14
ⴰⵀⴻⴽⴽⵡⵓ ⵏ ⵙⵉⴷⵉ ⵅ ⵡⴻⴷⵔⴰⵔ ⵏ ⵣⵣⵉⵜⵓⵏ
1 “ⵅⵣⴰⵔⴻⵜ, ⴰⴷ ⴷⴷ-ⵢⴰⵙ ⵉⵊⵊ ⵏ ⵡⴰⵙⵙ ⵉ ⵙⵉⴷⵉ ⵉ ⴷⵉ ⵉ ⵖⴰ ⵜᵉⵜⵜⵡⴰⴱⴹⴰ ⵜⴽⴻⵛⵛⴰⴹⵜ ⵏⵏⴻⵎ ⴷⵉ ⵍⵡⴻⵙⵟ ⵏⵏⴻⵎ!
2 ⵏⴻⵛⵛ ⴰⴷ ⵙⵙⵎⵓⵏⴻⵖ ⵎⴰⵔⵔⴰ ⵍⴻⴳⵏⵓⵙ ⵉ ⵓⵎⴻⵏⵖⵉ ⴰⴽ-ⴷ ⵓⵔⵛⴰⵍⵉⵎ. ⵜⴰⵏⴷⵉⵏⵜ ⴰⴷ ⵜᵉⵜⵜⵡⴰⵟⵟⴻⴼ, ⵜⵓⴷⵔⵉⵏ ⴰⴷ ⵜⵜⵡⴰⴽⴻⵛⵛⴹⴻⵏⵜ, ⵜⵉⵎⵖⴰⵔⵉⵏ ⴰⴷ ⵜⵜⵡⴰⵙⵙⵏⵓⵇⵇⴱⴻⵏⵜ ⵓ ⴰⵣⵢⴻⵏ ⵏ ⵜⴻⵏⴷⵉⵏⵜ ⴰⴷ ⵉⵜⵜⵡⴰⵏⴷⴻⵀ ⴷⵉ ⵍⵎⴻⵏⴼⴰ, ⵎⴰⵛⴰ ⵎⵉⵏ ⵉⵇⵇⵉⵎⴻⵏ ⵏ ⵍⴳⴻⵏⵙ ⵡⴰⵔ ⴳⴳⵓⵔ ⵛⴰ ⴰⴷ ⵉⵜⵜⵡⴰⵇⴹⴻⵄ.
3 ⵙⵉⴷⵉ ⴰⴷ ⵉⴼⴼⴻⵖ ⵓ ⵏⴻⵜⵜⴰ ⴰⴷ ⵉⵎⵎⵏⴻⵖ ⴰⴽ-ⴷ ⵍⴻⴳⵏⵓⵙ ⴰⵎ ⴷⴻⴳ ⵡⴰⵙⵙ ⵏ ⵓⵎⴻⵏⵖⵉ, ⴷⴻⴳ ⵡⴰⵙⵙ ⵏ ⵉⵜⵜⵎⴻⵏⵖⴰ ⵍⴻⴱⴷⴰ ⴷⴻⴳ ⵡⴰⵙⵙ ⵏ ⵡⴻⵀⵊⴰⵎ.
