20
ⵍⵎⴻⵡⵜ ⵏ ⵎⴰⵔⵢⴰⵎ
1 ⴷⴻⴳ ⵓⵢⵓⵔ ⴰⵎⴻⵣⵡⴰⵔⵓ ⵜⵉⵡⴻⴹ ⵎⴰⵔⵔⴰ ⵜⴰⵎⴻⵙⵎⵓⵏⵜ ⵏ ⴰⵢⵜ ⵏ ⵉⵙⵔⴰⵉⵍ ⵖⴰⵔ ⵍⴻⵅⵍⴰ ⵏ ⵚⵉⵏ. ⵍⴳⴻⵏⵙ ⵉⵇⵇⵉⵎ ⴷⵉ ⵇⴰⴷⴰⵛ. ⴷⵉⵏ ⵉ ⵜⴻⵎⵎⵓⵜ ⵎⴰⵔⵢⴰⵎ ⵓⵛⴰ ⵏⴻⴹⵍⴻⵏ ⵜⵜ ⴷⵉⵏ.
ⴰⵎⴰⵏ ⵏ ⵎⵉⵔⵉⴱⴰ
2 ⵡⴰⵔ ⵜⵓⵖⵉ ⴷⵉⵏ ⵛⴰ ⴰⵎⴰⵏ ⵉ ⵜⵎⴻⵙⵎⵓⵏⵜ. ⵅⴻⵏⵏⵉ ⵎⵓⵏⴻⵏ ⴹⵉⴷⴷ ⵉ ⵎⵓⵙⴰ ⴷ ⵀⴰⵔⵓⵏ.
3 ⵜⵓⵖⴰ ⵍⴳⴻⵏⵙ ⵉⵎⵛⵓⴱⴱⴻⵛ ⴰⴽ-ⴷ ⵎⵓⵙⴰ, ⵏⵏⴰⵏ: “ⵎⵍⵉ ⵜⵓⵖⴰ ⵣⵣⴰⵢⵏⴻⵖ ⵉⴼⴼⴻⵖ ⴱⵓⵃⴱⴻⵍ ⵓⵎⵉ ⵜⵓⵖⴰ ⵉⴼⴼⴻⵖ ⴱⵓⵃⴱⴻⵍ ⵣⴻⴳ ⴰⵢⵜⵎⴰⵜⵏⴻⵖ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ!
4 ⵎⴰⵢⴻⵎⵎⵉ ⵜⴻⵙⵙⵉⴷⴼⴻⵎ ⵡⴻⴳⵔⴰⵡ ⵏ ⵍⴳⴻⵏⵙ ⵏ ⵙⵉⴷⵉ ⴷⵉ ⵍⴻⵅⵍⴰ-ⵢⴰ ⵎⴰⵃⴻⵏⴷ ⴰⴷ ⵎⵎⵜⴻⵏ ⴷⵉⵏ, ⵏⴻⵛⵛⵉⵏ ⴷ ⵍⴻⴱⵀⴰⵢⴻⵎ ⵏⵏⴻⵖ?
5 ⵓ ⵎⴰⵢⴻⵎⵎⵉ ⴷ ⴰⵏⴻⵖ ⴷⴷ-ⵜⴻⵙⵙⵉⵍⵢⴻⵎ ⵣⵉ ⵎⵉⵚⵔⴰ ⵃⵉⵎⴰ ⴰⴷ ⴰⵏⴻⵖ ⵜⴻⵙⵙⵉⵡⴹⴻⵎ ⵖⴰⵔ ⵡⴻⵎⵛⴰⵏ-ⴰ ⴰⵄⴻⴼⴼⴰⵏ? ⴷⴻⴳ ⵡⴻⵎⵛⴰⵏ-ⴰ ⵡⴰⵔ ⴷⵉⵏ ⵣⵣⴰⵔⵉⵄⴻⵜ ⵏⵉⵖ ⵜⴰⵣⴰⵔⵜ ⵏⵉⵖ ⵜⵣⴰⵢⴰⵔⵜ ⵏⵉⵖ ⴰⵔⴻⵎⵎⴰⵎ ⵓ ⵡⴰⵔ ⴷⵉⵏ ⵄⴰⴷ ⴰⵎⴰⵏ ⵃⵉⵎⴰ ⴰⴷ ⵏⵙⵓ.”
