5
1 “ⵎⴰⵍⴰ ⵉⵅⴹⴰ ⵃⴻⴷ ⵓⵎⵉ ⵉⵙⵍⴰ ⴰⵀⴻⵊⵊⵉ ⵏ ⵉⵛⵜ ⵏ ⵏⵏⴻⵄⵍⴻⵜ ⵓⵛⴰ ⵏⴻⵜⵜⴰ ⴷ ⴰⵛⴻⵀⵀⴰⴷ ⵅⴰⵙ, ⵏⵉⵖ ⵉⵥⵔⴰ ⵉ-ⵜ ⵏⵉⵖ ⵉⵙⵙⴻⵏ ⵉ-ⵜ: ⵎⴰⵍⴰ ⵡⴰⵔ ⵅⴰⵙ ⵉⵇⵇⴰⵔ ⵡⴰⵍⵓ, ⵅⴻⵏⵏⵉ ⴰⴷ ⵢⴰⵔⴱⵓ ⵍⵎⵓⵄⵚⵉⵢⵢⴻⵜ ⵏⵏⴻⵙ.
2 ⵏⵉⵖ ⵎⴰⵍⴰ ⵉⵃⴰⴷⴰ ⵃⴻⴷ ⵎⵉⵏ ⵎⴰ ⵣⵉ ⵜⵎⴻⵙⵍⴰⵛⵜ ⵉⵅⴻⵎⵊⴻⵏ, ⵍⵅⴻⵛⴱⴻⵜ ⵏ ⵍⵎⴰⵍ ⵉⵅⵎⴻⵊ, ⵏⵉⵖ ⵍⵅⴻⵛⴱⴻⵜ ⵏ ⵍⴻⴱⵀⵉⵎⴻⵜ ⵉⵅⴻⵎⵊⴻⵏ, ⵏⵉⵖ ⵍⵅⴻⵛⴱⴻⵜ ⵏ ⵓⵎⵓⴷⴷⴰⵔ ⵉⵅⵎⴻⵊ ⵉⵜⵜⴱⵓⵄⴻⵏ, ⵓⵛⴰ ⵏⴻⵜⵜⴰ ⵡⴰⵔ ⵉⵙⵙⵉⵏ ⴰⵢⴰ, ⴰⵇⴰ ⵉⵅⵎⴻⵊ ⵓ ⴷⴰⵢⴻⵙ ⴰⵎⴰⵔⵡⴰⵙ.
3 ⵏⵉⵖ ⵎⴰⵍⴰ ⵉⵃⴰⴷⴰ ⵛⴰ ⵏ ⵍⴻⵅⵎⴻⵊ ⵏ ⴱⵏⴰⴷⴻⵎ, ⵎⵉⵏ ⵎⴰ ⵣⵉ ⵍⴻⵅⵎⴻⵊ ⵏⵏⴻⵙ ⵉ ⵣⵉ ⵉⴷⵡⴻⵍ ⵏⴻⵜⵜⴰ ⵉⵅⵎⴻⵊ, ⵎⴰⵍⴰ ⵜⴻⵏⵏⵓⴼⴼⴰⵔ ⵅⴰⵙ ⵓⵛⴰ ⵉⵙⵙⴻⵏ ⵉⵜ ⴰⵡⴰⵔⵏⵉ ⴰⵙ, ⴰⵇⴰ ⴷⴰⵢⴻⵙ ⴰⵎⴰⵔⵡⴰⵙ.