4 ⴷⴻⴳ ⵡⴰⵙⵙ ⵏⵏⵉ ⴰⴷ ⴱⴻⴷⴷⴻⵏ ⵉⴹⴰⵔⴻⵏ ⵏⵏⴻⵙ ⵅ ⵡⴻⴷⵔⴰⵔ ⵏ ⵣⵣⵉⵜⵓⵏ ⵡⴻⵏⵏⵉ ⵇⵉⴱⴰⵍⵜ ⵉ ⵓⵔⵛⴰⵍⵉⵎ, ⵖⴰⵔ ⵛⵛⴰⵔⵇ. ⴰⴷⵔⴰⵔ ⵏ ⵣⵣⵉⵜⵓⵏ ⴰⴷ ⵉⵜⵜⵡⴰⴼⴻⴵⴻⵇ ⴷⵉ ⵜⵏⴰⵢⴻⵏ ⵏ ⵉⵣⵉⵢⵏⴰⵜ, ⵊⵊⵉⵀⴻⵜ ⵏ ⵛⵛⴰⵔⵇ ⵓ ⵊⵊⵉⵀⴻⵜ ⵏ ⵍⴻⴱⵃⴰⵔ, ⵎⴰⵃⴻⵏⴷ ⴰⴷ ⴷⵉⵏ ⵜⵉⵍⵉ ⵉⵛⵜ ⵏ ⵜⴻⵖⵣⵓⵔⵜ ⴷ ⵜⴰⵎⴻⵇⵇⵔⴰⵏⵜ. ⴰⵣⵢⴻⵏ ⵏ ⵡⴻⴷⵔⴰⵔ ⴰⴷ ⵉⵎⴻⵢⵢⴻⵍ ⵖⴰⵔ ⵛⵛⴰⵎⴰⵍ ⵓ ⴰⵣⵢⴻⵏ ⵏⵏⴻⵖⵏⵉ ⵏ ⵡⴻⴷⵔⴰⵔ ⴰⴷ ⵉⵎⴻⵢⵢⴻⵍ ⵖⴰⵔ ⵍⵊⴰⵏⵓⴱ.
5 ⵓⵛⴰ ⴽⴻⵏⵏⵉⵡ ⴰⴷ ⵜⴰⵔⴻⵡⵍⴻⵎ ⵣⵉ ⵀⴻⴽⴽⵡⵓ ⵏ ⵉⴷⵓⵔⴰⵔ ⵉⵏⵓ, ⵎⴰⵖⴰⵔ ⵜⴰⵖⵣⵓⵔⵜ ⵏ ⵉⴷⵓⵔⴰⵔ ⴰⴷ ⴷⴷ-ⵜⴰⵡⴻⴹ ⴰⵍ ⴰⵚⴰⵍ ⵓ ⴽⴻⵏⵏⵉⵡ ⴰⴷ ⵜⴰⵔⴻⵡⵍⴻⵎ ⴰⵎ ⵎⴰⵎⵎⴻⵛ ⵜⴰⵔⴻⵡⵍⴻⵎ ⴽⴻⵏⵏⵉⵡ ⵣⴻⴳ ⵡⴻⵏⵀⴻⵣⵣⵉ ⵏ ⵜⴻⵎⵎⵓⵔⵜ ⴷⴻⴳ ⵡⵓⵙⵙⴰⵏ ⵏ ⵄⵓⵣⵣⵉⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵓⵛⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⴰⴷ ⴷⴷ-ⵢⴰⵙ ⵓ ⵎⴰⵔⵔⴰ ⵉⵎⵇⴻⴷⴷⴰⵙⴻⵏ ⴰⴽⵉⴷⴻⴽ.
6 ⴷⴻⴳ ⵡⴰⵙⵙ ⵏⵏⵉ ⴳⴳⵓⵔ ⴰⴷ ⵉⵎⵙⴰⵔ ⴰⵇⴰ ⵡⴰⵔ ⵜᵉⵜⵜⵉⵍⵉ ⵜⴼⴰⵡⵜ, ⵉⵜⵔⴰⵏ ⵉⵜⵜⵉⵙⵙⵉⵇⴻⵏ ⴰⴷ ⵜᵉⵜⵜⵡⴰⴽⴻⵎⵎⵛⴻⵏ.
7 ⴰⴷ ⵢⵉⵍⵉ ⴷ ⵉⵊⵊ ⵏ ⵡⴰⵙⵙ ⵉⵜⵜⵡⴰⴼⴰⵔⵣ, ⴰⴷ ⵢⵉⵍⵉ ⵉⵜⵜⵡⴰⵙⵙⴻⵏ ⵖⴰⵔ ⵙⵉⴷⵉ. ⵡⴰⵔ ⵉⴵⵉ ⴷ ⴰⵙⵙ ⵓⵍⴰ ⴷ ⴵⵉⵍⴻⵜ. ⴰⴷ ⵉⵎⵙⴰⵔ ⵖⴰⵔ ⵍⵡⴻⵇⵜ ⵏ ⵓⵄⴻⵛⵛⵉ ⴰⴷ ⵜⵉⵍⵉ ⵜⴼⴰⵡⵜ.
