140
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ.
 
ⴼⴻⴽⴽ ⴰⵢⵉ ⵣⵉ ⴱⵏⴰⴷⴻⵎ ⴷ ⴰⵄⴻⴼⴼⴰⵏ, ⵙⵉⴷⵉ,
ⵃⴹⴰ ⴰⵢⵉ ⵣⴻⴳ ⵡⴻⵔⵢⴰⵣ ⵏ ⵍⵄⵓⵏⴼ,
ⵣⴻⴳ ⵢⵉⵏⵏⵉ ⵉⵜⵜⵅⴰⵔⵔⴰⵚⴻⵏ
ⴷⴻⴳ ⵡⵓⵍ ⵏⵙⴻⵏ ⴷⵉ ⵍⵖⴰⵔ,
ⵙⵙⴻⴽⴽⴰⵔⴻⵏ ⵉⵎⴻⵏⵖⴰⵏ ⴷⵉ ⵎⴰⵔⵔⴰ ⵓⵙⵙⴰⵏ.
ⵏⵉⵜⵏⵉ ⵙⵙⵇⴻⴹⵄⴻⵏ ⵉⵍⵙⴰⵡⴻⵏ ⵏⵙⴻⵏ
ⴰⵎ ⵢⵉⵊⵊ ⵏ ⵓⴼⵉⵖⴰⵔ,
ⵙⵙⴻⵎ ⵉⵃⵎⴰ ⴰⵇⴰ-ⵜ ⵙⴰⴷⵓ ⵉⵢⴻⵏⵛⵉⵛⴻⵏ ⵏⵙⴻⵏ.
ⵙⵉⵍⴰⵀ.
 
ⵃⴹⴰ ⵅⴰⴼⵉ, ⵙⵉⴷⵉ, ⵣⴻⴳ ⵉⴼⴰⵙⵙⴻⵏ ⵏ ⵉⵄⴻⴼⴼⴰⵏⴻⵏ,
ⵃⴹⴰ ⴰⵢⵉ ⵣⴻⴳ ⵉⵔⵢⴰⵣⴻⵏ ⵏ ⵍⵄⵓⵏⴼ,
ⵉⵏⵏⵉ ⵢⴰⵔⴻⵣⵣⵓⵏ ⴰⴷ ⴰⵢⵉ ⵖⴻⴹⵍⴻⵏ
ⵖⴰⵔ ⵜⴻⵎⵎⵓⵔⵜ.
ⴰⵢⵜ ⵏ ⴱⵓ-ⵏⵏⴼⴰⵅⴻⵜ
ⵙⵙⵏⵓⴼⴼⴰⵔⴻⵏ ⵅⴰⴼⵉ ⵉⵊⵊ ⵏ ⵍⴼⴻⵅ,
ⵜⵜⴱⴻⵣⵣⴰⵄⴻⵏ ⵜⵉⵙⴻⵖⵡⵉⵏ
ⴰⵎ ⵢⵉⵛⵜ ⵏ ⵜⵔⴰⵛⵛⴰ
ⵖⴰⵔ ⵓⵖⴻⵣⴷⵉⵙ ⵏ ⵓⵎⴻⵙⵔⴰⵇ,
ⴰⵇⴰ ⵜⵜⴻⴳⴳⴻⵏ ⴰⵢⵉ ⵜⵉⵅⴻⴼⵛⵉⵏ. ⵙⵉⵍⴰⵀ.
 
ⵏⴻⵛⵛ ⵏⵏⵉⵖ ⵉ ⵙⵉⴷⵉ: “ⵛⴻⴽ ⴷ ⴰⵔⴻⴱⴱⵉ ⵉⵏⵓ!”
ⵙⴻⵍ, ⵙⵉⴷⵉ, ⵖⴰⵔ ⵜⵎⵉⵊⵊⴰ ⵏ ⵜⵓⵜⵔⴰ ⵉⵏⵓ.
ⵙⵉⴷⵉ, ⵙⵉⴷⵉ ⵉⵏⵓ, ⵊⵊⴻⵀⴷ ⵏ ⵓⵙⴻⵏⵊⴻⵎ ⵉⵏⵓ,
ⴷⴻⵍ ⴰⵣⴻⴵⵉⴼ ⵉⵏⵓ ⴷⴻⴳ ⵡⴰⵙⵙ ⵏ ⵍⵃⴻⵙⵙ ⵏ ⵍⴻⵙⵏⴰⵃ.
ⵙⵉⴷⵉ, ⵡⴰⵔ ⵜⵜⴻⵊⵊⵉ ⴰⵄⴻⴼⴼⴰⵏ ⴰⴷ ⵢⴰⵔⵔ ⵎⴻⵥⵔⵉ.
ⵡⴰⵔ ⵜⵜⴻⴳⴳ ⵜⵜⴰⵙⵉⵄ ⵉ ⵡⴻⵏⵡⴰⵢ ⵏⵏⴻⵙ ⵉⵄⴻⴼⴼⵏⴻⵏ,
ⴰⵍⴰⵎⵉ ⵖⴰ ⵙⵙⵄⵓⴵⴻⵏ ⵉⵅⴻⴼ ⵏⵙⴻⵏ. ⵙⵉⵍⴰⵀ.
 
