29
1 ⴰⵔⵢⴰⵣ, ⵡⴻⵏⵏⵉ ⵉⵙⵙⴻⵇⵙⵃⴻⵏ ⵢⵉⵔⵉ ⵏⵏⴻⵙ
ⴰⵡⴰⵔⵏⵉ ⵍⴰⵎⵉ ⵜ ⵄⴰⵇⴱⴻⵏ
ⴰⵟⵟⴰⵙ ⵏ ⵜⵡⴰⵍⴰⵡⵉⵏ,
ⴰⴷ ⵢⴰⵔⵥ ⴷⴻⴳ ⵉⵊⵊ ⵏ ⵓⵎⵓⵔ,
ⵅⴻⵏⵏⵉ ⵡⴰⵔ ⴷⵉⵏ ⵉⴵⵉ ⵄⴰⴷ ⵓⴳⴻⵏⴼⵓ.
2 ⵎⴰⵍⴰ ⴷⴻⵡⵍⴻⵏ ⵉⵎⵙⴻⴳⴳⴰⴷⴻⵏ ⵙ ⵚⵚⵓⵍⵟⴰ,
ⵅⴻⵏⵏⵉ ⵉⴼⴰⵔⵔⴻⵃ ⵍⴳⴻⵏⵙ,
ⵎⴰⵛⴰ ⵎⴰⵍⴰ ⵉⵃⴻⴽⴽⴻⵎ ⵓⵄⴻⴼⴼⴰⵏ,
ⵉⵡⴻⵄⵄⴻⴹ ⵍⴳⴻⵏⵙ.
3 ⴱⵏⴰⴷⴻⵎ ⵉⵜⵜⴻⵅⵙⴻⵏ ⵜⵉⵖⵉⵜ, ⵉⵙⵙⴼⴰⵔⵔⴰⵃ ⴱⴰⴱⴰⵙ,
ⵎⴰⵛⴰ ⵡⴻⵏⵏⵉ ⵉⵜⵜⵎⵓⵏⴰⵏ
ⴰⴽ-ⴷ ⵜⴻⵎⵖⴰⵔⵉⵏ ⵏ ⴼⴰⵔⵇ-ⵛⵛⵖⴻⵍ,
ⵢⴰⵔⴻⴷⴷⴻⴵ ⴰⴳⵍⴰ ⵏⵏⴻⵙ.
4 ⴰⵊⴻⴵⵉⴷ ⵉⵙⵙⴱⴻⴷⴷⴰ ⵜⴰⵎⵎⵓⵔⵜ ⵙ ⵍⵃⴻⵇⵇ,
ⵎⴰⵛⴰ ⴰⵔⵢⴰⵣ ⵏⵏⵉ ⵉⵙⵙⴳⴻⵄⵄⴰⴷⴻⵏ
ⴹⴹⴰⵔⵉⴱⴰ ⴰⵟⵟⴰⵙ ⵏ ⵜⵡⴰⵍⴰⵡⵉⵏ,
ⵉⵀⴻⴷⴷⴻⵎ ⵉ-ⵜⵜ.
5 ⴰⵔⵢⴰⵣ ⵏⵏⵉ ⵉⵙⵙⵡⴰⵟⴰⵏ ⵊⵊⴰⵔ ⵏⵏⴻⵙ,
ⵉⵜⵜⴱⴻⵣⵣⴰⵄ ⵉⵛⵜ ⵏ ⵜⵔⴰⵛⵛⴰ ⵉ ⵉⴹⴰⵔⴻⵏ ⵏⵏⴻⵙ.
6 ⴷⴻⴳ ⵓⵄⴻⴷⴷⵉ ⵏ ⵉⵊⵊ ⵏ ⵡⴻⵔⵢⴰⵣ ⴰⵄⴻⴼⴼⴰⵏ
ⵉⵏⵏⵓⴼⴼⴰⵔ ⴷⴰⵢⴻⵙ ⵉⵊⵊ ⵏ ⵍⴼⴻⵅ,
ⵎⴰⵛⴰ ⴰⵎⵙⴻⴳⴳⴻⴷ ⵉⵜⵜⴻⵙⵍⵉⵡⵍⴻⵡ ⵓ ⵉⴼⴰⵔⵔⴻⵃ.
