16
Ola kantri blanga Ifreiyim en Manesa klen
1 Wal ola femili brom Ifreiyim en Manesa klen hubin kamat brom Josef bin gedim sambala kantri. Det boda sauthsaid blanga olabat kantri bin stat langa det Jodan Riba sanraisaid brom detlot spring blanga det taun gulum Jeriko, en brom deya imbin go langa det deset kantri raidap langa det hil kantri deya langa det taun gulum Bethel,
2 en brom deya imbin go langa det taun gulum Las raidap langa det taun gulum Etarotheda weya detlot pipul gulum Akait bin jidan.
3-4 Brom deya det boda bin go sangodanwei langa det kantri weya detlot pipul gulum Jeiflatait bin jidan, en brom deya imbin go langa det dubala taun gulum Lowabetharan en Gisa olawei raidap langa det solwoda gulum Medatareiniyan.
Ola kantri blanga Ifreiyim klen
5 Det boda blanga det kantri blanga ola femili brom det Ifreiyim klen bin go brom det taun gulum Etarotheda sanraiswei langa det taun gulum Apabetharan,
6-8 en brom deya imbin go raidap langa det solwoda gulum Medatareiniyan. Det boda nowathsaid langa olabat kantri bin go brom det taun gulum Tanashailo sangodanwei langa det dubala taun gulum Maikmatha en Tapuwa, en brom deya imbin bulurrum det krik gulum Kana Krik raidap langa det solwoda gulum Medatareiniyan. Det boda sanraisaid langa olabat kantri bin go sauthwei brom det taun gulum Tanashailo raidap langa det thribala taun gulum Janowa, Etaroth en Neira, en brom deya imbin go raidap langa det Jodan Riba gulijap langa det taun gulum Jeriko.
Ola femili brom det Ifreiyim klen bin gedim ol detlot kantri na,
9 en deibin gedim sambala taun weya bin jidan det said langa det boda blanga Manesa klen.
10 Bat detlot pipul brom Ifreiyim klen nomo bin andimwei detlot Keinanait pipul brom det taun gulum Gisa, en olabat stil jidanbat deya tudei garram detlot Ifreiyim pipul. Bat detlot Ifreiyim pipul bin meigim olabat jidan jis laiga prisana en dumbat ola adwek blanga olabat.