26
1 ⴰⵣⴻⵀⵀⴻⴷ ⵏ ⴷⴰⵡⵓⴷ.
ⴰⵖ ⴰⵢⵉ ⵜⴰⵙⵖⴰⵔⵜ ⵉⵏⵓ, ⴰ ⵙⵉⴷⵉ,
ⵎⴰⵖⴰⵔ ⵏⴻⵛⵛ ⴳⴳⵓⵔⴻⵖ ⴷⵉ ⵍⴻⵚⴼⴰⵢⴻⵜ ⵉⵏⵓ.
ⵏⴻⵛⵛ ⵜⵜⴻⵛⵍⴻⵖ ⵅ ⵙⵉⴷⵉ,
ⵡⴰⵔ ⵜⵜⴻⴼⵔⵉⵖⴻⵖ ⵛⴰ.
2 ⵇⴻⴵⴻⴱ ⴰⵢⵉ, ⴰ ⵙⵉⴷⵉ, ⵊⴰⵔⵔⴻⴱ ⴰⵢⵉ,
ⵙⴻⵚⴼⴰ ⵜⵉⵥⵥⴰⵍ ⵉⵏⵓ ⴷ ⵡⵓⵍ ⵉⵏⵓ.
3 ⵎⵉⵏⵣⵉ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ
ⴰⵇⴰ-ⵜⵜ ⵣⵣⴰⵜ ⵉ ⵜⵉⵟⵟⴰⵡⵉⵏ ⵉⵏⵓ,
ⵏⴻⵛⵛ ⴳⴳⵓⵔⴻⵖ ⴷⵉ ⵜⵉⴷⴻⵜⵜ ⵏⵏⴻⵛ.
4 ⵏⴻⵛⵛ ⵡⴰⵔ ⵜⵜⵖⵉⵎⵉⵖ
ⴰⴽ-ⴷ ⵉⵔⵢⴰⵣⴻⵏ ⵡⴰⵔ ⵉⵙⴻⴽⴽⵡⵉⵏ,
ⵡⴰⵔ ⵜⵜⵎⵓⵏⴻⵖ ⴰⴽ-ⴷ ⵢⵉⵏⵏⵉ ⵉⵛⴻⵎⵎⵜⴻⵏ.
5 ⵏⴻⵛⵛ ⵛⴰⵔⵔⵀⴻⵖ ⴰⴳⵔⴰⵡ ⵏ ⵜⴰⵔⵡⴰ ⵏ ⵍⴻⵀⵔⴰⵎ,
ⵡⴰⵔ ⵜⵜⵖⵉⵎⵉⵖ ⴰⴽ-ⴷ ⵉⵄⴻⴼⴼⴰⵏⴻⵏ.
6 ⵏⴻⵛⵛ ⵙⵙⵉⵔⵉⴷⴻⵖ ⵉⴼⴰⵙⵙⴻⵏ ⵉⵏⵓ
ⴰⵎ ⵡⴰⵔ ⴷⴰⵢⵉ ⵍⵄⵉⴱ,
ⵜⵜⴻⵏⵏⴹⴻⵖ ⵉ ⵓⵄⴰⵍⵟⴰⵔ ⵏⵏⴻⵛ,
ⵍⵎⴻⴷⴱⴻⵃ ⵏⵏⴻⵛ ⵏ ⵡⴻⵛⵎⴰⴹ, ⴰ ⵙⵉⴷⵉ,
7 ⵎⴰⵃⴻⵏⴷ ⴰⴷ ⵙⵙⴳⴻⵄⵄⴷⴻⵖ
ⵜⵎⵉⵊⵊⴰ ⵜⴻⵛⵛⵓⵔ ⵙ ⵓⵇⴰⴷⵉ,
ⵎⴰⵃⴻⵏⴷ ⴰⴷ ⴱⴰⵔⵔⵃⴻⵖ ⵙ ⵎⴰⵔⵔⴰ ⵍⵎⵓⵄⵊⵉⵣⴰⵜ ⵏⵏⴻⵛ.
8 ⴰ ⵙⵉⴷⵉ, ⵏⴻⵛⵛ ⵜⵜⴻⵅⵙⴻⵖ
ⵜⴰⵣⴻⴷⴷⵉⵖⵜ ⵏ ⵜⴰⴷⴷⴰⵔⵜ ⵏⵏⴻⵛ,
ⵓⵍⴰ ⴷ ⴰⵎⵛⴰⵏ ⵏ ⵜⵣⴻⴷⴷⵉⵖⵜ ⵏ ⵓⵄⵓⴵⵉ ⵏⵏⴻⵛ.
9 ⵡⴰⵔ ⵙⵎⵓⵏⴰ ⵍⴻⵄⵎⴰⵔ ⵉⵏⵓ ⴰⴽ-ⴷ ⵉⵎⴻⴷⵏⴰⴱ,
ⵓⵍⴰ ⴷ ⵜⵓⴷⴰⵔⵜ ⵉⵏⵓ ⵖⴰⵔ ⵉⵔⵢⴰⵣⴻⵏ
ⵉ ⵉⵙⵙⴰⵣⵣⴰⵍⴻⵏ ⵉⴷⴰⵎⵎⴻⵏ.
10 ⵉⵏⵏⵉ ⵖⴰⵔ ⵉⴵⴰ ⵉⴼⴰⵙⵙⴻⵏ ⵏⵙⴻⵏ
ⵛⵛⵓⵔⴻⵏ ⵙ ⵜⵓⵄⴻⴼⴼⵏⴰ,
ⴰⴼⵓⵙ ⵏⵙⴻⵏ ⴰⴼⵓⵙⵉ ⵉⵛⵛⵓⵔ ⵙ ⵍⵖⴻⵛⵛ.
11 ⵏⴻⵛⵛ ⴳⴳⵓⵔⴻⵖ ⴷⵉ ⵍⴻⵚⴼⴰⵢⴻⵜ ⵉⵏⵓ,
ⴼⴷⵉ ⴰⵢⵉ ⵓ ⵃⵉⵏⵏ ⵅⴰⴼⵉ.
12 ⴰⴹⴰⵔ ⵉⵏⵓ ⵉⴱⴻⴷⴷ ⵅ ⵜⴻⵎⵎⵓⵔⵜ ⵉⵡⴰⵟⴰⵏ.
ⵏⴻⵛⵛ ⴰⴷ ⴱⴰⵔⴽⴻⵖ ⵙⵉⴷⵉ ⴷⵉ ⵜⵎⴻⵙⵎⵓⵏⵉⵏ.