13
ⴰⵡⴰⴹⴻⵄ ⵉ ⵚⵚⵓⵍⵟⴰ
1 ⴻⵊⵊ ⴽⵓⵍ ⵉⵊⵊ ⴰⴷ ⵉⵡⴰⴹⴻⵄ ⵉ ⵚⵚⵓⵍⴰⵟⴰⵜ ⵉⵏⵏⵉ ⵉⴵⴰⵏ ⵙ ⵍⵄⴰⴹⴰⵎⴰ, ⵎⵉⵏⵣⵉ ⵡⴰⵔ ⴷⵉⵏ ⵚⵚⵓⵍⵟⴰ ⵎⵖⵉⵔ ⵙ ⴰⵔⴻⴱⴱⵉ, ⵓⵛⴰ ⵚⵚⵓⵍⴰⵟⴰⵜ ⵜⵉⵏⵏⵉ ⵉⴵⴰⵏ, ⴰⵇⴰ ⵉⵙⵙⴱⴻⴷⴷ ⵉ-ⵜⴻⵏⵜ ⴰⵔⴻⴱⴱⵉ.
2 ⵙ ⵓⵢⴰ ⵡⴻⵏⵏⵉ ⵉ ⵖⴰ ⵉⵎⵎⵄⴰⵍⴰⵏ ⴰⴽ-ⴷ ⵚⵚⵓⵍⵟⴰ, ⵉⵜⵜⴻⵎⵄⴰⵍⴰ ⴰⴽ-ⴷ ⵎⵉⵏ ⵉⵙⵙⴱⴻⴷⴷ ⴰⵔⴻⴱⴱⵉ, ⴷ ⵢⵉⵏⵏⵉ ⵉⵜⵜⴻⵎⵄⴰⵍⴰⵏ ⴰⴷ ⴽⵙⵉⵏ ⵍⵃⵓⴽⵎ ⵏⵙⴻⵏ.
3 ⵎⵉⵏⵣⵉ ⵍⵇⵓⴹⴰⵜ ⵡⴰⵔ ⴵⵉⵏ ⵉ ⵜⵉⴳⴳⵯⵓⴷⵉ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵅⴰⵔ, ⵎⴰⵛⴰ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ. ⵎⴰ ⵜⴻⵅⵙⴻⴷ ⴰⴷ ⵜⵉⵍⵉⴷ ⴱⵍⴰ ⵜⵉⴳⴳⵯⵓⴷⵉ ⵣⵉ ⵚⵚⵓⵍⵟⴰ ⵏ ⵍⵇⵓⴹⴰⵜ? ⴻⴳⴳ ⵎⵉⵏ ⵉⵛⵏⴰⵏ, ⴰⴷ ⴰⵛ ⵢⵉⵍⵉ ⵛⵛⴰⵏ ⵣⵣⴰⵢⴻⵙ,
4 ⵎⵉⵏⵣⵉ ⵚⵚⵓⵍⵟⴰ ⴷ ⵜⴰⵎⵙⴻⵅⵅⴰⵔⵜ ⵏ ⴰⵔⴻⴱⴱⵉ ⵉ ⵍⴻⴼⴹⴻⵍ ⵏⵏⴻⵛ. ⵎⴰⵛⴰ ⵎⴰⵍⴰ ⵜⴻⴳⴳⵉⴷ ⵍⵖⴰⵔ, ⴳⴳⵯⴻⴷ, ⵎⵉⵏⵣⵉ ⵚⵚⵓⵍⵟⴰ ⵡⴰⵔ ⵜⴱⴻⴽⴽⴻⵙ ⵛⴰ ⵙⵙⵉⴼ ⴱⴰⵟⴻⵍ ⵓⵎⵉ ⵏⴻⵜⵜⴰⵜ ⴷ ⵜⴰⵎⵙⴻⵅⵅⴰⵔⵜ ⵏ ⴰⵔⴻⴱⴱⵉ, ⴰⵇⴰ ⵜⵏⴻⵇⵇⴻⵎ ⵙ ⵡⴻⵖⴹⴰⴱ ⵉⵇⴻⵙⵃⴻⵏ ⵅ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ.
