3
ⵍⵃⵓⴽⵎ ⵅ ⵓⵔⵛⴰⵍⵉⵎ ⴷ ⵍⴻⴳⵏⵓⵙ
1 ⵓⵛⵜ ⵅⴰⵎ, ⵜⴻⵏⵏⵉ ⵉⵖⴻⵡⵡⵖⴻⵏ
ⴷ ⵢⴰⵔⵚⵓⴹⴻⵏ,
ⵜⴰⵏⴷⵉⵏⵜ ⵏ ⴷⴷⴻⴵ!
2 ⵏⴻⵜⵜⴰⵜ ⵡⴰⵔ ⵜᵉⵜⵜⴻⵙⵍⵉ
ⵖⴰⵔ ⵓⵍⴰ ⴷ ⵉⵛⵜ ⵏ ⵜⵎⵉⵊⵊⴰ,
ⵡⴰⵔ ⵜⵇⴻⴱⴱⴻⵍ ⴰⵡⴻⴷⴷⴻⴱ,
ⵏⴻⵜⵜⴰⵜ ⵡⴰⵔ ⵜᵉⵜⵜⵛⵉⵍ ⵅ ⵙⵉⴷⵉ,
ⵏⴻⵜⵜⴰⵜ ⵡⴰⵔ ⵜᵉⵜⵜⵇⴰⵔⵔⴰⴱ ⵛⴰ
ⵖⴰⵔ ⴰⵔⴻⴱⴱⵉ ⵏⵏⴻⵙ.
3 ⵍⵃⵓⴽⴽⴰⵎ ⵏⵏⴻⵙ ⴷⵉ ⵍⵡⴻⵙⵟ ⵏⵏⴻⵙ
ⴷ ⴰⵢⵔⴰⴷⴻⵏ ⵉⵜⵜⴰⵔⵔⵓⵊⴷⵓⴷⴻⵏ,
ⵍⵇⵓⴹⴰⵜ ⵏⵏⴻⵙ ⴷ ⵓⵛⵛⴰⵏⴻⵏ ⵏ ⴵⵉⵍⴻⵜ,
ⵉⵏⵏⵉ ⵡⴰⵔ ⵉⵜⵜⴻⵊⵊⵉⵏ ⵡⴰⵍⵓ ⴰⵍ ⵜⵓⴼⴼⵓⵜ.
4 ⵉⵏⴰⴱⵉⵢⵢⴻⵏ ⵏⵏⴻⵙ ⴷⴰⵢⵙⴻⵏ ⵍⴻⴼⵛⵓⵛ,
ⵏⵉⵜⵏⵉ ⴷ ⵉⵔⵢⴰⵣⴻⵏ ⵉⵅⴻⴷⴷⴰⵄⴻⵏ!
ⵉⴽⴻⵀⵀⴰⵏⴻⵏ ⵏⵏⴻⵙ ⵙⵙⴼⴻⵙⴷⴻⵏ
ⵣⵣⴰⵡⴻⵛⵜ ⵉⵇⴻⴷⴷⵙⴻⵏ,
ⵏⵉⵜⵏⵉ ⵅⴰⵍⴼⴻⵏ ⵛⵛⴰⵔⵉⵄⴰ.
5 ⵙⵉⴷⵉ ⴰⵎⵙⴻⴳⴳⴻⴷ ⴰⵇⴰ-ⵜ ⴷⵉ ⵍⵡⴻⵙⵜ ⵏⵏⴻⵙ.
ⵏⴻⵜⵜⴰ ⵡⴰⵔ ⵉⵜⵜⴻⴳⴳ ⵛⴰ ⵎⵉⵏ ⵡⴰⵔ ⵉⵙⴻⴳⴳⴷⴻⵏ.
ⴽⵓⵍ ⵜⵓⴼⴼⵓⵜ ⵉⵜⵜⴰⵔⵔⴰ ⵍⵃⴻⵇⵇ ⵏⵏⴻⵙ ⵖⴰⵔ ⵜⴼⴰⵡⵜ,
ⵄⴻⵎⵎⴰⵔⵚ ⵡⴰⵔ ⵜⵏⴻⵇⵇⴻⵚ!
