27
Иаково лэл дадэхкиро бахталисаримо
1 Кала Исаако ачиля пурано тай лэхкирэ якха хасардэ зор, вов акхарда Исаво, пэхкирэ пхурэдэрэ чявэ, тай пхэнда лэсти:
— Чяво муро!
— Мэ катэ, — пхэнэл Исаво.
2 Исаако пхэнда:
— Мэ пхуро, тай на джянав мэ диво, кала мэрава.
3 Лэ тиро колчяно тай луко, джя дэ маля тай дорос манди дыко мас.
4 Тав манди камлимахкиро хамо муро тай ан манди тэ ха, соб мэ бахталисардом тут англа муро мэримо.
5 Ревека шунда, сар Исаако дэдуманя пэхкирэґа чявэґа Исавоґа, тай кала Исаво уджиля дэ маля, соб тэ умарэ тай тэ анэ дыко мас,
6 Ревека пхэнда пэхкирэсти чявэсти Иаковости:
— Мэ шундом, сар тиро дад пхэнда тирэсти пхралэсти Исавости:
7 «Ан дыко мас тай тав лачё хамо, соб мэ бахталисардом тут англа РАЙ, покы на мулём».
8 Шун ман мишто кана, чяво муро, тай тер, сар мэ пхэнава тути.
9 Джя гуртостэ тай ан манди дуен лачен бузнорэн, соб манди тэ тавэ лачё хамо важ тиро дад, кацаво хамо, сар лэсти чялёл.
10 Тунчи отлиджя лэ дадэсти, вов хала тай бахталисарэла тут, покы на муля.
11 Иаково пхэнда Ревекати, пэхкиряти дати:
— Нэ муро пхрал Исаво всаворо дэ балэн, ай мандэ морци жужи.
12 Со, сар дад лэлапэ мандэ? Мэ авава англа лэстэ хохавимари, тай вов сигидэр дэла ман мрая, ай на бахталисарэла.
13 Дэй пхэнда лэсти:
— Мрая мэк авэла пэ мандэ, чяво муро, ай ту тер, сар мэ пхэнав: джя тай ан бузнорэн.
14 Вов джиля, лиля бузнорэн тай анда лэн дати, тай вой тавда лачё хамо, кацаво, сар чялёл лэхкирэсти дадэсти.
15 Тунчи Ревека лиля фэдэдэр їда Исавохкири, пэхкирэ пхурэдэрэ чявэхкири, сави сля латэ дэ цэр, тай урявда пэ цыкнэдэр чявэ Иаково,
16 ай лэхкирэ васта тай жужи кор ушаравда бузнорэхкиряґа морцяґа.
17 Тунчи вой дэня пэхкирэсти чявэсти Иаковости лачё хамо тай мандро, савэ тавда.
18 Вов авиля дадэстэ тай пхэнда:
— Муро дад.
— Акэ мэ, — пхэнда кодэва. — Ту саво мурэндар чявэндар?
19 Иаково пхэнда дадэсти:
— Мэ — Исаво, тиро барэдэр чяво. Мэ тердом, сар ту пхэндан. Мангав, ваздэпэ, бэш тай ха муро хамо, соб тунчи ту тэ бахталисарэх ман.
20 Исаако пхучля Иаковостар:
— Сар ту кади сиго аракхлян ла, муро чяво?
— РАЙ, тиро Дэвэл, дэня манди бахт, — пхэнда кодэва.
21 Исаако пхэнда Иаковости:
— Поджя пашэдэр, соб манди тэ лэпэ тутэ, муро чяво, чяче ту муро чяво Исаво чи нат.
22 Иаково поджиля пашэдэр пэхкирэстэ дадэстэ Исаакостэ, саво лиляпэ лэстэ тай пхэнда:
— Гласо — сар гласо Иаковохкиро, ай васта — сар васта Исавохкирэ.
23 Вов на уджянгля лэ, пала када со васта лэстэ слэ дэ балэн, сар Исавостэ, и вов бахталисарда лэ.
24 — Чяче ту муро чяво Исаво? — пхучля Исаако, тай вов пхэнда лэсти:
— Нэ, када мэ.
25 Исаако пхэнда:
— Чяво муро, подлиджя манди тиро дыко мас пашэдэр, тай мэ хава, ай тунчи бахталисарава тут.
Иаково дэня лэсти хамо, тай вов халя, анда мол, тай вов пиля.
26 Тунчи лэхкиро дад Исаако пхэнда лэсти:
— Подджя, чяво муро, тай чюминдэ ман.
