28
1 ⵏ ⴷⴰⵡⵓⴷ.
ⵉ ⵛⴻⴽ ⵓⵎⵉ ⵍⴰⵖⵉⵖ,
ⴰ ⵙⵉⴷⵉ, ⴰⵇⴰ ⵛⴻⴽ ⴷ ⵜⴰⵚⴹⴰⵔⵜ ⵉⵏⵓ.
ⵡⴰⵔ ⵜⵜⴻⴳⴳ ⵛⴰ ⵉⵅⴻⴼ ⵏⵏⴻⵛ
ⵡⴰⵔ ⵖⴰⵔⵉ ⵜᵉⵜⵜⴻⵙⵍⵉⴷ,
ⴰⵍⴰⵎⵉ, ⵙ ⵡⴻⵙⵇⴰⵔ ⵏⵏⴻⵛ ⵣⵣⴰⵜⵉ,
ⵡⴰⵔ ⵜⵜⴰⵔⴻⴽⴽⵡⵉⵙⴻⵖ
ⴰⴽ-ⴷ ⵢⵉⵏⵏⵉ ⴷⴷ-ⵉⵀⴻⴽⴽⵡⴰⵏ ⴷⴻⴳ ⵡⴻⵏⴹⴻⵍ.
2 ⵙⴻⵍ ⵉ ⵜⵎⵉⵊⵊⴰ ⵏ ⵜⵓⵜⵔⴰ ⵉⵏⵓ,
ⵅⵎⵉ ⵅⴰⴽ ⵜⵜⵍⴰⵖⵉⵖ,
ⵅⵎⵉ ⴽⴻⵙⵙⵉⵖ ⵉⴼⴰⵙⵙⴻⵏ ⵉⵏⵓ
ⵖⴰⵔ ⵡⴻⵅⵅⴰⵎ ⵏ ⴷⴰⵅⴻⵍ
ⵏ ⵣⵣⴰⵡⴻⵛⵜ ⵏⵏⴻⵛ ⵉⵇⴻⴷⴷⵙⴻⵏ.
3 ⵡⴰⵔ ⴷ ⴰⵢⵉ ⵜⵜⵊⴰⵔⵔⵉ ⴰⴽ-ⴷ ⵉⵄⴻⴼⴼⴰⵏⴻⵏ,
ⴰⴽ-ⴷ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ,
ⵉⵏⵏⵉ ⵉⵙⵙⴰⵡⴰⵍⴻⵏ ⵅ ⵍⴻⵀⵏⴰ
ⴰⴽ-ⴷ ⵊⵊⵉⵔⴰⵏ ⵏⵙⴻⵏ,
ⴰⵎ ⵖⴰⵔⵙⴻⵏ ⵉⴵⴰ ⵍⵖⴰⵔ ⴷⴻⴳ ⵡⵓⵍ ⵏⵙⴻⵏ.
4 ⵅⴻⴵⴻⵚ ⴰⵙⴻⵏ ⵄⵍⴰⵃⵙⴰⴱ ⵎⵉⵏ ⵜⵜⴻⴳⴳⴻⵏ,
ⵄⵍⴰⵃⵙⴰⴱ ⵜⵓⵄⴻⴼⴼⵏⴰ ⵏ ⵜⵎⴻⴳⴳⴰ ⵏⵙⴻⵏ.
ⵅⴻⴵⴻⵚ ⴰⵙⴻⵏ
ⵄⵍⴰⵃⵙⴰⴱ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵙⴻⵏ,
ⴻⵡⵛ ⴰⵙⴻⵏ ⵍⵎⵓⵏⴻⵜ ⵏⵙⴻⵏ ⵉ ⵉⵙⴷⴰⵀⴻⴵⴻⵏ,
5 ⵎⵉⵏⵣⵉ ⵏⵉⵜⵏⵉ ⵡⴰⵔ ⵅⴻⵣⵣⴰⵔⴻⵏ
ⵖⴰⵔ ⵍⴻⴼⵄⴰⵢⴻⵍ ⵏ ⵙⵉⴷⵉ,
ⵓⵍⴰ ⵖⴰⵔ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵙ.
ⵏⴻⵜⵜⴰ ⴰⴷ ⵜⴻⵏ ⵉⵖⴹⴻⵍ, ⵡⴰⵔ ⵜⴻⵏ ⵉⴱⴻⵏⵏⵉ ⵛⴰ.
6 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ,
ⵎⴰⵖⴰⵔ ⵏⴻⵜⵜⴰ ⵉⵙⵍⴰ ⵉ ⵜⵎⵉⵊⵊⴰ ⵏ ⵜⵓⵜⵔⴰ ⵉⵏⵓ.
7 ⵙⵉⴷⵉ ⴷ ⵍⵄⴻⵣⵣ ⵉⵏⵓ
ⴷ ⵜⴰⵙⴻⴷⴷⴰⵔⵜ ⵉⵏⵓ ⵏ ⵓⵙⴻⵍⵇⵉ,
ⵓⵍ ⵉⵏⵓ ⵉⵜⵜⵛⴻⵍ ⵅⴰⵙ ⵓⵛⴰ ⵜⵜⵡⴰⵄⴰⵡⵏⴻⵖ.
ⵓⵍ ⵉⵏⵓ ⵉⵏⴻⴳⴳⴻⵣ ⵙ ⵍⴻⴼⵔⴰⵃⴻⵜ,
ⵙ ⵢⴻⵣⵍⵉ ⵉⵏⵓ ⴰⴷ ⵜ ⵇⴰⴷⵉⵖ.
8 ⵙⵉⴷⵉ ⴷ ⵊⵊⴻⵀⴷ ⵏⵙⴻⵏ,
ⵏⴻⵜⵜⴰ ⴷ ⵍⴱⵓⵔⵊ ⵉⵊⴻⵀⴷⴻⵏ ⵏ ⵉⵙⴻⵏⵊⵉⵎⴻⵏ
ⵉ ⵓⵎⴻⴷⵀⵓⵏ ⵏⵏⴻⵙ.
9 ⵙⴻⵏⵊⴻⵎ ⵍⴳⴻⵏⵙ ⵏⵏⴻⵛ, ⴱⴰⵔⴻⴽ ⵜⴰⵙⵖⴰⵔⵜ ⵏⵏⴻⵛ,
ⴰⵔⵡⴻⵙ ⵉ-ⵜⴻⵏ ⵓ ⴰⵔⴱⵓ ⵜⴻⵏ ⵉ ⵍⴻⴱⴷⴰ ⵇⴰⵄ.