7 ⴰⵎⵙⴻⴳⴳⴻⴷ ⵉⵙⵙⴻⵏ ⴷⴷⴻⵄⵡⴻⵜ ⵏ ⵉⵎⴰⵔⵅⴰ,
ⴰⵄⴻⴼⴼⴰⵏ ⵡⴰⵔ ⵉⴼⴻⵀⵀⴻⵎ ⵡⴰⵍⵓ ⴷⵉ ⵜⵓⵙⵙⵏⴰ.
8 ⵉⵎⴻⵙⵜⴻⵀⵣⴰⵢⵢⴻⵏ ⵙⵙⴻⴽⴽⴰⵔⴰⵏ
ⴰⵖⴻⵡⵡⴻⵖ ⴷⵉ ⵜⴻⵏⴷⵉⵏⵜ,
ⵎⴰⵛⴰ ⵉⵎⵉⵖⵉⵙⴻⵏ ⵙⵙⵏⴻⵇⵍⴰⴱⴻⵏ ⴰⵖⴹⴰⴱ.
9 ⵎⴰⵍⴰ ⴰⵎⵉⵖⵉⵙ ⵉⴽⵙⵉ-ⴷⴷ ⵜⴰⵏⴼⵓⵍⵜ
ⵉ ⵢⵉⵊⵊ ⵏ ⵓⴱⵓⵀⴰⵍⵉ,
ⵅⴻⵏⵏⵉ ⵏⴻⵜⵜⴰ ⴳⴳⵓⵔ ⴰⴷ ⵉⵅⴻⵢⵢⴻⵇ ⵡⴰⵏⵉⵜⴰ
ⵓ ⴰⴷ ⵉⴹⵃⴻⵛ, ⵎⴰⵛⴰ ⵡⴰⵔ ⴷⵉⵏ ⵍⵀⵓⴷⵏⴻⵜ.
10 ⵉⵔⵢⴰⵣⴻⵏ ⵓⵎⵉ ⵉⵜⵜⴻⵄⵊⵉⴱ ⵉⴷⴰⵎⵎⴻⵏ
ⵛⴰⵔⵔⵀⴻⵏ ⵡⴻⵏⵏⵉ ⵉⴽⴻⵎⵎⵍⴻⵏ,
ⵎⴰⵛⴰ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ
ⵅⴻⵣⵣⴰⵔⴻⵏ ⵖⴰⵔ ⵍⴻⵄⵎⴰⵔ ⵏⵏⴻⵙ.
11 ⴰⴱⵓⵀⴰⵍⵉ ⵉⴹⴻⴵⴻⵇ ⵉ ⵎⴰⵔⵔⴰ ⴱⵓⵃⴱⴻⵍ ⵏⵏⴻⵙ,
ⵎⴰⵛⴰ ⴰⵎⵉⵖⵉⵙ ⵉⵜⵜⵇⴻⵎⵎⴻⵄ ⵉ-ⵜ.
12 ⵍⵃⴰⴽⴻⵎ ⵏⵏⵉ ⵉⵜⵜⵉⵛⴻⵏ ⵜⴰⵢⵏⵉⵜ
ⵉ ⵍⵀⴰⵔⴷ ⵏ ⵉⵅⴰⵔⵔⵉⵇⵇⴻⵏ,
ⵣⵣⴰⵢⴻⵙ ⴰⴷ ⵉⵍⵉⵏ
ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴷ ⵉⵄⴻⴼⴼⴰⵏⴻⵏ.
13 ⴰⵎⴻⵣⵍⵓⴹ ⴷ ⵡⴻⵔⵢⴰⵣ ⵉⵜⵜⵡⴰⵃⵙⴰⵔⴻⵏ ⵍⴻⴱⴷⴰ,
ⵎⵙⴰⴳⴰⵔⴻⵏ,
ⵙⵉⴷⵉ ⵉⵙⵙⵏⴻⵡⵡⴰⵔ ⵜⵉⵟⵟⴰⵡⵉⵏ ⵏⵙⴻⵏ
ⵙ ⵜⵏⴰⵢⴻⵏ ⵉⴷⵙⴻⵏ.
