14
ⴰⵖⴻⵍⵍⴻⴱ ⵏ ⴰⵙⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵅ ⵣⴰⵔⴰⵃ
1 ⴰⵙⴰ ⵉⴳⴳⴰ ⵎⵉⵏ ⵉⴵⴰⵏ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵙ.
2 ⵏⴻⵜⵜⴰ ⵉⴽⴽⴻⵙ ⵉⵄⴰⵍⵟⴰⵔⴻⵏ ⵏ ⵉⵔⴻⴱⴱⵉⵜⴻⵏ ⵉⵖⵔⵉⴱⴻⵏ ⴷ ⵍⴻⴳⵄⵓⴷⵉ ⵓⵛⴰ ⵢⴰⵔⵥⴰ ⵉⵎⴰⵢⴹⵓⵜⴻⵏ ⵉⵇⴻⴷⴷⵙⴻⵏ ⵓⵛⴰ ⵉⵀⴷⴻⵎ ⵜⵉⵔⴻⴱⴱⵉⵏ ⵏ ⵛⵡⴰⵔⵜⵉ.
3 ⵏⴻⵜⵜⴰ ⵉⵏⵏⴰ ⵉ ⵢⴰⵀⵓⴷⴰ, ⴰⴷ ⴰⵔⵣⵓⵏ ⵙⵉⴷⵉ, ⴰⵔⴻⴱⴱⵉ ⵏ ⵍⴻⵊⴷⵓⴷ ⵏⵙⴻⵏ ⵓⵛⴰ ⴰⴷ ⴹⴼⴰⵔⴻⵏ ⵛⵛⴰⵔⵉⵄⴰ ⴷ ⵜⴻⵡⵚⴻⵢⵢⴻⵜ.
4 ⵏⴻⵜⵜⴰ ⵉⴽⴽⴻⵙ ⵄⴰⵡⴻⴷ ⵍⴻⴳⵄⵓⴷⵉ ⴷ ⵉⴱⵉⵍⴰⵔⴻⵏ ⵏ ⴰⵔⴻⴱⴱⵉ ⵏ ⵜⴼⵓⵛⵜ ⵣⵉ ⵎⴰⵔⵔⴰ ⵜⵉⵏⴻⴷⴷⴰⵎ ⵏ ⵢⴰⵀⵓⴷⴰ. ⵜⴰⴳⴻⵍⴷⵉⵜ ⵜⵓⵖⴰ ⵖⴰⵔⴻⵙ ⵍⵀⵓⴷⵏⴻⵜ ⵙⴰⴷⵓ ⵏⴻⵜⵜⴰ.
5 ⵉⴱⵏⴰ ⵜⵉⵏⴻⴷⴷⴰⵎ ⵉⴼⴰⵔⵢⴻⵏ ⴷⵉ ⵢⴰⵀⵓⴷⴰ ⵎⴰⵖⴰⵔ ⵜⴰⵎⵎⵓⵔⵜ ⵜⵓⵖⴰ ⴷⴰⵢⴻⵙ ⵍⵀⵓⴷⵏⴻⵜ. ⵡⴰⵔ ⵜⵓⵖⵉ ⴷⵉⵏ ⴰⵎⴻⵏⵖⵉ ⴰⴽⵉⴷⴻⵙ ⴷⴻⴳ ⵉⵙⴻⴳⴳⵯⵓⵙⴰ ⵏⵏⵉ, ⵎⵉⵏⵣⵉ ⵙⵉⴷⵉ ⵉⵡⵛⴰ ⴰⵙ ⵍⵀⵓⴷⵏⴻⵜ.
6 ⵏⴻⵜⵜⴰ ⵉⵏⵏⴰ ⵉ ⵢⴰⵀⵓⴷⴰ: “ⴻⵊⵊ ⴰⵏⴻⵖ ⴰⴷ ⵏⴻⴱⵏⴰ ⵜⵉⵏⴻⴷⴷⴰⵎ-ⴰ ⵓⵛⴰ ⴰⴷ ⵜⴻⵏⵜ ⵏⴻⵙⵙⴰⵔ ⵙ ⵍⴻⵃⵢⵓⴹ ⴷ ⵍⴱⵓⵔⵊⴰⵜ ⴷ ⵜⴻⵡⵡⵓⵔⴰ ⴷ ⵉⵄⵓⵎⴰⴷ ⵉ ⵓⴱⴻⵍⵍⴻⵄ, ⵎⴰⵖⴰⵔ ⵜⴰⵎⵎⵓⵔⵜ ⵄⴰⴷ ⵣⵣⴰⵜⵏⴻⵖ ⵙ ⵍⵀⵓⴷⵏⴻⵜ, ⵎⵉⵏⵣⵉ ⵏⴻⵛⵛⵉⵏ ⵏⴰⵔⵣⵓ ⵅ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵏⴰⵔⵣⵓ ⵅⴰⵙ ⵓ ⵏⴻⵜⵜⴰ ⵉⵡⵛⴰ ⴰⵏⴻⵖ ⵍⵀⵓⴷⵏⴻⵜ.” ⵓ ⵏⵉⵜⵏⵉ ⴱⵏⴰⵏ ⵓⵛⴰ ⴼⴻⵍⵃⴻⵏ.
