3
ⴰⴹⴼⴰⵔ ⵏ ⵓⵍⴰⵖⵉ ⵏ ⴰⵔⴻⴱⴱⵉ
1 ⵙ ⵓⵢⴻⵏⵏⵉ, ⴰ ⴰⵢⵜⵎⴰ, ⴼⴰⵔⵃⴻⵎ ⴷⵉ ⵙⵉⴷⵉⵜⵏⴻⵖ. ⵡⴰⵔ ⵅⴰⴼⵉ ⵢⴻⵡⵄⴰⵔ ⴰⴷ ⴰⵡⴻⵎ ⴰⵔⵉⵖ ⵜⵉⵎⴻⵙⵍⴰⵢⵉⵏ-ⴰ ⵜⵡⴰⵍⴰ ⵏⵏⴻⵖⵏⵉⵜ, ⵎⵉⵏⵣⵉ ⴰⴷ ⵣⵣⴰⵢⵙⴻⵏⵜ ⵜᵉⵜⵜⵡⴰⵃⴹⴰⵎ.
2 ⵃⴹⴰⵎ ⵉⵅⴻⴼ ⵏⵡⴻⵎ ⵣⴻⴳ ⵢⵉⵟⴰⵏ, ⵃⴹⴰⵎ ⵣⴻⴳ ⵉⵅⴻⴷⴷⴰⵎⴻⵏ ⵉⵄⴻⴼⴼⴰⵏⴻⵏ, ⵃⴹⴰⵎ ⵣⴻⴳ ⵉⵏⵏⵉ ⵉⵇⴻⵟⵟⵄⴻⵏ ⴰⵢⵙⵓⵎ.
3 ⵎⵉⵏⵣⵉ ⵏⴻⵛⵛⵉⵏ ⴷ ⴰⵅⵜⴰⵏ, ⵏⴻⵛⵛⵉⵏ ⵉⵏⵏⵉ ⵉⵜⵜⵙⴻⵅⵅⴰⵔⴻⵏ ⵉ ⴰⵔⴻⴱⴱⵉ ⵙ ⴰⵔⵔⵓⵃ, ⵉⵏⵏⵉ ⵉⵙⵙⴻⵎⵖⴰⵔⴰⵏ ⴷⵉ ⵢⴰⵙⵓⵄ ⵍⵎⴰⵙⵉⵃ, ⵓⵛⴰ ⵡⴰⵔ ⵜⵜⵉⵇⵇⴻⵏ ⵛⴰ ⴷⴻⴳ ⵡⴻⵅⵜⴰⵏ ⵏ ⵡⴻⵢⵙⵓⵎ ⵏ ⴱⵏⴰⴷⴻⵎ.
4 ⵏⴻⵛⵛ ⵣⴻⵎⵎⴰⵔⴻⵖ ⴰⴷ ⵜⵜⵉⵇⵇⴻⵖ ⴷⴻⴳ ⵡⴻⵢⵙⵓⵎ ⵉⵏⵓ, ⵎⵉⵏⵣⵉ ⵎⴰⵍⴰ ⵉⵜⵜⵖⵉⵍ ⵉ ⵃⴻⴷ ⴰⴷ ⵉⵜⵜⵉⵇⵇ ⴷⴻⴳ ⵡⴻⵢⵙⵓⵎ ⵏⵏⴻⵙ, ⵏⴻⵛⵛ ⴽⵜⴰⵔ:
5 ⴰⵇⴰ ⴰⵢⵉ ⴷ ⴰⵎⴻⵅⵜⴰⵏ ⵣⴻⴳ ⵡⴰⵎⵉ ⵖⴰⵔⵉ ⵜⵎⴻⵏⵢⴰ ⵏ ⵡⵓⵙⵙⴰⵏ, ⵣⵉ ⵍⴳⴻⵏⵙ ⵏ ⵉⵙⵔⴰⵉⵍ, ⵣⴻⴳ ⴰⵢⵜ ⵏ ⴱⵉⵏⵢⴰⵎⵉⵏ, ⵏⴻⵛⵛ ⴷ ⴰⵄⵉⴱⵔⴰⵏⵉ ⵣⴻⴳ ⵉⵄⵉⴱⵔⴰⵏⵉⵢⵢⴻⵏ, ⵣⵉ ⵊⵊⵉⵀⴻⵜ ⵏ ⵛⵛⴰⵔⵉⵄⴰ ⵏⴻⵛⵛ ⴷ ⴰⴼⴰⵔⵉⵙⵉ,
6 ⵣⴻⴳ ⵓⵖⴻⵣⴷⵉⵙ ⵏ ⵛⴹⴰⵔⴻⵜ ⵜⵓⵖⴰ ⴷⴰⵔⵔⵛⴻⵖ ⵅ ⵜⵎⴻⵙⵎⵓⵏⵜ ⵏ ⵍⵎⴰⵙⵉⵃ, ⵣⴻⴳ ⵓⵖⴻⵣⴷⵉⵙ ⵏ ⵜⵙⴻⴳⴷⴰ ⵜⴻⵏⵏⵉ ⴷⵉ ⵛⵛⴰⵔⵉⵄⴰ ⴰⵇⴰ ⴰⵢⵉ ⴱⵍⴰ ⵍⵄⵉⴱ.
