80
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ.
ⵙ ⵜⴻⵖⵏⵉⵏⵜ ⵏ ‘ⵜⵍⵉⵍⵍⵉⵛⵉⵏ’.
ⵛⵛⵀⴰⴷⴻⵜ ⵏ ⴰⵙⴰⴼ. ⴰⵣⴻⵀⵀⴻⴷ.
2 ⵙⴻⵍ, ⴰ ⴰⵎⴻⴽⵙⴰⵡ ⵏ ⵉⵙⵔⴰⵉⵍ,
ⵛⴻⴽ ⴷ ⵡⴻⵏⵏⵉ ⵢⴰⵔⴻⴽⴽⵡⴻⵙⴻⵏ ⵢⵓⵙⵓⴼ
ⴰⵎ ⵡⵓⴵⵉ,
ⵛⴻⴽ ⴷ ⵡⴻⵏⵏⵉ ⵉⵜⵜⵖⵉⵎⴰⵏ ⵅ ⵉⴽⵉⵔⵓⴱⴻⵏ,
ⴱⴰⵏ-ⴷⴷ ⴷⵉ ⵜⵉⵙⵙⵉⵇⵜ!
3 ⵙⴻⴽⴽⴰⵔ ⵊⵊⴻⵀⴷ ⴰⵎⴻⵇⵇⵔⴰⵏ ⵏⵏⴻⵛ
ⵣⵣⴰⵜ ⵉ ⵡⵓⴷⴻⵎ ⵏ ⵉⴼⵔⴰⵢⵉⵎ
ⴷ ⴱⵉⵏⵢⴰⵎⵉⵏ ⴷ ⵎⴰⵏⴰⵙⵙⴰ,
ⴰⵙ-ⴷⴷ ⵃⵉⵎⴰ ⴰⴷ ⴰⵏⴻⵖ ⵜⴼⴻⴽⴽⴻⴷ.
4 ⴰ ⴰⵔⴻⴱⴱⵉ, ⴰⵔⵔ ⴰⵏⴻⵖ-ⴷⴷ,
ⴻⵊⵊ ⵓⴷⴻⵎ ⵏⵏⴻⵛ ⴰⴷ ⵅⴰⵏⴻⵖ ⵢⴰⵔⵖ,
ⵅⴻⵏⵏⵉ ⴰⴷ ⵏⴻⵜⵜⵡⴰⴼⴻⴽⴽ.
5 ⴰ ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ,
ⵎⴻⵛⵃⴰⵍ ⵉ ⵖⴰ ⵜⴻⴽⴽⴻⴷ ⵜᵉⵜⵜⵅⴻⵢⵢⴰⵇⴻⴷ
ⵖⴰⵔ ⵜⵥⴰⴵⵉⵜ ⵏ ⵍⴳⴻⵏⵙ ⵏⵏⴻⵛ?
6 ⵛⴻⴽ ⵜⴻⵙⵙⴻⵛⵛⴻⴷ ⵜⴻⵏ
ⵙ ⵡⴻⵖⵔⵓⵎ ⵏ ⵉⵎⴻⵟⵟⴰⵡⴻⵏ,
ⵜⴰⵔⵔⵉⴷ ⵜⴻⵏ ⴰⴷ ⵙⵡⴻⵏ ⵉⵎⴻⵟⵟⴰⵡⴻⵏ
ⵙ ⵉⵊⵊ ⵏ ⵍⵎⵉⵊⴰⵍ ⵉⵜⵜⵡⴰⴳⴳⴻⵏ.
7 ⵛⴻⴽ ⵜⴻⴳⴳⵉⴷ ⴰⵏⴻⵖ
ⴷ ⵉⵛⵜ ⵏ ⵜⵛⴰⵎⵎⴰ ⵏ ⵉⵎⵛⵓⴱⴱⴻⵛⴻⵏ
ⵉ ⵊⵊⵉⵔⴰⵏ ⵏⵏⴻⵖ,
ⵍⵄⴻⴷⵢⴰⵏ ⵏⵏⴻⵖ
ⵙⵜᵉⵀⴻⵣⵣⴰⵏ ⵣⵣⴰⵢⵏⴻⵖ ⵊⴰⵔ ⴰⵙⴻⵏ.
8 ⴰⵔⵔ ⴰⵏⴻⵖ-ⴷⴷ, ⴰ ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ,
ⴻⵊⵊ ⵓⴷⴻⵎ ⵏⵏⴻⵛ ⴰⴷ ⵅⴰⵏⴻⵖ ⵢⴰⵔⵖ,
ⵅⴻⵏⵏⵉ ⴰⴷ ⵏⴻⵜⵜⵡⴰⴼⴻⴽⴽ.
9 ⵛⴻⴽ ⵜⵇⴻⵍⵄⴻⴷ ⵉⵛⵜ ⵏ ⵜⵣⴰⵢⴰⵔⵜ ⵣⵉ ⵎⵉⵚⵔⴰ,
ⵜⵓⵥⵥⵍⴻⴷ ⵅ ⵍⴻⴳⵏⵓⵙ, ⵓⵛⴰ ⵜⴻⵥⵥⵓⴷ-ⵉ-ⵜⵜ ⴷⵉⵏ.
10 ⵛⴻⴽ ⵜⴻⵙⵙⵡⴻⵊⴷⴻⴷ ⴰⵙ ⴰⵎⵛⴰⵏ
ⵓ ⵜⴰⵔⵔⵉⴷ ⵜⵜ-ⵉ-ⴷⴷ ⴰⴷ ⵜⴻⵡⵡⴻⵜ ⵉⵥⴻⵡⵔⴰⵏ,
ⵜⵄⴻⵎⵎⴰⵔ ⵜⵣⴰⵢⴰⵔⵜ ⵎⴰⵔⵔⴰ ⵜⴰⵎⵎⵓⵔⵜ.