27 Вов поджиля тай чюминда лэ. Исаако ушунда фано лэхкиря їдатиро тай бахталисарда лэ:
— Када фано мурэ чявэхкиро,
сар малятиро фано,
сави бахталисарда РАЙ.
28 Мэк Дэвэл дэла тути болыбнахкирятар росынатар
тай барвалиматар пхуятирятар,
бут ворзо тай тэрно мол.
29 Тэ терэн пэ тутэ породы,
тай тэлён тути народуря.
Раеґа ав тирэнди пхралэнди,
тай тэ тэлён англа тутэ чявэ тиря датирэ.
Тэ авэл дэно мрая кодэва, ко дэл тут мрая,
ай ко бахталисарэл тут, тэ авэл бахталисардо.
30 Кацик Исаако пэрэачиля тэ бахталисаримо, тай кацик Иаково выджиля дадэстар, сар авиля лэхкиро пхрал Исаво астариматар.
31 Вов кадиж тавда лачё хамо тай анда дадэсти. Вов пхэнда лэсти:
— Дадэ, ваздэпэ, бэш тай ха муро хамо, ай тунчи бахталисар ман.
32 Лэхкиро дад Исаако пхучля:
— Ко ту?
— Мэ тиро чяво, — пхэнда вов, — тиро барэдэр, Исаво.
33 Исаако всаворо тэ затинисиля тай пхэнда:
— Ко сля кодэва авэр, саво анда дыко мас манди? Мэ халём лэ англа кода, сар ту тэ авэх тай бахталисардом лэ. Вов кана авэла бахталисардо!
34 Кала Исаво ушунда дадэхкирэ лава, вов зоралэ тай кырко затиписиля тай пхэнда дадэсти:
— Бахталисар кадиж и ман, дадэ!
35 Нэ кодэва пхэнда:
— Тиро пхрал авиля хрантимаґа тай отлиля тутар бахталисаримо.
36 Исаво пхэнда:
— Чячимаґа, лэ и акхарэн Иаковоґа? Дувар вов обджиля ман: лиля муро барэдэримо, а кана муро бахталисаримо!
Тай пхучля:
— На ачиляпэ тут э бахталисаримо и важ манди?
37 Исаако пхэнэл Исавости:
— Мэ тердом лэ хулаеґа понад тутэ, тай всаворо лэхкиро родо отдэнём лэсти дэ копылен, бахталисардом лэ мандрэґа тай дэнём лэсти тэрно мол. Со жэ кана тэ тере важ тути, муро чяво?
38 Исаво пхэнда дадэсти:
— Тутэ со, кацик екх бахталисаримо, дадэ? Бахталисар и ман, дад муро!
Тай фартэ зоралэ заровиня.
39 Дад лэхкиро Исаако пхэнда лэсти:
— Тиро джювимо авэла дур барвалиматар,
сави дэл пхув,
дур болыбнастирятар росынатар,
сави упрэ.
40 Ту авэґа тэ джювэ баря чюрятар
тай авэґа тэ терэ бути пэ тиро пхрал.
Нэ авэла вряма,
кала ту ваздэґапэ
тай счювэґа пэхкирятар коратар лэхкиро ґамо.
Иаково нашэл дэ Харано Лаваностэ
41 Исаво рицарэлас холи пэ Иаково пала бахталисаримо, саво дэня лэсти дад, тай пхэнда пэсти: «Сиго дад мэрэла, тай проджяна ровимахкирэ дивэ пала муро дад. Тунчи мэ умарава мурэ пхралэ Иаково».
42 Ревекати пэрэдэне, со пхэнда пхурэдэр чяво Исаво, тай вой бичялда пала цыкнэдэр чяво, пала Иаково, тай пхэнда лэсти:
— Тиро пхрал Исаво думисарэл тэ умарэ тут.
43 Муро чяво, стер, сар мэ пхэнава: екхатар жэ прастэ дэ Харано мурэстэ пхралэстэ Лаваностэ.
44 Джюв лэстэ савись вряма, покы на уджяла холи тирэстэ пхралэстэ.
45 Кала жэ холи тирэ пхралэстэ проджяла тай вов бистарэла кода, со ту тердан лэсти, тунчи мэ бичялава тэ пхэнэ тути, со авиля вряма тэ рисявэ тути. Пэ со манди тэ хасарэ тумэн дуен дэ екх диво?
46 Тунчи Ревека пхэнда Исаакости:
— Мэ на лошали джювимати пала кадэла хеттейсконэн чеен. Сар и Иаково лэла пэсти дэ ромнен джювля калатар пхуятар, кацавя акэ хеттеянка, сар кадэла, тунчи пала со манди тэ джювэ?