7 ⵎⴰⵛⴰ ⵎⵉⵏ ⵜⵓⵖⴰ ⵖⴰⵔⵉ ⴰⵔⴱⴻⵃ, ⴰⵇⴰ ⴳⴳⵉⵖ ⵜ ⴷ ⵜⴰⵅⴻⵙⵙⴰⵔⵜ ⵅ ⵙⵙⵉⴱⴱⴻⵜ ⵏ ⵍⵎⴰⵙⵉⵃ.
8 ⵏⴻⵛⵛ ⴳⴳⵉⵖ ⵎⴰⵔⵔⴰ ⵎⴰⵏ ⴰⵢⴰ ⴷ ⵜⴰⵅⴻⵙⵙⴰⵔⵜ ⵣⵉ ⵙⵙⵉⴱⴱⴻⵜ ⵏ ⵜⵓⵙⵙⵏⴰ ⵏ ⵙⵉⴷⵉ ⵢⴰⵙⵓⵄ ⵍⵎⴰⵙⵉⵃ, ⵡⴻⵏⵏⵉ ⴷⵉ ⵟⵟⵡⴻⵄ ⵏⵏⴻⵙ ⵅⵙⴰⵔⴻⵖ ⴽⵓⵍⵛⵉ, ⴳⴳⵉⵖ ⵜ ⴰⵎⴻⵛⵏⴰⵡ ⵡⴻⴼⵔⴰⴹ ⵢⵓⵔⵚⵓⴹⴻⵏ ⵃⵉⵎⴰ ⴰⴷ ⴰⵔⴻⴱⵃⴻⵖ ⵍⵎⴰⵙⵉⵃ,
9 ⵎⴰⵃⴻⵏⴷ ⴰⴷ ⵜⵜⵡⴰⴼⴻⵖ ⴷⴰⵢⴻⵙ, ⵡⴰⵔ ⵉⴵⵉ ⵙ ⵜⵙⴻⴳⴷⴰ ⵏ ⵉⵅⴻⴼ ⵉⵏⵓ ⵜⴻⵏⵏⵉ ⵣⵉ ⵛⵛⴰⵔⵉⵄⴰ - ⵎⴰⵛⴰ ⴰⴽ-ⴷ ⵜⴻⵏⵏⵉ ⴷⴷ-ⵉⵜⵜⴻⴼⴼⵖⴻⵏ ⵣⵉ ⵍ’ⵉⵎⴰⵏ ⵏ ⵍⵎⴰⵙⵉⵃ, ⴰⵇⴰ-ⵜⵜ ⴷ ⵜⴰⵙⴻⴳⴷⴰ ⵜⴻⵏⵏⵉ ⵣⵉ ⴰⵔⴻⴱⴱⵉ -
10 ⵃⵉⵎⴰ ⴰⵎⵎⵓ ⵉ ⵖⴰ ⵙⵙⵏⴻⵖ ⵢⴰⵙⵓⵄ ⴷ ⵊⵊⴻⵀⴷ ⵏ ⵜⵏⵓⴽⵔⴰ ⵏⵏⴻⵙ, ⵓ ⵎⴰⵃⴻⵏⴷ ⴰⴷ ⵛⴰⵔⵛⴻⵖ ⴷⴻⴳ ⵓⵡⴻⴷⴷⴻⴱ ⵏⵏⴻⵙ, ⴰⴷ ⴷⴻⵡⵍⴻⵖ ⴷⴻⴳ ⵡⴰⵔⵡⴰⵙ ⵏ ⵍⵎⴻⵡⵜ ⵏⵏⴻⵙ,
11 ⵃⵉⵎⴰ ⵙ ⵛⴰ ⵏ ⵡⴻⴱⵔⵉⴷ ⴰⴷ ⴰⵡⴹⴻⵖ ⵖⴰⵔ ⵜⵏⵓⴽⵔⴰ ⵣⵉ ⵜⴰⴷⴷⴰⵔⵜ ⵏ ⵉⵎⴻⵜⵜⵉⵏⴻⵏ.