6 ⵅⴻⵏⵏⵉ ⵢⵉⵡⴻⴹ ⵎⵓⵙⴰ ⴰⴽ-ⴷ ⵀⴰⵔⵓⵏ ⵣⵉ ⵣⵣⴰⵜ ⵏ ⵡⵓⴷⴻⵎ ⵏ ⵡⴻⴳⵔⴰⵡ ⵏ ⵍⴳⴻⵏⵙ ⵖⴰⵔ ⵡⴰⴷⴰⴼ ⵏ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⵓⵛⴰ ⵡⴹⴰⵏ ⵅ ⵡⵓⴷⵎⴰⵡⴻⵏ ⵏⵙⴻⵏ ⵓⵛⴰ ⵉⴱⴰⵏ ⴰⵙⴻⵏ-ⴷⴷ ⵓⵄⵓⴵⵉ ⵏ ⵙⵉⴷⵉ.
7 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:
8 “ⴽⵙⵉ ⵜⴰⵖⵖⴰⵔⵛⵜ ⵓⵛⴰ ⵙⵎⵓⵏ ⵜⴰⵎⴻⵙⵎⵓⵏⵜ, ⵛⴻⴽ ⴷ ⵀⴰⵔⵓⵏ, ⵓⵎⴰⵛ. ⵉⵜⵜⵅⴻⵚⵚⴰ ⴰⴷ ⵜⴻⵙⵙⵉⵡⵍⴻⵎ ⴰⴽ-ⴷ ⵜⴻⵚⴹⴰⵔⵜ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ ⵓⵛⴰ ⵅⴻⵏⵏⵉ ⴰⴷ ⵜⴻⵡⵛ ⴰⵎⴰⵏ ⵏⵏⴻⵙ. ⴰⵎⵎⵓ ⵉ ⵖⴰ ⵜⴻⵙⵙⵓⴼⴼⵖⴻⵎ ⴰⵎⴰⵏ ⵉ ⵏⵉⵜⵏⵉ ⵣⵉ ⵜⴻⵚⴹⴰⵔⵜ ⵓⵛⴰ ⴰⴷ ⵜᵉⵙⵙⴻⵙⵙⵓⴷ ⵜⴰⵎⴻⵙⵎⵓⵏⵜ ⴷ ⵍⴻⴱⵀⴰⵢⴻⵎ.”
9 ⵅⴻⵏⵏⵉ ⵉⴽⵙⵉ ⵎⵓⵙⴰ ⵜⴰⵖⵖⴰⵔⵛⵜ ⵣⵉ ⵣⵣⴰⵜ ⵏ ⵡⵓⴷⴻⵎ ⵏ ⵙⵉⴷⵉ ⴰⵎ ⵎⴰⵎⵎⴻⵛ ⴷ ⴰⵙ ⵢⵓⵎⵓⵔ ⵏⴻⵜⵜⴰ,
10 ⵓⵛⴰ ⵉⵙⵙⵎⵓⵏ ⵎⵓⵙⴰ ⴷ ⵀⴰⵔⵓⵏ ⴰⴳⵔⴰⵡ ⵏ ⵍⴳⴻⵏⵙ ⵣⵣⴰⵜ ⵉ ⵡⵓⴷⴻⵎ ⵏ ⵜⴻⵚⴹⴰⵔⵜ. ⵏⴻⵜⵜⴰ ⵉⵏⵏⴰ ⴰⵙⴻⵏ: “ⵙⵍⴻⵎ ⵍⴻⵅⵅⵓ, ⴰ ⴽⴻⵏⵏⵉⵡ ⵉⵏⵏⵉ ⵉⵖⴻⵡⵡⵖⴻⵏ, ⵎⴰ ⵉⵜⵜⵅⴻⵚⵚⴰ ⴰⵏⴻⵖ ⴰⴷ ⴷⴷ-ⵏⴻⵙⵙⵓⴼⴼⴻⵖ ⴰⵎⴰⵏ ⵣⵉ ⵜⴻⵚⴹⴰⵔⵜ-ⴰ?”
