15
ⴰⵡⴰⵍⴻⵏ ⵉⵡⴻⵣⵣⵏⴻⵏ ⵏ ⵙⵓⵍⵉⵎⴰⵏ - ⵜⴰⵙⵖⴰⵔⵜ 1ⵛ
1 ⵜⵡⴰⵔⵔⵉⵜ ⵉⴼⵙⵓⵙⴻⵏ
ⵜⴻⵙⵙⴻⵙⵎⴰⴹ ⴰⵅⴻⵢⵢⴻⵇ,
ⵎⴰⵛⴰ ⴰⵡⴰⵍ ⵉⵜⵜⴻⵇⵇⵙⴻⵏ
ⵉⵙⵙⴻⴽⴽⴰⵔⴰ-ⴷⴷ ⴰⵅⴻⵢⵢⴻⵇ.
2 ⵉⵍⴻⵙ ⵏ ⵉⵎⵉⵖⵉⵙⴻⵏ ⵉⵊⴻⴱⴱⴻⴷ ⵜⵓⵙⵙⵏⴰ
ⵖⴰⵔ ⵣⵣⴰⵜ,
ⵎⴰⵛⴰ ⴰⵇⴻⵎⵎⵓⵎ ⵏ ⵉⴱⵓⵀⴰⵍⵉⵢⵢⴻⵏ
ⵉⵜⵜⴰⵣⵣⴻⵍ ⵙ ⵜⵓⴱⴱⵓⵀⴻⵍⵢⴰ.
3 ⵜⵉⵟⵟⴰⵡⵉⵏ ⵏ ⵙⵉⴷⵉ ⴷⵉ ⴽⵓⵍ ⴰⵎⵛⴰⵏ,
ⵜⵜⵃⴻⴽⴽⴰⵔⴻⵏⵜ ⵉ ⵉⵚⴻⴱⵃⴰⵏⴻⵏ ⴷ ⵉⵄⴻⴼⴼⴰⵏⴻⵏ.
4 ⵉⵍⴻⵙ ⵏⵏⵉ ⵉⵙⵙⴳⴻⵏⴼⴰⵏ ⴷ ⵜⴰⵛⴻⵊⵊⴰⵔⵜ ⵏ ⵜⵓⴷⴰⵔⵜ,
ⵎⴰⵛⴰ ⴰⵔⵔⵀⴰⵊ ⵏⵏⴻⵙ ⵉⵜⵜⴰⵔⴻⵥⵥⴰ ⴱⵓⵃⴱⴻⵍ.
5 ⴰⴱⵓⵀⴰⵍⵉ ⵉⵏⴻⵟⵟⴰⵔ ⵜⵜⴰⵔⴱⵉⵢⵢⴻⵜ ⵏ ⴱⴰⴱⴰⵙ,
ⵎⴰⵛⴰ ⵡⴻⵏⵏⵉ ⵉⵜⵜⵃⴻⴽⴽⴰⵔⴰⵏ
ⵉ ⵓⵡⴻⴱⴱⴻⵅ, ⴰⵇⴰ ⵉⴼⵜⴻⵏ.
6 ⴷⵉ ⵜⴰⴷⴷⴰⵔⵜ ⵏ ⵓⵎⵙⴻⴳⴳⴰⴷ
ⴷⴰⵢⴻⵙ ⵍⴽⴻⵏⵣ ⵉⵎⵖⴰⵔ,
ⵎⴰⵛⴰ ⴷⵉ ⵎⵉⵏ ⴷⴷ-ⵉⵜⵜⴰⵡⵉ ⵓⵄⴻⴼⴼⴰⵏ
ⴷⴰⵢⴻⵙ ⵜⴰⵎⴰⵔⴰ.