8 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ ⴰⵇⴰ ⴰⵎⴰⵏ ⵉⴷⴷⴰⵔⴻⵏ ⴰⴷ ⴷⴷ-ⴼⴼⵖⴻⵏ ⵣⵉ ⵓⵔⵛⴰⵍⵉⵎ, ⴰⵣⵢⴻⵏ ⵣⵣⴰⵢⵙⴻⵏ ⵖⴰⵔ ⵍⴻⴱⵃⴰⵔ ⴰⵛⴰⵔⵇⵉ ⵓ ⴰⵣⵢⴻⵏ ⵏⵏⴻⵖⵏⵉ ⵖⴰⵔ ⵍⴻⴱⵃⴰⵔ ⵏ ⵍⵖⴰⵔⴱⵉ. ⴰⵎⵎⵓ ⵉ ⵖⴰ ⵢⵉⵍⵉ ⴷⴻⴳ ⵓⵏⴻⴱⴷⵓ ⵓ ⴷⵉ ⵜⴳⴰⵔⵙⵜ.
9 ⵙⵉⴷⵉ ⴰⴷ ⵢⵉⵍⵉ ⴷ ⴰⵊⴻⴵⵉⴷ ⵅ ⵎⴰⵔⵔⴰ ⵜⴰⵎⵎⵓⵔⵜ.
ⴷⴻⴳ ⵡⴰⵙⵙ ⵏⵏⵉ ⴰⴷ ⵢⵉⵍⵉ ⵏⴻⵜⵜⴰ ⴷ ⴰⵢⴻⵏⵏⵉ ⵏ ⵙⵉⴷⵉ ⵓ ⵉⵙⴻⵎ ⵏⵏⴻⵙ ⴷ ⴰⵢⴻⵏⵏⵉ ⵏ ⵢⵉⵙⴻⵎ.
10 ⵎⴰⵔⵔⴰ ⵜⴰⵎⵎⵓⵔⵜ ⴰⴷ ⵜⴻⴷⵡⴻⵍ ⴰⵎ ⵍⴻⵡⴹⴰ, ⵣⵉ ⵊⴰⴱⵄⴰ ⴰⵍ ⵔⵉⵎⵎⵓⵏ, ⵖⴰⵔ ⵊⵊⵉⵀⴻⵜ ⵏ ⵍⵊⴰⵏⵓⴱ ⵏ ⵓⵔⵛⴰⵍⵉⵎ. ⵜⴰⵏⴷⵉⵏⵜ ⴰⴷ ⵜᵉⵜⵜⵡⴰⵙⵙⴳⴻⵄⵄⴻⴷ ⵓ ⴰⴷ ⴷⴰⵢⴻⵙ ⵣⴻⴷⵖⴻⵏ ⵉⵡⴷⴰⵏ ⴷⴻⴳ ⵡⴻⵎⵛⴰⵏ ⵏⵏⴻⵙ, ⵣⵉ ⵜⴻⵡⵡⴰⵔⵜ ⵏ ⴱⵉⵏⵢⴰⵎⵉⵏ ⴰⵍ ⴰⵎⵛⴰⵏ ⵏ ⵜⴻⵡⵡⴰⵔⵜ ⵉ ⴷⵉⵏ ⵜⵓⵖⴰ ⵣⵉⵛ, ⴰⵍ ⵜⴰⵡⵡⴰⵔⵜ ⵏ ⵜⴻⵖⵎⴰⵔⵜ, ⵓ ⵣⵉ ⵍⴱⵓⵔⵊ ⵏ ⵃⴰⵏⴰⵏⵉⵢⵉⵍ ⴰⵍ ⵜⵉⵙⴰⵔⵉⵏ ⵏ ⵡⴻⵃⵔⴰⵢ ⵏ ⴷⴷⵉⵍⴻⵛⵜ ⵏ ⵓⵊⴻⴵⵉⴷ.
