22
1 ⵉⵙⴻⵎ ⴰⵚⴻⴱⵃⴰⵏ ⵉⵃⵍⴰ
ⵅ ⵡⴰⵟⵟⴰⵙ ⵏ ⵡⴰⴳⵍⴰ,
ⴰⵃⵉⵏⵏⵉ ⵉⵃⵍⴰ ⵅ ⵏⵏⵓⵇⴰⵔⵜ ⴷ ⵡⵓⵔⴻⵖ.
2 ⴱⵓ-ⵡⴰⴳⵍⴰ ⴷ ⵓⵎⴻⵣⵍⵓⴹ ⵜⵜⴻⵎⵙⴰⴳⴰⵔⴻⵏ,
ⵙⵉⴷⵉ ⵉ-ⵜⴻⵏ ⵉⴳⴳⵉⵏ ⵎⴰⵔⵔⴰ.
3 ⴱⵏⴰⴷⴻⵎ ⵉⴼⴻⵜⵜⵏⴻⵏ ⵉⵜⵜⵡⴰⵍⴰ ⵍⵖⴰⵔ
ⵓⵛⴰ ⵉⵜⵜⵏⵓⴼⴼⴰⵔ,
ⵎⴰⵛⴰ ⵉⵃⴰⴼⵉⵢⵢⴻⵏ ⴰⵔⴻⵏⵏⵉⵏ ⴳⴳⵓⵔⴻⵏ
ⵓⵛⴰ ⴰⴷ ⵜⵜⵡⴰⵄⴰⵇⴰⴱⴻⵏ.
4 ⵍⵎⵓⵏⴻⵜ ⵉ ⵓⵡⴰⴹⴻⵄ ⴷ ⵜⵉⴳⴳⵯⵓⴷⵉ ⵏ ⵙⵉⴷⵉ,
ⴷ ⴰⴳⵍⴰ ⴷ ⵛⵛⴰⵏ ⴷ ⵜⵓⴷⴰⵔⵜ.
5 ⵉⵙⴻⵏⵏⴰⵏⴻⵏ ⴷ ⵍⴻⴼⵅⵓⵅ ⴰⵇⴰ ⴰⵜⴻⵏ
ⵅ ⵡⴻⴱⵔⵉⴷ ⵏ ⵡⴻⵏⵏⵉ ⵉⴼⴰⵔⵖⴻⵏ,
ⵡⴻⵏⵏⵉ ⵉⵃⴻⵟⵟⴰⵏ ⵍⴻⵄⵎⴰⵔ ⵏⵏⴻⵙ,
ⵉⵜⵜⵖⵉⵎⴰ ⵖⴰⵔ ⵍⴰⴳⴳⵯⴰⵊ ⵏⵙⴻⵏ.
6 ⴷⴰⵔⵔⴻⴱ ⴰⵃⵓⴷⵔⵉ
ⵄⵍⴰⵃⵙⴰⴱ ⵍⴻⵇⵢⴰⵙ ⵏ ⵡⴻⴱⵔⵉⴷ ⵏⵏⴻⵙ,
ⵡⴰⵅⵅⴰ ⵏⴻⵜⵜⴰ ⵉⵡⵙⴰⵔ, ⵡⴰⵔ ⵅⴰⵙ ⵉⵜⵜⵃⴻⵢⵢⵉⴷ ⵛⴰ.
7 ⴱⵓ-ⵡⴰⴳⵍⴰ ⵉⵜⵜⵚⴻⴵⴰⴹ ⵅ ⵉⵎⴻⵣⵍⴰⴹ,
ⴱⵓ-ⵓⵎⴰⵔⵡⴰⵙ ⴷ ⵉⵙⵎⴻⵖ
ⵏ ⵡⴻⵏⵏⵉ ⴷ ⴰⵙ ⵢⴰⵔⴻⵟⵟⵍⴻⵏ.
8 ⵡⴻⵏⵏⵉ ⵉⵣⴰⵔⵔⵄⴻⵏ ⵍⵖⴻⵛⵛ, ⴰⴷ ⵉⵎⵊⴰⵔ ⵍⴻⵖⴱⴻⵏ,
ⴰⵄⵎⵓⴷ ⵏ ⵓⴷⵓⵇⵇⴻⵣ ⵏⵏⴻⵙ ⵏ ⵓⴼⵓⴳⴻⵎ ⴰⴷ ⵉⴼⵏⴰ.