10  ⵓⵣⴻⴵⵉⴼ ⵏ ⵎⴰⵔⵔⴰ ⵉⵏⵏⵉ ⴷ ⴰⵢⵉ ⴷⴷ-ⵉⵏⵏⴹⴻⵏ,
ⵉⵍⵉ ⴰⴷ ⵜⴻⵏ ⵉⴷⴻⵍ ⵓⵛⴻⵇⵇⴻⴼ ⵏ ⵉⵢⴻⵏⵛⵉⵛⴻⵏ ⵏⵙⴻⵏ,
11 ⴻⵊⵊ ⴰⴷ ⵅⴰⵙⴻⵏ ⴽⴻⴱⴱⴻⵏ ⵍⴻⴼⵃⴻⵎ,
ⵉⵍⵉ ⵏⴻⵜⵜⴰ ⴰⴷ ⵜⴻⵏ ⵉⵖⴹⴻⵔ ⴷⵉ ⵜⵎⴻⵙⵙⵉ,
ⴷⵉ ⵍⵃⴻⵎⵍⴰⵜ ⵢⵓⴵⵖⴻⵏ,
ⵃⵉⵎⴰ ⵡⴰⵔ ⵜⵜⴻⴽⴽⴰⵔⴻⵏ ⵄⴰⴷ.
12 ⴻⵊⵊ ⴰⵔⵢⴰⵣ ⵉ ⵉⵛⴻⵇⵇⴼⴻⵏ ⵙ ⵢⵉⵍⴻⵙ
ⵡⴰⵔ ⵉⵜⵜⵖⵉⵎⵉ ⵉⴱⴻⴷⴷ ⵅ ⵜⴻⵎⵎⵓⵔⵜ,
ⴻⵊⵊ ⴰⴷ ⵉⵄⴰⵔⵏ ⵍⵖⴰⵔ ⴷⴻⵖⵢⴰ
ⴰⵔⵢⴰⵣ ⴱⵓ-ⵍⴻⵅⵛⵓⵏⴻⵜ.
 
13 ⵏⴻⵛⵛ ⵙⵙⵏⴻⵖ, ⴰⵇⴰ ⵙⵉⴷⵉ ⴰⴷ ⵉⵙⵙⴻⵇⴼⴻⵍ
ⴷⴷⴻⵄⵡⴻⵜ ⵏ ⵍⵎⵓⵙⴰⴽⵉⵏ, ⵍⵃⴻⵇⵇ ⵏ ⵉⵎⴻⵣⵍⴰⴹ.
14 ⵙ ⵜⵉⴷⴻⵜⵜ, ⵉⵎⵙⴻⴳⴳⴰⴷⴻⵏ
ⴰⴷ ⵇⴰⴷⴰⵏ ⵉⵙⴻⵎ ⵏⵏⴻⵛ,
ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⴰⴷ ⵇⵇⵉⵎⴻⵏ
ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ.
 
 
140:4 ⵉⵥⵀⴷ. 58:5; ⵔⵓⵎ. 3:13 140:5 ⵉⵏⵏⵉ ⵢⴰⵔⴻⵥⵥⵓⵏ ⴰⴷ ⴰⵢⵉ ⵖⴻⴹⵍⴻⵏ ⵖⴰⵔ ⵜⴻⵎⵎⵓⵔⵜ-ⵙ ⵜⵄⵉⴱⵔⴰⵏⵉⵜ ‘ⵉⵏⵏⵉ ⵢⴰⵔⴻⵥⵥⵓⵏ ⴰⴷ ⵙⵙⵏⴻⵇⵔⴰⴷⴻⵏ ⵉⴹⴰⵔⴻⵏ ⵉⵏⵓ’. 140:6 ⵉⵔⵎ. 18:22