5 ⵙ ⵓⵢⴰ ⵉⵜⵜⵅⴻⵚⵚⴰ ⴰⵏⴻⵖ ⴰⴷ ⵏⴻⵟⵟⴰⵄ, ⵡⴰⵔ ⵉⴵⵉ ⵅ ⵙⵙⵉⴱⴱⴻⵜ ⵏ ⵡⴻⵖⴹⴰⴱ ⵡⴰⵀⴰ, ⵎⴰⵛⴰ ⵄⴰⵡⴻⴷ ⵅ ⵙⵙⵉⴱⴱⴻⵜ ⵏ ⵜⵏⴻⴼⵙⴻⵛⵜ.
6 ⵅ ⵙⵙⵉⴱⴱⴻⵜ-ⴰ ⵜᵉⵜⵜⵅⴻⴵⵚⴻⵎ ⴹⴹⴰⵔⵉⴱⴰ ⵉ ⴽⵓⵍ ⴰⵣⴻⴵⵉⴼ ⵓⵎⵉ ⵏⵉⵜⵏⵉ ⴷ ⵉⵎⵙⴻⵅⵅⴰⵔⴻⵏ ⵏ ⴰⵔⴻⴱⴱⵉ ⵉ ⵉⵜⵜⵡⴰⴳⴳⴻⵏ ⵉ ⵎⴰⵏ ⴰⵢⴰ ⵙⵉⵎⴰⵏⵜ ⵏⵏⴻⵙ.
7 ⵅ ⵓⵢⴰ, ⵡⵛⴻⵎ ⵉ ⵎⴰⵔⵔⴰ ⵎⵉⵏ ⴷ ⴰⵙⴻⵏ ⵉⵜⵜⵅⴻⵚⵚⴰⵏ: ⴹⴹⴰⵔⵉⴱⴰ ⵉ ⵡⴻⵏⵏⵉ ⵓⵎⵉ ⴷⴷ-ⵜⵓⵙⴰ ⴹⴹⴰⵔⵉⴱⴰ ⵉ ⴽⵓⵍ ⴰⵣⴻⴵⵉⴼ, ⵍⴻⵅⵍⴰⵚ ⵉ ⵡⴻⵏⵏⵉ ⵓⵎⵉ ⴷⴷ-ⵢⵓⵙⴰ ⵍⴻⵅⵍⴰⵚ, ⴰⵡⴻⵇⵇⴰⵔ ⵉ ⵡⴻⵏⵏⵉ ⵓⵎⵉ ⴷⴷ-ⵢⵓⵙⴰ ⵓⵡⴻⵇⵇⴰⵔ, ⵛⵛⴰⵏ ⵉ ⵡⴻⵏⵏⵉ ⵉⵙⴷⴰⵀⴻⴵⴻⵏ ⵛⵛⴰⵏ.
ⵜⴰⵢⵔⵉ ⴷ ⴰⴽⴻⵎⵎⴻⵍ ⵏ ⵛⵛⴰⵔⵉⵄⴰ
8 ⵡⴰⵔ ⵜⵜⴻⴳⴳⴻⵎ ⴰⵎⴰⵔⵡⴰⵙ ⵖⴰⵔ ⵃⴻⴷ ⵎⵖⵉⵔ ⵡⴻⵏⵏⵉ ⵏ ⵜⴰⵢⵔⵉ ⴰⴽ-ⴷ ⵡⴰⵢⴰⵡⵢⴰ, ⵎⵉⵏⵣⵉ ⵡⴻⵏⵏⵉ ⵉⵜⵜⴻⵅⵙⴻⵏ ⵡⴻⵏⵏⵉ ⴷ ⴰⵙ ⵢⵓⴷⵙⴻⵏ, ⴰⵇⴰ ⵉⴽⴻⵎⵎⴻⵍ ⵛⵛⴰⵔⵉⵄⴰ.
