Англунимо люмлятиро
1
Дэвэл терэл люмля
1 Май англэ Дэвэл стерда болыбэн тай пхув.
2 Пхув сля бинисохкири тай шущи, калимо сля упрэ барэн панен, тай Фано Дэвлэхкиро урялас упрал панэстар.
3 Дэвэл пхэнда:
— Мэк авэла душлимо.
Тай стердапэ душлимо.
4 Дэвэл удыкхля, со душлимо сля мишто, тай вылиля лэ калиматар.
5 Дэвэл акхарда душлимо «диво», а калимо — «рат». Сля бельвель, тай сля дэнзор — пэрво диво.
6 Тай пхэнда Дэвэл:
— Мэк авэла сводо помашкар панэстэ, соб тэ отлэ пани панестар.
7 Дэвэл стерда сводо тай отлиля пани тала сводо панестар, саво сля понад лэ. Тай ачиля кади.
8 Дэвэл акхарда сводо «болыбэн». Сля бельвель, тай сля дэнзор — дуйто диво.
9 Дэвэл пхэнда:
— Пани тала болыбэн мэк стидэлпэ екхтханэ, тай мэк стерэлапэ суша.
Тай ачиля кади.
10 Дэвэл акхарда суша «пхув», а пани, саво стидыняпэ екхтханэ, — «море». Тай удыкхля Дэвэл, со када мишто.
11 — Мэк барярэл пхув всаворэ чяря: чяря, савэ анэн самбуря, тай бут породы ранден пэ пхув, савэ анэн плодуря кокаленца, — пхэнда Дэвэл.
Тай ачиля кади.
12 Пхув барярда бут породы чярен: чяря, дэ савэн исин самбуря, тай бут породы ранден, савэ анэн плодуря кокалицэнца.Тай удыкхля Дэвэл, со када мишто.
13 Сля бельвель, тай сля дэнзор — трито диво.
14 Тай пхэнда Дэвэл:
— Мэк авэна яга пэ болыбнахкиро сводо, соб отлэ диво ратятар. Мэк вонэ авэна знаконэнца, соб тэ сикавэн вряма, дивэ тай бэрша.
15 Тай мэк вонэ тэ дэн яг пэ болыбнахкиро сводо, соб тэ душол пхув.
Тай ачиля кади.
16 Дэвэл стерда дуй барэ яга: бари яг, соб тэ авэл хулаеґа дивэсэґа, тай цыкныдэр яг, соб тэ авэл хулаеґа ратяґа, а кади ж Вов стерда черґэня.
17 Дэвэл тховда лэн пэ болыбнахкиро сводо, соб вонэ тэ дэн душлимо пэ пхув,
18 тэ авэн хулаенца дивэсэґа тай ратяґа и тэ отлэн душлимо калиматар. Тай удыкхля Дэвэл, со када мишто.
19 Сля бельвель, тай сля дэнзор — штарто диво.
20 Дэвэл пхэнда:
— Мэк пхэрдёла пани джювимаґа, тай мэк урян понад пхув дэ сводо болыбэн чирикля.
21 Дэвэл стерда барэн морендирэн жывотнонэн и бут породы джювима, савэ тирёнас дэ пани, тай бут породы чириклен пхакэнца. Тай удыкхля Дэвэл, со када мишто.
22 Дэвэл бахталисарда лэн тай пхэнда:
— Мэк тумэндэ авэна чяворэ тай мэк лэн авэла бут, пхэрдён пани дэ море. Тай мэк чириклен авэла будэр пэ пхув.
23 Сля бельвель, тай сля дэнзор — панчто диво.
24 И пхэнда Дэвэл:
— Мэк барярэл пхув бут породы джювима: бут породы барэн тай цыкнэн жывотнонэн.
Тай ачиля кади.
25 Дэвэл стерда бут породы жывотнонэн, барэн тай цыкнэн зверен пэ пхув. Тай удыкхля Дэвэл, со када мишто.
26 Тунчи Дэвэл пхэнда:
— Стераґа манушэ, Амаро образо, и тэ авэл вов поджило пэ Амэн. Мэк вов тэ авэл хулай понад морендирэн мачен, и чириклен, савэ дэ болыбэн, понад хулаимо, понад всавори пхув тай понад всаворэн жывотнонэн, савэ пхирэн пав пхув.
27 Кади Дэвэл стерда манушэ пав образо Пэхкиро, пав образо Дэвлэхкоро Вов стерда лэ, муршэґа тай джювляґа Вов стерда лэн.
28 Дэвэл бахталисарда лэн и пхэнда:
— Мэк тумэндэ авэна чяворэ тай мэк лэн авэла бут. Пхэрдён пхув и заачявэн ла тэ тирэ бути важ тумэн. Авэн хулаенца понад мачен, савэ дэ морё, и чириклен, савэ дэ болыбэн, тай понад всаворя джювима, сави пхирэл пав пхув.
29 Тунчи Дэвэл пхэнда:
— Мэ дав тумэнди всаворэ чяря самбуренца пав всавори пхув тай всаворэ рандя, савэ дэн плодуря кокалицэнца. Вонэ авэна тумэнди хамаґа .
30 Тай всаворэнди джювима пав пхув, и всаворэнди чирикленди дэ болыбэн, тай всаворэнди жывотнонэн, савэ пхирэн пав пхув, — всаворэнди, дэ кастэ пхурдэл джювимо, Мэ дав дэ хама всавори зэлэнь.
Тай ачиля кади.
31 Дэвэл подыкхля пэ вса, со Вов стерда, тай вса сля фартэ мишто. Сля бельвель, тай сля дэнзор — шовто диво.