18
Трин мурша авэн каринг о Авраамо
1 Кала десэ пэкэлас о кхам, ай Авраамо бэшэлас англа пэсти катуна катар о тэрэбинтоско вэшоро Мамрэ, каринг лэстэ авиля о РАЙ.
2 О Авраамо вазгля э якха и додикхля англа пэстэ трин муршэн. Кала вов додикхля лэн, дя тэ прастэл ла катунатар каринг лэндэ и тэлиля лэнди жы каринг э пхув.
3 Вов пхэндя:
— Мэрно хулай, сар кай мэ аракхлэм тынгимос андэ терэ якха, на прожа ман, терэ копэлес.
4 Мэк анэн найбут паи, кай тэ халавэн тумэнди э пэрнэ тай тэ отчиён тэла кадыва кашт.
5 Кала тумэ ужэ авилэ каринг тумаро копэли, мэ анава тумэнди варисо тэ хан. Кала тумэ хана, подритярэна теро зор тай тунче жана пэстерэ дромэса.
— Када фартэ мишто, — пхэндэ вонэ. — Стер кадя, сар пхэнэс.
6 Авраамо грабимаса жыля андэ катуна каринг э Сарра и пхэндя лати:
— Майито, дорэс трин сатэ майлашо яро, загамисар хумэр и пэк биквасно марно.
7 Ай екхжэно прастая каринг о гурто, и витидя лашорэс тэрнорэс гурувурэс тай отдя лэс лэ копэлести, саво йито пригэтосардя лэс.
8 Тунче вов андя тирал, тхуд тай пригэтосардя гурувано мас и стходя англа лэндэ. Кала вонэ ханас, вов тэрдёлас паша лэндэ тэла кашт.
9 — Кай исы тери ромни э Сарра? — пушлэ вонэ.
— Котэ андэ катуна, — пхэндя вов лэнди.
10 Тунче о РАЙ пхэндя:
— Мэ чячес рисайвапэ тутэ пэ авэр бэрш пашай кадыя время, и кай э Сарра, тери ромни, авэла шаво.
Ай э Сарра ашунэлас, тэрдёлас лэстэ пала думо, андэ катуна пашай вудара.
11 О Авраамо тай э Сарра саслэ ужэ пхурэ, андэ бэршэндэ, и кода, со исы кай э жувля, кай э Сарра парашыля.
12 Э Сарра розасаяпэ андэ пэстэ тай гындосардя: «Мэ ужэ спхурилэм, и о хулай мэрно пхуро, мандэ инке авэла кацави лош?»
13 Тунче о РАЙ пхэндя лэ Авраамости:
— Состар э Сарра асал и пхэнэл: «Тай со, мандар, пхуранятар, чячес авэла бэято?»
14 Исин ли варисо, со нащи тэ терэл о РАЙ? Мэ рисайвапэ тутэ пэ авэр бэрш андэ время, сави трэбуй, и кай э Сарра авэла шаво.
15 Э Сарра пэрэдарайля, ашыля тэ отпхэндэпэ тай пхэндя:
— Мэ на асаям.
Ай Вов пхэндя:
— Най, ту асасас.
О Авраамо мангэл лэ Дэвлэс пала форо о Содомо
16 Кала мурша вазглэпэ тай ашылэ тэ жалтар каринг о Содомо, о Авраамо жыля лэнца, тэ проандярэл лэн андо дром.
17 О РАЙ погындосардэм:
— Гаравава ли Мэ лэ Авраамостар кода, со камав тэ терав?
18 Лэ Авраамостар чячес авэла баро тай зорало народо, и черэз лэстэ прилэна бахт саворэ народуря пэ пхув.
19 Мэ жэ витидэм лэс, соп вов тэ припхэндя пэстерэнди бэятонэнди, тэ фирисарэн о дром лэ РАЕСКО тай тэ жувэн пав лашымос тай чячимос. Тунче Мэ, РАЙ, стерава ся, со пхэндэм лэ Авраамости.
20 О РАЙ пхэндя:
— Андэ Содомо тай Гомора ашунэлпэ баро цыпипос, мануша котэ терэн пхаро бэзэх.
21 Тэ жав Мэ тэлэ и тэ подикхав, чячюно ли о цыпимос, саво дожыля жы Мандэ, кадя ли вырыто вонэ терэн. Мэ уганава, када чячимос чи на.
22 Э мурша бандилэ и жылэ каринг о Содомо, ай о Авраамо ашыляпэ тэ тэрдёл англа РАЙ.
23 О Авраамо пашыля каринг Лэстэ тай пхэндя:
— Ту со, умарэса лэ чячюнэс екхтанэ лэ бэзэхэстерэса?
24 Ай со, сар кай андо форо исы панчдэша чячюнэ мануша? Ту со, саекх розмарэса и на потынгоса кодыва тхан важ э панчдэша чячюнэ манушэн?
25 Нащи Ту кацаво тэ стерэс, Ту на хасяйвэса лэ чячюнэс екхтанэ лэ бэзэхэстерэса, тэ на авэла лэ чячюнэса кода ж, со лэ бэзэхэстерэса. Нащи Ту кадя тэ стерэс! Хэба о Сындомари савора люмако стерэла найчячимос?
26 О РАЙ пхэндя:
— Сар кай Мэ аракхава андо Содомо панчдэша чячюнэн манушэн, то важ лэндэ Мэ потынгоя ся кода тхан.
27 Тунче о Авраамо инке пхэндя:
— Акэ мэ сым пош пхуятар тай ватрако, ай саекх найдараса лэм тэ дав дума Туса, мэрно Хулай.
28 Ай со, сар каринг э панчдэша чячюнэн на хутилэла панч мануш? Розмарэса ли Ту ся о форо пала кода, со на хутилэл панч мануша?
— Сар кай Мэ аракхава котэ штардэша панч чячюнэ мануша, — пхэндя Вов, — тунче на розмарава лэс.
29 О Авраамо инке екхвар пушля Лэстар:
— Ай со, сар котэ авэна кати штардэша?
Вов пхэндя:
— И пала э штардэша Мэ на стерава кода.
30 Тунче Авраамо пхэндя:
— Мэк на холяйвэл о Хулай, ай дэл манди тэ пхэнав. Ай со сар котэ авэна кати триндэша?
Вов пхэндя:
— Мэ на стерава кода, сар аракхава котэ триндэша.
31 Авраамо пхэндя:
— Акэ, мэ сымас кацаво састо, со камав тэ пхэнав лэ Хулаести. Ай со сар котэ авэна кати дуйдэша?
О РАЙ пхэндя:
— И пала э дуйдэша Мэ на розмарава лэс.
32 Тунче Авраамо пхэндя:
— Мэк на холяйвэл о Хулай, ай дэ манди тэ пхэнав инке кати екхвар. Ай со сар кай котэ авэна кати дэш?
Вов пхэндя:
— И пала э дэш Мэ на розмарава лэс.
33 Кала о РАЙ парашыля тэ дэл дума лэ Авраамоса, Вов жылятар, ай о Авраамо рисайля черэ.