24
ⴰⵡⴰⵍⴻⵏ ⵉⵡⴻⵣⵏⴻⵏ ⵏ ⴱⴰⵍⵄⴰⵎ
1 ⵉⵥⵔⴰ ⴱⴰⵍⵄⴰⵎ ⴱⴻⵍⵍⵉ ⴰⵇⴰ ⵢⴰⵔⴹⴰ ⵉ ⵜⵉⵟⵟⴰⵡⵉⵏ ⵏ ⵙⵉⴷⵉ ⵓⵎⵉ ⵉⴱⴰⵔⴻⴽ ⵉⵙⵔⴰⵉⵍ ⵓⵛⴰ ⵅⴻⵏⵏⵉ ⵡⴰⵔ ⵢⴰⵔⴻⵣⵣⵓ, ⴰⵎ ⵓⵎⵓⵔ ⴰⵎⴻⵣⵡⴰⵔⵓ ⴷ ⵓⵎⵓⵔ ⵡⵉⵙⵙ ⵜⵏⴰⵢⴻⵏ, ⵃⵉⵎⴰ ⴰⴷ ⵉⵄⴻⵣⵣⴻⵎ ⵙ ⵉⴼⵉⵖⵔⴰⵏ, ⵎⴰⵛⴰ ⵢⴰⵔⵔⴰ ⵓⴷⴻⵎ ⵏⵏⴻⵙ ⵖⴰⵔ ⵍⴻⵅⵍⴰ.
2 ⵓⵎⵉ ⵉⵙⵙⴳⴻⵄⵄⴻⴷ ⵜⴰⵎⵓⵖⵍⵉ ⵏⵏⴻⵙ, ⵉⵥⵔⴰ ⵉⵙⵔⴰⵉⵍ ⵉⵣⴷⴻⵖ ⴷⵉⵏ, ⵜᵉⵜⵜⵡⴰⵙⴻⵜⵜⴻⴼ ⵄⵍⴰⵃⵙⴰⴱ ⵜⵉⵇⴻⴱⴱⴰⵍ ⵏⵏⴻⵙ, ⵅⴻⵏⵏⵉ ⵢⵓⵙⴰ-ⴷⴷ ⴰⵔⵔⵓⵃ ⵏ ⴰⵔⴻⴱⴱⵉ ⵅⴰⵙ.
3 ⵉⴱⴷⴰ ⵏⴻⵜⵜⴰ ⴰⵡⴰⵍ ⵏⵏⴻⵙ ⵉⵡⴻⵣⵏⴻⵏ, ⵉⵏⵏⴰ:
“ⴰⵡⴰⵍ ⵏ ⴱⴰⵍⵄⴰⵎ, ⵎⵎⵉⵙ ⵏ ⴱⴰⵄⵓⵔ,
ⴰⵡⴰⵍ ⵏ ⵡⴻⵔⵢⴰⵣ ⵉⵊⴻⵀⴷⴻⵏ, ⵡⴻⵏⵏⵉ ⵓⵎⵉ ⵜⴻⵇⵇⴻⵏ ⵜⵉⵟⵟ,
4 ⵉⵊⵊ ⵏ ⵡⴰⵡⴰⵍ ⵏ ⵡⴻⵏⵏⵉ ⵉⵙⵍⵉⵏ ⴰⵡⴰⵍⴻⵏ ⵏ ⴰⵔⴻⴱⴱⵉ,
ⴷ ⵡⴻⵏⵏⵉ ⵉⵅⴻⵣⵣⴰⵔⴻⵏ ⵍⴻⵡⵃⵉⵢ
ⵏ ⵓⵎⵣⴻⵎⵎⴰⵔ ⵅ ⴽⵓⵍⵛⵉ,
ⴰⵎ ⴷⴷ-ⵉⵡⴹⴰ ⵙ ⵜⵉⵟⵟⴰⵡⵉⵏ ⵢⴰⵔⴻⵣⵎⴻⵏ.