7 ⵉⵢⴻⵏⵛⵉⵛⴻⵏ ⵏ ⵉⵎⵉⵖⵉⵙⴻⵏ ⵜⵜⴱⴻⵣⵣⴰⵄⴻⵏ ⵜⵓⵙⵙⵏⴰ,
ⵎⴰⵛⴰ ⵓⵍ ⵏ ⵉⴱⵓⵀⴰⵍⵉⵢⵢⴻⵏ ⵡⴰⵔ ⵉⴵⵉ ⵏⵉⵛⴰⵏ.
8 ⵜⴰⵖⴰⵔⵚⵜ ⵉ ⵉⵜⵜⵇⴻⴷⴷⴰⵎⴻⵏ ⵉⵄⴻⴼⴼⴰⵏⴻⵏ
ⴷ ⵏⵏⵄⵉ ⵉ ⵙⵉⴷⵉ,
ⵎⴰⵛⴰ ⵜⴰⵥⴰⴵⵉⵜ ⵏ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ
ⴰⵇⴰ-ⵜⵜ ⵉ ⵏⴻⵜⵜⴰ ⴷ ⴰⵔⴹⴰ.
9 ⴰⴱⵔⵉⴷ ⵏ ⵓⵄⴻⴼⴼⴰⵏ ⴷ ⵏⵏⵄⵉ ⵉ ⵙⵉⴷⵉ,
ⵎⴰⵛⴰ ⵡⴻⵏⵏⵉ ⵉⴹⴻⴼⴼⴰⵔⴰⵏ ⵜⴰⵙⴻⴳⴷⴰ,
ⵉⵜⵜⴻⵅⵙ ⵉ-ⵜ ⵏⴻⵜⵜⴰ.
10 ⵜⵜⴰⵔⴱⵉⵢⵢⴻⵜ ⵉⵇⴻⵙⵃⴻⵏ ⵜⵍⴻⵇⵇⴻⴼ
ⵡⴻⵏⵏⵉ ⵉⵙⴻⵎⵃⴻⵏ ⴷⴻⴳ ⵡⴻⴱⵔⵉⴷ,
ⵓ ⵡⴻⵏⵏⵉ ⵉⵛⴰⵔⵔⵀⴻⵏ ⴰⵡⴻⴱⴱⴻⵅ,
ⴰⴷ ⵉⵎⵎⴻⵜ.
11 ⵍⴰⵅⴰⵔⵜ ⴷ ⵜⴻⵙⵔⴰⴼⵜ ⵏ ⵓⵀⴻⵍⵍⴻⴽ
ⴰⵇⴰ ⴷⵉⵏ ⴰⵔⴻⵣⵎⴻⵏ ⵣⵣⴰⵜ ⵉ ⵙⵉⴷⵉ,
ⵎⴻⵛⵃⴰⵍ ⵄⴰⴷ ⵡⵓⵍⴰⵡⴻⵏ ⵏ ⵜⴰⵔⵡⴰ ⵏ ⴱⵏⴰⴷⴻⵎ?
12 ⴰⵎⴻⵙⵜⴻⵀⵣⵉⵢ ⵡⴰⵔ ⵉⵜⵜⴻⵅⵙ
ⵡⴻⵏⵏⵉ ⵜ ⵉ ⵖⴰ ⵉⵡⴻⴱⴱⵅⴻⵏ,
ⵡⴰⵔ ⵉⵜⵜⵔⵉⵃ ⵛⴰ ⵖⴰⵔ ⵉⵎⵉⵖⵉⵙⴻⵏ.
13 ⵓⵍ ⵉⴼⴰⵔⵃⴻⵏ ⵉⵜⵜⴻⴳⴳ ⵓⴷⴻⵎ ⵉⵛⵏⴰⵏ,
ⵎⴰⵛⴰ ⴰⵎⵏⵓⵙ ⴷⴻⴳ ⵡⵓⵍ ⵉⵙⴻⴽⴽⴻⴼ ⴱⵓⵃⴱⴻⵍ.