14 ⴰⵊⴻⴵⵉⴷ ⵏⵏⵉ ⵉⵜⵜⵉⵛⴻⵏ ⵙ ⵜⵉⴷⴻⵜⵜ ⵜⴰⵙⵖⴰⵔⵜ
ⵉ ⵉⵎⴰⵔⵅⴰ ⴷⵉ ⵛⵛⵔⴻⵄ,
ⵍⴽⵓⵔⵙⵉ ⵏⵏⴻⵙ ⴰⴷ ⵉⵇⵇⵉⵎ ⵉⴱⴻⴷⴷ ⵉ ⵍⴻⴱⴷⴰ.
15 ⴰⵄⵎⵓⴷ ⴷ ⵓⵡⴻⴱⴱⴻⵅ ⵜⵜⵉⵛⴻⵏ ⵜⵉⵖⵉⵜ,
ⵎⴰⵛⴰ ⴰⵃⴻⵏⵊⵉⵔ ⵊⵊⵉⵏ ⵜ ⵉ ⵢⵉⵅⴻⴼ ⵏⵏⴻⵙ,
ⵢⴰⵔⵔⴰ ⵢⴻⵎⵎⴰⵙ ⴰⴷ ⵜⵙⴻⴹⵃⴰ.
16 ⵎⴰⵍⴰ ⴷⴻⵡⵍⴻⵏ ⵉⵄⴻⴼⴼⴰⵏⴻⵏ ⵊⴻⵀⴷⴻⵏ,
ⵅⴻⵏⵏⵉ ⵢⴰⵔⴻⵏⵏⵉ ⵓⵅⴻⵟⵟⵓ,
ⵎⴰⵛⴰ ⵉⵎⵙⴻⴳⴳⴰⴷⴻⵏ
ⴰⴷ ⵥⴰⵔⴻⵏ ⵡⴻⵟⵟⵓ ⵏⵙⴻⵏ.
17 ⴰⵔⴻⴱⴱⴰ ⵎⵎⵉⵛ ⵓ ⵏⴻⵜⵜⴰ ⴰⴷ ⵛⴻⴽ ⵉⵙⵙⴰⵔⴻⵢⵢⴻⵃ,
ⵏⴻⵜⵜⴰ ⴰⴷ ⵉⵡⵛ ⵍⴱⴰⵔⴰⴽⴰⵜ ⵜⵉⵎⵉⵥⵉⴷⵉⵏ
ⵉ ⵍⴻⵄⵎⴰⵔ ⵏⵏⴻⵛ.
18 ⵎⴰⵍⴰ ⵡⴰⵔ ⴷⵉⵏ ⵍⴻⵡⵃⵉⵢ, ⵉⵜⵜⴼⵓⵛⵛⵓⵃ ⵍⴳⴻⵏⵙ,
ⵙⵙⴻⵄⴷ ⵏ ⵡⴻⵏⵏⵉ ⵉⵃⴻⵟⵟⴰⵏ ⵛⵛⴰⵔⵉⵄⴰ.
19 ⵉⵊⵊ ⵏ ⵉⵙⵎⴻⵖ ⵡⴰⵔ ⵉⵜⵜⴻⵊⵊⵉ
ⴰⴷ ⵜ ⴰⵔⵔⴻⴱⴱⴰⵏ ⵙ ⵡⴰⵡⴰⵍⴻⵏ,
ⵎⴰⵖⴰⵔ ⵡⴰⵅⵅⴰ ⵏⴻⵜⵜⴰ ⵉⴼⴻⵀⵀⴻⵎ ⵅⴰⴽ,
ⵡⴰⵔ ⵅⴰⴽ ⴷⴷ-ⵉⵜⵜⴰⵔⵔⵉ ⵛⴰ.
20 ⵎⴰ ⵛⴻⴽ ⵄⴻⵎⵎⴰⵔⵚ ⵡⴰⵔ ⵜⴻⵥⵔⵉⴷ ⵉⵊⵊ ⵏ ⵡⴻⵔⵢⴰⵣ
ⵉⵜⵜⵇⴻⴵⵉⵇ ⵙ ⵡⴰⵡⴰⵍⴻⵏ ⵏⵏⴻⵙ?
ⴰⵇⴰ ⴷⵉⵏ ⵍⴰⵢⴰⵙ ⴽⵜⴰⵔ ⵉ ⵓⴱⵓⵀⴰⵍⵉ ⵓⵍⴰ ⵅⴰⵙ.