9 ⵡⴻⵏⵏⵉ ⵖⴰⵔ ⵉⴵⴰ ⵍⵅⴻⵣⵔⴰⵜ ⵚⴻⴱⵃⴻⵏⵜ,
ⴰⴷ ⵉⵜⵜⵡⴰⴱⴰⵔⴻⴽ,
ⵎⵉⵏⵣⵉ ⵏⴻⵜⵜⴰ ⵉⵜⵜⵉⵛ ⵉ ⵉⵎⴻⵣⵍⴰⴹ
ⵣⴻⴳ ⵡⴻⵖⵔⵓⵎ ⵏⵏⴻⵙ.
10 ⴰⵥⵥⴻⵍ ⵅ ⵓⵎⴻⵙⵜⴻⵀⵣⵉⵢ, ⴰⴷ ⵉⴼⴼⴻⵖ ⵍⵀⴻⵎⵎ,
ⴰⵇⴰ ⵉⴱⴻⴷⴷ ⵓⵎⵃⴰⵔⵡⴰⴹ ⴷ ⵍⴻⴼⴹⵉⵃⴻⵜ.
11 ⵡⴻⵏⵏⵉ ⵉⵜⵜⴻⵅⵙⴻⵏ ⵍⴻⵚⴼⴰⵢⴻⵜ ⵏ ⵡⵓⵍ,
ⵡⴻⵏⵏⵉ ⵖⴰⵔ ⵉⴵⴰ ⵉⵢⴻⵏⵛⵉⵛⴻⵏ ⵉⵛⵛⵓⵔⴻⵏ ⵙ ⴰⵔⴹⴰ,
ⴰⵊⴻⴵⵉⴷ ⴰⴷ ⵢⵉⵍⵉ ⴷ ⴰⵎⴻⴷⴷⵓⴽⴽⴻⵍ ⵏⵏⴻⵙ.
12 ⵜⵉⵟⵟⴰⵡⵉⵏ ⵏ ⵙⵉⴷⵉ ⵃⴻⵟⵟⴰⵏⵜ ⵅ ⵜⵓⵙⵙⵏⴰ,
ⵎⴰⵛⴰ ⴰⵡⴰⵍⴻⵏ ⵏ ⵓⵖⴻⴷⴷⴰⵔ ⴰⴷ ⵜⴻⵏ ⵉⴱⴹⴻⵍ.
13 ⴰⵎⴻⵄⴳⵓⵣ ⵉⵇⵇⴰⵔ:
“ⴰⵇⴰ ⴷⵉⵏ ⵉⵊⵊ ⵏ ⵡⴰⵢⵔⴰⴷ ⴷⵉ ⴱⴰⵔⵔⴰ!
ⴰⴷ ⵜⴰⵖ ⴱⴰⵍⴰⴽ ⴰⴷ ⵜⵜⵡⴰⵏⵖⴻⵖ
ⴷⵉ ⵍⵡⴻⵙⵟ ⵏ ⵡⴰⵣⵣⴰⵢⴻⵏ!”
14 ⴰⵇⴻⵎⵎⵓⵎ ⵏ ⵜⴻⵎⵖⴰⵔⵉⵏ ⵜⵉⴱⴰⵔⵔⴰⵏⵉⵢⵢⵉⵏ
ⴷ ⵉⵛⵜ ⵏ ⵜⴻⵙⵔⴰⴼⵜ ⵢⵓⴵⵖⴻⵏ,
ⵡⴻⵏⵏⵉ ⵅ ⵉⴼⴼⵓⴳⴻⵎ ⵙⵉⴷⵉ, ⴰⴷ ⴷⴰⵢⴻⵙ ⵉⵡⴹⴰ.
15 ⵜⵓⴱⴱⵓⵀⴻⵍⵢⴰ ⵜᵉⵜⵜⵖⵉⵎⴰ ⵜⵍⴻⵙⵙⴻⵇ
ⴷⴻⴳ ⵡⵓⵍ ⵏ ⵓⵃⵓⴷⵔⵉ,
ⴰⵄⵎⵓⴷ ⵏ ⵓⵡⴻⴱⴱⴻⵅ ⴰⴷ ⵜⵜ ⵉⵙⵙⵓⴼⴼⴻⵖ ⵣⵣⴰⵢⴻⵙ.