7 ⴰⵙⴰ ⵜⵓⵖⴰ ⵖⴰⵔⴻⵙ ⵉⵊⵊ ⵏ ⵍⵄⴻⵙⴽⴰⵔ ⵏ ⵜⴻⵍⵜ-ⵎⵢⴰⵜ-ⴰⵍⴻⴼ ⵏ ⵢⴻⵔⵢⴰⵣⴻⵏ ⵣⵉ ⵢⴰⵀⵓⴷⴰ, ⵉⵏⵏⵉ ⵉⴽⵙⵉⵏ ⵜⴰⵙⴻⴷⴷⴰⵔⵜ ⵏ ⵓⵄⴻⵙⴽⴰⵔⵉ ⵜⴰⵎⴻⵇⵇⵔⴰⵏⵜ ⴷ ⵍⴰⵏⵙⴰ, ⵎⵉⵜⴰⵢⴻⵏ ⵓ-ⵜⵎⴻⵏⵢⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ ⵣⵉ ⴱⵉⵏⵢⴰⵎⵉⵏ, ⵉⵏⵏⵉ ⵢⴰⵔⴻⴱⴱⵓⵏ ⵜⴰⵙⴻⴷⴷⴰⵔⵜ ⵏ ⵓⵄⴻⵙⴽⴰⵔⵉ ⵓ ⵣⴻⵎⵎⴰⵔⴻⵏ ⵅ ⵍⵇⴻⵡⵙ. ⵏⵉⵜⵏⵉ ⵎⴰⵔⵔⴰ ⵜⵓⵖⴰ ⴰⵜⴻⵏ ⴷ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ.
8 ⵉⴼⴼⴻⵖ ⴰⴽⵓⵛⵉ, ⵇⵇⴰⵔⴻⵏ ⴰⵙ ⵣⴰⵔⴰⵃ ⵉ ⵓⵎⴻⵏⵖⵉ ⴰⴽⵉⴷⵙⴻⵏ ⵙ ⵢⵉⵊⵊ ⵏ ⵍⵄⴻⵙⴽⴰⵔ ⵏ ⵉⵊⵊ ⵏ ⵎⴻⵍⵢⵓⵏ ⵏ ⵢⴻⵔⵢⴰⵣⴻⵏ ⴷ ⵜⴻⵍⵜ-ⵎⵢⴰ ⵏ ⵉⴽⴰⵔⵔⵓⵜⴻⵏ. ⵏⴻⵜⵜⴰ ⵢⵓⵙⴰ-ⴷⴷ ⴰⵍ ⵎⴰⵔⵉⵛⴰ.
9 ⵉⴼⴼⴻⵖ ⴰⵙⴰ ⵉ ⵓⵎⵙⴰⴳⴰⵔ ⴰⴽⵉⴷⴻⵙ ⵓⵛⴰ ⵙⴻⴷⴷⴻⵏ ⵏⵉⵜⵏⵉ ⵉⵅⴻⴼ ⵏⵙⴻⵏ ⵉ ⵓⵎⴻⵏⵖⵉ ⴷⵉ ⵜⴻⵖⵣⵓⵔⵜ ⵏ ⵚⴰⴼⴰⵜⴰ ⵖⴰⵔ ⵎⴰⵔⵉⵛⴰ.