5 ⴰ ⵢⴰⵄⵇⵓⴱ, ⵎⴻⵛⵃⴰⵍ ⵚⴻⴱⵃⴻⵏ ⵉⵇⵉⴹⴰⵏ ⵏⵏⴻⵛ,
ⴷ ⵜⵣⴻⴷⴷⵉⵖⵉⵏ ⵏⵏⴻⵛ, ⴰ ⵉⵙⵔⴰⵉⵍ!,
6 ⴰⵇⴰ ⵙⵙⵡⵉⵥⵥⴰⴹⴻⵏ ⴰⵎⴻⵛⵏⴰⵡ ⵜⵉⵖⵣⵓⵔⵉⵏ,
ⴰⵎⴻⵛⵏⴰⵡ ⴰⵖⴻⵎⵎⵓⵢ ⵉⵛⴻⵡⵡⴰⵔⴻⵏ ⴰⴽ-ⴷ ⵢⴻⵖⵣⴰⵔ,
ⴰⵎⴻⵛⵏⴰⵡ ⴰⵛⴼⵉⵍ ⵏⵏⵉ ⵉⵥⵥⵓ ⵙⵉⴷⵉ,
ⴰⵎⴻⵛⵏⴰⵡ ⵜⵉⵛⴻⵊⵊⵓⵔⴰ ⵏ ⵜⴻⵏⴳⴻⵍⵜ
ⵣⵣⴰⵜ ⵉ ⵡⴰⵎⴰⵏ.
7 ⵣⴻⴳ ⵉⴱⵓⵇⴰⵍⴻⵏ ⵏⵏⴻⵙ ⴰⴷ ⵙⵙⵉⵣⵣⵍⴻⵏ ⵡⴰⵎⴰⵏ
ⵓⵛⴰ ⵣⵣⴰⵔⵉⵄⴻⵜ ⵏⵏⴻⵙ ⴰⴷ ⵜⵉⵍⵉ ⴷⵉ ⵜⵓⴼⴼⴻⵜ.
ⴰⵊⴻⴵⵉⴷ ⵏⵏⴻⵙ ⴰⴷ ⵉⵜⵜⵡⴰⵙⵙⴳⴻⵄⵄⴻⴷ ⵅ ⴰⵊⴰⵊ
ⵓ ⵜⴰⴳⴻⵍⴷⵉⵜ ⵏⵏⴻⵙ ⴰⴷ ⵜᵉⵜⵜⵡⴰⵙⵙⵓⵄⵍⴰ.
8 ⴰⵔⴻⴱⴱⵉ ⵉⵙⵙⵓⴼⴼⴻⵖ ⵉ-ⵜ-ⵉ-ⴷⴷ ⵣⵉ ⵎⵉⵚⵔⴰ.
ⵊⵊⴻⵀⴷ ⵏⵏⴻⵙ ⴰⵎ ⵡⴰⵛⵛⴰⵡⴻⵏ ⵉⵣⵉⵔⴰⵔⴻⵏ
ⵏ ⵉⵖⴰⵢⴹ ⵏ ⵍⴻⵅⵍⴰ.
ⴰⴷ ⵢⴻⵛⵛ ⵍⴻⴳⵏⵓⵙ, ⵉⵖⵔⵉⵎⴻⵏ ⵏⵏⴻⵙ,
ⴰⴷ ⵉⵍⴱⴻⵣ ⵉⵖⵓⵙⵙⴰⵏ ⵏⵙⴻⵏ
ⵓⵛⴰ ⴰⴷ ⵜⴻⵏ ⵉⵙⵙⵏⵓⵇⵇⴻⴱ ⵙ ⴼⵍⵉⵜⵛⴰⵜ ⵏⵏⴻⵙ.
