
44 Wen yubin wail langa melabat im jis laik yubin blandim miselp biyain langa bigbala klaud en yu kaan irrim melabat preya.
45 Yubin meigim melabat laiga rabish langa dijan wel.
46 Melabat jidan brabli nogudbala en ola enami blanga melabat bin oldei mokimbat langa melabat.
47 Melabat bin abumbat loda trabul en melabat nomo sabi wanim blanga dum en melabat brabli bradin.’
Lagijat na wi garra prei langa YAWEI.
48 “Mi krai binji dumaji main pipul olabat bin daidaibat ebriweya.
49 En ai kaan stap kraikraibat,
50 raidap YAWEI lukdan brom top langa wi.
51 Mi brabli sori wen mi luk wanim bin hepin langa detlot gel iya langa Jerusalem.
52 “Ola enami bin trepam mi jis laiga bard.
Deibin kipgon heidimbat mi, nomeda ai nomo bin dum enijing langa olabat.
53 Deibin wandim kilim mi ded wen deibin tjakidawei mi insaid langa det hol, en deibin jadimap det hol garram bigwan ston.
54 Woda bin kamat en gaburrumap mi, en aibin reken mi garra dai.
55 “Brom det dipwan hol na aibin jingat, ‘YAWEI album mi.’
56 En wen aibin jingat adbala langa im, imbin irrim mi.
57 YAWEI, yubin ensim main preya en yubin dalim mi nomo blanga bradin.
58 Bos, yubin kaman blanga seibum mi.
Yubin seibum main laif.
59 Yu kotimbat mi gudwei, dumaji yu sabi wotkain nogudbala ting deibin dum langa mi.
60 Yu sabi detlot enami blanga mi oldei heidimbat mi detmatj en dei olweis wandi dumbat nogudbala ting langa mi.
61 “Yubin irrim olabat tok nogudbalawei blanga mi.
YAWEI, yu sabi ola nogudwan plen olabat meigim blanga ardim mi.
62 Olabat oldei toktokbat blanga mi, en meigimbat plen blanga binijimap mi.
63 Yu luk langa detmob. Nomeda dei jandapbat o jidanbat, olabat meigimbat fan langa mi.
64 “YAWEI, yu panishim olabat blanga ola nogudbala ting deibin dum langa mi.
65 Yu panishim olabat brabliwei en meigim olabat brabli nogudbinji.
66 Yu andimwei olabat en yu binijimap olabat.”
Lagijat na det speshalwan mesinja bin tok.