9 ⵎⵉⵏⵣⵉ ⵛⵛⴰⵔⵉⵄⴰ ⵜⴻⵇⵇⴰⵔ ⵄⴰⵡⴻⴷ: “ⵡⴰⵔ ⵣⴻⵏⵏⵉ, ⵡⴰⵔ ⵏⴻⵇⵇ, ⵡⴰⵔ ⵜⵜⵉⵛⴰⵔ, ⵡⴰⵔ ⵜⵜⴰⵙⴻⵎ!”, ⵓⵛⴰ ⵎⴰⵍⴰ ⴷⵉⵏ ⵛⴰ ⵏ ⵜⴻⵡⵚⴻⵢⵢⴻⵜ ⵏⵏⴻⵖⵏⵉ, ⴰⵇⴰ ⴰⵜⴻⵏⵜ ⵎⵓⵏⴻⵏⵜ ⴷⴻⴳ ⵡⴰⵡⴰⵍ-ⴰ: “ⴰⴷ ⵜⴻⵅⵙⴻⴷ ⵊⵊⴰⵔ ⵏⵏⴻⵛ ⴰⵎ ⵉⵅⴻⴼ ⵏⵏⴻⵛ!”
10 ⵜⴰⵢⵔⵉ ⵡⴰⵔ ⵜⵜⴹⴰⵔⵔⵉ ⵛⴰ ⵊⵊⴰⵔ. ⵙ ⵓⵢⴻⵏⵏⵉ ⵜⴰⵢⵔⵉ ⵏⴻⵜⵜⴰⵜ ⴷ ⵍⴻⴽⵎⴰⵍ ⵏ ⵛⵛⴰⵔⵉⵄⴰ.
11 ⴰⵇⴰ ⵙⵙⵏⴻⵖ ⴰⵇⴰ ⵜⴰ ⴷ ⵍⵡⴻⵇⵜ ⴷ ⵜⵙⴰⵄⵄⴻⵜ ⵃⵉⵎⴰ ⴰⴷ ⵏⴼⴰⵇ ⵣⴻⴳ ⵉⴹⴻⵚ, ⵎⵉⵏⵣⵉ ⵍⴻⵅⵅⵓ ⵜⵓⴷⴰⵔⵜ ⵏⵏⴻⵖ ⵜⵓⴷⴻⵙ-ⴷⴷ ⴽⵜⴰⵔ ⵣⴻⴳ ⵡⴰⵎⵉ ⵏⴻⴷⵡⴻⵍ ⵏⵓⵎⴻⵏ.
12 ⵍⴻⵅⵅⵓ ⵜⴻⵄⴷⵓ ⴵⵉⵍⴻⵜ, ⵢⵉⵡⴻⴹ-ⴷⴷ ⵓⵣⵉⵍ. ⴻⵊⵊ ⴰⵏⴻⵖ ⴰⴷ ⵏⴻⵙⵙⴰⵔⵙ ⵍⴻⵅⴷⴰⵢⴻⵎ ⵏ ⵜⴰⴵⴻⵙⵜ, ⴰⴷ ⵏⴻⴽⵙⵉ ⵍⴻⵙⵏⴰⵃ ⵏ ⵜⴼⴰⵡⵜ.
13 ⴻⵊⵊ ⴰⵏⴻⵖ ⴰⴷ ⵏⵓⵢⵓⵔ ⵙ ⵓⵛⵓⵡⵡⴰⵔ ⴰⵅⵎⵉ ⴷ ⴰⵣⵉⵍ, ⵡⴰⵔ ⵉⴵⵉ ⴷⵉ ⵣⵣⵀⵓ ⴰⴱⴰⵔⵛⴰⵏ, ⵍⴰ ⴷⴻⴳ ⵓⵖⴻⵍⵍⵉ, ⵍⴰ ⴷⵉ ⵜⴻⵅⵎⵓⵊⵉ ⵏ ⴼⴰⵔⵇ-ⵛⵛⵖⴻⵍ ⴷⵉ ⵇⴰⵎⴰ ⵓⵍⴰ ⴷⴻⴳ ⵓⵎⴻⵏⵖⵉ ⴷ ⵍⴻⵃⵙⴻⴷ,
14 ⵎⴰⵛⴰ ⴰⵔⴹⴻⵎ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ, ⵡⴰⵔ ⵜⵜⵉⵛⴻⵎ ⵜⴰⵢⵏⵉⵜ ⵉ ⵏⵏⴻⵛⵡⴰⵜ ⵏ ⵡⴻⵢⵙⵓⵎ ⵏⵡⴻⵎ.