11 ⵓⵛⴰ ⵉⵙⵙⴳⴻⵄⵄⴻⴷ ⵎⵓⵙⴰ ⴰⴼⵓⵙ ⵏⵏⴻⵙ ⵓⵛⴰ ⵉⵡⵜⴰ ⵜⴰⵚⴹⴰⵔⵜ ⵜⵏⴰⵢⴻⵏ ⵏ ⵜⵡⴰⵍⴰⵡⵉⵏ ⵙ ⵜⴰⵖⵖⴰⵔⵛⵜ ⵏⵏⴻⵙ ⵓⵛⴰ ⴼⴼⵖⴻⵏ-ⴷⴷ ⵣⵣⴰⵢⴻⵙ ⴰⵟⵟⴰⵙ ⵏ ⵡⴰⵎⴰⵏ ⵓⵛⴰ ⵜⴻⵙⵡⴰ ⵜⵎⴻⵙⵎⵓⵏⵜ ⴷ ⵍⴻⴱⵀⴰⵢⴻⵎ ⵏⵙⴻⵏ.
12 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵎⵓⵙⴰ ⴷ ⵀⴰⵔⵓⵏ: “ⵎⵉⵏⵣⵉ ⴽⴻⵏⵏⵉⵡ ⵡⴰⵔ ⴷ ⴰⵢⵉ ⵜᵉⵜⵜⴻⵛⵍⴻⵎ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⴰⵢⵜ ⵏ ⵉⵙⵔⴰⵉⵍ ⴰⵍⴰⵎⵉ ⴷ ⴰⵢⵉ ⵜⵡⴻⵇⵇⴰⵔⴻⵎ ⵙ ⵓⵡⴻⵇⵇⴰⵔ ⵉⵇⴻⴷⴷⵙⴻⵏ, ⵙ ⵓⵢⴰ ⵡⴰⵔ ⵜⴻⵙⵙⵉⴷⵉⴼⴻⵎ ⴰⴳⵔⴰⵡ-ⴰ ⵏ ⵍⴳⴻⵏⵙ ⴷⵉ ⵜⴻⵎⵎⵓⵔⵜ ⵏⵏⵉ ⴷ ⴰⵙⴻⵏ ⵡⵛⵉⵖ.”
13 ⵉⵏⴰ ⴰⵇⴰ ⴷ ⴰⵎⴰⵏ ⵏ ⵎⴰⵔⵉⴱⴰ ⵎⵉⵏ ⵅⴻⴼ ⴰⵔⴻⵣⵣⵓⵏ ⴰⵢⵜ ⵏ ⵉⵙⵔⴰⵉⵍ ⴰⴷ ⵎⵛⵓⴱⴱⵛⴻⵏ ⴰⴽ-ⴷ ⵙⵉⴷⵉ ⵓ ⵎⴰⵏⵉ ⵏⴻⵜⵜⴰ ⵉⴱⴰⵏ-ⴷⴷ ⴷ ⴰⵎⵇⴻⴷⴷⴻⵙ ⵊⴰⵔ ⴰⵙⴻⵏ.
ⵉⴷⵓⵎ ⵢⵓⴳⵉ ⴰⵥⵡⵉ ⵏ ⵍⴳⴻⵏⵙ
14 ⵉⵙⵙⴻⴽⴽ ⵎⵓⵙⴰ ⵉⵔⴻⵇⵇⴰⵙⴻⵏ ⵣⵉ ⵇⴰⴷⴰⵛ ⵖⴰⵔ ⵓⵊⴻⴵⵉⴷ ⵏ ⵉⴷⵓⵎ, ⵏⵏⴰⵏ: “ⴰⵎⵎⵓ ⵉ ⵉⵇⵇⴰⵔ ⵉⵙⵔⴰⵉⵍ, ⵓⵎⴰⵛ: ‘ⵛⴻⴽ ⵜⴻⵙⵙⵏⴻⴷ ⵎⴰⵔⵔⴰ ⵜⴰⵎⴰⵔⴰ ⵏⵏⵉ ⵅⴰⵏⴻⵖ ⵉⴽⴽⵉⵏ,
15 ⴰⵇⴰ ⵍⴻⵊⴷⵓⴷ ⵏⵏⴻⵖ ⵀⵡⴰⵏ-ⴷⴷ ⵖⴰⵔ ⵎⵉⵚⵔⴰ ⵓ ⵜⵓⵖⴰ ⵏⵣⴻⴷⴷⴻⵖ ⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ ⴷⵉ ⵎⵉⵚⵔⴰ ⵓ ⵉⵎⵉⵚⵔⵉⵢⵢⴻⵏ ⴳⴳⵉⵏ ⴷⴰⵢⵏⴻⵖ ⵓ ⴷⵉ ⵍⴻⵊⴷⵓⴷ ⵏⵏⴻⵖ ⴰⵟⵟⴰⵙ ⵏ ⵍⵖⴰⵔ.