9 ⴰⵇⴰ ⵉⵖⵏⴻⵙ,
ⵉⵙⵙⴻⵣⵣⴻⵍ ⵉⵅⴻⴼ ⵏⵏⴻⵙ ⴰⵎ ⵡⴻⵢⵔⴰⴷ,
ⴰⵎ ⵜⴻⵢⵔⴰⴷⵜ.
ⵡⵉ ⵜ ⵉ ⴷⴷ ⵖⴰ ⵉⵙⵙⴻⴽⴽⴰⵔⴻⵏ?
ⵡⴻⵏⵏⵉ ⵛⴻⴽ ⵉⵜⵜⴱⴰⵔⴽⴻⵏ, ⴰⴷ ⵉⵜⵜⵡⴰⴱⴰⵔⴻⴽ
ⵓ ⵡⴻⵏⵏⵉ ⵛⴻⴽ ⵉⵏⴻⵄⵄⵍⴻⵏ, ⴰⴷ ⵢⵉⵍⵉ ⵉⵜⵜⵡⴰⵏⵄⴻⵍ!’ ”
10 ⵅⴻⵏⵏⵉ ⵢⴰⵔⵖⴰ ⵓⵅⴻⵢⵢⴻⵇ ⵏ ⴱⴰⵍⴰⴽ ⵅ ⴱⴰⵍⵄⴰⵎ. ⵉⵡⵜⴰ ⵏⴻⵜⵜⴰ ⴷⴻⴳ ⵉⴼⴰⵙⵙⴻⵏ ⵏⵏⴻⵙ ⵓⵛⴰ ⴱⴰⵍⴰⴽ ⵉⵏⵏⴰ ⵉ ⴱⴰⵍⵄⴰⵎ: “ⴰⵇⴰ ⵍⴰⵖⵉⵖ-ⴷⴷ ⵛⴻⴽ ⵎⴰⵃⴻⵏⴷ ⴰⴷ ⵜⵏⴻⵄⵍⴻⴷ ⵍⵄⴻⴷⵢⴰⵏ ⵉⵏⵓ, ⵎⴰⵛⴰ ⵅⵣⴰⵔ, ⴰⵇⴰ ⵜⴱⴰⵔⴽⴻⴷ ⵉ-ⵜⴻⵏ ⵄⴰⴷ ⵏⵉⵛⴰⵏ ⵜⵍⴰⵜⴰ ⵏ ⵉⵎⵓⵔⴻⵏ!
11 ⵅⴻⵏⵏⵉ ⵍⴻⵅⵅⵓ, ⴰⵔⵡⴻⵍ ⵖⴰⵔ ⵡⴻⵎⵛⴰⵏ ⵎⴰⵏⵉ ⵜⵣⴻⴷⴷⵖⴻⴷ! ⵏⴻⵛⵛ ⵏⵏⵉⵖ ⴰⵛ ⵜ, ⴰⴷ ⵛⴻⴽ ⵛⴻⵏⵄⴻⵖ ⴰⵟⵟⴰⵙ, ⵎⴰⵛⴰ ⵅⵣⴰⵔ, ⵙⵉⴷⵉ ⵉⵎⵏⴻⵄ ⵅⴰⴽ ⵛⵛⴻⵏⵄⴻⵜ ⵏⵏⵉ!”
