3
1 ⵙⴻⵄⵇⴻⵍ ⵉ-ⵜⴻⵏ, ⵎⴰⵃⴻⵏⴷ ⴰⴷ ⵟⵟⴰⵄⴻⵏ ⵉ ⵍⵃⵓⴽⴽⴰⵎ ⵓ ⵉ ⵚⵚⵓⵍⴰⵟⴰⵜ, ⴰⴷ ⴰⵙⴻⵏ ⴳⴳⴻⵏ ⴰⵔⵔⴰⵢ, ⴰⴷ ⵉⵍⵉⵏ ⵡⴻⵊⴷⴻⵏ ⵉ ⵍⵅⴻⴷⵎⴻⵜ ⵜⴰⵚⴻⴱⵃⴰⵏⵜ ⵎⴰⵎⵎⴻⵛ ⵎⴰ ⵜⴻⴳⴳⴰ,
2 ⵡⴰⵔ ⵜⵜⵛⴻⵇⵇⵉⴼⴻⵏ ⴷⵉ ⵃⴻⴷ, ⵡⴰⵔ ⵜⵜⴻⵎⵛⵓⴱⴱⵓⵛⴻⵏ, ⴰⴷ ⵉⵍⵉⵏ ⵜⵜⴻⴱⵜⴻⵏ ⵓⵛⴰ ⴰⴷ ⵙⵙⴻⵛⵏⴻⵏ ⵍⴻⴹⵔⴰⴼⴻⵜ ⵉ ⵎⴰⵔⵔⴰ ⵉⵡⴷⴰⵏ ⵣⵉ ⵎⴰⵔⵔⴰ ⵉⵖⴻⵣⴷⵉⵙⴻⵏ.
3 ⴰⵇⴰ ⵓⵍⴰ ⴷ ⵏⴻⵛⵛⵉⵏ ⵣⵉⵛ ⵜⵓⵖⴰ ⴰⵏⴻⵖ ⴷ ⵉⴼⵖⴰⵍ, ⵙ ⵡⵓⵍ ⵡⴰⵔ ⵉⵎⵜⵉⵏⴻⵏ, ⵏⵡⴻⴷⴷⴰⵔ, ⴰⵇⴰ ⴰⵏⴻⵖ ⴷ ⵉⵙⴻⵎⵖⴰⵏ ⵏ ⵄⵍⴰⵎ ⴽⵓⵍ ⵏⵏⴻⵛⵡⴰⵜ ⴷ ⵛⵛⴻⵀⵡⴰⵜ, ⵜⵓⵖⴰ ⵏⴻⴷⴷⴰⵔ ⴷⵉ ⵜⵓⵄⴻⴼⴼⵏⴰ ⵓⵍⴰ ⴷⵉ ⵍⴻⵃⵙⴻⴷ, ⴷⴰⵢⵏⴻⵖ ⴰⵛⵔⴰⵀ ⵓⵛⴰ ⵏⵛⴰⵔⵀ ⵉⵊⵊⴻⵏ ⵡⴻⵏⵏⴻⵖⵏⵉ.
4 ⵎⴰⵛⴰ ⵅⵎⵉ ⵜⴱⴰⵏ ⵜⵛⵓⵏⵉ ⴷ ⵜⴰⵢⵔⵉ ⵏ ⴰⵔⴻⴱⴱⵉ, ⵡⴻⵏⵏⵉ ⴷ ⴰⵏⴻⵖ ⵉⵜⵜⵉⵛⴻⵏ ⵜⵓⴷⴰⵔⵜ,
5 ⴰⵇⴰ ⵉⵡⵛⴰ ⴰⵏⴻⵖ ⵜⵓⴷⴰⵔⵜ, ⵡⴰⵔ ⵉⴵⵉ ⵄⵍⴰⵃⵙⴰⴱ ⵍⴻⵅⴷⴰⵢⴻⵎ ⵏ ⵜⵙⴻⴳⴷⴰ ⵉ ⵏⴻⴳⴳⴰ, ⵎⴰⵛⴰ ⵄⵍⴰⵃⵙⴰⴱ ⴰⵔⵔⴻⵃⵎⴻⵜ ⵏⵏⴻⵙ, ⵄⵍⴰⵃⵙⴰⴱ ⴰⵙⵉⵔⴷ ⵏ ⵡⴻⵅⵍⴰⵇ ⵏ ⵊⴷⵉⴷ ⴷ ⵜⴰⵊⴷⵉⴷⴻⵜ ⵙ ⴰⵔⵔⵓⵃ ⵉⵇⴻⴷⴷⵙⴻⵏ
6 ⵉ ⵅⴰⵏⴻⵖ ⴷⴷ-ⵉⴼⴰⵔⵔⴻⵖ ⵙ ⵓⴼⴻⵢⵢⴻⴹ ⵙ ⵢⴰⵙⵓⵄ ⵍⵎⴰⵙⵉⵃ, ⵡⴻⵏⵏⵉ ⴷ ⴰⵏⴻⵖ ⵉⵜⵜⵉⵛⴻⵏ ⵜⵓⴷⴰⵔⵜ,
7 ⵃⵉⵎⴰ ⴰⴷ ⵏⴻⵜⵜⵡⴰⵙⴻⴳⴳⴻⴷ ⵙ ⴰⵔⴹⴰ ⵏⵏⴻⵙ, ⴰⴷ ⵏⴻⴷⵡⴻⵍ ⴷ ⵉⵡⵔⵉⵜⴻⵏ ⵙ ⵓⵙⵉⵜⴻⵎ ⴷⵉ ⵜⵓⴷⴰⵔⵜ ⵉⵜⵜⴷⵓⵎⴰⵏ.
