49
О Яков алгыштиел пэ чявэн
1 О Яков диняс икос пэ чявэн тай пхэнляс:
— Кидэнтумэн агорял, тай мэ кан пхэнав, со кан овэл тумэнца андэ деса, кай авэн.
2 Кидэнтумэн тай шунэн, о чявэ э Яковески, шунэн тумарэ дадэс э Израилес!
3 Рувим, ту — мо баштутно, ми зор,
о баштутно имишы мэ муршыканэ зорако;
ов алаендар зорало тай лэс алаи гинэн.
4 Ай, сар пани, тут нащи тэрдярэс.
Акана ту на кан овэс баштутно,
вай ту пашлилян опэр тхан тэ дадэско
тай гарамладын мо тхан.
5 О Симеон тай о Левий — пхрала,
лэнги камадэс керэн хурлуки.
6 Мэ на кан овав андэ лэнги дилэндэ,
мэ на кан овав лэнца екх,
вай он холясаилэ тай мударэнас э муршэн,
манглэ тай чиндэ э гурувэн.
7 Дини арман лэнги холи, вай джюнгали,
тай о канлылыки, вай бут баро!
Мэ кан чяв лэн машкарэ ко пуя ки Яковески
тай кан дурярав лэн андэ Израиль.
8 Иуда, тэ пхрала кан махтадиен тут,
то васт кан овэл опэр мэн тэ душманенги,
о чявэ тэ дадэски кан бангён туки.
9 Ту — тэрно леви, Иуда;
ту авэс хамаса, мо чяво.
Сар леви, ов пэрэл ки пху тай пашлёл,
сар львица — кон кан мангел лэс тэ астарэл?
10 О скипетр на кан ачявэл э Иудас,
тай о пуя лэски екхараи кан астарэн э ровли э патишаенги,
бискай на кан авэл о Шыло,
Кас кан тхэн кан о дюнядэс.
11 Ов кан пхандэл пэ джёрэс ки дракхаки лазас,
пэ джёрорэс — ки зиядэ ветка.
Ов кан халярэл пэ савутя андэ винастэ,
о уряипэ пинро — андэ рат ки дракхако.
12 О якха лэски — калэ катар винас,
о данда лэски — катар сути парнэ.
13 О Завулон кан бэшэл паш ки моря
тай лэстэ кан авэн караблядэс;
лэски четя кан сидэнпэс джи ко Сидон.
14 О Иссахар — зорало джёро,
пашло машкарэ ко пхарэ гонэ.
15 Ов дикхляс, со лачё лэско тхан э рагатеско
тай со лачи лэски пху;
ов кан бангярэл пэ пхике тал пхарипэ
тай кан керэл бути сар иргати.
16 О Дан диндёл тэ керэл цындос пэ дюняски
сар екх андар порода ки Израилески.
17 О Дан кан овэл э сапэнги паш ко дром,
гадюка ки ливади,
сави дандэлэл э грастэс чянгатар,
тай о атлыс пэрэл тэлэ.
18 О Сагбус о Яхвэ, Тутэ родав мэ кутардипэ!
19 Опэр Гад кан пэрэн чёра,
ай ов кан пэрэл опэр лэндэ палэ
тай кан кувдиел.
20 О хапэ э Асиреско кан овэл бут;
ов кан анэл патишайлытико хапэ.
21 О Неффалим — мукли лани,
сави анэл шукарэ пуен.
22 О Иосиф — имишэнго дракхако кущёки,
имишэнго кущёки паш ко пани,
савэски веткес ваздэнпэс опэр стинас.
23 Холинаса пэрэнас опэр лэстэ
тай мукенас андэ лэстэ стриладэс.
24 Ай о луки лэско ачило зорало,
э зор лэски вастэнги — о зорало Дэл э Яковеско,
о нав э Чёбанеско тай о Бар э Израилеско.
25 Ов — о Дэл тэ дадэско,
Саво кан керэл туки ярдыми.
Ов — о Дэл Баро-Зорало,
Саво кан алгыштиел тут.
Ов кан дэл тут алгыштима э булутенго опрал,
тай безднако тэлал,
тай алгыштима э дэенго,
савэ хавдярэн э пуен.
26 О алгыштима тэ дадэско зиядэ,
ниш алгыштима э пуранэ горадэнго,
ниш алгыштима э пуранэ ливаденго.
Мэ овэн он алаи опэр шэро ки Иосифеско,
опэр чикат ки тхэдэ князеско машкарэ пэ пхралэндэ.
27 О Вениамин — джюнгало рув;
сабахтан ов хал со астардяс,
бэлвэле палящиел, со чёрдэ.
28 Аки касавке си дэшудуй породэс э Израилески. Аки со пхэнляс лэнги о дад, кана алгыштиелас лэн; кажнес ов диняс лэнго алгыштима.
О мэрипэ тай о парома э Яковеско
29 О Яков пхэнляс лэнги:
— Мэ джяв мэ дадэндэ. Пароскерэн ман мэ дадэнца андэ пищера ки ливади ки хетеески ки Эфронески,
30 андэ пищера ки ливади Махпела паш ко Мамрэ андэ Ханаан, сави о Авраам киндяс ко хетеи ко Эфрон сар паромаско тхан.
31 Отхэ сас пароскердэ о Авраам тай лэски ромни э Сарра, отхэ сас пароскердэ о Исаак тай лэски ромни э Рэвэка, тай отхэ мэ пароскердём э Лия.
32 Э ливади тай э пищера сас киндэ ко хетея.
33 О Яков бытэрды тэ пхэнэл пэ чявэнги, ваздиняс пэ пинрэ опэр тхан, мукляс по тынышы тай гело пэ дадэндэ.