16 ⵏⵍⴰⵖⴰ ⵅ ⵙⵉⴷⵉ ⵓⵛⴰ ⵏⴻⵜⵜⴰ ⵉⵙⵍⴰ ⵜⵎⵉⵊⵊⴰ ⵏⵏⴻⵖ ⵓⵛⴰ ⵉⵙⵙⴻⴽⴽ-ⴷⴷ ⵍⵎⴰⵍⴰⴽ ⵓⵛⴰ ⵉⵙⵙⵓⴼⴼⴻⵖ ⴰⵏⴻⵖ-ⴷⴷ ⵣⵉ ⵎⵉⵚⵔⴰ. ⵅⵣⴰⵔ, ⴰⵇⴰ ⴰⵏⴻⵖ ⴷⵉ ⵇⴰⴷⴰⵛ, ⵉⵛⵜ ⵏ ⵜⴻⵏⴷⵉⵏⵜ ⵖⴰⵔ ⵟⵟⴰⵔⴼ ⵏ ⵊⵊⵉⵀⴻⵜ ⵏⵏⴻⵛ.
17 ⴻⵊⵊ ⴰⵏⴻⵖ, ⵎⴰⵍⴰ ⵜⴻⵅⵙⴻⴷ, ⴰⴷ ⵏⴻⵥⵡⴰ ⵅ ⵜⴻⵎⵎⵓⵔⵜ ⵏⵏⴻⵛ. ⵡⴰⵔ ⵏⵥⴻⴽⴽⵡⵉ ⵅ ⵉⵢⵢⴰⵔⴻⵏ ⵏⵉⵖ ⵅ ⵉⵎⴰⵔⵊⴰⵄⴻⵏ ⵏⵏⴻⵛ ⵏ ⵓⴹⵉⵍ ⵓ ⵡⴰⵔ ⵏᵉⵙⴻⵙⵙ ⴰⵎⴰⵏ ⵣⴻⴳ ⵡⴰⵏⵓⵜⴻⵏ. ⵅ ⵡⴻⴱⵔⵉⴷ ⵉⴳⴻⵍⵍⴷⴻⵏ ⴰⴷ ⵏⴻⵄⴷⵓ ⴱⵍⴰ ⵎⴰ ⴰⴷ ⵏⵃⴻⵢⵢⴻⴷ ⵖⴰⵔ ⵢⴻⴼⵓⵙ ⵓⵍⴰ ⵖⴰⵔ ⵓⵣⴻⵍⵎⴰⴹ, ⴰⵍ ⵖⴰ ⵏⴻⵄⴷⵓ ⵄⴰⵡⴻⴷ ⵉⵢⵎⵉⵔⴻⵏ ⵏ ⵜⴻⵎⵎⵓⵔⵜ ⵏⵏⴻⵛ.’ ”
18 ⵉⵏⵏⴰ ⴰⵙ ⵉⴷⵓⵎ: “ⵡⴰⵔ ⵜⵜⵥⴻⴽⴽⵯⵉⴷ ⵅⴰⴼⵉ, ⵏⵉⵖ ⴰⴽ ⴽⵉⵛ ⵎⵎⵙⴰⴳⴰⵔⴻⵖ ⵙ ⵙⵙⵉⴼ ⴱⴰⵍⴰⴽ!”