ⵎⴰⵛⴰ ⵡⴻⵏⵏⵉ ⵉⵜⵜⴻⴳⴳⴻⵏ ⵎⵉⵏ ⵡⴰⵔ ⵉⵙⴻⴳⴳⴷⴻⵏ,
ⵡⴰⵔ ⵉⵙⵙⵉⵏ ⵛⴰ ⴰⵙⴻⴹⵃⵉ.
6 ⵏⴻⵛⵛ ⵇⴹⵉⵖ ⵍⴻⴳⵏⵓⵙ,
ⴰⵔⴻⴷⴷⴵⴻⵖ ⵚⵚⵓⵎⵄⴰⵜ ⵏⵙⴻⵏ ⵏ ⵜⵖⴻⵎⵎⵓⵔⴰ.
ⵏⴻⵛⵛ ⵅⵍⵉⵖ ⵉ ⵜⴱⵔⵉⴷⵉⵏ ⵏⵏⴻⵙ,
ⴰⵍⴰⵎⵉ ⵓⵍⴰ ⴷ ⵉⵊⵊⴻⵏ ⵡⴰⵔ ⵉⵇⵇⵉⵎ ⵄⴰⴷ
ⵉⵜⵜⵙⴰⵔⴰ ⴷⵉⵏⵏⵉ.
ⵜⵉⵏⴻⴷⴷⴰⵎ ⵏⵙⴻⵏ ⵜⵜⵡⴰⵔⴻⴷⴷⴵⴻⵏⵜ,
ⵡⴰⵔ ⵉⵇⵇⵉⵎ ⵃⴻⴷ,
ⵓⵍⴰ ⴷ ⵉⵊⵊ ⵏ ⵓⵎⴻⵣⴷⵓⵖ.
7 ⵏⴻⵛⵛ ⵏⵏⵉⵖ: ⵉⵜⵜⵅⴻⵚⵚⴰ ⵛⴻⵎ
ⴰⴷ ⴰⵢⵉ ⵜⴻⴳⴳⵯⴻⴷⴻⴷ,
ⴰⴷ ⵜⴻⴽⵙⵉⴷ ⴰⵡⴻⴷⴷⴻⴱ!,
ⵃⵉⵎⴰ ⵡⴰⵔ ⵜᵉⵜⵜⵡⴰⴽⴽⴻⵙ ⵜⵣⴻⴷⴷⵉⵖⵜ ⵏⵏⴻⵙ,
ⵙ ⵎⴰⵔⵔⴰ ⵎⵉⵏ ⴷ ⴰⵙ ⵖⴰ ⴳⴳⴻⵖ.
ⵙ ⵜⵉⴷⴻⵜⵜ, ⵏⵉⵜⵏⵉ ⵖⴻⵡⵡⵖⴻⵏ ⵣⵉⵛ,
ⵎⴰⵃⴻⵏⴷ ⴰⴷ ⵙⵙⴼⴻⴹⵃⴻⵏ
ⵜⵉⵎⴻⴳⴳⴰ ⵏⵙⴻⵏ ⴰⵍ ⵟⵟⴰⵔⴼ.
8 ⵙ ⵓⵢⴰ ⵔⴰⵊⴰⵎ ⴰⵢⵉ, ⵉⵇⵇⴰⵔ ⵙⵉⴷⵉ,
ⴰⵙⵙ ⵉ ⴷⵉ ⴷⴷ ⵖⴰ ⴽⴽⴰⵔⴻⵖ ⵉ ⵜⴽⴻⵛⵛⴰⴹⵜ.
ⵎⵉⵏⵣⵉ ⴰⵢⴰ ⴷ ⵍⵃⵓⴽⵎ ⵉⵏⵓ ⵉⵙⴻⴳⴳⴷⴻⵏ
ⴰⵇⴰ ⴰⴷ ⵊⴰⵔⵡⴻⵖ ⵍⴻⴳⵏⵓⵙ,
ⴰⴷ ⵙⵙⵎⵓⵏⴻⵖ ⵜⵉⴳⴻⵍⴷⵉⵏ,
ⵃⵉⵎⴰ ⴰⴷ ⵅⴰⵙⴻⵏ ⵙⵙⴼⴻⵙⵢⴻⵖ ⴰⵙⵅⴻⴹ ⵉⵏⵓ,
ⵎⴰⵔⵔⴰ ⵍⵃⴰⴷⵓⵇ ⵏ ⵡⴻⵖⴹⴰⴱ ⵉⵏⵓ,
ⵎⴰⵖⴰⵔ ⵙ ⵜⵎⴻⵙⵙⵉ ⵏ ⵜⵓⵙⵎⵉ ⵉⵏⵓ ⵉⵇⴻⴷⴷⵙⴻⵏ
ⴰⴷ ⵜᵉⵜⵜⵡⴰⵛⵛ ⵎⴰⵔⵔⴰ ⵜⴰⵎⵎⵓⵔⵜ.
