ⴰⴷⵍⵉⵙ ⵉⵇⴻⴷⴷⵙⴻⵏ ⵉⵥⴻⵀⵀⵉⴷⴻⵏ 65

1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ. ⵉⵣⵍⵉ.

2 ⴰⵚⴻⴱⴱⴻⵃ ⵉⵜⵜⵔⴰⵊⴰ ⵉ ⵛⴻⴽ ⴷⵉ ⵍⵀⵓⴷⵏⴻⵜ,

ⴰ, ⴰⵔⴻⴱⴱⵉ, ⴷⵉ ⵚⵉⵀⵢⵓⵏ,

ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵍⵡⴰⵄⴷ ⵉ ⵛⴻⴽ.

3 ⵛⴻⴽ ⵜⴻⵙⵍⵉⴷ ⵉ ⵜⵥⴰⴵⵉⵜ,

ⵎⴰⵔⵔⴰ ⴷⴷⴰⵜ ⴰⴷ ⵖⴰⵔⴻⴽ ⴷⴷ-ⵢⴰⵙ.

4 ⵍⵎⵓⵄⵚⵉⵢⵢⴻⵜ ⵜⵓⵖⴰ ⵜⴻⵊⵀⴻⴷ ⵅⴰⴼⵉ,

ⵎⴰⵛⴰ ⵛⴻⴽ ⵜᵉⵜⵜⴻⴳⴳⴻⴷ ⴰⵚⵍⴰⵃ ⵅ ⵉⵅⴻⵟⵟⴰⵏ ⵏⵏⴻⵖ.

5 ⵙⵙⴻⵄⴷ ⵏ ⵡⴻⵏⵏⵉ ⵉ ⵜⴼⴰⵔⵔⵣⴻⴷ ⵛⴻⴽ

ⵓ ⵜⴻⵙⵙⵇⴰⵔⵔⴱⴻⴷ ⵜ-ⵉ-ⴷⴷ ⵖⴰⵔⴻⴽ,

ⵃⵉⵎⴰ ⴰⴷ ⵉⵣⴷⴻⵖ ⴷⵉ ⵍⴻⵎⵔⴰⵃⴰⵜ ⵏⵏⴻⵛ.

ⵏⴻⵛⵛⵉⵏ ⴰⴷ ⵏⴻⵊⵊⵉⵡⴻⵏ

ⵙ ⵍⵅⴰⵔ ⵏ ⵜⴰⴷⴷⴰⵔⵜ ⵏⵏⴻⵛ,

ⵙ ⵜⵇⴻⴷⴷⴰⵙⵜ ⵏ ⵣⵣⴰⵡⴻⵛⵜ ⵏⵏⴻⵛ ⵜⴰⵎⴻⵇⵇⵔⴰⵏⵜ.

6 ⵛⴻⴽ ⴰⴷ ⵅⴰⵏⴻⵖ ⴷⴷ-ⵜⴰⵔⵔⴻⴷ ⴷⵉ ⵜⵙⴻⴳⴷⴰ

ⵙ ⵜⵎⴻⴳⴳⴰ ⵉⵙⵙⴰⴳⴳⵯⴰⴷⴻⵏ,

ⴰ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵏⵏⴻⵖ.

ⴰⵇⴰ ⵛⴻⴽ ⴷ ⵍⴰⵎⴰⵏ

ⵏ ⵎⴰⵔⵔⴰ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ,

ⵏ ⵍⴻⴱⵃⵓⵔ ⵉⴳⴳⵯⴻⵊⴻⵏ ⵇⴰⵄ.

7 ⵛⴻⴽ ⴷ ⵡⴻⵏⵏⵉ ⵉⵙⵙⵔⵓⵙⴰⵏ ⵉⴷⵓⵔⴰⵔ

ⵙ ⵊⵊⵀⴻⴷ ⵏⵏⴻⵙ,

ⵛⴻⴽ ⵜⴱⴻⴽⴽⵙⴻⴷ ⵙ ⵊⵊⴻⵀⴷ.

8 ⵛⴻⴽ ⴷ ⵡⴻⵏⵏⵉ ⵉⵜⵜⴰⵔⵔⴰⵏ

ⵍⴻⵀⵡⴻⵍ ⵏ ⵍⴻⴱⵃⵓⵔ ⵢⴰⵔⴻⵙⵙⴰ,

ⵍⴻⵀⵡⴻⵍ ⵏ ⵍⴻⵎⵡⴰⵊ

ⵣⵣⵀⵉⵔ ⵏ ⵛⵛⵓⵄⵓⴱ.

