5
ⵜⴰⵔⴻⵡⵙⴰ ⵏ ⵜⵃⵉⵎⴰⵔⵜ ⵏ ⴰⵔⴻⴱⴱⵉ
1 ⵜⵜⵣⴰⵡⴳⴻⵖ ⵉⵏⵏⵉ ⴷ ⵉⵎⵖⴰⵔⴻⵏ ⵊⴰⵔ ⴰⵡⴻⵏ, ⵏⴻⵛⵛ ⴷ ⵡⴻⵏⵏⵉ ⴷ ⴰⵎⵖⴰⵔ ⴰⴽⵉⴷⵡⴻⵎ ⴷ ⴰⵛⴻⵀⵀⴰⴷ ⵏ ⵓⵡⴻⴷⴷⴻⴱ ⵉ ⵉⴽⴽⵉⵏ ⵅ ⵍⵎⴰⵙⵉⵃ ⵓⵍⴰ ⴷ ⴰⵎⵄⴰⵛⴰⵔ ⴷⴻⴳ ⵓⵄⵓⴵⵉ ⵏⵏⴻⵙ ⵉ ⴷⴷ ⵖⴰ ⵉⵜⵜⵡⴰⵙⵙⴻⴹⵀⴰⵔ:
2 ⴰⵔⴻⵡⵙⴻⵎ ⵜⴰⵃⵉⵎⴰⵔⵜ ⵏ ⴰⵔⴻⴱⴱⵉ ⵜⴻⵏⵏⵉ ⵜⵃⴻⵟⵟⴰⵎ, ⵡⴰⵔ ⵉⴵⵉ ⵙ ⵓⵖⵉⵍ ⵎⴰⵛⴰ ⵙ ⵍⵅⴰⴹⴰⵔ, ⵡⴰⵔ ⵉⴵⵉ ⴷⵉ ⵟⵟⵎⴻⵄ ⵏ ⴰⵔⴱⴻⵃ ⵡⴰⵔ ⵉⵃⵍⵉⵏ, ⵎⴰⵛⴰ ⵙ ⵎⴰⵔⵔⴰ ⵡⵓⵍ ⵏⵡⴻⵎ,
3 ⵡⴰⵔ ⵉⴵⵉ ⴰⵎ ⵢⵉⵏⵏⵉ ⵉⴵⴰⵏ ⵅ ⵜⵃⵉⵎⴰⵔⵜ, ⵎⴰⵛⴰ ⵓⵎⵉ ⵜⴻⴵⴰⵎ ⴷ ⵉⵊⵊ ⵏ ⵓⵎⴻⴷⵢⴰ ⵉⵛⵏⴰ ⵉ ⵏⵉⵜⵏⵉ.
4 ⵓⵛⴰ ⵅⵎⵉ ⴷⴷ ⵖⴰ ⵉⴹⵀⴰⵔ ⵓⵎⴻⴽⵙⴰ ⴰⵎⴻⵇⵇⵔⴰⵏ ⴰⴷ ⵣⵣⴰⵢⴻⵙ ⵜᵉⵟⵟⴼⴻⵎ ⵜⵜⴰⵊ ⵏ ⵓⵄⵓⴵⵉ ⵉ ⵡⴰⵔ ⵉⴼⴻⵏⵏⵉⵏ.
5 ⵓ ⴽⴻⵏⵏⵉⵡ, ⵉⴱⵍⵉⵖⴻⵏ, ⵙⴰⵔⵙⴻⵎ ⵉⵅⴻⴼ ⵏⵡⴻⵎ ⵙⴰⴷⵓ ⵉⵎⵖⴰⵔⴻⵏ ⵏⵡⴻⵎ, ⴱⴻⵢⵙⴻⵎ ⵉⵅⴻⴼ ⵏⵡⴻⵎ ⵙ ⵓⵡⴰⴹⴻⵄ ⵏ ⴰⵔⵔⵓⵃ ⵉⵊⵊ ⵉ ⵡⴻⵏⵏⴻⵖⵏⵉ, ⵎⵉⵏⵣⵉ ⴰⵔⴻⴱⴱⵉ ⵉⵜⵜⵄⴻⴽⴽⴰⵙ ⵉⵎⵄⴻⴼⴼⴰⵔⴻⵏ, ⵎⴰⵛⴰ ⵉⵎⵡⴰⴹⵄⴻⵏ ⵉⵡⵛⴰ ⴰⵙⴻⵏ ⴰⵔⴹⴰ.
6 ⵙⴻⵎⵥⴰⵢⴻⵎ ⵉⵅⴻⴼ ⵏⵡⴻⵎ ⵙⴰⴷⵓ ⴰⴼⵓⵙ ⵉⵊⴻⵀⴷⴻⵏ ⵏ ⴰⵔⴻⴱⴱⵉ, ⵃⵉⵎⴰ ⴰⴷ ⴽⴻⵏⵏⵉⵡ ⵉⵙⵙⵓⵄⵍⴰ ⴷⵉ ⵍⵡⴻⵇⵜ ⵏⵏⴻⵙ ⵏⵉⵛⴰⵏ.
7 ⵎⴰⵔⵔⴰ ⵉⵎⵏⵓⵙⴻⵏ ⵏⵡⴻⵎ ⴰⵔⵔⴻⵎ ⵜⴻⵏ ⵖⴰⵔ ⴰⵔⴻⴱⴱⵉ, ⴰⵇⴰ ⵏⴻⵜⵜⴰ ⵉⵜⵜⵀⵉⵍⵍⴰ ⴷⴰⵢⵡⴻⵎ.