19 ⵅⴻⵏⵏⵉ ⵏⵏⴰⵏ ⴰⵙ ⴰⵢⵜ ⵏ ⵉⵙⵔⴰⵉⵍ: “ⴰⴷ ⵏⴻⴹⴼⴰⵔ ⴰⴱⵔⵉⴷ ⴰⵎⴻⵇⵇⵔⴰⵏ ⵓ ⵎⴰⵍⴰ ⴰⴷ ⵙⵡⴻⵖ ⴰⵎⴰⵏ ⵏⵏⴻⵛ, ⵏⴻⵛⵛ ⴷ ⵍⴻⴱⵀⴰⵢⴻⵎ ⵉⵏⵓ, ⴰⴷ ⵜⴻⵏ ⵅⴻⴵⵚⴻⵖ. ⴰⴷ ⵥⵡⵉⵖ ⵜⴰⵎⵎⵓⵔⵜ ⵅ ⵉⴹⴰⵔⴻⵏ ⴷ ⵡⴻⵏⵏⵉ ⵏⴻⵜⵜⴰ ⵡⴰⵀⴰ.”
20 ⵎⴰⵛⴰ ⵏⴻⵜⵜⴰ ⵉⵏⵏⴰ: “ⵡⴰⵔ ⵅⴰⵙ ⵜⵥⴻⴽⴽⵯⵉⴷ!” ⵓⵛⴰ ⵉⴼⴼⴻⵖ ⵉⴷⵓⵎ ⵎⴰⵃⴻⵏⴷ ⴰⴷ ⴽⵉⵙ ⵉⵎⵙⴰⴳⴰⵔ ⵙ ⵢⵉⵊⵊ ⵏ ⵓⴱⴰⵔⵔⵓ ⴷ ⴰⵎⴻⵇⵇⵔⴰⵏ ⴷ ⵓⴼⵓⵙ ⵉⵊⴻⵀⴷⴻⵏ.
21 ⴰⵎⵎⵓ ⵢⵓⴳⵉ ⵉⴷⵓⵎ ⴰⴷ ⵉⵡⵛ ⵜⵜⴻⵙⵔⵉⵃ ⵉ ⵉⵙⵔⴰⵉⵍ ⵎⴰⵃⴻⵏⴷ ⴰⴷ ⵉⵥⵡⴰ ⴰⵢⵎⵉⵔ ⵏⵏⴻⵙ. ⵙ ⵓⵢⴻⵏⵏⵉ ⵉ ⵉⵊⵊⴰ ⵉⵙⵔⴰⵉⵍ ⴰⴱⵔⵉⴷ ⴷⵉ ⵙⵙⵉⴱⴱⴻⵜ ⵏⵏⴻⵙ.
ⵍⵎⴻⵡⵜ ⵏ ⵀⴰⵔⵓⵏ
22 ⴼⴻⵙⵢⴻⵏ ⵉⵇⵉⴹⴰⵏ ⵏⵙⴻⵏ, ⴼⴼⵖⴻⵏ ⵣⵉ ⵇⴰⴷⴰⵛ, ⵓⵛⴰ ⵅⴻⵏⵏⵉ ⵉⵡⴹⴻⵏ ⴰⵢⵜ ⵏ ⵉⵙⵔⴰⵉⵍ ⵖⴰⵔ ⵡⴻⴷⵔⴰⵔ ⵏ ⵀⵓⵔ, ⵜⴰⵎⴻⵙⵎⵓⵏⵜ ⵎⴰⵔⵔⴰ.
23 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ ⴷ ⵀⴰⵔⵓⵏ ⵖⴰⵔ ⵡⴻⴷⵔⴰⵔ ⵏ ⵀⵓⵔ, ⵖⴰⵔ ⵡⴻⵢⵎⵉⵔ ⵏ ⵜⴻⵎⵎⵓⵔⵜ ⵏ ⵉⴷⵓⵎ, ⵉⵏⵏⴰ:
24 “ⴰⴷ ⵉⵎⵎⴰⵔⵏⵉ ⵀⴰⵔⵓⵏ ⵖⴰⵔ ⵍⴳⴻⵏⵙ ⵏⵏⴻⵙ, ⵎⵉⵏⵣⵉ ⵡⴰⵔ ⵉⵜⵜⵉⴷⴻⴼ ⵖⴰⵔ ⵜⴻⵎⵎⵓⵔⵜ ⵏⵏⵉ ⵡⵛⵉⵖ ⵉ ⴰⵢⵜ ⵏ ⵉⵙⵔⴰⵉⵍ, ⵎⵉⵏⵣⵉ ⴽⴻⵏⵏⵉⵡ ⵜⵖⴻⵏⵏⴰⵏⴻⵎ ⵅ ⵍⵓⵎⵓⵔ ⵉⵏⵓ ⵖⴰⵔ ⵡⴰⵎⴰⵏ ⵏ ⵎⴰⵔⵉⴱⴰ.