14 ⵓⵍ ⵉⴼⴻⵀⵀⵎⴻⵏ ⵢⴰⵔⴻⵣⵣⵓ ⵜⵓⵙⵙⵏⴰ,
ⵎⴰⵛⴰ ⴰⵇⴻⵎⵎⵓⵎ ⵏ ⵉⴱⵓⵀⴰⵍⵉⵢⵢⴻⵏ
ⵉⵙⵙⴻⵛⵛⴰ ⵉⵅⴻⴼ ⵏⵏⴻⵙ ⵙ ⵜⵓⴱⴱⵓⵀⴻⵍⵢⴰ.
15 ⵉ ⵢⵉⵏⵏⵉ ⵉⵜⵜⵡⴰⵃⵚⴰⵔⴻⵏ ⵎⴰⵔⵔⴰ ⵓⵙⵙⴰⵏ ⵏⵙⴻⵏ
ⴰⵇⴰ ⵉⵄⴻⴼⴼⵏⴻⵏ,
ⵎⴰⵛⴰ ⵓⵍ ⵉⴼⴰⵔⵃⴻⵏ
ⴰⵎ ⵉⵛⵜ ⵏ ⵣⵣⴰⵔⴷⴻⵜ ⵡⴰⵔ ⵉⵇⴻⵟⵟⵉⵏ.
16 ⵉⵃⵍⴰ ⴷⵔⵓⵙ ⴰⴽ-ⴷ ⵜⴻⴳⴳⵯⵓⴷⵉ ⵏ ⵙⵉⴷⵉ,
ⵅ ⵉⵊⵊ ⵏ ⵍⴽⴻⵏⵣ ⴷ ⴰⵎⴻⵇⵇⵔⴰⵏ ⵙ ⵍⴻⵃⵡⴻⵍ.
17 ⵉⵃⵍⴰ ⵉⵊⵊ ⵏ ⵟⵟⴻⴱⵚⵉ ⵏ ⵍⵅⵓⴹⴰⵔⵜ
ⵎⴰⵏⵉ ⵜⵃⴻⴽⴽⴻⵎ ⵜⴰⵢⵔⵉ,
ⵅ ⵉⵊⵊ ⵏ ⵓⵢⴻⵏⴷⵓⵣ ⵉⵚⴻⵃⵃⴻⵏ ⴰⴽ-ⴷ ⵡⴻⵛⵔⴰⵀ.
18 ⴰⵔⵢⴰⵣ ⵉⵜⵜⴰⵔⵔⵓⵊⴷⵓⴷⴻⵏ
ⵉⵙⵙⴻⴽⴽⴰⵔⴰ ⵉⵎⴻⵏⵖⵉⵢⵢⴻⵏ,
ⵎⴰⵛⴰ ⵡⴻⵏⵏⵉ ⵖⴰⵔ ⵉⴵⴰ ⵜⵜⴰⵙⵉⵄ ⵏ ⵍⵅⴰⴹⴰⵔ
ⵉⵙⵙⴻⵅⵙⴰⵢ ⴰⵎⴻⵏⵖⵉ.
19 ⴰⴱⵔⵉⴷ ⵏ ⵓⵎⴻⵄⴳⵓⵣ
ⴰⵎ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ,
ⵎⴰⵛⴰ ⴰⵎⴻⵙⵔⵓⵇ ⵏ ⵢⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ
ⴰⵇⴰ ⵉⵜⵜⵡⴰⵙⵙⴳⴻⵄⵄⴻⴷ.
20 ⵎⵎⵉⵙ ⴰⵎⵉⵖⵉⵙ ⵉⵙⵙⴼⴰⵔⵔⴻⵃ ⴱⴰⴱⴰⵙ,
ⵎⴰⵛⴰ ⴱⵏⴰⴷⴻⵎ ⴰⴱⵓⵀⴰⵍⵉ
ⵉⵙⵙⴻⵃⵇⴰⵔⴰ ⵢⴻⵎⵎⴰⵙ.