11 ⵜⵜⵡⴰⵙⵙⴷⵓⵔⵢⴻⵏ ⵉⴷⵓⵔⴰⵔ ⵙ ⵜⵉⵍⵉ ⵏⵏⴻⵙ,
ⵜⵉⵛⴻⵊⵊⵓⵔⴰ ⵏ ⵜⴻⵏⴳⴻⵍⵜ ⵏ ⴰⵔⴻⴱⴱⵉ
ⵙ ⵍⴻⴼⵔⵓⵄ ⵏⵏⴻⵙ.
12 ⵜⴻⴳⴳⴰ ⵜⵉⵙⴻⴹⵡⵉⵏ ⵏⵏⴻⵙ
ⴰⴷ ⴰⵡⴹⴻⵏⵜ ⴰⵍ ⵍⴻⴱⵃⴰⵔ,
ⵉⴼⴻⵜⵡⴰⵏ ⵏⵏⴻⵙ ⵉⵣⵉⵢⵣⴰⵡⴻⵏ
ⴰⵍ ⵉⵖⵣⴰⵔ ⵏ ⵍⴼⵓⵔⴰⵟ.
13 ⵎⴰⵢⴻⵎⵎⵉ ⵜⵖⴻⴹⵍⴻⴹ ⵉⵖⴻⴱⵔⴰⵡⴻⵏ ⵏⵏⴻⵙ,
ⴰⵍⴰⵎⵉ ⵎⴰⵔⵔⴰ ⵉⵏⵏⵉ ⴷⴷ-ⵉⵜⵜⴻⴽⴽⴻⵏ
ⵅ ⵡⴻⴱⵔⵉⴷ ⵍⴻⵇⵇⴹⴻⵏ ⵜⵜ?
14 ⵉⵍⴻⴼ ⵣⴻⴳ ⵡⴻⵣⵖⴰⵔ ⵉⵇⵍⴻⴱ ⵜⴰⵣⴰⵢⴰⵔⵜ,
ⵎⴰⵔⵔⴰ ⵎⵉⵏ ⵉⵏⵜⴻⵏⵀⴻⵣⵣⴰⵏ ⴷⴻⴳ ⵉⵢⵢⴰⵔ,
ⴰⵇⴰ ⵉⵀⴷⴰ ⵉ-ⵜⵜ.
15 ⴰ ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ,
ⴷⵡⴻⵍ-ⴷⴷ ⵖⴰⵔⵏⴻⵖ,
ⵙⵉⵊⵊ-ⴷⴷ ⵣⴻⴳ ⵓⵊⴻⵏⵏⴰ,
ⵓ ⵅⵣⴰⵔ, ⴰⵔⵣⴻⴼ ⵜⴰⵣⴰⵢⴰⵔⵜ-ⴰ,
16 ⵜⵜⵀⵉⵍⵍⴰ ⴷⵉ ⵜⵣⴰⵢⴰⵔⵜ
ⵜⴻⵏⵏⵉ ⵉⵥⵥⵓ ⵓⴼⵓⵙ ⵏⵏⴻⵛ ⴰⴼⵓⵙⵉ,
ⴷⵉ ⵎⵎⵉⵛ ⵏⵏⵉ ⵜⴻⵙⵙⵊⴻⵀⴷⴻⴷ ⵉ ⵢⵉⵅⴻⴼ ⵏⵏⴻⵛ.
17 ⴰⵇⴰ ⵜᵉⵜⵜⵡⴰⵙⵙⴻⵛⵎⴻⴹ ⵙ ⵜⵎⴻⵙⵙⵉ, ⵜᵉⵜⵜⵡⴰⵇⴹⴻⵄ.
ⵣⴻⴳ ⵓⵙⴻⴳⴳⵯⴻⴷ ⵏ ⵡⵓⴷⴻⵎ ⵏⵏⴻⵛ
ⴰⴷ ⵡⴻⴷⴷⴰⵔⴻⵏ.
18 ⴻⵊⵊ ⴰⴼⵓⵙ ⵏⵏⴻⵛ ⴰⴷ ⵢⵉⵍⵉ
ⴰⴽ-ⴷ ⵡⴻⵔⵢⴰⵣ ⵏ ⵓⴼⵓⵙ ⵏⵏⴻⵛ ⴰⴼⵓⵙⵉ,
ⴰⴽ-ⴷ ⵎⵎⵉⵙ ⵏ ⴱⵏⴰⴷⴻⵎ
ⵡⴻⵏⵏⵉ ⵜⴻⵙⵙⵊⴻⵀⴷⴻⴷ ⵉ ⵢⵉⵅⴻⴼ ⵏⵏⴻⵛ.
19 ⵅⴻⵏⵏⵉ ⵡⴰⵔ ⵅⴰⴽ ⵏⵃⴻⵢⵢⴻⴷ ⵛⴰ.
ⴻⵊⵊ ⴰⵏⴻⵖ ⴰⴷ ⵏⴻⴷⴷⴰⵔ,
ⵅⴻⵏⵏⵉ ⴰⴷ ⵏⵍⴰⵖⴰ ⵅ ⵢⵉⵙⴻⵎ ⵏⵏⴻⵛ.
20 ⴰ ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ,
ⴰⵔⵔ ⴰⵏⴻⵖ-ⴷⴷ,
ⴻⵊⵊ ⵓⴷⴻⵎ ⵏⵏⴻⵛ ⴰⴷ ⵅⴰⵏⴻⵖ ⵢⴰⵔⵖ,
ⵅⴻⵏⵏⵉ ⴰⴷ ⵏⴻⵜⵜⵡⴰⴼⴻⴽⴽ.