ⴰⴷⵍⵉⵙ ⵉⵇⴻⴷⴷⵙⴻⵏ ⵉⵥⴻⵀⵀⵉⴷⴻⵏ 88

1 ⵉⵣⵍⵉ, ⴰⵣⴻⵀⵀⴻⴷ ⵏ ⴰⵢⵜ ⵏ ⵇⵓⵔⴰⵃ.

ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ, ⵙ ⵜⴻⵖⵏⵉⵏⵜ ⵏ ‘ⵉⵣⵍⵉ ⵏ ⵡⴻⵛⴹⴰⵏ’ ⵖⴰⵔ ⵍⴻⵃⵚⴰⵔⴰⵜ.

ⴰⵅⴻⵎⵎⵉ ⵏ ⵀⴰⵢⵎⴰⵏ, ⴰⵣⵔⴰⵃⵉ.

2 ⴰ ⵙⵉⴷⵉ, ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ,

ⴷⴻⴳ ⵡⴰⵙⵙ ⵉ ⴷⵉ ⴷⴷ ⵖⴰ ⵙⵖⵓⵢⴻⵖ ⵖⴰⵔⴻⴽ

ⵙ ⴵⵉⵍⴻⵜ,

3 ⴻⵊⵊ ⵅⴻⵏⵏⵉ ⴰⴷ ⴷⴷ-ⵜⴰⵙ ⵜⵥⴰⴵⵉⵜ ⵉⵏⵓ ⵣⵣⴰⵜⴻⴽ,

ⴻⵡⵛ ⴰⵎⴻⵣⵣⵓⵖ ⵏⵏⴻⵛ ⵉ ⵓⵍⴰⵖⵉ ⵉⵏⵓ.

4 ⵎⴰⵖⴰⵔ ⵍⴻⵄⵎⴰⵔ ⵉⵏⵓ ⵉⵊⵊⵉⵡⴻⵏ ⵙ ⵍⵎⵓⵚⵉⴱⴰⵜ,

ⵜⵓⴷⴰⵔⵜ ⵉⵏⵓ ⵜⵓⴷⴻⵙ-ⴷⴷ ⵍⴰⵅⴰⵔⵜ.

5 ⵏⴻⵛⵛ ⵜⵜⵡⴰⵃⴻⵙⵙⴰⴱⴻⵖ ⴰⵎ ⵢⵉⵏⵏⵉ ⴷⴷ-ⵉⵀⴻⴽⴽⵡⴰⵏ

ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ,

ⴰⵎ ⵉⵊⵊ ⵏ ⵡⴻⵔⵢⴰⵣ

ⵓⵎⵉ ⵡⴰⵔ ⴷⴰⵢⴻⵙ ⵊⵊⵀⴻⴷ ⵄⴰⴷ.

6 ⴰⵇⴰ ⵜⵜⵡⴰⵃⵓⵣⴻⵖ ⵊⴰⵔ ⵉⵎⴻⵜⵜⴰⵏ,

ⴰⵎ ⵢⵉⵏⵏⵉ ⵉⵜⵜⵡⴰⵏⵖⴻⵏ

ⵉⵏⵏⵉ ⵉⵣⵣⵍⴻⵏ ⴷⴻⴳ ⵡⴻⵏⴹⴻⵍ,

ⵉⵏⵏⵉ ⵡⴰⵔ ⵜⴻⵏ ⵜᵉⵜⵜⵉⴷⴰⵔⴻⴷ ⵄⴰⴷ,

ⵜⵜⵡⴰⵇⴻⴹⵄⴻⵏ ⵏⵉⵜⵏⵉ ⵣⴻⴳ ⵓⴼⵓⵙ ⵏⵏⴻⵛ.

7 ⵛⴻⴽ ⵜⴻⴳⴳⵉⴷ ⴰⵢⵉ

ⴷⴻⴳ ⵡⴻⵏⴹⴻⵍ ⵢⵓⴵⵖⴻⵏ ⵇⴰⵄ,

ⴷⵉ ⵜⴰⴵⴻⵙⵜ, ⴷⵉ ⵍⴰⴵⴰⵖ.

8 ⴰⵙⵄⴰⵔ ⵏⵏⴻⵛ ⵉⴷⵇⴻⵍ ⵅⴰⴼⵉ ⴰⵟⵟⴰⵙ,

ⵙ ⵎⴰⵔⵔⴰ ⵍⴻⵎⵡⴰⵊ ⵏ ⵡⴻⵙⵄⴰⵔ ⵏⵏⴻⵛ

ⵜⴻⵙⵙⴷⴻⴵⴻⴷ ⴰⵢⵉ. ⵙⵉⵍⴰⵀ.

9 ⵉⵎⵇⴰⵔⵔⴰⴱⴻⵏ ⵉⵏⵓ

ⵜⴻⵙⵙⵉⴳⴳⵯⴻⵊⴻⴷ ⵉ-ⵜⴻⵏ ⵅⴰⴼⵉ,

ⵜⴰⵔⵔⵉⴷ ⴰⵢⵉ ⴷ ⵏⵏⵄⵉ ⵉ ⵏⵉⵜⵏⵉ.

ⵉⵜⵜⵡⴰⴱⴻⵍⵍⴻⵄ ⵅⴰⴼⵉ,

ⵡⴰⵔ ⵣⴻⵎⵎⴰⵔⴻⵖ ⴰⴷ ⴷⴷ-ⴼⴼⵖⴻⵖ.