ⵜⵜⵓⴱⴻⵜ ⵏ ⵍⴻⴳⵏⵓⵙ
9 ⵎⵉⵏⵣⵉ ⵅⴻⵏⵏⵉ ⵏⴻⵛⵛ ⴰⴷ ⴱⴻⴷⴷⵍⴻⵖ
ⵍⵃⴰⵔⴷ ⵏ ⵍⴻⴳⵏⵓⵙ
ⵉⵢⴻⵏⵛⵉⵛⴻⵏ ⵉⵎⴻⵣⴷⴰⴳⴻⵏ ⴰⴷ ⵜⴻⵏ ⵡⵛⴻⵖ,
ⴰⵍⴰⵎⵉ ⵉ ⵖⴰ ⵍⴰⵖⴰⵏ ⵅ ⵢⵉⵙⴻⵎ ⵏ ⵙⵉⴷⵉ,
ⵃⵉⵎⴰ ⴰⴷ ⵜ ⵄⴻⴱⴱⴷⴻⵏ ⴰⵎ ⵙ ⵢⵉⵛⵜ ⵏ ⵜⴻⵖⵔⵓⴹⵜ.
10 ⵣⴻⴳ ⵓⵊⴻⵎⵎⴰⴹ ⵏ ⵉⵖⴻⵣⵔⴰⵏ ⵏ ⴽⵓⵛ,
ⵉⵏⵏⵉ ⵅⴰⴼⵉ ⵉⵜⵜⵥⴰⴵⴰⵏ,
ⵢⴻⴵⵉⵙ ⵏ ⵉⵎⵎⵟⴰⵔⵔⵛⴻⵏ ⵉⵏⵓ,
ⴰⴷ ⵜⵜ ⴰⵡⵢⴻⵏ ⵏⵉⵜⵏⵉ ⴰⵎⴻⵛⵏⴰⵡ ⵜⴻⵡⵀⵉⴱⵜ ⵉⵏⵓ.
11 ⴷⴻⴳ ⵡⴰⵙⵙ ⵏⵏⵉ ⵡⴰⵔ ⵜⵙⴻⴹⵃⵉⴷ ⵛⴰ ⵄⴰⴷ,
ⵅ ⵎⴰⵔⵔⴰ ⵜⵉⵎⴻⴳⴳⴰ ⵉ ⵣⵉ ⵅⴰⴼⵉ ⵜⵖⴻⵡⵡⵖⴻⴷ,
ⵎⵉⵏⵣⵉ ⴰⴷ ⴽⴽⵙⴻⵖ ⵣⵉ ⵍⵡⴻⵙⵟ ⵏⵏⴻⵎ
ⵉⵏⵏⵉ ⵉⵜⵜⴼⴻⵢⵢⵛⴻⵏ ⴷⵉ ⵏⵏⴼⴰⵅⴻⵜ,
ⵓ ⴽⴻⵏⵏⵉⵡ ⵡⴰⵔ ⵜⴻⵙⵙⴳⴻⵄⵄⴰⴷⴻⵎ ⵄⴰⴷ ⵉⵅⴻⴼ ⵏⵡⴻⵎ
ⵅ ⵡⴻⴷⵔⴰⵔ ⵉⵏⵓ ⵉⵇⴻⴷⴷⵙⴻⵏ.
12 ⵏⴻⵛⵛ ⴰⴷ ⵊⵊⴻⵖ ⴷⵉ ⵍⵡⴻⵙⵟ ⵏⵏⴻⵎ
ⵉⵊⵊ ⵏ ⵍⴳⴻⵏⵙ ⵉⵜⵜⵡⴰⵃⵚⴰⵔ, ⵉⵥⴻⵍⴹ.
ⵏⵉⵜⵏⵉ ⴰⴷ ⴰⵔⴻⵡⵍⴻⵏ ⵖⴰⵔ ⵢⵉⵙⴻⵎ ⵏ ⵙⵉⴷⵉ.