11 ⵏⵉⵜⵏⵉ ⴰⴷ ⴷⴰⵢⴻⵙ ⵣⴻⴷⵖⴻⵏ ⵓ ⵡⴰⵔ ⵉⵜⵜⵉⵍⵉ ⵄⴰⴷ ⵓⵍⴰ ⴷ ⵉⵊⵊ ⵏ ⵓⵃⴰⵔⵔⴻⵎ ⵉ ⵓⵜⴻⵃⵃⵉ, ⵎⵉⵏⵣⵉ ⵓⵔⵛⴰⵍⵉⵎ ⴰⴷ ⵉⵣⴷⴻⵖ ⴷⵉ ⵍⴰⵎⴰⵏ.
12 ⵜⴰ ⴰⴷ ⵜⵉⵍⵉ ⴷ ⵜⵉⵛⵜⵉ ⵉ ⵣⵉ ⵖⴰ ⵉⵡⵡⴻⵜ ⵙⵉⴷⵉ ⵎⴰⵔⵔⴰ ⵍⴻⴳⵏⵓⵙ ⵏⵏⵉ ⵉⵎⵎⴻⵏⵖⴻⵏ ⴰⴽ-ⴷ ⵓⵔⵛⴰⵍⵉⵎ: ⵏⴻⵜⵜⴰ ⴰⴷ ⵢⴰⵔⵔ ⴰⵔⵔⵉⵎⴻⵜ ⵏ ⴽⵓⵍ ⴱⵏⴰⴷⴻⵎ ⴰⴷ ⵉⴽⴽⵉⵛⵛⵓ ⴰⵎ ⵏⴻⵜⵜⴰ ⵄⴰⴷ ⵉⴱⴻⴷⴷ ⵅ ⵉⴹⴰⵔⴻⵏ ⵏⵏⴻⵙ ⵓ ⵜⵉⵟⵟⴰⵡⵉⵏ ⵏⵏⴻⵙ ⴰⴷ ⴽⴽⵉⵛⵛⵡⴻⵏⵜ ⴷⴻⴳ ⵉⵅⵓⴱⴰⵛ ⵏⵙⴻⵏ ⵓ ⵉⵍⴻⵙ ⵏⵏⴻⵙ ⴰⴷ ⵉⴽⴽⵉⵛⵛⵓ ⴷⴻⴳ ⵓⵇⴻⵎⵎⵓⵎ ⵏⵏⴻⵙ.
13 ⴷⴻⴳ ⵡⴰⵙⵙ ⵏⵏⵉ ⴳⴳⵓⵔ ⴰⴷ ⵉⵎⵙⴰⵔ ⴰⵇⴰ ⵉⵊⵊ ⵏ ⵓⵎⵅⴰⵔⵡⴻⴹ ⴷ ⴰⵎⴻⵇⵇⵔⴰⵏ ⵣⵉ ⵙⵉⴷⵉ ⴰⴷ ⵉⴷⵡⴻⵍ ⵊⴰⵔ ⴰⵙⴻⵏ, ⴰⵍⴰⵎⵉ ⵖⴰ ⵉⵟⵟⴻⴼ ⴽⵓⵍ ⵉⵊⵊ ⴰⴼⵓⵙ ⵏ ⵊⵊⴰⵔ ⵏⵏⴻⵙ ⵓ ⵅⴻⵏⵏⵉ ⴰⴼⵓⵙ ⵏ ⴽⵓⵍ ⵉⵊⵊⴻⵏ ⴰⴷ ⵉⵏⵏⴻⵇⵍⴻⴱ ⴹⵉⴷⴷ ⵉ ⵓⴼⵓⵙ ⵏ ⵊⵊⴰⵔ ⵏⵏⴻⵙ.
