31
О Яково нашэлтар лэ Лаваностар
1 О Яково ашундя, сар э шавэ лэ Лаваностерэ дэнас дума: «О Яково заля ся, со сас кай амаро дад, стидя пэсти барвалимос катар амаро дад».
2 О Яково ля сама, со о Лавано най кацаво каринг лэстэ, сар сас данглал.
3 О РАЙ пхэндя лэ Яковости:
— Рисав палпалэ пэ тхан, кай аракхадилян, каринг теро родо. Мэ авава туса.
4 О Яково бишалдя тэ пхэнэн ла Рахиляти тай Лияти, собы вонэ тэ авэн пэ мал, кай сас лэстерэ бакрэ и бузнэ.
5 Вов пхэндя лэнди:
— Мэ дикхав, со тумаро дад най кацаво каринг мандэ, сар сас данглал. Ай о Дэл мэрнэ дадэско исы манца.
6 Тумэ ганэн, сар мэ теравас бути важ тумаро дад анда ся мэрно зор,
7 ай тумаро дад хохадя ман, дэшвар парувэлас мэрно потинимос. Ай о Дэл на дя лэсти тэ терэл манди вырыто.
8 Сар кай вов пхэнэнас: «Теро потинимос авэна о крапчято ското», то ся о ското анэнас крапчятонэн, ай сар кай вов пхэнэнас: «Теро потинимос авэна о пёстро ското», то ся о ското анэнас пёстронэн.
9 Акадя о Дэл заля о ското кай тумаро дад тай отдя лэс манди.
10 Екхвар, андэ кодыя время, кала о ското ушаравэл екх екхэс, мэ дикхлэм суно: мэ вазглэм э якха тай додикхлэм, со э бузнэ, савэ ушаравэн лэ бузнян, саслэ пёстри, крапчяти тай пятнисти.
11 О янголо лэ Дэвлэско пхэндя манди андо суно: «Яково». Мэ пхэндэм: «Мэ катэ».
12 Вов пхэндя: «Лэ сама тай дикхэса: саворэ бузнэ, савэ ушарадэ лэ бузнян, — пёстри, крапчяти тай пятнисти. Мэ дикхлэм ся, со терэл о Лавано туса.
13 Мэ сым о Дэл, Саво сыкадиля тути андо Вефилё, кай ту шордян о вулей по бар тай солахаян Манди. Акана ашав майито кадыя пхув тай рисав палпалэ пэ пхув, кай ту аракхадилян».
14 Э Рахиль тай э Лия пхэндэ:
— Исин ли амэндэ инке, саво котор андэ амарэ дадэско хаббэ?
15 Хэба на дичёл, со вов ангичел амэн, сар най пэстерэн? Вов битиндя амэн тай тратисардя ловэ, савэ ля важ амэндэ.
16 Ай сар, ся о барвалимос, саво о Дэл заля амарэ дадэстар, сыно амаро тай амарэ бэятонэнго. Стер кадя, сар пхэнэл тути о Дэл.
17 Тунче о Яково бэшля лэ бэятонэн тай лэ ромнян пэ вэрблюдуря,
18 ля ся пэско мищимос, саво вов стидя андо Падан-Арамо, дарадя ся пэско ското англа пэстэ тай жылятар кай пэско дад Исаако андэ пхув Ханаано.
19 Кала о Лавано жыля тэ стрэжый лэ бакрэн, э Рахиль чёрдя лэстерэ черутнэн дэвлэн.
20 Ай Яково хохадя лэ арамеёс лэ Лаванос, на пхэндя лэсти, кай вов жалтар.
21 Вов нашлятар ся пэстерэ мищимоса, пэрэжыля э лэн тай жыля каринг э плая лэ Галаадости.
О Лавано тай о Яково терэн допхэндимос
22 По трито дес лэ Лаваности пхэндэ, со о Яково нашлятар.
23 Вов ля пэса пэстерэ родонэн, мэкляпэ пала Яково тай по ефтато дес дорэсля лэс катар э Галаадски плая.
24 Андэ кодыя рят о Дэл авиля андо суно каринг о арамеё Лавано тай пхэндя лэсти: «Фирисавпэ, на пхэн нисо лэ Яковости, ни лашо, ни вырыто».
25 О Лавано дорэсля лэ Яковос. О Яково стходя э катуна катар э плая Галаадски, тай о Лавано пэстерэ родоса котэ ж стходэ э катунэ.
26 О Лавано пхэндя лэ Яковости:
— Со ту тердян? Ту хохадян ман тай ундярдян мэрнэ щеян, сар копэльницэн па маримос.
27 Состар ту нашлянтар чёрял? Состар ту на пхэндян манди, кай мэ тэ мэкав тут лошаса тай дилянца, пэ бубно тай пэ арфа?
28 Ту на дян манди тэ чюмидав лэ внуконэн тай лэ щеян. Ту тердян бигындоско.
29 Мандэ исы зор тэ терав тути вырытимос, ай андэ кодыя рят о Дэл терэ дадэско пхэндя манди: «Фирисавпэ, на пхэн нисо лэ Яковости, ни лашо, ни вырыто».
30 Ту жылянтар, пала кода со тути фартэ камэласпэ тэ рисайвэс терэ дадэстэ черэ. Ай состар ту чёрдян мэрнэ дэвлэн?
31 О Яково пхэндя лэ Лаваности:
— Мэ дарайлэм, пала кода гындосарэлас, со ту зорэса одлэса мандар терэ щеян.