16 ⵡⴻⵏⵏⵉ ⵉⵃⴻⵚⵚⴰⵔⴻⵏ ⴰⵎⴰⵔⵅⵓ,
ⴰⴷ ⵢⴰⵔⵏⵉ ⴷⵉ ⵍⴻⵎⵖⴰⵔⴻⵜ ⵏⵏⴻⵙ,
ⵡⴻⵏⵏⵉ ⵉⵜⵜⵉⵛⴻⵏ ⵉ ⴱⵓ-ⵡⴰⴳⵍⴰ,
ⴰⴷ ⵉⵃⵡⴰⵊ ⵡⴰⵀⴰ.
ⴰⵡⴰⵍⴻⵏ ⵉⵡⴻⵣⵏⴻⵏ ⵏ ⴰⵢⵜ ⵏ ⵜⵉⵖⵉⵜ -ⵜⴰⵙⵖⴰⵔⵜ 1
17 ⴻⵡⵛ ⴰⵎⴻⵣⵣⵓⵖ ⵏⵏⴻⵛ,
ⵓⵛⴰ ⵙⴻⵍ ⵖⴰⵔ ⵡⴰⵡⴰⵍⴻⵏ ⵏ ⵉⵎⵉⵖⵉⵙⴻⵏ,
ⴰⵔⵔ ⵓⵍ ⵏⵏⴻⵛ ⵖⴰⵔ ⵜⵓⵙⵙⵏⴰ ⵉⵏⵓ.
18 ⵎⴰⵖⴰⵔ ⴰⵇⴰ ⵎⵍⵉⵃ
ⵎⴰⵍⴰ ⵜⵅⴻⵎⵎⵍⴻⴷ ⵜⴻⵏ ⴷⵉ ⴷⴰⵅⴻⵍ ⵏⵏⴻⵛ,
ⵎⴰⵍⴰ ⴰⴷ ⵜⴻⵏ ⵜⴻⵙⵙⵡⴻⵊⴷⴻⴷ ⵊⵎⵉⵄ
ⵅ ⵉⵢⴻⵏⵛⵉⵛⴻⵏ ⵏⵏⴻⵛ.
19 ⵎⴰⵃⴻⵏⴷ ⴰⴷ ⵢⵉⵍⵉ ⵓⵜⴻⵛⵍⵉ ⵏⵏⴻⵛ ⵅ ⵙⵉⴷⵉ,
ⴰⴷ ⴰⵛ ⵜⴻⵏ ⵙⵙⴻⵛⵏⴻⵖ ⵍⴻⵅⵅⵓ, ⵡⴰⵀ ⵉ ⵛⴻⴽ.
20 ⵎⴰ ⵣⴻⵄⵎⴰ ⵡⴰⵔ ⴷ ⴰⵛ ⵓⵔⵉⵖ
ⴰⵡⴰⵍⴻⵏ ⵉⴼⴰⵔⵣⴻⵏ ⴰⵟⵟⴰⵙ,
ⵛⵛⵓⵔⴻⵏ ⵙ ⵛⵛⵡⴰⵔ ⴷ ⵜⵓⵙⵙⵏⴰ,
21 ⵃⵉⵎⴰ ⴰⴷ ⴰⵛ ⵙⵙⴻⵛⵏⴻⵖ ⵍⴻⵎⵜⴻⵏ
ⵏ ⵡⴰⵡⴰⵍⴻⵏ ⵏ ⵜⵉⴷⴻⵜⵜ,
ⵎⴰⵃⴻⵏⴷ ⵜⵣⴻⵎⵎⴰⵔⴻⴷ ⴰⴷ ⴷⴷ-ⵜⴰⵔⵔⴻⴷ ⵙ ⵍⴰⵎⴰⵏ
ⵅ ⵡⴻⵏⵏⵉ ⵛⴻⴽ ⴷⴷ-ⵉⵙⵙⴻⴽⴽⴻⵏ.