10 ⴰⵙⴰ ⵉⵍⴰⵖⴰ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵙ, ⵉⵏⵏⴰ: “ⴰ ⵙⵉⴷⵉ, ⴰⵢⴰ ⵉⵙⵀⴻⵍ ⵅⴰⴽ ⵃⵉⵎⴰ ⴰⴷ ⵜⴰⴷⴼⴻⴷ ⵊⴰⵔ ⵢⴻⵏⵏⵉ ⴷⴻⴳ ⵡⴰⵟⵟⴰⵙ ⴷ ⵢⴻⵏⵏⵉ ⵡⴰⵔ ⵖⴰⵔ ⵉⴵⵉ ⵊⵊⴻⵀⴷ. ⵄⴰⵡⴻⵏ ⴰⵏⴻⵖ, ⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵎⴰⵖⴰⵔ ⵏⴻⵜⵜⵛⴻⵍ ⵅⴰⴽ ⵓ ⵏⵓⵙⴰ-ⴷⴷ ⵇⵉⴱⴰⵍⵜ ⵉ ⵍⵖⴰⵛⵉ-ⵢⴰ ⵙ ⵢⵉⵙⴻⵎ ⵏⵏⴻⵛ. ⴰ ⵙⵉⴷⵉ, ⵛⴻⴽ ⴷ ⴰⵔⴻⴱⴱⵉ ⵏⵏⴻⵖ, ⵡⴰⵔ ⵜⵜⴻⵊⵊⵉ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵣ ⴰⴷ ⴰⴽⵉⴷⴻⴽ ⵉⵎⵎⵄⴰⵍⴰ.”
11 ⵓⵛⴰ ⵙⵉⴷⵉ ⵉⵡⵜⴰ ⴰⵢⵜ ⵏ ⴽⵓⵛ ⵣⵣⴰⵜ ⵉ ⵡⵓⴷⴻⵎ ⵏ ⴰⵙⴰ ⴷ ⵢⴰⵀⵓⴷⴰ, ⵓⵛⴰ ⴰⵔⴻⵡⵍⴻⵏ ⴰⵢⵜ ⵏ ⴽⵓⵛ.
12 ⴰⵙⴰ ⴷ ⵍⴳⴻⵏⵙ ⵉ ⵜⵓⵖⴰ ⴰⴽⵉⴷⴻⵙ, ⴹⴼⴰⵔⴻⵏ ⵜⴻⵏ ⴰⵍ ⵊⴰⵔⴰⵔ. ⵡⴹⴰⵏ ⴰⵟⵟⴰⵙ ⵣⴻⴳ ⴰⵢⵜ ⵏ ⴽⵓⵛ ⴰⵍⴰⵎⵉ ⵡⴰⵔ ⵣⴻⵎⵎⴰⵔⴻⵏ ⴰⴷ ⴱⴻⴷⴷⴻⵏ ⵄⴰⴷ, ⵎⵉⵏⵣⵉ ⵏⵉⵜⵏⵉ ⵜⵜⵡⴰⵖⴻⵍⴱⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⴷ ⵍⵄⴻⵙⴽⴰⵔ ⵏⵏⴻⵙ. ⵏⵉⵜⵏⵉ ⵟⵟⴼⴻⵏ ⵉⵛⵜ ⵏ ⵜⴽⴻⵛⵛⴰⴹⵜ ⴷ ⵜⴰⵎⴻⵇⵇⵔⴰⵏⵜ.
13 ⵏⵉⵜⵏⵉ ⵡⵜⵉⵏ ⵎⴰⵔⵔⴰ ⵜⵉⵏⴻⴷⴷⴰⵎ ⵉ ⴷⴷ-ⵉⵏⵏⴹⴻⵏ ⵉ ⵊⴰⵔⴰⵔ, ⵎⴰⵖⴰⵔ ⴰⵔⵔⴻⵀⴱⴻⵜ ⵏ ⵙⵉⴷⵉ ⵜⴻⵡⴹⴰ-ⴷⴷ ⵅⴰⵙⴻⵏⵜ. ⵏⵉⵜⵏⵉ ⴽⴻⵛⵛⴹⴻⵏ ⵎⴰⵔⵔⴰ ⵜⵉⵏⴻⴷⴷⴰⵎ, ⵎⴰⵖⴰⵔ ⵜⵓⵖⴰ ⵜⴱⴰⵏ-ⴷⴷ ⴷⴰⵢⵙⴻⵏⵜ ⴰⵟⵟⴰⵙ ⵏ ⵜⴽⴻⵛⵛⴰⴹⵜ.
14 ⵏⵉⵜⵏⵉ ⵀⴻⴷⵎⴻⵏ ⵓⵍⴰ ⴷ ⵉⵇⵉⴹⴰⵏ ⵏ ⵍⵎⴰⵍ ⵓⵛⴰ ⵟⵟⴼⴻⵏ ⵓⴵⵉ ⴷ ⵉⵍⴻⵖⵎⴰⵏ. ⵅⴻⵏⵏⵉ ⵄⴻⵇⴱⴻⵏ ⵖⴰⵔ ⵓⵔⵛⴰⵍⵉⵎ.