12 ⵏⴻⵛⵛ ⵡⴰⵔ ⵜⵜⵉⵡⵉⴹⴻⵖ ⵏⵉⵖ ⵜⵜⵡⴰⴽⴻⵎⵎⵍⴻⵖ ⵄⴰⴷ, ⵎⴰⵛⴰ ⵢⴻⵎⵎⴰⵔⴻⵖ ⵉ ⵎⴰⵏ ⴰⵢⴰ, ⵃⵉⵎⴰ, ⵎⴰⵍⴰ ⵉⵄⴻⴷⴷⴻⵍ, ⴰⴷ ⵟⵟⴼⴻⵖ ⵎⵉⵏ ⵅⴻⴼ ⵉ ⴷ ⴰⵢⵉ ⵉⵟⵟⴻⴼ ⵢⴰⵙⵓⵄ ⵍⵎⴰⵙⵉⵃ.
13 ⴰ ⴰⵢⵜⵎⴰ, ⵡⴰⵔ ⴷ ⴰⵢⵉ ⵉⵜⵜⵖⵉⵍ ⴰⵇⴰ ⵟⵟⴼⴻⵖ ⵜ, ⵎⴰⵛⴰ ⵜⵜⴻⴳⴳⴻⵖ ⵉⵛⵜ ⵏ ⵍⵃⴰⵊⵊⴻⵜ: ⵜⵜⵓⵖ ⵎⵉⵏ ⴰⵡⴰⵔⵏⵉ ⴰⵢⵉ ⵓⵛⴰ ⴰⴷ ⵙⵙⵡⵉⵥⵥⴹⴻⵖ ⵉⵅⴻⴼ ⵉⵏⵓ ⵖⴰⵔ ⵎⵉⵏ ⴷⵉⵏ ⵣⵣⴰⵜⵉ.
14 ⵜⵜⵉⵣⵣⴰⵔⴻⵖ ⵖⴰⵔ ⵍⵖⴰⵔⴰⴹ ⵃⵉⵎⴰ ⴰⴷ ⵟⵟⴼⴻⵖ ⵜⵜⴰⵊ ⵏ ⵓⵖⴻⵍⵍⴻⴱ ⵏ ⵜⵍⴰⵖⵉⵜ ⵢⵓⵄⵍⴰⵏ ⵏ ⴰⵔⴻⴱⴱⵉ ⵜⴻⵏⵏⵉ ⵉⴵⴰⵏ ⴷⵉ ⵢⴰⵙⵓⵄ ⵍⵎⴰⵙⵉⵃ.
15 ⴻⵊⵊ ⵉⵏⵏⵉ ⵉⵡⴹⴻⵏ ⵖⴰⵔ ⵍⴻⴽⵎⴰⵔⴻⵜ, ⴰⴷ ⵔⴻⴽⴽⵣⴻⵏ ⵅⴻⵏⵏⵉ ⴷⵉ ⵜⵎⴻⵙⵍⴰⵢⵉⵏ-ⴰ. ⵓⵛⴰ ⵎⴰⵍⴰ ⵖⴰⵔⵡⴻⵎ ⵏⵏⴻⵢⵢⴻⵜ ⵏⵏⴻⵖⵏⵉ ⴷⵉ ⵛⴰ, ⴰⵇⴰ ⴰⵔⴻⴱⴱⵉ ⴰⴷ ⴰⵡⴻⵎ ⵉⵙⵙⵛⴻⵏ ⵎⴰⵏ ⴰⵢⴰ ⵄⴰⵡⴻⴷ.
16 ⵎⴰⵛⴰ ⴻⵊⵊ ⴰⵏⴻⵖ, ⵃⵉⵎⴰ ⴰⴷ ⵏⴰⵡⴻⴹ ⵖⴰⵔ ⵎⴰⵏ ⴰⵢⴰ, ⴰⴷ ⵏⵓⵢⵓⵔ ⴷⴻⴳ ⵡⴻⴱⵔⵉⴷ ⴷ ⵉⵊⵊⴻⵏ ⵙ ⵉⵅⴰⵔⵉⵚⵚⴻⵏ ⵏⵏⴻⵖ ⴷ ⵉⵊⵊⴻⵏ.