9 ⵉⵏⵏⵉ ⵉⵣⴻⴷⴷⵖⴻⵏ ⵖⴰⵔ ⵜⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ

ⵜⵜⴻⴳⴳⵯⴻⴷⴻⵏ ⵣⵉ ⵍⴻⵄⵍⴰⵎⴰⵜ ⵏⵏⴻⵛ,

ⴰⵇⴰ ⵛⴻⴽ ⵜᵉⵜⵜⴰⵔⵔⵉⴷ ⵍⴻⴼⵊⴰⵔ ⵏ ⵜⵓⴼⴼⵓⵜ

ⴷ ⵡⴻⵟⵟⵓ ⵏ ⵜⵎⴻⴷⴷⵉⵜ ⴰⴷ ⵙⵍⵉⵡⴻⵍⵡⴻⵏ.

10 ⵛⴻⴽ ⵜⴰⵔⴻⵣⵣⴼⴻⴷ ⵜⴰⵎⵎⵓⵔⵜ,

ⵜᵉⵜⵜⴰⵔⵔⵉⴷ ⵜⵉⵖⴻⵣⵔⴰⵜⵉⵏ ⴰⴷ ⵜⵜ ⵛⵓⵇⴻⵏⵜ,

ⴰⵇⴰ ⵛⴻⴽ ⵜᵉⵜⵜⴰⵔⵔⵉⴷ ⵜⵜ-ⵉ-ⴷⴷ

ⵙ ⵍⵅⵉⵔ ⴰⵟⵟⴰⵙ.

ⵉⵖⵣⴰⵔ ⵏ ⴰⵔⴻⴱⴱⵉ ⵏⵏⵉ ⵜⵜ ⵉⵜⵜⵛⵓⵇⴰ

ⴰⵇⴰ ⵉⵜⵜⵛⵓⵔ ⵙ ⵡⴰⵎⴰⵏ.

ⵛⴻⴽ ⵜⴻⵙⵙⴻⵡⵊⴰⴷⴻⴷ ⵉⵎⴻⵏⴷⵉ ⵏⵙⴻⵏ,

ⵎⴰⵖⴰⵔ ⵉ ⵓⵢⴰ ⵉ ⵜⴻⴳⴳⵉⴷ ⵜⴰⵎⵎⵓⵔⵜ.

11 ⵛⴻⴽ ⵜᵉⵜⵜⵙⴰⵡⴻⴷ ⵎⵙⴻⵇⵇⴻⵎ

ⵍⴰⵜⴰⵔⴰⵜ ⵏ ⵡⴻⵛⵔⴰⵣ,

ⵜⴻⵙⵙⵀⴻⴽⴽⵯⵉⴷ ⵉⴱⵓⴷⴰ ⵏⵏⴻⵙ.

ⵜⴻⵙⵙⴰⵔⴹⴰⴱⴻⴷ ⵜⴰⵎⵎⵓⵔⵜ ⵙ ⵉⵏⴻⵛⵏⴰⵛⴻⵏ,

ⵜᵉⵜⵜⴱⴰⵔⴽⴻⴷ ⴰⵖⴻⵎⵎⵓⵢ ⵏⵏⴻⵙ.

12 ⵛⴻⴽ ⵜᵉⵜⵜⴻⴳⴳⴻⴷ ⵜⵜⴰⵊ

ⵉ ⵓⵙⴻⴳⴳⵯⴰⵙ ⵏ ⵍⵅⴰⵔ ⵏⵏⴻⵛ,

ⵍⴰⵜⴰⵔⴰⵜ ⵏⵏⴻⵛ ⵜⵜⵓⴷⵓⵎⴻⵏⵜ ⵙ ⵜⴰⴷⵓⵏⵜ.

13 ⴰⵇⴰ ⵜⵜⵓⴷⵓⵎⴻⵏⵜ ⵅ ⴷⴷⵎⴰⵏⵉ ⵏ ⵍⴻⵅⵍⴰ,

ⵜⵉⵡⵔⵉⵔⵉⵏ ⴱⴻⴽⴽⵙⴻⵏⵜ ⵙ ⵍⴻⴼⵔⴰⵃⴻⵜ.

14 ⴷⴷⵎⴰⵏⵉ ⵏ ⵜⴰⵔⴻⵡⵙⴰ ⵙⵙⵓⵏⵜ ⵙ ⵡⵓⴵⵉ,

ⵜⵉⵖⵣⵓⵔⵉⵏ ⴷⵍⵉⵏⵜ ⵙ ⵉⵎⴻⵏⴷⵉ.

ⵏⵉⵜⵏⵉ ⴷⴷⵓⵇⵇⵓⵣⴻⵏ ⵙ ⵓⵙⵍⵉⵡⵍⴻⵡ,

ⵡⴰⵀ, ⵜⵜⵖⴻⵏⵏⴰⵊⴻⵏ.