36
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵣⴻⴳ ⵓⵎⵙⴻⵅⵅⴰⵔ ⵏ ⵙⵉⴷⵉ. ⵏ ⴷⴰⵡⵓⴷ.
2 ⵉⵙⵙⴰⵡⴰⵍ ⵓⵅⴻⵟⵟⵓ ⵏ ⵓⵄⴻⴼⴼⴰⵏ ⴷⴰⵅⴻⵍ ⴷⴻⴳ ⵡⵓⵍ ⵉⵏⵓ:
“ⵡⴰⵔ ⵖⴰⵔⴻⵙ ⵜⵉⴳⴳⵯⵓⴷⵉ ⵏ ⴰⵔⴻⴱⴱⵉ
ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵙ.”
3 ⵎⵉⵏⵣⵉ ⴰⵅⴻⵟⵟⵓ-ⵢⴰ ⵉⵙⵙⵃⵉⵏⵏⴰⴱ ⵉ-ⵜ
ⴷⵉ ⵜⵉⵟⵟⴰⵡⵉⵏ ⵏⵏⴻⵙ,
ⴰⵇⴰ ⵢⵓⴼⴰ ⵍⵎⵓⵄⵚⵉⵢⵢⴻⵜ ⵏⵏⴻⵙ
ⵜⴰⵔⵔⴰ ⵉ-ⵜ-ⵉ-ⴷⴷ ⵖⴰⵔ ⵡⴻⵛⵔⴰⵀ.
4 ⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵏⵏⴻⵙ
ⴰⵇⴰ ⴰⵜⴻⵏ ⴷ ⵍⵖⴻⵛⵛ ⴷ ⵡⴻⵛⵎⴰⵜ,
ⵏⴻⵜⵜⴰ ⵉⵙⵙⴱⴻⴷⴷ ⵃⵉⵎⴰ ⴰⴷ ⵢⴰⵔⵣⵓ ⵍⴻⴼⵀⴰⵎⴻⵜ
ⵃⵉⵎⴰ ⴰⴷ ⵉⴳⴳ ⵍⵅⴰⵔ.
5 ⵉⵜⵜⵅⴻⵎⵎⴻⵎ ⴷⵉ ⵍⵖⴻⵛⵛ ⴷⵉ ⵇⴰⵎⴰ ⵏⵏⴻⵙ,
ⵉⴳⴳⵓⵔ ⴰⴷ ⵉⴱⴻⴷⴷ
ⴷⴻⴳ ⵉⵊⵊ ⵏ ⵡⴻⴱⵔⵉⴷ ⵡⴰⵔ ⵉⵚⴻⴱⵃⴻⵏ.
ⵍⵖⴰⵔ ⵡⴰⵔ ⵜ ⵉⵜⵜⵎⴻⵏⴹⵉⵔ.
6 ⴰ ⵙⵉⴷⵉ, ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ
ⵜᵉⵜⵜⴰⴽⴽⵡⴰⴹ ⴰⵍ ⴷⴰⵅⴻⵍ ⵏ ⵉⵊⴻⵏⵡⴰⵏ,
ⵍⴰⵎⴰⵏ ⵏⵏⴻⵛ ⴰⵍ ⵉⵙⴻⵢⵏⵓⵜⴻⵏ.
7 ⵜⴰⵙⴻⴳⴷⴰ ⵏⵏⴻⵛ ⵜⴻⴳⴳⴰ ⴰⵎ ⵢⵉⴷⵓⵔⴰⵔ ⵏ ⴰⵔⴻⴱⴱⵉ,
ⵍⴻⵃⴽⴰⵎⴰⵜ ⵏⵏⴻⵛ ⴰⵎ ⵡⴰⵎⴰⵏ ⵉⵀⴻⵡⵍⴻⵏ.
ⵙⵉⴷⵉ ⵉⵙⵙⴻⵏⵊⴰⵎ ⴱⵏⴰⴷⴻⵎ ⴷ ⵍⵎⴰⵍ.
