33
Jeikob bin midim Isau
1 Bambai na Jeikob bin luk Isau kaminap garram im 400 wekinmen olabat, en wen imbin luk olabat, imbin kadimat ola biginini blanga im langa thribala mob garram olabat ronwan mami.
2-3 Jeikob bin kipgon lida langa olabat, en det dubala najawan waif blanga im bin kaman biyain langa im garram ola biginini blanga dubala. Det brabliwan waif blanga Jeikob neim Liya bin kaman biyain langa olabat garram ola biginini blanga im. En det najawan brabli waif blanga Jeikob neim Reitjul bin kaman laswan garram im lilboi Josef.
Wal Jeikob bin go lida langa ola femili blanga im, en wen imbin kaman gulijap langa im braja, imbin nildan, en sebenbala taim imbin pudum im hed langa graun blanga meigim Isau reken imbin bos oba langa Jeikob.
4 Wal wen Isau bin luk Jeikob, imbin ran langa im, en imbin pudumran im dubala am, en imbin kis langa im, dumaji imbin brabli gudbinji. En det dubala braja gija bin jis kraikrai na.
5 Afta na wen Isau bin lukaran, imbin luk ola biginini en detlot fobala wuman kaminap, en imbin tok, “Main braja, blanga hu dislot pipul olabat?”
En Jeikob bin tok, “Detlot pipul ola biginini weya God bin gibit langa mi.”
6 Wal wen olabat bin kaman gulijap, det dubala waif en ola biginini langa det lidamob bin kaman langa Isau, en deibin nildan langa graun. En Liya en im biginini olabat bin kaman biyain langa olabat, en deibin nildan langa graun du.
7 En laswan na Reitjul en im lilboi Josef bin kaman, en dubala bin nildan langa graun lagijat du.
8 Brom deya Isau bin tok, “Detlot wekinmen garram ola enimul weya aibin midim basdam, ai nomo sabi wotfo yubin jandim olabat lagijat.”
En Jeikob bin tok, “Aibin jandim olabat lagijat blanga meigim yu gudbinji langa mi.”
9 Wal Isau bin tok, “Ai nomo wandim enijing brom yu, baba. Yu kipum. Ai garram naf.”
10 Wal Jeikob bin tok, “Nomo, baba. If yu laigim mi, wal yu garra deigim dislot presen weya aibin gibit langa yu. Main baba, wen aibin luk yubin gudbinji langa mi, aibin gudbinji du. Aibin gudbinji jis laik aibin luk God.
11 “Wal kaman na. Yu deigim dislot presen weya aibin bringimap blanga yu. God bin brabli gudbinji langa mi, en imbin gibit langa mi ebrijing.”
Wal Jeikob bin kipgon tok langa Isau olawei raidap imbin deigim detlot presen.
12 Afta na Isau bin dalim Jeikob, “Wal kaman na. Melabat garra go garram yumob.”
13-14 Bat Jeikob bin tok, “Nomo. Yu go lida langa melabat, en melabat garra kaman biyain slobala, dumaji ola biginini main nokap na, en ola nenigout en ship en kau garram beibi mait dai if ai kipgon trebulin kwikbala garram yu. Melabat kaman biyain slobala. Bambai melabat gajimap yu langa det kantri Idam.”
15 Wal Isau bin tok, “Wal ai libum sambala wekinmen main garram yu blanga album yu.”
En Jeikob bin tok, “Nomo, main braja. Yumob kipgon longes yu gudbinji langa mi. Mi orait.”
16 Brom deya Isau bin gobek raitbek langa im ron kantri Idam.
17 Bat Jeikob bin trikim Isau. Imbin go najawei langa najawan pleis, en deya na imbin meigim haus blanga im femili olabat, en imbin meigim bausheid blanga im buligi en ship en gout olabat. En tudei dei gulum det pleis Sukait.
18 Bambai na Jeikob en im femili olabat bin gowei brom Sakoth, en deibin kipgon raidap deibin kamat langa det kantri gulum Keinan. Deya na Jeikob bin ringimap im tent atsaid langa det taun gulum Shekam,
19 en imbin go langa ola biginini blanga det olmen neim Heima hubin bildimap det taun, en imbin baiyim det pedik weya imbin ringimap im tent blanga bigmob mani. Imbin baiyim blanga 100 silba langa olabat kain mani.
20 Afta na Jeikob bin pailimap ston blanga theingkyu langa God, en imbin gulum neim blanga det ston El Elohei Isreil, dumaji det neim im tok God Blanga Isreil.