8 ⴰⵡⴰⵍ-ⴰ ⴷⴰⵢⴻⵙ ⵍⵎⴰⵏⴻⵜ, ⵓⵛⴰ ⵏⴻⵛⵛ ⵅⵙⴻⵖ ⵄⴰⵡⴻⴷ ⴰⴷ ⵜⴻⴽⴽⴰⵔⴻⴷ ⴰⴷ ⵜⴱⴻⴷⴷⴻⴷ ⵙ ⵊⵊⴻⵀⴷ ⵅ ⵎⴰⵏ ⴰⵢⴰ, ⵃⵉⵎⴰ ⵉⵏⵏⵉ ⵉⵜⵜⴻⵛⵍⴻⵏ ⵅ ⴰⵔⴻⴱⴱⵉ, ⴰⴷ ⵎⴻⵃⴹⴻⵏ ⵎⴰⵃⴻⵏⴷ ⴰⴷ ⵛⴻⴱⴱⴰⵔⴻⵏ ⵍⴻⴱⴷⴰ ⴷⵉ ⵍⴻⵅⴷⴰⵢⴻⵎ ⵜⵉⵚⴻⴱⵃⴰⵏⵉⵏ. ⵜⵉⵎⴻⵙⵍⴰⵢⵉⵏ-ⴰ ⵛⵏⴰⵏⵜ ⵓ ⴷⴰⵢⵙⴻⵏⵜ ⵏⵏⴼⴰⵄ ⵉ ⵉⵡⴷⴰⵏ.
9 ⵎⴰⵛⴰ ⴱⴻⵄⵄⴻⴷ ⵅ ⵓⵎⵃⴰⵔⵡⴻⴹ ⴰⴱⵓⵀⴰⵍⵉ, ⵅ ⵜⵀⵓⵊⴰ ⵏ ⵜⴰⵚⵉⵍⴰⵜ, ⵅ ⵓⵎⴻⵏⵖⵉ ⵓ ⵅ ⵉⵎⵛⵓⴱⴱⴰⵛ ⵏ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ, ⵎⵉⵏⵣⵉ ⴷⵉ ⵎⴰⵔⵔⴰ ⵎⴰⵏ ⴰⵢⴰ ⵡⴰⵔ ⴷⴰⵢⴻⵙ ⴱⵓ ⵏⵏⴼⴰⵄ, ⴰⵇⴰ ⵎⴰⵏ ⴰⵢⴰ ⴷ ⵍⴱⴰⵟⴻⵍ.
10 ⵎⴰⵍⴰ ⴷⵉⵏ ⵃⴻⴷ ⵉⵙⵙⴱⴻⵟⵟⴰ, ⵉⵜⵜⵅⴻⵚⵚⴰ ⴽⴻⵏⵏⵉⵡ ⴰⴷ ⴰⵙ ⵜⴰⴳⵉⵎ ⴰⵡⴰⵔⵏⵉ ⵍⴰⵎⵉ ⵜ ⵜⵡⴻⴱⴱⵅⴻⵎ ⵉⵛⵜ ⵏ ⵜⵡⴰⵍⴰ ⵓ ⵉⵛⵜ ⵏ ⵜⵡⴰⵍⴰ ⵏⵏⴻⵖⵏⵉ.