14 ⵄⴰⴷ ⴰⴷ ⵉⵎⵎⵏⴻⵖ ⵢⴰⵀⵓⴷⴰ ⴷⵉ ⵓⵔⵛⴰⵍⵉⵎ ⵓⵛⴰ ⴰⴷ ⵜⵜⵡⴰⵙⵙⵎⵓⵏⴻⵏ ⵡⴰⴳⵍⴰ ⵏ ⵎⴰⵔⵔⴰ ⵍⴻⴳⵏⵓⵙ ⵉ ⴷ ⴰⵙ ⴷⴷ-ⵉⵏⵏⴹⴻⵏ: ⵓⵔⴻⵖ ⴷ ⵏⵏⵓⵇⴰⵔⵜ ⴷ ⵡⴰⵔⵔⵓⴹ ⴰⵟⵟⴰⵙ ⵙ ⵡⴰⵟⵟⴰⵙ.
15 ⴰⵎⵎⵓ ⵉ ⵖⴰ ⵜⵉⵍⵉ ⵄⴰⵡⴻⴷ ⵜⴻⵛⵜⵉ ⵏ ⵓⵢⵉⵙ ⴷ ⵓⵙⴰⵔⴷⵓⵏ ⴷ ⵡⴻⵍⵖⴻⵎ ⴷ ⵢⴻⵖⵢⴰⵍ ⴷ ⵎⴰⵔⵔⴰ ⵍⵎⴰⵍ ⵏⵏⵉ ⵉⴵⴰⵏ ⴷⵉ ⵍⵄⴻⵙⴽⴰⵔⴰⵜ, ⴰⵇⴰ ⵜⵉⵛⵜⵉ-ⵢⴰ ⴰⴷ ⵜⴻⵏ ⵜⴻⵍⵇⴻⴼ.
16 ⵅⴻⵏⵏⵉ ⴰⴷ ⵉⵎⵙⴰⵔ ⴰⵇⴰ ⵎⴰⵔⵔⴰ ⵉⵏⵏⵉ ⵉⵇⵇⵉⵎⴻⵏ ⵣⵉ ⵎⴰⵔⵔⴰ ⵍⴻⴳⵏⵓⵙ ⵏⵏⵉ ⴷⴷ-ⵢⵓⵙⵉⵏ ⵖⴰⵔ ⵓⵔⵛⴰⵍⵉⵎ ⵉ ⵍⴻⵃⵚⴰⵔⴻⵜ, ⴰⴷ ⴳⴻⵄⵄⴷⴻⵏ ⵣⴻⴳ ⵓⵙⴻⴳⴳⵯⴰⵙ ⴰⵍ ⴰⵙⴻⴳⴳⵯⴰⵙ, ⵃⵉⵎⴰ ⴰⴷ ⴱⴻⵏⴷⵇⴻⵏ ⵣⵣⴰⵜ ⵉ ⵓⵊⴻⴵⵉⴷ, ⵉ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵓ ⵃⵉⵎⴰ ⴰⴷ ⵄⴻⵢⵢⴷⴻⵏ ⵍⵄⵉⴷ ⵏ ⵉⵄⵓⵛⵛⵓⵜⴻⵏ.
17 ⴰⴷ ⵉⵎⵙⴰⵔ ⴱⴻⵍⵍⵉ ⵎⴰⵏ ⵡⴻⵏ ⵣⵉ ⵍⴰⴵⴰⵜ ⵏ ⵜⴻⵎⵎⵓⵔⵜ ⵡⴰⵔ ⴷⴷ-ⵉⵜⵜⴳⵉⵄⵄⵉⴷ ⵛⴰ ⵖⴰⵔ ⵓⵔⵛⴰⵍⵉⵎ ⵃⵉⵎⴰ ⴰⴷ ⵉⴱⴻⵏⴷⴻⵇ ⵉ ⵓⵊⴻⴵⵉⴷ, ⵉ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⵇⴰ ⵡⴰⵔ ⵅⴰⵙ ⵉⵡⴻⵟⵟⵉ ⵛⴰ ⵡⴻⵏⵥⴰⵔ.
