3
О Адамо и э Ева терэн о бэзэх
1 О сап сас майфранто саворэ вэшэнго жундимастар, савэн стердя о РАЙ Дэл. Вов пушля кай э жувли:
— Чячес ли пхэндя о Дэл: «На хан ни па саво кашт андо садо»?
2 Э жувли пхэндя лэ сапэсти:
— Амэ хас э плодуря саворэн каштэндар андо садо,
3 но о Дэл пхэндя: «На хан э плодуря па кашт, саво помашкар садо, и на лэнпэ лэндэ, ай со тумэ мэрэна».
4 — Най, тумэ на мэрэна, — пхэндя о сап лэ жувляти.
5 — О Дэл ганэн, со кала тумэ хана лэн, пхэрнадёна тумарэ якха и тумэ ашэна, сар о дэвла, савэ ганэн о лашымос и о вырытимос.
6 Тунче э жувли додикхля, со о плодо лэ каштэско лашо тэ хас и драго тэ дикхэс. О кашт кодыва фартэ чялёлас, пала кода со дэлас годи. Жувли ля екх плодо и халя. Вой дя о плодо лэ ромэсти, саво сас паша латэ, и вов кадя ж лэс похаля.
7 Пхэрнадилэ э якха лэндэ, и вонэ полинэ, со саслэ нангэ. Тунче судэ инжырни листуря, соп тэ гаравэн пэско нангимос.
8 Андо вэчеро, кала ашыля майшудро, пхурдя балвалоры, и вонэ ашундэ, сар о РАЙ Дэл пхирэл па садо. О Адамо и лэсти ромни гарадилэ лэ РАЕСТАР Дэвлэстар машкара кашта андо садо.
9 О РАЙ Дэл акхардя лэ Адамости:
— Кай ту сан?
10 О Адамо пхэндя:
— Мэ ашундэм Тут андо садо и пэрэдарайлэм, пала кода со мэ сым нанго, акэ мэ и гарадилэм.
11 Вов пушля лэстар:
— Ко пхэндя тути, со ту нанго? Ту со, халян э плодуря па кашт, па саво Мэ припхэндэм тути тэ на хас?
12 О Адамо пхэндя:
— Э жувли, савя Ту дян манди, соп вой тэ авэл манца, — када вой дя манди о плодо па кодыва кашт, и мэ похалэм лэс.
13 Тунче РАЙ Дэл пхэндя ла жувляти:
— Со ж ту када тердян?
Э жувли пхэндя:
— Када о сап хохадя ман, и мэ халэм.
14 Тунче о РАЙ Дэл пхэндя лэ сапэсти:
— Пала кода, со ту када тердян, дав амрая тут майбут, сар саворо черэско ското и саворо вэшэско жундимос! Ту авэса тэ пхирэс по йило и тэ хас э чик андэ саворэ терэ деса, скати жувэса.
15 Мэ стхава вырыцыя машкара тутэ и жувли и машкара терэ бэяцэ и лати бэяцэ: вов авэла тэ умарэ тут андо шэро, ай ту авэса тэ дэндалэс лэсти э талпа.
16 Ай лэ жувляти пхэндя:
— Мэ стерава, со теро пхаримос авэла андо грижа: ту анэса бэятонэн андэ дукх. Ту камэса тэ авэс э хулаи лэ ромэсти, ай вов авэла о хулай важ тутэ.
17 Лэ Адамости жэ Вов пхэндя:
— Кадя сар ту канглян теря ромня и похалян о плодо па кашт, пала саво Мэ припхэндэм тути: «На ха лэстар», дав амрая пала тутэ э пхув: андэ пхари бути ту авэса тэ дорэсэс о марно латар андэ ся теро жувимос.
18 Э пхув вибарярэла тути пусавдэ и вырытонэ чяря, ту авэса тэ хас кода, со барёл пэ мал.
19 Андэ пхари бути авэса тэ затерэс пэсти о марно, жы кай на рисавэса андэ чик, анда сави санас лино. Ту сан чик, и андэ чик ту рисайвэса.
20 О Адамо дя алав пэстя ромняти Ева, пала кода со вой ашыля дэй саворэнди, ко жувэл.
21 О РАЙ Дэл стердя лэнди йида андай гаравля и стходя ла по Адамо и пэ лэсти ромни.
22 Тунче о РАЙ Дэл пхэндя:
— О мануш угангля о лашымос тай о вырытимос и ашыля акана, сар екх Амэндар. Нащи, кай вов тэ процырдэл о васт тай тэ шынэл о плодо па кашт лэ жувимоско. Сар вов похала лэс, авэла тэ жувэл и на мэрэла.
23 И о РАЙ Дэл витрадя лэ Адамос анда садо Эдэм, соб вов тэ терэл бути пэ пхув, анда сави сас лино.
24 Сар о РАЙ витрадя лэ манушэс, Вов стходя по тэсараско риг лэ Эдэмостар лэ херувимонэн и бари ягатери шури, сави марэлас андэ саворэ рига, соп тэ фирин о дром каринг о кашт лэ жувимаско.