11 ⴰⵇⴰ ⵜⴻⵙⵙⵏⴻⵎ ⴱⴻⵍⵍⵉ ⵡⴰⵏⵉⵜⴰ ⴷ ⴰⵎⴼⴰⵔⵢⴰⴹ, ⴰⵇⴰ ⴷ ⴰⵎⴻⴷⵏⵓⴱ, ⴰⵇⴰ ⵉⵜⵜⵡⴰⵃⴰⵙⴻⴱ ⵣⴻⴳ ⵉⵅⴻⴼ ⵏⵏⴻⵙ.
ⴰⵡⴰⵍ ⴷ ⵓⵙⴻⴵⴻⵎ ⴰⵏⴻⴳⴳⴰⵔⵓ
12 ⵅ ⵎⵉⵏⵏⵉ ⵉ ⵖⴰⵔⴻⴽ ⴷⴷ ⵖⴰ ⵙⵙⵇⴰⴷⴻⵖ ⴰⵔⵜⵉⵎⴰⵙ ⵏⵉⵖ ⵜⵉⵛⵉⴽⵓⵙ, ⴻⴳⴳ ⵜⵉⵣⴻⵎⵎⴰⵔ ⵎⴰⵃⴻⵏⴷ ⴰⴷ ⵖⴰⵔⵉ ⴷⴷ-ⵜⴰⵙⴻⴷ ⴷⴻⵖⵢⴰ ⵖⴰⵔ ⵏⵉⴽⵓⴱⵓⵍⵉⵙ, ⵎⵉⵏⵣⵉ ⴰⵇⴰ ⴳⴳⵉⵖ ⴰⴷ ⴷⵉⵏ ⵙⵙⴻⵄⴷⵓⵖ ⵍⵎⴻⵛⵜⴰ.
13 ⵣⴻⵏⴰⵙ, ⴰⵎⵙⴻⵍⵎⴰⴷ ⵏ ⵉⴷⵍⵉⵙⴻⵏ, ⴷ ⴰⴱⵓⵍⵍⵓⵙ, ⴰⵡⵢⴻⵎ ⵜⴻⵏ-ⴷⴷ ⵎⵍⵉⵃ ⴷⴻⴳ ⵡⴻⴱⵔⵉⴷ, ⵃⵉⵎⴰ ⵡⴰⵔ ⴷ ⴰⵙⴻⵏ ⵉⵜⵜⵅⴻⵚⵚⵉ ⵓⵍⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ.
14 ⵏⵉⵜⵏⵉ ⴰⴷ ⵙⵙⴻⵍⵎⴰⴷⴻⵏ ⵉⵏⵏⵉ ⵏⵏⴻⵖ ⵎⴰⵃⴻⵏⴷ ⴰⴷ ⴳⴳⴻⵏ ⵍⴻⵅⴷⴰⵢⴻⵎ ⵜⵉⵚⴻⴱⵃⴰⵏⵉⵏ ⵎⴰⵍⴰ ⴷⵉⵏ ⵍⴻⵃⵡⴻⵊ ⴰⵎⴻⵇⵇⵔⴰⵏ, ⵃⵉⵎⴰ ⵡⴰⵔ ⵜⵜⵉⵍⵉⵏ ⴱⵍⴰ ⵍⵖⵉⴵⴻⵜ.
15 ⵎⴰⵔⵔⴰ ⵡⵉ ⴽⵉⴷⵉ ⴷⴰⵏⵉⵜⴰ ⵜⵜⵙⴻⴵⴰⵎⴻⵏ ⵅⴰⴽ ⵙ ⵍⴻⵀⵏⴰ. ⵙⴻⴵⴻⵎ ⵙ ⵍⴻⵀⵏⴰ ⵄⴰⵡⴻⴷ ⵅ ⵢⵉⵏⵏⵉ ⴷ ⴰⵏⴻⵖ ⵉⵜⵜⴻⵅⵙⴻⵏ ⴷⵉ ⵍ’ⵉⵎⴰⵏ. ⴰⵔⴹⴰ ⴰⴷ ⴽⵉⵡⴻⵎ ⵢⵉⵍⵉ ⵎⴰⵔⵔⴰ ⵉⴷⵡⴻⵎ! ⴰⵎⵉⵏ.