21 ⵜⵓⴱⴱⵓⵀⴻⵍⵢⴰ ⴰⵇⴰ-ⵜⵜ ⴷ ⵍⴻⴼⵔⴰⵃⴻⵜ
ⵉ ⵡⴻⵏⵏⵉ ⵡⴰⵔ ⵖⴰⵔ ⵉⴵⵉ ⴱⵓ ⵡⵓⵍ ⵉⵎⵜⴻⵏ,
ⵎⴰⵛⴰ ⵉⵊⵊ ⵏ ⵡⴻⵔⵢⴰⵣ ⵏ ⵍⴻⴼⵀⴰⵎⴻⵜ
ⵉⴳⴳⵓⵔ ⵏⵉⵛⴰⵏ.
22 ⵉⵏⵡⴰⵢⴻⵏ ⴼⴻⵛⵛⵍⴻⵏ
ⵎⴰⵍⴰ ⵡⴰⵔ ⴷⵉⵏ ⵉⴵⵉ ⵛⵛⵡⴰⵔ,
ⵎⴰⵛⴰ ⵙ ⵡⴰⵟⵟⴰⵙ ⵏ ⵉⵎⵛⴰⵡⴰⵔⴻⵏ
ⴰⴷ ⵢⵉⵍⵉ ⵡⴻⵏⵡⴰⵢ.
23 ⴰⵔⵢⴰⵣ ⵖⴰⵔⴻⵙ ⵍⴻⴼⵔⴰⵃⴻⵜ
ⴷⵉ ⵜⴻⵎⵡⴰⵔⵔⵉⵜ ⵉⵚⴻⴱⵃⴻⵏ
ⵣⴻⴳ ⵓⵇⴻⵎⵎⵓⵎ ⵏⵏⴻⵙ.
ⵎⴻⵛⵃⴰⵍ ⵉⵚⴱⴻⵃ ⵡⴰⵡⴰⵍ ⴷⵉ ⵍⵡⴻⵇⵜ ⵏⵏⴻⵙ!
24 ⴰⴱⵔⵉⴷ ⵏ ⵜⵓⴷⴰⵔⵜ ⵉⵏⴻⴷⴷⴻⵀ
ⵖⴰⵔ ⵙⴻⵏⵏⴻⵊ ⵉ ⵓⴼⴻⵀⵀⴰⵎ,
ⵎⴰⵃⴻⵏⴷ ⵏⴻⵜⵜⴰ ⴰⴷ ⵉⵃⴻⵢⵢⴻⴷ
ⵅ ⵍⴰⵅⴰⵔⵜ ⵙⵡⴰⴷⴷⴰⵢ.
25 ⵜⴰⴷⴷⴰⵔⵜ ⵏ ⴱⵓ-ⵏⵏⴼⴰⵅⴻⵜ
ⴰⴷ ⵜⵜ ⵉⵇⵍⴻⵄ ⵙⵉⴷⵉ,
ⵎⴰⵛⴰ ⴰⵢⵎⵉⵔ ⵏ ⵢⴻⵢⵢⴰⵔ ⵏ ⵜⴰⵊⵊⴰⵍⵜ
ⵉⵙⵙⴻⵎⵜⴰⵏ ⵉ-ⵜ ⵏⴻⵜⵜⴰ.
26 ⵉⵅⴻⵎⵎⵉⵎⴻⵏ ⵏ ⵓⵄⴻⴼⴼⴰⵏ ⴷ ⵏⵏⵄⵉ ⵉ ⵙⵉⴷⵉ,
ⵎⴰⵛⴰ ⴰⵡⴰⵍⴻⵏ ⵉⵛⴻⵡⵡⴰⵔⴻⵏ ⴷ ⵉⵎⴻⵣⴷⴰⴳⴻⵏ.