25 ⴽⵙⵉ ⵀⴰⵔⵓⵏ ⴷ ⴰⵍⵉⵄⴰⵣⴰⵔ, ⵎⵎⵉⵙ, ⵓⵛⴰ ⴰⵔⵔ ⵉ-ⵜⴻⵏ ⴰⴷ ⴳⴻⵄⵄⴷⴻⵏ ⵅ ⵡⴻⴷⵔⴰⵔ ⵏ ⵀⵓⵔ.
26 ⵄⴰⵔⵔⴰ ⵀⴰⵔⵓⵏ ⵣⴻⴳ ⵡⴰⵔⵔⵓⴹ ⵏⵏⴻⵙ ⵓⵛⴰ ⵙⵢⴰⵔⴹ ⵉ-ⵜ ⵉ ⴰⵍⵉⵄⴰⵣⴰⵔ, ⵎⵎⵉⵙ. ⵅⴻⵏⵏⵉ ⴰⴷ ⵉⵜⵜⵡⴰⴽⵙⵉ ⵀⴰⵔⵓⵏ ⵓⵛⴰ ⴰⴷ ⵉⵎⵎⴻⵜ ⴷⵉⵏ.”
27 ⵎⵓⵙⴰ ⵉⴳⴳⴰ ⴰⵎ ⵎⴰⵎⵎⴻⵛ ⴷ ⴰⵙ ⵢⵓⵎⵓⵔ ⵙⵉⴷⵉ. ⵓⵍⵢⴻⵏ ⴰⴷⵔⴰⵔ ⵏ ⵀⵓⵔ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵜⴰⵎⴻⵙⵎⵓⵏⵜ.
28 ⵎⵓⵙⴰ ⵉⵄⴰⵔⵔⴰ ⵀⴰⵔⵓⵏ ⵣⴻⴳ ⵡⴰⵔⵔⵓⴹ ⵏⵏⴻⵙ ⵓⵛⴰ ⵉⵙⵙⵢⴰⵔⴹ ⵉ-ⵜ ⵉ ⴰⵍⵉⵄⴰⵣⴰⵔ, ⵎⵎⵉⵙ. ⵓⵛⴰ ⵉⵎⵎⵓⵜ ⵀⴰⵔⵓⵏ ⴷⵉⵏ ⵅ ⵜⵇⵉⵛⵛⴰⵜ ⵏ ⵡⴻⴷⵔⴰⵔ. ⵅⴻⵏⵏⵉ ⵉⵀⵡⴰ-ⴷⴷ ⵎⵓⵙⴰ ⵣⴻⴳ ⵡⴻⴷⵔⴰⵔ ⴰⴽ-ⴷ ⴰⵍⵉⵄⴰⵣⴰⵔ.
29 ⵎⴰⵔⵔⴰ ⵜⴰⵎⴻⵙⵎⵓⵏⵜ ⵜⴻⵥⵔⴰ ⴱⴻⵍⵍⵉ ⵀⴰⵔⵓⵏ ⵉⴹⵍⴻⵇ ⵉ ⴱⵓⵃⴱⴻⵍ ⵏⵏⴻⵙ ⵓⵛⴰ ⵔⵓⵏ ⵜⵍⴰⵜⵉⵏ ⵏ ⵡⵓⵙⵙⴰⵏ ⴷⵉ ⵙⵙⵉⴱⴱⴻⵜ ⵏ ⵀⴰⵔⵓⵏ, ⵎⴰⵔⵔⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ.