O Žalmos 54
1 Oleske, ko ľidžal o bašaviben pro strunengro nastrojis. O maskil le Davidoskro,
2 so pisinďa, sar avle o Zifančana a phende le Sauloske: „O David pes garuvel ke amende.“
3 Zachraňin man, Devla, tire naveha
a sikav tira zoraha, hoj som čačipnaskro.
4 Šun miro mangipen, Devla!
Prithov o kan paš o lava mire mujeskre!
5 Avle pre ma o cudzinci;
kamen man te murdarel o bijileskre murša,
so na den pačiv le Devles.
6 Ale dikh, o Del mange pomožinel!
O Raj hino olenca, ko zaačhen vaš ma.
7 Mi visarel o Del o nalačhipen pale pre ola, ko pre ma džan!
Ov len zňičinela, bo hino verno!
8 Radišagoha tuke anava e obeta
a paľikerava tire naveske, RAJEJA, bo hino lačho.
9 Bo tu man zachraňinďal dojekhe pharipnastar
a pre mire jakha dikhľom mire ňeprijaťeľen, sar peren tele.