32 Сар кай ту аракхэса варикастэ котэ терэ дэвлэн, кодыва на жувэла. Англа терэ родуря родэ екжэно, исы варисо мандэ теро, тай сар исы, тунче залэ кода палпалэ.
О Яково на ганэнас, со э Рахиль чёрдя лэ дэвлэн.
33 Тунче о Лавано зажыля андэ лэ Яковости катуна, андэ ла Лияти катуна тай дуен копэльницатерэ катуна, ай нисо на аракхля. Ла Лиятеря катунатар вов зажыля кай э Рахиль андэ катуна.
34 Ай э Рахиль англа кода ля лэ черутнэ дэвлэн, стходя лэн андэ лэ вэрблюдонэнди зэн тай бэшля пэр лэндэ. О Лавано обродя ся катуна, ай нисо на аракхля.
35 Э Рахиль пхэндя пэсти дадэсти:
— На холяв, мэрно рай, манди нащи тэ ущяв англа тутэ, мандэ кодя, со терэлпэ лэ жувлянца.
Кай вов кати на родя, вов нащи аракхэлас лэ черутнэн дэвлэн.
36 О Яково сас фартэ холяко и ля тэ пхэнэл лэ Лаваности:
— Андэ со мэрни дош? — пушля вов. — Саво бэзэх мэ тердэм, кай ту мэклянпэ пала мандэ тэ астарэс ман?
37 Ту обродян ся мэрно мищимос — со ту аракхлян пэско? Стхов, со аракхлян, англа теро тай мэрно родо, и мэк вонэ амэн сындосарэн.
38 Дуйдэша бэрша мэ жудэм тутэ: терэ бакря тай бузня на шонас пэстар, мэ на халэм бакрэн анда теро гурто.
39 Мэ на анавас тутэ лэ бакрэн, савэн шынэнас о дыко зверо, мэ екжэно шавас палпалэ пала лэндэ анда мэрно гурто. Ту мангэсас мандар потинимо пала ся дош, со сас чёрдо, десэ ли када терэласпэ, чи рятяса.
40 Акадя мэ жувавас: десэ пхабарэлас ман о кхам, ай рятэ пагосарэлас ман о шудримос, тай о совимос нашэлятар мэрнэ якхэндар.
41 Кацавэ сас кодыла дуйдэша бэрша, сар мэ жувавас тутэ андо чер. Мэ теравас бути тути дэшуштар бэрша пала терэ дуй щея тай шов бэрша пала ското, ай ту дэшвар парувэсас мэрно потинимос.
42 Сар бы на авэлас манца мэрнэ дадэско Дэл, о Дэл лэ Авраамоско, Кодыва, Кастар даралас о Исаако, тунче ту отбишалдя б ман палпалэ шушэ вастэнца. Ай о Дэл дикхля мэрни бида тай э пхари бути мэрнэ вастэнди и сыкадя тути рятэ тери дош.
43 О Лавано пхэндя лэ Яковости:
— Кала щея исы мэрнэ щея, э бэяцэ исы мэрнэ бэяцэ, тай э гуртуря исы мэрнэ гуртуря. Ся, со ту дикхэс, ся мэрно. Со жэ мэ акана тэ терав мэрнэ щеянца тай лэ бэятонэнца, савэн вонэ аракхадэ?
44 Терам туса допхэндимос, ту и мэ, тай мэк вов авэла машкара амэндэ.
45 О Яково ля о бар тай стходя лэс ворта.
46 Вов пхэндя пэстерэ родости:
— Стидэн бара.
Вонэ стидэ э бара, стходэ лэн плаёрэса тай бэшлэ паша латэ тэ хан.
47 О Лавано дя алав лэ плаёрэсти Егар-Сахадута, ай о Яково — Гал-Эд.
48 О Лавано пхэндя:
— Мэк кадыва плаёро дикхэл тай ашунэл, со амэ катэ солахас екх екхэсти.
Акэ пала со лэсти динэ алав Гал-Эд.
49 Лэсти инке динэ алав Мицпа, ке вов пхэндя:
— Мэк о РАЙ дикхэл пала тутэ тай пала мандэ, кала амэ аваса дур екх екхэстар.
50 Сар кай ту лэса вырыто пэс тэ андярэс мэрнэ щеянца тай лэса тути аврэ ромнян, тай сар кай амэнца никас на авэла, на бистри, со на мануш, ай о Дэл дикхэл тай ашунэл тут тай ман.
51 Инке о Лавано пхэндя лэ Яковости:
— Акэ о плаёро анда бара, ай о баруно столбо, саво мэ стходэм ворта машкара тутэ тай мандэ.
52 Кала бара тай кадыва столбо дикхэн, со мэ солахав, со мэ на пэрэжава пала кадыва барэнго плаёро пэ тери риг, соп тэ терав тути чёрымос, тай ту на пэрэжаса пала лэндэ пэ мэрни риг, соп тэ терэс манди чёрымос.
53 Мэк о Дэл лэ Авраамоско тай о Дэл лэ Нахороско, лэндерэ дадэско Дэл, тэ авэл сындомари машкара амэндэ.
Ай о Яково солахая Колэса, Кастар даралас лэско дад о Исаако.
54 Вов андя жэртва котэ андэ плаендери пхув тай акхардя пэстерэ родонэн тэ хан. Вонэ халэ тай рятярэн котэ,
55 ай тэсара о Лавано чюмидя пестерэ внуконэн тай лэ щеян, бахталисардя лэн тай рисайля черэ.