10 ⵜⵉⵟⵟ ⵉⵏⵓ ⵜⴻⵄⵎⴻⵛ ⵙ ⵍⴻⵖⴱⴻⵏ.

ⴰ ⵙⵉⴷⵉ, ⴰⵙⵙ ⵎⴰⵔⵔⴰ ⵜⵜⵍⴰⵖⵉⵖ ⵖⴰⵔⴻⴽ,

ⵏⴻⵛⵛ ⵙⵙⵡⵉⵥⵥⴹⴻⵖ ⵉⴼⴰⵙⵙⴻⵏ ⵉⵏⵓ ⵖⴰⵔⴻⴽ.

11 ⵎⴰ ⴰⴷ ⵜⴻⴳⴳⴻⴷ ⵉⵛⵜ ⵏ ⵍⵎⵓⵄⵊⵉⵣⴰ

ⴷⴻⴳ ⵉⵎⴻⵜⵜⴰⵏ?

ⵏⵉⵖ ⴰⴷ ⴷⴷ-ⴽⴽⴰⵔⴻⵏ ⵍⴻⵅⵢⴰⵍⴰⵜ ⵏ ⵉⵎⴻⵜⵜⴰⵏ,

ⵎⴰ ⴰⴷ ⵛⴻⴽ ⵇⴰⴷⴰⵏ? ⵙⵉⵍⴰⵀ.

12 ⵎⴰ ⴰⴷ ⴱⴰⵔⵔⵃⴻⵏ

ⵙ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ

ⴷⴻⴳ ⵡⴻⵏⴹⴻⵍ, ⵙ ⵍⴰⵎⴰⵏ ⵏⵏⴻⵛ

ⴷⵉ ⵜⴻⵙⵔⴰⴼⵜ ⵏ ⵓⵀⴻⵍⵍⴻⴽ?

13 ⵎⴰ ⴰⴷ ⵜⵜⵡⴰⵙⵙⵏⴻⵏⵜ ⵍⵎⵓⵄⵊⵉⵣⴰⵜ ⵏⵏⴻⵛ

ⴷⵉ ⵜⴰⴵⴻⵙⵜ,

ⵜⴰⵙⴻⴳⴷⴰ ⵏⵏⴻⵛ ⴷⵉ ⵜⴻⵎⵎⵓⵔⵜ ⵏ ⵜⴰⵜⵜⵓⵜ?

14 ⴰ ⵙⵉⴷⵉ, ⵏⴻⵛⵛ ⵜⵜⵍⴰⵖⵉⵖ ⵛⴻⴽ,

ⵜⴰⵥⴰⴵⵉⵜ ⵉⵏⵓ ⵜᵉⵜⵜⴰⵙ-ⴷⴷ ⵣⵣⴰⵜⴻⴽ ⵖⴰⵔ ⵓⵜⴻⴼⴼⵓ.

15 ⵎⴰⵢⴻⵎⵎⵉ, ⴰ ⵙⵉⴷⵉ,

ⵜⵏⴻⵟⵟⴰⵔⴻⴷ ⵍⴻⵄⵎⴰⵔ ⵉⵏⵓ,

ⵎⴰⵢⴻⵎⵎⵉ ⵜᵉⵙⵙⵏⵓⴼⴼⴰⵔⴻⴷ

ⵓⴷⴻⵎ ⵏⵏⴻⵛ ⵣⵣⴰⵢⵉ?

16 ⵣⵉ ⵜⴻⵎⵥⵉ ⵉⵏⵓ ⵏⴻⵛⵛ ⴷⵉ ⵍⴻⵖⴱⴻⵏ

ⵓ ⴳⴳⵓⵔⴻⵖ ⵖⴰⵔ ⵓⵏⵓⵔⵉ,

ⴽⵙⵉⵖ ⵉⵙⵏⴻⵅⵔⵉⵄⴻⵏ ⵏⵏⴻⵛ ⴹⵉⴷⴷ ⵉⵏⵓ,

ⵜⵜⵡⴰⵃⵚⴰⵔⴻⵖ ⵣⵣⴰⵢⵙⴻⵏ.

17 ⵜⴻⵜⵜⴻⴽⴽ ⵅⴰⴼⵉ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵛ,

ⵉⵜⵜⴻⵃⵃⴰ ⴰⵢⵉ ⵓⵙⴻⴳⴳⵯⵉⴷ ⵏⵏⴻⵛ.

18 ⴰⵙⵙ ⵎⴰⵔⵔⴰ ⵉⵜⵜⴻⵏⵏⴻⴹ ⴰⵢⵉ-ⴷⴷ ⴰⵎ ⵡⴰⵎⴰⵏ,

ⵉⵜⵜⵇⵓⵡⵡⴰⵔ ⴰⵢⵉ-ⴷⴷ ⵎⴰⵔⵔⴰ.

19 ⴰⵎⵄⵉⵣⵣ ⵉⵏⵓ ⴷ ⵓⵎⴻⴷⴷⵓⴽⴽⴻⵍ ⵉⵏⵓ

ⵜⴻⵙⵙⵉⴳⴳⵯⴻⵊⴻⴷ ⵉ-ⵜⴻⵏ ⵅⴰⴼⵉ,

ⵉⵏⵏⵉ ⴷ ⴰⵢⵉ ⵉⵙⵙⵏⴻⵏ ⵉⵏⵓ

ⴰⵇⴰ ⴰⵜⴻⵏ ⵜⵜⵡⴰⵍⴻⵃⵃⴼⴻⵏ ⵙ ⵜⴰⴵⴻⵙⵜ.