8 ⵎⴻⵛⵃⴰⵍ ⵜⵉⵖⵍⴰ
ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, ⴰ ⴰⵔⴻⴱⴱⵉ!
ⵙ ⵓⵢⴻⵏⵏⵉ ⴰⵔⴻⴽⴽⵡⴰⵍⴻⵏ ⵖⴰⵔⴻⴽ
ⵜⴰⵔⵡⴰ ⵏ ⴱⵏⴰⴷⴻⵎ,
ⵖⴰⵔ ⵜⵉⵍⵉ ⵏ ⵡⴰⴼⵔⵉⵡⴻⵏ ⵏⵏⴻⵛ.
9 ⵜⵜⵡⴰⵙⵊⴰⵡⵏⴻⵏ ⵙ ⵓⴼⴻⵢⵢⴻⴹ
ⵙ ⵜⴰⴷⵓⵏⵜ ⵏ ⵜⴰⴷⴷⴰⵔⵜ ⵏⵏⴻⵛ,
ⵉⵖⵣⴰⵔ ⵙ ⵏⵏⵄⴰⵎⵉ ⵏⵏⴻⵛ ⵜⴻⵡⵛⴻⴷ ⴰⵙⴻⵏ
ⵎⴰⵃⴻⵏⴷ ⴰⴷ ⵣⵣⴰⵢⴻⵙ ⵙⵡⴻⵏ.
10 ⵎⴰⵖⴰⵔ ⵖⴰⵔⴻⴽ ⵉ ⵉⴵⴰ ⵍⵄⵓⵏⵚⴰⵔ ⵏ ⵜⵓⴷⴰⵔⵜ,
ⴷⵉ ⵜⴼⴰⵡⵜ ⵏⵏⴻⵛ ⴰⵇⴰ ⵏⴻⵜⵜⵡⴰⵍⴰ ⵜⴰⴼⴰⵡⵜ.
11 ⵙⵡⵉⵥⵥⴻⴹ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ
ⵅ ⵢⵉⵏⵏⵉ ⵉ ⵛⴻⴽ ⵉⵙⵙⵏⴻⵏ,
ⵜⴰⵙⴻⴳⴷⴰ ⵏⵏⴻⵛ ⵅ ⵢⵉⵏⵏⵉ
ⵉ ⵖⴰⵔ ⵉⴵⴰ ⵡⵓⵍ ⵉⵙⴻⴳⴳⵎⴻⵏ.
12 ⵡⴰⵔ ⵜⵜⴻⵊⵊⵉ ⴰⴷ ⵅⴰⴼⵉ ⴷⴷ-ⵢⴰⵙ
ⵓⴹⴰⵔ ⵏ ⴰⵢⵜ ⵏ ⴱⵓ-ⵏⵏⴼⴰⵅⴻⵜ,
ⵡⴰⵔ ⵜⵜⴻⵊⵊⵉ ⴰⴼⵓⵙ ⵏ ⵉⵄⴻⴼⴼⴰⵏⴻⵏ
ⴰⴷ ⴰⵢⵉ ⴷⴷ-ⵢⴰⵔⵔ ⴰⴷ ⵜⴻⵍⵍⵄⴻⵖ ⵎⴰⵏⵉ ⵎⴰ.
13 ⴰⵇⴰ ⴷⵉⵏ ⵉ ⵡⴹⴰⵏ,
ⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ,
ⵜⵜⵡⴰⵖⴻⴹⵍⴻⵏ ⵖⴰⵔ ⵜⴻⵎⵎⵓⵔⵜ,
ⵡⴰⵔ ⵣⴻⵎⵎⴰⵔⴻⵏ ⵄⴰⴷ ⴰⴷ ⴽⴽⴰⵔⴻⵏ ⵄⴰⵡⴻⴷ.