21 ⵎⴰⵍⴰ ⵉⵊⵊⴻⵏ ⵉⵙⵙⵓⴱⴻⴹ ⵉⵙⵎⴻⵖ ⵏⵏⴻⵙ ⵣⵉ ⵜⴻⵎⵥⵉ,
ⴰⴷ ⵉⴷⵡⴻⵍ ⵖⴰⵔ ⵓⵏⴻⴳⴳⴰⵔ ⵡⴰⵔ ⵜ ⵉⵜⵜⵇⵉⴷⵉ.
22 ⴰⵔⵢⴰⵣ ⵉⵜⵜⴰⵔⵔⵓⵊⴷⵓⴷⴻⵏ
ⵉⵙⵙⴻⴽⴽⴰⵔⴰ-ⴷⴷ ⴰⵎⵛⵓⴱⴱⴻⵛ,
ⵓ ⴱⴰⴱ ⵏ ⵡⴻⵙⵄⴰⵔ ⵉⵜⵜⴻⴳⴳ ⴰⵟⵟⴰⵙ ⵏ ⵉⵅⴻⵟⵟⴰⵏ.
23 ⵏⵏⴼⴰⵅⴻⵜ ⵏ ⴱⵏⴰⴷⴻⵎ ⴰⴷ ⵜ ⵉⵙⵙⵡⴰⴹⴻⵄ,
ⵎⴰⵛⴰ ⴰⵎⵡⴰⴹⴻⵄ ⵏ ⴱⵓⵃⴱⴻⵍ
ⴰⴷ ⴰⵙ ⵉⵜⵜⵡⴰⴳⴳ ⵛⵛⴰⵏ.
24 ⵡⴻⵏⵏⵉ ⵉⴱⴻⵟⵟⴰⵏ ⴰⴽ-ⴷ ⵓⵅⴻⵡⵡⴰⵏ,
ⵉⵛⴰⵔⵔⴻⵀ ⵉⵅⴻⴼ ⵏⵏⴻⵙ,
ⵎⴰⵖⴰⵔ ⵏⴻⵜⵜⴰ ⵉⵜⵜⴻⵙⵍⴰ ⵉ ⵏⵏⴻⵄⵍⴻⵜ,
ⵎⴰⵛⴰ ⵡⴰⵔ ⵜ ⵉⵇⵇⴰⵔ ⵛⴰ.
25 ⵜⵉⴳⴳⵯⵓⴷⵉ ⵣⴻⴳ ⵉⵡⴷⴰⵏ ⵜⵏⴻⴷⴷⴻⵀ ⵖⴰⵔ ⵍⴼⴻⵅ,
ⵎⴰⵛⴰ ⵡⴻⵏⵏⵉ ⵉⵜⵜⵛⴰⵍⴰⵏ ⵅ ⵙⵉⴷⵉ,
ⴰⴷ ⵉⵜⵜⵡⴰⵙⵙⴳⴻⵄⵄⴻⴷ ⴷⵉ ⵍⴰⵎⴰⵏ.
26 ⴰⵟⵟⴰⵙ ⴰⵔⴻⵣⵣⵓⵏ ⵓⴷⴻⵎ ⵏ ⵍⵃⴰⴽⴻⵎ,
ⵡⴰⵅⵅⴰ ⵜⴰⵙⵖⴰⵔⵜ ⵏ ⴽⵓⵍ ⵉⵊⵊ ⵜᵉⵜⵜⴰⵙ-ⴷⴷ ⵣⵉ ⵙⵉⴷⵉ.
27 ⴰⵔⵢⴰⵣ ⴰⵖⴻⵛⵛⴰⵛ ⴷ ⵏⵏⵄⵉ ⵉ ⵉⵎⵙⴻⴳⴳⴰⴷⴻⵏ,
ⵎⴰⵛⴰ ⵡⴻⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ
ⴷⴻⴳ ⵡⴻⴱⵔⵉⴷ ⵏⵏⴻⵙ,
ⴰⵇⴰ-ⵜ ⴷ ⵏⵏⵄⵉ ⵉ ⵓⵄⴻⴼⴼⴰⵏ.