18 ⵎⴰⵍⴰ ⵍⴰⴵ ⵏ ⵎⵉⵚⵔⴰ ⵡⴰⵔ ⴷⴷ-ⵉⴳⴻⵄⵄⴻⴷ ⵓ ⵡⴰⵔ ⴷⴷ-ⵜⵓⵙⵉ ⵛⴰ, ⵅⴻⵏⵏⵉ ⵡⴰⵔ ⵅⴰⵙⴻⵏ ⵉⵛⵛⵉⵜ ⵡⴻⵏⵥⴰⵔ. ⵜⴰ ⴰⴷ ⵜⵉⵍⵉ ⴷ ⵜⵉⵛⵜⵉ ⵉ ⵣⵉ ⵖⴰ ⵉⵍⵇⴻⴼ ⵙⵉⴷⵉ ⵍⴻⴳⵏⵓⵙ ⵏⵏⵉ ⵡⴰⵔ ⴷⵉⵏ ⵉⵜⵜⴳⵉⵄⵄⵉⴷⴻⵏ ⵛⴰ ⵃⵉⵎⴰ ⴰⴷ ⵄⴻⵢⵢⴷⴻⵏ ⴼⵉⵛⵜⴰ ⵏ ⵍⵄⵉⴷ ⵏ ⵉⵄⵓⵛⵛⵓⵜⴻⵏ.
19 ⵜⴰ ⴳⴳⵓⵔ ⴰⴷ ⵜⵉⵍⵉ ⴷ ⵜⵉⵛⵜⵉ ⵉ ⴷⴷⵏⵓⴱ ⵏ ⵎⵉⵚⵔⴰ ⵓⵍⴰ ⴷ ⵜⵉⵛⵜⵉ ⵉ ⵎⴰⵔⵔⴰ ⵍⴻⴳⵏⵓⵙ, ⵉⵏⵏⵉ ⵡⴰⵔ ⴷⵉⵏ ⵉⵜⵜⴳⴻⵄⵄⴻⴷⴻⵏ, ⵃⵉⵎⴰ ⴰⴷ ⵄⴻⵢⵢⴷⴻⵏ ⵍⵄⵉⴷ ⵏ ⵉⵄⵓⵛⵛⵓⵜⴻⵏ.
20 ⴷⴻⴳ ⵡⴰⵙⵙ ⵏⵏⵉ ⴳⴳⵓⵔ ⴰⴷ ⵢⵉⵍⵉ ⵅ ⵜⵏⴰⵇⵓⵙⵉⵏ ⵏ ⵢⴻⵢⵙⴰⵏ ‘ⴷ ⴰⵎⵇⴻⴷⴷⴰⵙ ⵉ ⵙⵉⴷⵉ!’ ⵜⵜⵏⴰⵊⴰⵔ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ ⴰⴷ ⵉⵍⵉⵏ ⴰⵎ ⵟⵟⴰⵡⵢⴰⵜ ⵉ ⵓⵔⵓⵛⵛⵉ ⵣⵣⴰⵜ ⵉ ⵓⵄⴰⵍⵟⴰⵔ.
21 ⵎⴰⵔⵔⴰ ⵜⵜⵏⴰⵊⴰⵔ ⴷⵉ ⵓⵔⵛⴰⵍⵉⵎ ⵓ ⴷⵉ ⵢⴰⵀⵓⴷⴰ ⴰⴷ ⵉⵍⵉⵏ ⵇⴻⴷⴷⵙⴻⵏ ⵉ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵓ ⵎⴰⵔⵔⴰ ⵉⵏⵏⵉ ⵉ ⴷⴷ ⵖⴰ ⵢⴰⵙⴻⵏ ⵃⵉⵎⴰ ⴰⴷ ⵇⴻⴷⴷⵎⴻⵏ ⵜⵉⵡⵀⵉⴱⵉⵏ, ⴰⴷ ⵣⵣⴰⵢⵙⴻⵏⵜ ⴽⵙⵉⵏ ⵓ ⴰⴷ ⴷⴰⵢⵙⴻⵏⵜ ⵙⵙⵏⴻⵏⵏⴰⵏ.
ⴷⴻⴳ ⵡⴰⵙⵙ ⵏⵏⵉ ⵡⴰⵔ ⴷⵉⵏ ⵉⵜⵜⵉⵍⵉ ⵓⵍⴰ ⴷ ⵉⵊⵊ ⵏ ⵓⴽⴻⵏⵄⴰⵏⵉ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ.”