13 ⵎⵉⵏ ⵉⵇⵇⵉⵎⴻⵏ ⵏ ⵉⵙⵔⴰⵉⵍ
ⵡⴰⵔ ⵉⵜⵜⴻⴳⴳ ⵎⵉⵏ ⵡⴰⵔ ⵉⵙⴻⴳⴳⴷⴻⵏ,
ⵏⵉⵜⵏⵉ ⵡⴰⵔ ⵙⵙⵅⴰⵔⵔⵉⵇⴻⵏ ⵛⴰ,
ⵓ ⴷⴻⴳ ⵓⵇⴻⵎⵎⵓⵎ ⵏⵙⴻⵏ
ⵡⴰⵔ ⵉⵜⵜᵉⵜⵜⵡⵉⴼⵉ ⵢⵉⵍⴻⵙ ⵉⵙⵙⵅⴰⵔⵔⵉⵇⴻⵏ,
ⵎⴰⵛⴰ ⵏⵉⵜⵏⵉ ⴰⴷ ⵀⴻⴷⴷⴰⵏ ⴰⴷ ⵣⵣⵍⴻⵏ,
ⵓ ⵓⵍⴰ ⴷ ⵉⵊⵊⴻⵏ ⴰⴷ ⵜⴻⵏ ⵉⵙⵙⵏⴻⵅⵍⵉⵄ.
ⵍⴻⴼⵔⴰⵃⴻⵜ ⵏ ⵉⵙⵔⴰⵉⵍ ⴷ ⵡⴻⵄⴷⴰⵍ ⵏⵏⴻⵙ
14 ⵖⴻⵏⵏⴻⵊ, ⴰ ⵢⴻⴵⵉⵙ ⵏ ⵚⵉⵀⵢⵓⵏ,
ⵙⵍⵉⵡⵍⴻⵡ, ⴰ ⵉⵙⵔⴰⵉⵍ.
ⴼⴰⵔⵃ ⵓ ⵜⴼⴰⴵⵉⴷ ⵙ ⵎⴰⵔⵔⴰ ⵓⵍ ⵏⵏⴻⵎ,
ⴰ, ⵢⴻⴵⵉⵙ ⵏ ⵓⵔⵛⴰⵍⵉⵎ!
15 ⵙⵉⴷⵉ ⵉⴽⴽⴻⵙ ⵍⴻⵃⴽⴰⵎⴰⵜ ⵏⵏⴻⵎ,
ⵏⴻⵜⵜⴰ ⴰⵇⴰ ⵉⵎⵃⴰ ⵍⴻⵄⴷⵓ ⵏⵏⴻⵎ.
ⴰⵊⴻⴵⵉⴷ ⵏ ⵉⵙⵔⴰⵉⵍ,
ⵙⵉⴷⵉ, ⴰⵇⴰ-ⵜ ⴷⵉ ⵍⵡⴻⵙⵟ ⵏⵏⴻⵎ!
ⵡⴰⵔ ⵜⵥⴰⵔⵔⴻⴷ ⵄⴰⴷ ⵍⵖⴰⵔ.
16 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵏⵉⵏ ⵉ ⵓⵔⵛⴰⵍⵉⵎ:
ⵡⴰⵔ ⵜⵜⴻⴳⴳⵯⴻⴷ ⵛⴰ, ⵚⵉⵀⵢⵓⵏ!
ⵡⴰⵔ ⵜⵜⴻⵊⵊⵉ ⵉⴼⴰⵙⵙⴻⵏ ⵏⵏⴻⵎ
ⴰⴷ ⴰⵔⵅⵓⵏ ⵄⴻⵎⵎⴰⵔⵚ ⵄⴰⴷ!
17 ⵙⵉⴷⵉ, ⴰⵔⴻⴱⴱⵉ ⵏⵏⴻⵎ, ⴰⵇⴰ-ⵜ ⴷⵉ ⵍⵡⴻⵙⵜ ⵏⵏⴻⵎ,
ⴱⵓ-ⵜⴻⵖⵔⵓⴹⵜ ⵏⵏⵉ ⵉ ⴷⴷ ⵖⴰ ⵢⴰⵡⵢⴻⵏ ⴰⵙⴻⵏⵊⴻⵎ
ⵏⴻⵜⵜⴰ ⴰⴷ ⵣⵣⴰⵢⴻⵎ ⵉⴼⴰⵔⵃ ⵙ ⵡⴰⵟⵟⴰⵙ,
ⵏⴻⵜⵜⴰ ⴰⴷ ⵉⵙⴻⵖⴹ ⴷⵉ ⵜⴰⵢⵔⵉ ⵏⵏⴻⵙ,
ⵏⴻⵜⵜⴰ ⴰⴷ ⵅⴰⵎ ⵉⵙⵍⵉⵡⵍⴻⵡ ⵙ ⵓⵖⴻⵏⵏⴻⵊ.’
18 ⵏⴻⵛⵛ ⴰⴷ ⵙⵙⵎⵓⵏⴻⵖ ⵉⵏⵏⵉ ⵉⵛⴻⵟⵟⵏⴻⵏ
ⵓⵎⵉ ⵡⴰⵔ ⵣⴻⵎⵎⴰⵔⴻⵏ ⴰⴷ ⵛⴰⵔⵛⴻⵏ
ⴷⵉ ⵜⵎⴻⵙⵎⵓⵏⵜ ⵉⵜⵜⵡⴰⴳⴳⴻⵏ ⵉ ⵍⵄⵉⴷ.
ⴰⵇⴰ ⵏⵉⵜⵏⵉ ⵣⵣⴰⵢⴻⵎ!
ⴷⴷⵇⴻⵍ ⵏ ⵍⵃⴻⴳⵔⴰ ⴰⵇⴰ-ⵜ ⵅⴰⵙ.
19 ⵅⵣⴰⵔ, ⵏⴻⵛⵛ ⴰⴷ ⵛⴻⵖⵍⴻⵖ ⵉⵅⴻⴼ ⵉⵏⵓ
ⴰⴽ-ⴷ ⵢⵉⵏⵏⵉ ⵛⴻⵎ ⵉⵃⵚⴰⵔⴻⵏ.
ⵏⴻⵛⵛ ⴰⴷ ⵙⵙⵏⴻⵊⵎⴻⵖ ⵉⵇⴻⵊⴷⴰⵃⴻⵏ
ⵓ ⵢⵉⵏⵏⵉ ⵉⵜⵜⵡⴰⵙⵙⵓⴼⴼⵖⴻⵏ ⴰⴷ ⵜⴻⵏ ⵙⵙⵎⵓⵏⴻⵖ.
ⵏⴻⵛⵛ ⴰⴷ ⴰⵙⴻⵏ ⵡⵛⴻⵖ ⵍⵄⴻⵣⵣ
ⴷ ⵢⵉⵊⵊ ⵏ ⵉⵙⴻⵎ ⵉⵛⴻⵏⵏⵄⴻⵏ,
ⴷⵉ ⵎⴰⵔⵔⴰ ⴷⴷⵓⵏⴻⵛⵜ
ⵏⵏⵉ ⵜⴻⵏ ⵜⵓⵖⴰ ⵉⵙⵙⴼⴻⵟⵟⵃⴻⵏ.
20 ⴷⵉ ⵍⵡⴻⵇⵜ ⵏⵏⵉ ⴰⴷ ⴽⴻⵏⵏⵉⵡ ⴷⴷ-ⴰⵔⵔⴻⵖ,
ⵓ ⴷⵉ ⵍⵡⴻⵇⵜ ⵏⵏⵉ ⴰⴷ ⴽⴻⵏⵏⵉⵡ ⵙⵙⵎⵓⵏⴻⵖ,
ⵏⴻⵛⵛ ⴰⴷ ⴰⵡⴻⵎ ⵡⵛⴻⵖ
ⵉⵊⵊ ⵏ ⵢⵉⵙⴻⵎ ⵉⵛⴻⵏⵏⵄⴻⵏ ⴷ ⵍⵄⴻⵣⵣ
ⵊⴰⵔ ⵎⴰⵔⵔⴰ ⵍⴻⴳⵏⵓⵙ ⵏ ⴷⴷⵓⵏⴻⵛⵜ,
ⵅⵎⵉ ⵉ ⵣⵣⴰⵢⵡⴻⵎ ⵖⴰ ⵙⵙⴻⵏⵇⴻⵍⴱⴻⵖ
ⵜⴰⵎⴻⵃⴱⴰⵙⵜ ⵏⵡⴻⵎ
ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵡⴻⵎ,
ⵉⵏⵏⴰ ⵙⵉⴷⵉ.