3
1 ⴰⵣⴻⵀⵀⴻⴷ ⵏ ⴷⴰⵡⵓⴷ, ⵓⵎⵉ ⵢⴰⵔⵡⴻⵍ ⵣⴻⴳ ⵡⵓⴷⴻⵎ ⵏ ⵎⵎⵉⵙ ⴰⴱⵛⴰⵍⵓⵎ.
2 ⴰ ⵙⵉⴷⵉ, ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ
ⴰⵇⴰ ⴽⴻⵜⵜⴰⵔⴻⵏ,
ⴰⵟⵟⴰⵙ ⴰⵇⴰ ⴰⵜⴻⵏ ⴹⵉⴷⴷ ⵉⵏⵓ.
3 ⴰⵟⵟⴰⵙ ⴰⵇⴰ ⵇⵇⴰⵔⴻⵏ ⵅ ⵍⴻⵄⵎⴰⵔ ⵉⵏⵓ:
“ⵉ ⵏⴻⵜⵜⴰ ⵡⴰⵔ ⴷⵉⵏ ⵉⴵⵉ ⵓⵙⴻⵏⵊⴻⵎ ⵖⴰⵔ ⴰⵔⴻⴱⴱⵉ!”
ⵙⵉⵍⴰⵀ.
4 ⴰⵃⴻⵇⵇⴰ ⵛⴻⴽ, ⴰ ⵙⵉⴷⵉ,
ⴷ ⵜⴰⵙⴻⴷⴷⴰⵔⵜ ⵏ ⵓⵙⴻⵍⵇⵉ ⵉ ⵏⴻⵛⵛ,
ⴰⵄⵓⴵⵉ ⵉⵏⵓ,
ⵛⴻⴽ ⴷ ⵡⴻⵏⵏⵉ ⵉⵙⵙⴳⴻⵄⵄⴷⴻⵏ ⴰⵣⴻⴵⵉⴼ ⵉⵏⵓ.
5 ⵙ ⵜⵎⵉⵊⵊⴰ ⵉⵏⵓ ⵍⴰⵖⵉⵖ ⵉ ⵙⵉⴷⵉ,
ⵓⵛⴰ ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⴼⵉ
ⵣⴻⴳ ⵡⴻⴷⵔⴰⵔ ⵏⵏⴻⵙ ⵉⵇⴻⴷⴷⵙⴻⵏ. ⵙⵉⵍⴰⵀ.
6 ⵙⴻⵏⵏⴷⴻⵖ ⵓⵛⴰ ⵉⴽⴽⴰ ⵅⴰⴼⵉ ⵢⵉⴹⴻⵚ,
ⴼⴰⵇⴻⵖ-ⴷⴷ, ⵎⵉⵏⵣⵉ ⵙⵉⴷⵉ ⵉⵜⵜⵄⴰⵡⴻⵏ ⴰⵢⵉ.
7 ⵡⴰⵔ ⵜⵜⴻⴳⴳⵯⵉⴷⴻⵖ ⵣⵉ ⵄⴻⵛⵔⴰ ⵏ ⵍⵓⵍⵓⴼ ⵏ ⵍⴳⴻⵏⵙ,
ⵉⵏⵏⵉ ⴷ ⴰⵢⵉ ⴷⴷ-ⵉⵏⵏⴹⴻⵏ,
ⵙⵙⴱⴻⴷⴷⴰⵏ ⵉⵅⴻⴼ ⵏⵙⴻⵏ ⵅ ⵉⵖⴻⵣⴷⵉⵙⴻⵏ ⵉⵏⵓ.
8 ⴽⴽⴰⵔ, ⴰ ⵙⵉⴷⵉ, ⵙⴻⵏⵊⴻⵎ ⴰⵢⵉ, ⴰ ⴰⵔⴻⴱⴱⵉ ⵉⵏⵓ,
ⵎⵉⵏⵣⵉ ⵛⴻⴽ ⵜⴻⵡⵜⵉⴷ ⵎⴰⵔⵔⴰ ⵍⵄⴻⴷⵢⴰⵏ ⵉⵏⵓ
ⵖⴰⵔ ⵓⵖⴻⵙⵎⵉⵔ,
ⴰⵇⴰ ⵜⴻⴷⴷⵣⴻⴷ ⵜⵉⵖⵎⴰⵙ ⵏ ⵉⵄⴻⴼⴼⴰⵏⴻⵏ.
9 ⴰⵙⴻⵏⵊⴻⵎ ⴰⵇⴰ-ⵜ ⵏ ⵙⵉⴷⵉ,
ⵍⴱⴰⵔⴰⴽⴰ ⵏⵏⴻⵛ ⴰⵇⴰ-ⵜⵜ ⵅ ⵍⴳⴻⵏⵙ ⵏⵏⴻⵛ. ⵙⵉⵍⴰⵀ.