12 ⵅⴻⵏⵏⵉ ⵉⵏⵏⴰ ⴱⴰⵍⵄⴰⵎ ⵉ ⴱⴰⵍⴰⴽ: “ⵎⴰ ⵡⴰⵔ ⵙⵙⵉⵡⵍⴻⵖ ⴰⴽ-ⴷ ⵉⵔⴻⵇⵇⴰⵙⴻⵏ ⵏⵏⵉ ⴷ ⴰⵢⵉ ⴷⴷ-ⵜᵉⵙⵙⴻⴽⴽⴻⴷ ⵓⵛⴰ ⵏⵏⵉⵖ:
13 ‘ⵡⴰⵅⵅⴰ ⴱⴰⵍⴰⴽ ⴰⴷ ⴰⵢⵉ ⵉⵡⵛ ⵜⴰⴷⴷⴰⵔⵜ ⵏⵏⴻⵙ ⵜⴻⵛⵛⵓⵔ ⵙ ⵏⵏⵓⵇⴰⵔⵜ ⴷ ⵡⵓⵔⴻⵖ, ⵅⴻⵏⵏⵉ ⵏⴻⵛⵛ ⵄⴰⴷ ⵡⴰⵔ ⵣⵎⵉⵔⴻⵖ ⴰⴷ ⵄⴻⴷⴷⵉⵖ ⵅ ⵍⵓⵎⵓⵔ ⵏ ⵙⵉⴷⵉ, ⵎⴰⵃⴻⵏⴷ ⴰⴷ ⴳⴳⴻⵖ ⵛⴰ ⵏ ⵍⵃⴰⵊⵊⴻⵜ ⵏ ⵍⵅⴰⵔ ⵏⵉⵖ ⵏ ⵍⵖⴰⵔ ⵉ ⴷⴷ-ⵉⵜⵜⴻⴼⴼⵖⴻⵏ ⵣⴻⴳ ⵡⵓⵍ ⵉⵏⵓ. ⵎⵉⵏ ⵖⴰ ⵢⵉⵏⵉ ⵙⵉⴷⵉ, ⴰⴷ ⵜ ⵉⵏⵉⵖ.’
14 ⵍⴻⵅⵅⵓ ⵅⴻⵏⵏⵉ, ⵅⵣⴰⵔ, ⵏⴻⵛⵛ ⴰⴷ ⴷⴷ-ⴷⴻⵡⵍⴻⵖ ⵖⴰⵔ ⵍⴳⴻⵏⵙ ⵉⵏⵓ. ⴰⵙ-ⴷⴷ, ⵏⴻⵛⵛ ⴰⴷ ⵛⴻⴽ ⵙⵙⴰⵔⴻⴳⴱⴻⵖ ⵅ ⵍⴻⴼⵀⴰⵎⴻⵜ ⵓⵛⴰ ⴰⴷ ⴰⵛ ⵉⵏⵉⵖ ⵎⵉⵏ ⴷ ⴰⵛ ⵖⴰ ⵢⴻⴳⴳ ⵍⴳⴻⵏⵙ-ⴰ ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ.”
15 ⵅⴻⵏⵏⵉ ⵉⴱⴷⴰ ⵏⴻⵜⵜⴰ ⴰⵡⴰⵍ ⵉⵡⴻⵣⵏⴻⵏ ⵏⵏⴻⵙ, ⵉⵏⵏⴰ:
“ⴰⵡⴰⵍ ⵏ ⴱⴰⵍⵄⴰⵎ, ⵎⵎⵉⵙ ⵏ ⴱⴰⵄⵓⵔ,
ⴰⵡⴰⵍ ⵏ ⵡⴻⵔⵢⴰⵣ ⵉⵊⴻⵀⴷⴻⵏ,
ⵡⴻⵏⵏⵉ ⵓⵎⵉ ⵜⴻⵇⵇⴻⵏ ⵜⵉⵟⵟ!
16 ⵜⴰⵡⴰⵍⵜ ⵏ ⵡⴻⵏⵏⵉ ⵉⵙⵍⵉⵏ ⴰⵡⴰⵍⴻⵏ ⵏ ⴰⵔⴻⴱⴱⵉ,
ⴷ ⵡⴻⵏⵏⵉ ⵉⵙⵙⵏⴻⵏ ⵣⵉ ⵜⵓⵙⵙⵏⴰ
ⵏ ⵡⴻⵏⵏⵉ ⴷ ⴰⵎⵄⵓⴵⵉ ⵅ ⴽⵓⵍⵛⵉ,
ⴷ ⵡⴻⵏⵏⵉ ⵉⵅⴻⵣⵣⴰⵔⴻⵏ ⵍⴻⵡⵃⵉⵢ
ⵏ ⵓⵎⵣⴻⵎⵎⴰⵔ ⵅ ⴽⵓⵍⵛⵉ,
ⴰⵎ ⴷⴷ-ⵉⵡⴹⴰ ⵙ ⵜⵉⵟⵟⴰⵡⵉⵏ ⵢⴰⵔⴻⵣⵎⴻⵏ.