22 ⵡⴰⵔ ⵜⵜⴽⴻⵛⵛⴰⴹ ⴰⵎⴰⵔⵅⵓ
ⵎⴰⵖⴰⵔ ⵏⴻⵜⵜⴰ ⴷ ⴰⵎⴰⵔⵅⵓ,
ⵡⴰⵔ ⵍⴻⴱⴱⴻⵣ ⵍⵎⴻⵙⴽⵉⵏ ⵖⴰⵔ ⵜⴻⵡⵡⴰⵔⵜ,
23 ⵎⴰⵖⴰⵔ ⵙⵉⴷⵉ ⴰⴷ ⴰⵙⴻⵏ ⵢⴰⵖ ⵜⴰⵙⵖⴰⵔⵜ ⵏⵙⴻⵏ,
ⵏⴻⵜⵜⴰ ⴰⴷ ⵉⴽⴻⵛⵛⴻⴹ ⵍⴻⵄⵎⴰⵔ
ⵏ ⵢⵉⵏⵏⵉ ⵉ-ⵜⴻⵏ ⵉⵜⵜⴽⴻⵛⵛⴰⴹⴻⵏ.
24 ⵡⴰⵔ ⵜⵜⴻⵎⴷⴷⵓⴽⴽⵓⵍ
ⴰⴽ-ⴷ ⴰⵔⵢⴰⵣ ⵉⵜⵜⴰⵔⵔⵓⵊⴷⵓⴷⴻⵏ,
ⵡⴰⵔ ⵜⵜⵉⴷⴻⴼ ⵖⴰⵔ ⴱⴰⴱ ⵏ ⵡⴻⵙⵄⴰⵔ,
25 ⵎⴰⵃⴻⵏⴷ ⵛⴻⴽ ⵡⴰⵔ ⵜᵉⵜⵜⵏⵉⵎⵉⴷ ⵛⴰ
ⴰⴽ-ⴷ ⵉⵎⴻⵙⵔⴰⵇ ⵏⵏⴻⵙ,
ⴰⴷ ⵜⴻⴳⴳⴻⴷ ⵍⴼⴻⵅ ⵉ ⵍⴻⵄⵎⴰⵔ ⵏⵏⴻⵛ.
26 ⵡⴰⵔ ⵜⵜⴰⴷⴻⴼ ⵊⴰⵔ ⵉⵏⵏⵉ ⵉⵜⵜⵉⵛⴻⵏ ⴰⵡⴰⵍ
ⵙ ⵜⵎⴻⵡⵛⵉⵡⵜ ⵏ ⵉⴼⴰⵙⵙⴻⵏ,
ⵊⴰⵔ ⵉⵏⵏⵉ ⵉⴵⴰⵏ ⴷ ⴰⴹⵎⴰⵏ ⵉ ⵉⵎⴰⵔⵡⵓⵙⴰ.
27 ⵎⴰⵍⴰ ⵡⴰⵔ ⵖⴰⵔⴻⴽ ⵎⵉⵏ ⵣⵉ ⵖⴰ ⵜⵅⴻⴵⵚⴻⴷ,
ⵎⴰⵢⴻⵎⵎⵉ ⵉⵊⴻⴱⴱⴻⴷ ⵇⴰⵎⴰ ⵏⵏⴻⵛ
ⵣⵉ ⵙⴰⴷⵓ ⵏⵏⴻⵛ?
28 ⵡⴰⵔ ⵙⵎⵓⵟⵟⵓⵢ ⴰⵢⵎⵉⵔ ⵏ ⵡⴻⵛⵃⴰⵍ ⵓⵢⴰ,
ⵡⴻⵏⵏⵉ ⴳⴳⵉⵏ ⵍⴻⵊⴷⵓⴷ ⵏⵏⴻⵛ.
29 ⵎⴰ ⵜⴻⵥⵔⵉⴷ ⵉⵊⵊ ⵏ ⵡⴻⵔⵢⴰⵣ ⵉⵎⴻⵃⴹⴻⵏ
ⴷⵉ ⵍⵃⵉⵔⴼⴰ ⵏⵏⴻⵙ?
ⴰⴷ ⵜ ⵙⵙⴱⴻⴷⴷⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵉⵊⴻⴵⵉⴷⴻⵏ,
ⵡⴰⵔ ⵉⴵⵉ ⴰⴷ ⵉⴱⴻⴷⴷ ⵣⵣⴰⵜ ⵉ ⵡⵓⴷⴻⵎ
ⵏ ⵎⵉⴷⴷⴻⵏ ⵡⴰⵔ ⴷⵉ ⵉⴵⵉ ⵍⴰⵎⴰⵏ.