17 ⴹⴼⴰⵔⴻⵎ ⴰⵢⵉ-ⴷⴷ, ⴰ ⴰⵢⵜⵎⴰ, ⴽⵙⵉⵎ ⵜⵉⵡⴻⵚⵚⴰⴼ ⵉ ⵉⵏⵏⵉ ⵢⵓⵢⵓⵔⴻⵏ ⵄⵍⴰⵃⵙⴰⴱ ⴰⵎⴻⴷⵢⴰ ⵉ ⵣⵣⴰⵢⵏⴻⵖ ⵜⴻⵥⵔⵉⵎ.
18 ⵎⵉⵏⵣⵉ ⴰⵇⴰ ⴷⵉⵏ ⴰⵟⵟⴰⵙ ⵉⵏⵏⵉ ⵢⵓⵢⵓⵔⴻⵏ ⵡⴰⵔ ⵉⴵⵉ ⴰⵎⴻⵏⵏⵉ, ⵏⵏⵉⵖ ⴰⵡⴻⵎ ⵜⵜ ⴰⵟⵟⴰⵙ ⵏ ⵉⵎⵓⵔⴻⵏ - ⵓⵛⴰ ⵍⴻⵅⵅⵓ ⴰⴷ ⵜⵜ ⵉⵏⵉⵖ ⵙ ⵉⵎⴻⵟⵟⴰⵡⴻⵏ - ⴰⵇⴰ ⴰⵜⴻⵏ ⴷ ⵍⵄⴻⴷⵢⴰⵏ ⵏ ⵚⵚⴰⵍⵉⴱ ⵏ ⵍⵎⴰⵙⵉⵃ.
19 ⴰⵏⴻⴳⴳⴰⵔⵓ ⵏⵙⴻⵏ ⴷ ⴰⵀⴻⵍⵍⴻⴽ, ⴰⵔⴻⴱⴱⵉ ⵏⵙⴻⵏ ⴷ ⴰⵄⴻⴷⴷⵉⵙ ⵏⵙⴻⵏ ⵓⵛⴰ ⴰⵄⵓⴵⵉ ⵏⵙⴻⵏ ⴷ ⴰⴱⴻⵀⴷⴻⵍ ⵏⵙⴻⵏ, ⵓ ⵏⵏⴻⵢⵢⴻⵜ ⵏⵙⴻⵏ ⴷⵉ ⵜⵎⴻⵙⵍⴰⵢⵉⵏ ⵏ ⴷⴷⵓⵏⴻⵛⵜ.
20 ⵎⴰⵛⴰ ⵏⴻⵛⵛⵉⵏ ⵏᵉⵜⵜⵙⴻⵅⵅⴰⵔ ⴷⴻⴳ ⵉⵊⴻⵏⵡⴰⵏ ⵉ ⵣⵣⴰⵢⴻⵙ ⵏⴻⵜⵜⵔⴰⵊⴰ ⵄⴰⵡⴻⴷ ⵡⴻⵏⵏⵉ ⴷ ⴰⵏⴻⵖ ⵉⵜⵜⵉⵛⴻⵏ ⵜⵓⴷⴰⵔⵜ, ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ,
21 ⵡⴻⵏⵏⵉ ⵉ ⵖⴰ ⵉⴱⴻⴷⴷⵍⴻⵏ ⴰⵔⵔⵉⵎⴻⵜ ⵏⵏⴻⵖ ⵉⵃⴻⴱⴹⴻⵏ, ⵃⵉⵎⴰ ⴰⴷ ⵜⴻⴷⵡⴻⵍ ⴷⵉ ⵚⵚⵉⴼⴻⵜ ⵏ ⴰⵔⵔⵉⵎⴻⵜ ⵏⵏⴻⵙ ⵉⵄⵓⴵⴻⵏ, ⵄⵍⴰⵃⵙⴰⴱ ⵊⵊⴻⵀⴷ ⵏⵏⴻⵙ ⵜⴰⵎⴻⵇⵇⵔⴰⵏⵜ ⵉ ⵣⵉ ⵉ ⵖⴰ ⵉⵜⵜⵡⴰⴳⴳ ⵎⴰⵔⵔⴰ ⵎⵉⵏ ⵉⴵⴰⵏ ⵙⵡⴰⴷⴷⴰⵢ ⵏⵏⴻⵙ.