37
Иософохкирэ сунэ
1 Иаково джювэлас дэ кодэя пхув, тев джюда лэхкиро дад, дэ пхув Ханаано.
2 Акэ роспхэндимо пала Иаково тай пала лэхкирэн чяворэн.
Иосифо, савэсти сля душуефта бэрш, чяравэлас гуртуря бакрэн екхтханэ пэхкирэнца пхралэнца — Валлатирэнца тай Зелфатирэнца чявэнца. Иософо роспхэнэлас дадэсти врытимо пала пхралэн.
3 Израилё камэлас Иосифо будэр всаворэн аврэн чявэн, пала када со вов сля бэяндо лэсти дэ пхурима. Вов кадиж стерда важ лэсти барвали шукар їда.
4 Кала пхрала удыкхле, со дад камэл лэ будэр, сар аврэн, вонэ камле лэсти врытимо тай на дэдумане лэґа лачимаґа.
5 Екхфар Иосифо дыкхля суно. Вов роспхэнда пала лэ пхралэнди, тай вонэ закамле лэсти врытимо инте будэр.
6 Акэ со вов пхэнда лэнди:
— Пошунэнти, саво манди авиля суно.
7 Амэ пхандэґас снопуря дэ маля, тай муро снопо подлиляпэ тай састиля, ай тумарэ снопуря ачиле всаворэ ригэндар тай тэлиле.
8 Пхрала пхэндэ лэсти:
— Чи на тхагареґа ту авэґа амэндэ? Чи амэ аваґа тут тэ кандэ?
Тай вонэ камэнас лэсти врытимо инте будэр пала лэхкиро суно тай пала кадэва роспхэндимо.
9 Иосифости авиля инте екх суно, тай вов упалэ роспхэнда пала лэ пхралэнди:
— Пошунэнти, манди авиля инте екх суно: пэ кадэва моло манди тэлиле кхам, чён тай дэшуекх чергэня.
10 Вов роспхэнда суно на кацик пхралэнди, ай и дадэсти, тай дад выпхэнда лэсти:
— Со када за суно тутэ авиля? Со када, мэ, дэй тири тай пхрала тирэ чяче аваґа тай тэлюваґа тути ды пхув?
11 Пхрала холявэнас пэ лэстэ, ай дад зарипирда кадэя дума.
Пхрала битинэн Иосифо
12 Пхрала уджиле тэ чяравэ дадэхкирэ гуртуря пашэ Шэхемо,
13 тай Израилё пхэнда Иосифости:
— Ту джянэх, со тирэ пхрала чяравэн гуртуря пашэ Шэхемо. Мэ камав тэ бичялэ тут лэндэ.
— Мэ джява, — пхэнда Иосифо.
14 Дад пхэнда лэсти:
— Джя, подыкх, вса мишто тирэнца пхралэнца тай гуртонэнца. Тунчи авэґа и пхэнэґа манди.
Вов када прэпхэнда дэ Хевронохкири маля, тай Иосифо джиля дэ Шэхемо.
15 Котэ вов родэлас лэн дэ мален, покы екх мануш дыкхляпэ лэґа тай пхучля лэстар:
— Со родэх ту?
16 Вов пхэнда:
— Мэ родав мурэн пхралэн. Мангав тут, пхэн манди, тев вонэ чяравэн пэхкирэ гуртуря?
17 — Вонэ уджиле катар, — пхэнда кодэва мануш. — Мэ шундом, сар вонэ пхэнэнас: «Джяґа дэ Дотано».
Иосифо джиля пала пхралэн тай аракхля лэн Дотаностэ.
18 Вонэ удыкхле лэ дурал тай дыкалэ, сар вов тэ поджял лэндэ, допхэндэпэ тэ умарэ лэ.
19 — Акэ джял кадэва, ко дыкхэл сунэ! — пхэндэ вонэ екх екхэсти.
20 — Умараґа лэ тай чюваґа лэ дэ шуко ханинг, ай дадэсти пхэнаґа, со лэ схаля дыко зверё. Тунчи подыкхаґа, со выджяла лэхкирэ сунэндар.
21 Нэ Рувимо ушунда тай фирисарда лэ лэндар. Вов пхэнда:
— Нат, на аваґа лэ тэ умарэ.
22 Вов допхэнда:
— На прочювэн рат. Чюваґа лэ дэ кадэва ханинг катэ, дэ шуки пхув, кацик на ваздэн пэ лэстэ васт.
Рувимо камля тэ фирисарэ лэ лэндар тай тэ рисявэл вов дадэстэ.
23 Кала Иосифо поджиля пхралэндэ, вонэ счиндэ лэстар їда, кодэя барвали шукарни їда, со сля пэ лэстэ,
24 тай чютэ лэ дэ ханинг. Ханинг сля шушо, би панехкиро.
25 Вонэ бэшле тэ ха тай удыкхле: измаильтянуря джян Галаадостар. Лэндирэ верблюдуря сле зачютэ пхаримаґа спецыенца, бальзамоґа тай мираґа, савэ вонэ лиджянас дэ Египто.
26 Иуда пхэнда пхралэнди:
— Со амэнди колэстар, сар амэ умараґа амарэ пхралэ тай сгараваґа када?
27 Фэдэр битинаґа лэ измаильтянэнди тай на аваґа тэ ваздэ пэ лэстэ васт. Вов жэ амаро пхрал, амаро рат, амэ екхэ масэстар.
Пхрала кангле лэ.
28 Кала битинимаря Мидьяностар проджянас пашэ, пхрала доросле Иосифо ханингатар тай битиндэ измаильтянонэнди пала биш рупунэ шэкиля. Измаильтянуря лиле лэ дэ Египто.
29 Кала Рувимо рисиля ханингатэ, вов удыкхля, со Иосифо котэ нинай, тай росчинда пэхкири їда.
30 Вов рисиля пхралэндэ тай пхэнда:
— Чяворэ котэ нинай! Тев манди кана тэ джя?
31 Тунчи вонэ лиле їда Иосифохкири, зачиндэ бузнэ тай вымакхле їда дэ рат.
32 Котар вонэ отлиджялдэ барвали шукарни їда дадэсти тай пхэндэ:
— Акэ со амэ аракхле. Подыкх, када їда на тирэ чявэхкири?
33 Вов уджянгля ла тай затиписиля:
— Када їда мурэ чявэхкири! Лэ схаля дыко зверё! Чяче, Иосифо сля розчиндо пэ котора!
34 Иаково розчинда їда пэ пэстэ, обпхангля кущик їдаґа, сави гонэндар, тай бут дивэ ровэлас пала чявэ.
35 Всаворэ лэхкирэ чявэ тай чея авиле тэ анэ пачя лэсти, ай вов отпхэнэласпэ пачятар, пхэнэлас:
— Нат, мэ кади глабатар джява дэ мулэндири люмля, мурэстэ чявэстэ!
Кади дад ровэлас пала пэхкиро чяво.
36 Ай мидьянитянуря кодэя врямаґа битиндэ Иосифо дэ Египто Потифарости, саво сля фараоностэ барэдэра пэ халавдэ.