O Žalmos 125
1 E giľi pro drom upre andro Jeruzalem.
Ola, ko pes muken pro RAJ,
hine sar o verchos Sion:
Na čhalaven pes,
ľikeren pro furt.
2 Sar hin o verchi pašal o Jeruzalem,
avke hin o RAJ pašal peskre manuša
akanastar a pro furt.
3 O žezlos le nalačhengro na vladňinela
upral e phuv le spravodľive manušengri,
hoj te na keren o spravodľiva
peskre vastenca o nalačhipen.
4 RAJEJA, ker o lačho olenge, ko hine lačhe,
olenge, ko hine čačipnaskre andro jile!
5 Ale olen, ko oddžan pro bange droma,
o RAJ tradela het jekhetane olenca, ko keren o nalačhipen.
O smirom pro Izrael!