27 ⵡⴻⵏⵏⵉ ⵢⴰⵔⴻⵣⵣⵓⵏ ⵅ ⴰⵔⴱⴻⵃ
ⵉⵖⴻⵟⵟⴻⵍ ⵜⴰⴷⴷⴰⵔⵜ ⵏⵏⴻⵙ ⴷⵉ ⴰⵔⵔⵥⵉⵢⵢⴻⵜ,
ⵎⴰⵛⴰ ⵡⴻⵏⵏⵉ ⵉⵛⴰⵔⵔⵀⴻⵏ ⵜⴰⵔⵣⵉⴼⵉⵏ, ⴰⴷ ⵉⴷⴷⴰⵔ.
28 ⵓⵍ ⵏ ⵉⵎⵙⴻⴳⴳⴰⴷⴻⵏ ⵉⵜⵜⵅⴰⵔⵔⴰⵚ
ⵎⴰⵃⴻⵏⴷ ⴰⴷ ⴷⴷ-ⵢⴰⵔⵔ,
ⵎⴰⵛⴰ ⴰⵇⴻⵎⵎⵓⵎ ⵏ ⵉⵄⴻⴼⴼⴰⵏⴻⵏ
ⵉⵜⵜⴼⴻⵢⵢⴻⴹ ⵙ ⵍⵖⴰⵔ.
29 ⵉⴳⴳⵯⴻⵊ ⵙⵉⴷⵉ ⵅ ⵉⵄⴻⴼⴼⴰⵏⴻⵏ,
ⵎⴰⵛⴰ ⵜⴰⵥⴰⴵⵉⵜ ⵏ ⵉⵎⵙⴻⴳⴳⴰⴷⴻⵏ ⵉⵜⵜⴻⵙⵍⴰ ⴰⵙ.
30 ⵜⴰⴼⴰⵡⵜ ⴷⵉ ⵜⵉⵟⵟⴰⵡⵉⵏ ⵜⴻⵙⵙⴼⴰⵔⵔⴻⵃ ⵓⵍ,
ⵍⴻⵅⴱⴰⵔ ⴰⵚⴻⴱⵃⴰⵏ ⵉⵙⵙⵢⵓⵎⴰ ⵉⵖⵙⴰⵏ.
31 ⴰⵎⴻⵣⵣⵓⵖ ⵉⵜⵜⴻⵙⵍⴰⵏ
ⵖⴰⵔ ⵓⵡⴻⴱⴱⴻⵅ ⵉ ⵜⵓⴷⴰⵔⵜ,
ⴰⴷ ⵉⵙⵙⴻⵏⵙ ⴷⵉ ⵍⵡⴻⵙⵟ ⵏ ⵉⵎⵉⵖⵉⵙⴻⵏ.
32 ⵡⴻⵏⵏⵉ ⵉⵏⴻⵟⵟⴰⵔⴻⵏ ⵜⵜⴰⵔⴱⵉⵢⵢⴻⵜ,
ⵉⵙⵙⴻⵃⵇⴰⵔⴰ ⵉⵅⴻⴼ ⵏⵏⴻⵙ,
ⵎⴰⵛⴰ ⵡⴻⵏⵏⵉ ⵉⵜⵜⴻⵙⵍⴰⵏ ⵖⴰⵔ ⵓⵡⴻⴱⴱⴻⵅ,
ⵉⵙⵙⵢⴰⵡⴰⵏ ⵓⵍ ⵏⵏⴻⵙ.
33 ⵜⵉⴳⴳⵯⵓⴷⵉ ⵏ ⵙⵉⴷⵉ ⴷ ⵜⵜⴰⵔⴱⵉⵢⵢⴻⵜ ⵖⴰⵔ ⵜⵉⵖⵉⵜ,
ⵓ ⴰⵡⴰⴹⴻⵄ ⵉⵜⵜⵉⵣⵡⴰⵔ ⵉ ⵛⵛⴰⵏ.