17 ⴰⴷ ⵜ ⵥⴰⵔⵖ, ⵡⴰⵔ ⵉⴵⵉ ⵍⴻⵅⵅⵓ,
ⴰⴷ ⵜ ⵜⵡⴰⵍⵉⵖ, ⵎⴰⵛⴰ ⵡⴰⵔ ⵉⴵⵉ ⵣⵉ ⵍⴰⴷⴰⵙⴻⵜ.
ⴰⴷ ⴷⴷ-ⵉⴼⴼⴻⵖ ⵉⵜⵔⵉ ⵣⵉ ⵢⴰⵄⵇⵓⴱ
ⵓⵛⴰ ⴰⴷ ⵜⴻⴽⴽⴰⵔ ⵓⵣⴻⴵⴰⴹ
ⵏ ⵍⵃⴰⴽⴻⵎ ⵣⵉ ⵉⵙⵔⴰⵉⵍ,
ⵡⴻⵏⵏⵉ ⵉ ⵖⴰ ⵉⵍⴻⴱⵣⴻⵏ ⵍⵃⴻⵏⴽⴰⵜ
ⵏ ⵓⵣⴻⴵⵉⴼ ⵏ ⵎⵓ’ⴰⴱ
ⵓⵛⴰ ⴰⴷ ⵉⵍⴱⴻⵣ ⵎⴰⵔⵔⴰ ⵜⴰⵔⵡⴰ ⵏ ⵙⵙⴷⴻⵄ
18 ⵓⵛⴰ ⴰⴷ ⵉⵜⵜⵡⴰⵟⵟⴻⴼ ⵉⴷⵓⵎ ⴷ ⵍⵡⴰⵔⵜ
ⵓ ⵙⴰⵄⵉⵔ, ⵡⴻⵏⵏⵉ ⴷ ⵍⴻⵄⴷⵓ ⵏⵏⴻⵙ,
ⴰⴷ ⵜ ⵟⵟⴼⴻⵏ ⴷ ⵍⵡⴰⵔⵜ ⵄⴰⵡⴻⴷ,
ⵓⵛⴰ ⴰⵎⵎⵓ ⵉ ⵖⴰ ⵢⴻⴳⴳ ⵉⵙⵔⴰⵉⵍ ⵙ ⵜⴰⵔⵢⴰⵙⵜ.
19 ⵓ ⵡⴻⵏⵏⵉ ⵉ ⴷⴷ ⵖⴰ ⵉⴼⴼⵖⴻⵏ ⵣⵉ ⵢⴰⵄⵇⵓⴱ ⴰⴷ ⵉⵃⴽⴻⵎ
ⵓ ⵏⴻⵜⵜⴰ ⴰⴷ ⵉⵙⵙⵀⴻⵍⵍⴻⴽ
ⵡⴻⵏⵏⵉ ⵢⴰⵔⴻⵡⵍⴻⵏ ⵣⵉ ⵜⴻⵏⴷⵉⵏⵜ.”