8 ⴰⵔⵔⴻⵎ-ⴷⴷ ⵍⴱⴰⵍ, ⵃⴹⴰⵎ, ⵎⵉⵏⵣⵉ ⵍⴻⵄⴷⵓ ⵏⵡⴻⵎ, ⵛⵛⵉⵟⴰⵏ ⴰⵎⴻⵇⵇⵔⴰⵏ, ⵉⵜⵜⵣⴻⵀⵀⴰⵔ ⴰⵎ ⵡⴰⵢⵔⴰⴷ ⵓ ⵉⵜⵜⵃⴰⵎⴰ, ⵢⴰⵔⴻⵣⵣⵓ ⵎⵉⵏ ⵉⵣⴻⵎⵎⴰⵔ ⴰⴷ ⵉⵙⴰⵔⴹ.
9 ⵎⵄⴰⵍⴰⵎ ⵜ, ⵜⴱⴻⴷⴷⴻⵎ ⵏⵉⵛⴰⵏ ⴷⵉ ⵍ’ⵉⵎⴰⵏ, ⴰⵇⴰ ⵜⴻⵙⵙⵏⴻⵎ ⴱⴻⵍⵍⵉ ⴰⵢⵜⵎⴰⵜⵡⴻⵎ ⴷⵉ ⴷⴷⵓⵏⴻⵛⵜ ⵓⵍⴰ ⴷ ⵏⵉⵜⵏⵉ ⴽⴻⵙⵙⵉⵏ ⴰⵡⴻⴷⴷⴻⴱ-ⴰ.
10 ⵎⴰⵛⴰ ⴰⵔⴻⴱⴱⵉ ⵏ ⴰⵔⴹⴰ ⵡⴻⵏⵏⵉ ⴷ ⴰⵏⴻⵖ ⴷⴷ-ⵉⵍⴰⵖⴰⵏ ⵖⴰⵔ ⵓⵄⵓⴵⵉ ⵏⵏⴻⵙ ⵉⵜⵜⴷⵓⵎⴰⵏ ⵉ ⵍⴻⴱⴷⴰ ⵙ ⵢⴰⵙⵓⵄ ⵍⵎⴰⵙⵉⵃ, ⴰⵇⴰ ⵏⴻⵜⵜⴰ, ⴰⵡⴰⵔⵏⵉ ⵍⴰⵎⵉ ⵏⵡⴻⴷⴷⴻⴱ ⵍⴻⵃⵚⴰⵔⴰⵜ-ⴰ ⵜⵉⵎⵓⵇⵍⵉⵍⵉⵏ, ⴰⴷ ⴰⵏⴻⵖ ⵉⵙⵙⴻⵊⵀⴻⴷ, ⴰⴷ ⴰⵏⴻⵖ ⵉⴹⵎⴻⵏ ⵓ ⴰⴷ ⴰⵏⴻⵖ ⵉⵙⴻⴷⴷ ⵉ ⵍⴻⴱⴷⴰ.
11 ⵖⴰⵔⴻⵙ ⵏⴻⵜⵜⴰ ⴰⵄⵓⴵⵉ ⴷ ⵚⵚⵓⵍⵟⴰ ⴷ ⵍⵄⴻⵣⵣ ⵉ ⵍⴻⴱⴷⴰ ⵇⴰⵄ. ⴰⵎⵉⵏ.
12 ⵓⵔⵉⵖ ⴰⵡⴻⵎ-ⴷⴷ ⵛⴰ ⵏ ⵜⵎⴻⵙⵍⴰⵢⵉⵏ ⴷⵉ ⵜⵉⵔⴰ ⵜⴰⵇⵓⴹⴰⴹⵜ ⵙ ⵓⴼⵓⵙ ⵏ ⵙⵉⵍⵡⴰⵏⵓⵙ, ⵓⵎⴰ ⴷ ⴰⵎⵜⵉⵇⵇⵉ, ⵓ ⵏⴻⵛⵛ ⵇⴻⵏⵄⴻⵖ ⵓ ⵛⴻⵀⵀⴷⴻⵖ, ⴰⵇⴰ ⵎⴰⵏ ⴰⵢⴰ ⴷⵉ ⵎⵉⵏ ⴷⵉ ⵜⴱⴻⴷⴷⴻⵎ ⵏⵉⵛⴰⵏ, ⴰⵇⴰ-ⵜ ⴷ ⴰⵔⴹⴰ ⵏ ⴰⵔⴻⴱⴱⵉ ⴷ ⵜⵉⴷⴻⵜⵜ.
13 ⵜⴰⵎⴻⵙⵎⵓⵏⵜ ⵉⵜⵜⵡⴰⴼⴰⵔⵣⴻⵏ ⵉ ⵉⴵⴰⵏ ⴷⵉ ⴱⴰⴱⵉⵍ, ⵜⵙⴻⴵⴰⵎ ⵅⴰⵡⴻⵎ ⵙ ⵍⴻⵀⵏⴰ, ⵓⵍⴰ ⴷ ⵎⵎⵉ ⵎⴰⵔⴽⵓⵙ.
14 ⵙⴻⴵⵎⴻⵎ ⵅ ⵡⴰⵢⴰⵡⵢⴰ ⵙ ⵍⴻⵀⵏⴰ ⵓ ⵙ ⵓⵙⵓⴷⴻⵎ ⵉⵇⴻⴷⴷⵙⴻⵏ. ⵍⴻⵀⵏⴰ ⴰⴷ ⴽⵉⵡⴻⵎ ⵢⵉⵍⵉ ⵎⴰⵔⵔⴰ ⵉⴷⵡⴻⵎ ⵉ ⵉⴵⴰⵏ ⴷⵉ ⵍⵎⴰⵙⵉⵃ. ⴰⵎⵉⵏ.