35
Иаково рисявэл дэ Вефилё
1 Дэвэл пхэнда Иаковости:
— Ваздэпэ тай джя дэ Вефилё, джюв котэ тай стер котэ жэртвеннико Дэвлэсти, Саво сикавдапэ тути, кала ту нашлян тирэстар пхралэстар Исавостар.
2 Иаково пхэнда пэхкирэнди цэрутнэнди тай всаворэнди, ко сля лэґа:
— Вычювэн аврэн дэвлэн, савэ тумэндэ пэґа, выжужарэнпэ тай парувэн пэхкири їда.
3 Тунчи стидэнпэ дэ дром, тай амэ джяґа дэ Вефилё, тев мэ стерава жэртвеннико Дэвлэсти, Саво дэня манди зор, кала мандэ сля глаба, и сля манца, тев бы мэ тэ на джяв.
4 Вонэ отдэне Иаковости всаворэн аврэн дэвлэн, савэ сле лэндэ, тай ченя канэндар, тай Иаково заґанавда лэн тала дубо дэ Шэхемо.
5 Тунчи вонэ джиле дэ дром, тай дар Дэвлэстар сля пэ всаворэ форуря, савэ сле пашэ лэн, кади со нико на нашэлас пала Иаковохкирэн чяворэн.
6 Иаково тай всаворэ, ко сля лэґа, авиле дэ Лузо (када исин Вефилё) дэ Ханаанско пхув.
7 Котэ вов стерда жэртвеннико тай акхарда кодэва тхан «Эл Бет-Эл», пала када со котэ Дэвэл оттердапэ лэсти, кала вов нашля пэхкирэстар пхралэстар.
8 Девора, сави выправарда Ревека, муля, тай сля гаравди тала дубо пашэ Вефилёстар. Пала када вов сля акхардо «Аллон Бахут».
9 Кала Иаково рисиля Паддано-Арамостар, Дэвэл упалэ сикавдапэ лэсти тай бахталисарда лэ.
10 Дэвэл пхэнда лэсти:
— Тиро лав Иаково, нэ екхатар ту на авэґа тэ акхарэпэ Иаковоґа. Лав тиро авэла «Израилё».
Кади Вов акхарда лэ Израилё.
11 Дэвэл пхэнда лэсти:
— Мэ — Дэвэл Всазорако. Терэн чяворэн, тай мэк тумэн авэла бут. Народо тай бут народуря, тхагаря джяна тутар.
12 Пхув, сави Мэ дэнём Авраамости тай Исаакости, Мэ отдава тути тай тирэнди чяворэнди.
13 Тунчи Дэвэл ваздэняпэ лэстар.
14 Иаково тховда баруно столбо пэ кова тхан, тев Дэвэл дэдуманя лэґа, тай чюта пэ лэстэ мол тай дзэто.
15 Иаково акхарда тхан, тев Дэвэл дэдуманя лэґа, Вефилё.
Мэримо Рахилятиро
16 Вонэ ачявдэ Вефилё тай сле надур Эфрататар, кала Рахиль ачиля тэ бэянэ, тай сля лати фартэ пхаро.
17 Вой фартэ пхаро сля тэ бэянэ чяворэ, тай джювли, сави дэлас лати зор дэ када пхэнда лати:
— На дар, тутэ авэла инте екх чяво.
18 Кала Рахиль мэрэлас, вой акхарда чявэ Бен-Они, нэ дад акхарда лэ Вениамино.
19 Рахиль муля тай сля гаравди, пэ дром, сар тэ джя дэ Эфрата (када и исин Вифлеемо).
20 Упрал, тев вой сля гаравди, Иаково тховда баруно столбо; кодэва бар ачел котэ и авдивэ.
21 Израилё джялас дурэдэр тай тховда катуна пала Мигдало-Эдеро.
Иаковохкирэ чявэ
22 Кала Израилё джювэлас дэ кодэя пхув, Рувимо сута пэхкирэ дадэхкиря наложницаґа Валлаґа, тай Израилё уджянгля пала када.
Иаковостэ сля дэшудуй чявэн:
23 Лиятар: Рувимо (Иаковохкиро барэдэр чяво), Симеоно, Левиё, Иуда, Иссахаро тай Завулоно.
24 Рахилятар: Иосифо тай Вениамино.
25 Рахилятирятар копыльницатар Валлатар: Дано тай Неффалимо.
26 Лиятирятар копыльницатар Зелфатар: Гадо тай Асиро.
Акэ чявэ Иаковохкирэ, савэ бэяндэпэ лэстэ дэ Паддано-Арамо.
Мэримо Исаакохкиро
27 Иаково авиля пэхкирэ дадэстэ Исаакостэ дэ Мамре, када пашэ Кирьят-Арбаґа (када и исин Хевроноґа), тев калась джюдэ Авраамо тай Исаако.
28 Всаворо джювимо Исаакохкиро сля 180 бэрша.
29 Исаако муля дэ баря пхурима, пхуро тай чяло джювимаґа, тай отджиля пэхкорэндэ дадэндэ. Лэхкирэ чявэ Исаво тай Иаково гаравдэ лэ.