48
О Яково бахталисарэл лэ внуконэн
Па варисаво время лэ Иосифости пхэндэ:
— Теро дад насвало.
О Иосифо ля пэса лэ дуен шавэн, лэ Манасияс тай лэ Ефремос. Лэ Яковости пхэндэ:
— Тутэ авиля теро шаво о Иосифо.
О Израилё стидя пэско зор, вазгляпэ тай бэшля по тхан. О Яково пхэндя лэ Иосифости:
— О Дэл Саворэзорэско сыкадилясас манди андо Лузо, пэ пхув Ханаано, тай бахталисардя ман. Вов пхэндя манди: «Мэ терава, со тутэ авэла бут бэятонэн. Мэ терава, со тутар авэна бут народуря, тай дава кадыя пхув пэ ся время терэ бэятонэнди». Кадыла времятар терэ дуй шавэ, савэ аракхадилэ андо Египто жы кай ман на сас катэ, авэна мэрнэ. О Ефремо тай о Манасия авэна мэрнэ, сар о Рувимо тай о Симеоно. Ай э бэяцэ, савэ аракхадёна тутэ инке, авэна терэ. Вонэ лэна тэ акхарэнпэ лэ пхралэндерэ алавэнца и лэна пэстерэ котора андай лэндерэ пхуя. Кала мэ рисайвавас анда Падано, э Рахиль муля пэ мэрни грижа андэ пхув Ханаано, кала амэ самас инке андо дром, найдур лэ Эфратастар. Мэ прахосардэм ла котэ, паша дром андо Эфрата (кода исы о Вифлеемо).
Кала о Израилё додикхля лэ Иосифостерэ шавэн, вов пушля:
— Ко када?
О Иосифо пхэндя пэсти дадэсти:
— Када э шавэ, савэн о Дэл дя манди катэ.
О Израилё пхэндя:
— Подандяр лэн каринг мандэ, соп мэ тэ бахталисарав лэн.
10 Пхуримостар о Израилё вырыто дикхэлас, вов сас сар коро. О Иосифо подындярдя лэ шавэн майпашэ каринг пэско дад, ай кодыва чюмидя тай обля лэн. 11 О Израилё пхэндя лэ Иосифости:
— Мэ и на гындосаравас тэ дикхав тут упалэ, ай о Дэл дя манди тэ дикхав и терэ бэятонэн.
12 О Иосифо одындярдя лэ бэятонэн лэ Израилёстерэ чянгэндар тай тэлиля лэсти тэлэ жы кай э пхув. 13 Тунче о Иосифо стходя лэ Ефремос па чячюни риг пэстар, па лево васт лэ Изралёстар, ай лэ Манасияс па лево риг пэстар, па чячюно васт лэ Израилёстар, тай пашардя лэн каринг пэско дад. 14 Ай о Израилё процырдя чячюно васт тай стхол лэс по шэро лэ Ефремости, вов жэ сас майтэрно, ай о лево васт вов стходя по шэро лэ Манасиясти, вов жэ сас англуно. 15 Тунче вов бахталисардя лэ Иосифос тай пхэндя:
— О Дэл, англа Кастэ пхирэнас мэрнэ дада о Авраамо тай о Исаако,
о Дэл, Саво сас пастухо мэрно ся мэрно жувимос жы кадылэ десэстэ,
16 о Янголо, Саво фирисарэлас ман саворэ вырытимастар,
тэ бахталисарэл кадылэ бэятонэн.
Мэк жал лэндар мэрно алав
тай э алава мэрнэ дадэнди,
лэ Авраамоско тай лэ Исаакоско,
тай мэк авэн лэндэ бут бэяцэ па ся пхув.
17 Кала о Иосифо дикхля, со о дад стходя о чячё васт по шэро лэ Ефремости, кода на чялиля лэсти, тай вов ля лэ дадэско чячё васт, соп тэ стхол лэс пэ лэ Манасияско шэро. 18 О Иосифо пхэндя лэсти:
— Най, дадэ, акэ кадыва — англуно, стхов о чячё васт пэ лэско шэро.
19 Ай о дад на камля тай пхэндя:
— Мэ ганав, мэрно шаво, ганав. И лэстар авэла народо, тай вов авэла ашундо. Ай лэско майтэрно пхрал авэла майбаро лэстар, тай лэстерэ бэятонэндар жана бут народуря.
20 Тай вов бахталисардя лэн андэ кодыва дес тай пхэндя:
— Израильтянуря лэна тэ бахталисарэл екх екхэс тумарэ алавэнца:
«Тэ стерэл тут о Дэл тэ авэс, сар о Ефремо тай о Манасия».
Кадя вов стходя лэ Ефремос англа Манасия.
21 О Израилё пхэндя лэ Иосифости:
— Мэ мэрав. О Дэл авэла тумэнца тай рисарэла тумэн палпалэ пэ пхув тумарэ дадэндери. 22 Мэ дав тути пэ екх котор пхув майбут, сар терэ пхралэндар, плаенго тхан Шэхемо, саво мэ залэм кай э аморея лэ шурянца тай лэ луконэнца.