20 ⵓⵎⵉ ⵏⴻⵜⵜⴰ ⵉⵥⵔⴰ ⵄⴰⵎⴰⵍⵉⵇ, ⵉⴱⴷⴰ ⴰⵡⴰⵍ ⵉⵡⴻⵣⵏⴻⵏ ⵏⵏⴻⵙ, ⵉⵏⵏⴰ:
“ⵄⴰⵎⴰⵍⵉⵇ ⴷ ⴰⵎⴻⵣⵡⴰⵔⵓ ⵏ ⵍⴻⴳⵏⵓⵙ,
ⵎⴰⵛⴰ ⴰⵏⴻⴳⴳⴰⵔⵓ ⵏⵏⴻⵙ ⴰⴷ ⵉⴷⵡⴻⵍ ⴷ ⴰⵀⴻⵍⵍⴻⴽ!”
21 ⵍⴰⵎⵉ ⵉⵥⵔⴰ ⵉⵇⵉⵏⵉⵢⵢⴻⵏ, ⵉⴱⴷⴰ ⵏⴻⵜⵜⴰ ⴰⵡⴰⵍ ⵉⵡⴻⵣⵏⴻⵏ ⵏⵏⴻⵙ, ⵉⵏⵏⴰ:
“ⵜⴰⵣⴻⴷⴷⵉⵖⵜ ⵏⵏⴻⵛ ⵜⴻⵎⵜⴻⵏ
ⵓⵛⴰ ⵜⴻⴳⴳⵉⴷ ⵍⵄⵓⵛⵛ ⵏⵏⴻⵛ ⴷⵉ ⵜⴻⵚⴹⴰⵔⵜ.
22 ⵄⴰⴷ ⵇⴰⵢⵉⵏ ⴰⴷ ⵉⵜⵜⵡⴰⵙⵙⴻⵛⵎⴻⴹ.
ⴰⵍ ⵎⴻⵍⵎⵉ ⵉⵣⴻⵎⵎⴰⵔ ⴰⵛⵛⵓⵔ
ⴰⴷ ⴰⵛ ⴷⴷ-ⵢⴰⵡⵉ ⴷ ⴰⵎⴻⵃⴱⵓⵙ?”
23 ⵓⵛⴰ ⵉⴱⴷⴰ ⵏⴻⵜⵜⴰ ⴰⵡⴰⵍ ⵉⵡⴻⵣⵏⴻⵏ ⵏⵏⴻⵙ, ⵉⵏⵏⴰ:
“ⴰⵢ, ⵡⵉ ⵖⴰ ⵉⵇⵇⵉⵎⴻⵏ ⵉⴷⴷⴰⵔⴻⵏ
ⵅⵎⵉ ⵅⴰⵙ ⵉ ⵖⴰ ⵉⵙⵙⴰⵔⵙ ⴰⵔⴻⴱⴱⵉ ⵎⴰⵏ ⴰⵢⴰ?
24 ⵉⵖⴰⵔⵔⵓⴱⴰ ⵣⵉ ⵊⵊⵡⴰⵢⴻⵀ ⵏ ⴽⵉⵜⵜⵉⵎ
ⴰⴷ ⵖⴻⵣⵣⴰⵏ ⴰⵛⵛⵓⵔ
ⵓⵛⴰ ⴰⴷ ⵖⴻⵣⵣⴰⵏ ⵄⴰⵡⴻⴷ ⵄⴰⴱⵉⵔ
ⵓ ⵏⴻⵜⵜⴰ ⴰⴷ ⵉⵜⵜⵡⴰⵜⴻⵃⵃⴰ.”
25 ⵉⴽⴽⴰⵔ ⴱⴰⵍⵄⴰⵎ, ⵢⵓⵢⵓⵔ ⵓⵛⴰ ⵉⴷⵡⴻⵍ ⵖⴰⵔ ⵡⴻⵎⵛⴰⵏ ⵏⵏⴻⵙ ⵏ ⵜⵣⴻⴷⴷⵉⵖⵜ. ⵓⵍⴰ ⴷ ⴱⴰⵍⴰⴽ ⵉⵟⵟⴻⴼ ⴰⴱⵔⵉⴷ ⵏⵏⴻⵙ.