4 ⵏⵉⵖ ⵎⴰⵍⴰ ⵉⵥⵥⵓⴵ ⵃⴻⴷ ⵙ ⵜⵛⴰⵔⴼⴰⵢⴻⵃ ⵏⵏⴻⵙ, ⵎⴰⵃⴻⵏⴷ ⴰⴷ ⵉⴳⴳ ⵍⵖⴰⵔ ⵏⵉⵖ ⴰⴷ ⵉⴳⴳ ⵍⵅⴰⵔ, ⵏⵉⵖ ⵎⵉⵏ ⵎⴰ ⵉⵣⴻⵎⵎⴰⵔ ⴱⵏⴰⴷⴻⵎ ⴰⴷ ⵉⵏⵟⴻⵇ ⴰⵎⴻⵏⵏⵉ ⵡⴰⵀⴰ ⵙ ⵉⵛⵜ ⵏ ⵜⵊⴰⴵⵉⵜ, ⴰⵎ ⵡⴰⵔ ⵜⵜ ⵉⵙⵙⵉⵏ, ⵎⴰⵛⴰ ⵉⵙⵙⴻⵏ ⵉ-ⵜ ⴰⵡⴰⵔⵏⵉ ⵎⴰⵏ ⴰⵢⴰ, ⴰⵇⴰ ⴷⴰⵢⴻⵙ ⴰⵎⴰⵔⵡⴰⵙ ⴷⵉ ⵙⵙⵉⴱⴱⴻⵜ ⵏ ⵉⵛⵜ ⵣⵉ ⵜⵎⴻⵙⵍⴰⵢⵉⵏ-ⴰ.
5 ⵅⴻⵏⵏⵉ ⴰⴷ ⵉⵎⵙⴰⵔ, ⵎⴰⵍⴰ ⴷⴰⵢⴻⵙ ⴰⵎⴰⵔⵡⴰⵙ ⴷⵉ ⵙⵙⵉⴱⴱⴻⵜ ⵏ ⵉⵛⵜⴻⵏ ⵣⵉ ⵜⵎⴻⵙⵍⴰⵢⵉⵏ-ⴰ, ⴰⴷ ⵉⵏⵄⴻⵎ ⵅ ⵎⵉⵏ ⵜⵓⵖⴰ ⵉⵅⴹⴰ.
6 ⵅ ⴷⴷⴻⵏⴱ ⵉ ⵉⴳⴳⴰ, ⵉⵜⵜⵅⴻⵚⵚⴰ ⴰⵙ ⴰⴷ ⵉⵇⴻⴷⴷⴻⵎ ⵉⵛⵜ ⵏ ⵜⴻⵡⵜⴻⵎⵜ ⵏ ⵡⵓⴵⵉ ⴷ ⵜⴰⵖⴰⵔⵚⵜ ⵏ ⵓⵎⴰⵔⵡⴰⵙ, ⵉⵛⵜ ⵏ ⵜⴻⵅⵙⵉ ⵏⵉⵖ ⵉⵛⵜ ⵏ ⵜⵖⴰⵢⴹⴻⵜ, ⴷ ⵜⴰⵖⴰⵔⵚⵜ ⵏ ⴷⴷⴻⵏⴱ ⵉ ⵙⵉⴷⵉ, ⵓⵛⴰ ⴰⴽⴻⵀⵀⴰⵏ ⴰⴷ ⵅⴰⵙ ⵉⴳⴳ ⴰⵚⵍⴰⵃ ⴷⵉ ⵙⵙⵉⴱⴱⴻⵜ ⵏ ⴷⴷⴻⵏⴱ ⵏⵏⴻⵙ.
7 ⵎⴰⵛⴰ ⵎⴰⵍⴰ ⴰⴼⵓⵙ ⵏⵏⴻⵙ ⵡⴰⵔ ⵖⴰⵔⴻⵙ ⵎⵉⵏ ⵉⵇⴻⴷⴷⴻⵏ ⵉ ⵢⵉⵊⵊ ⵣⴻⴳ ⵡⵓⴵⵉ, ⵅⴻⵏⵏⵉ ⴰⴷ ⵢⴰⵡⵉ ⵉ ⵙⵉⴷⵉ ⵉ ⵜⵖⴰⵔⵚⵜ ⵏ ⵓⵎⴰⵔⵡⴰⵙ ⵅ ⴷⴷⴻⵏⴱ ⵉ ⵉⴳⴳⴰ, ⵜⵏⴰⵢⴻⵏ ⵏ ⵜⴻⵊⵍⵉⵍⵍⵉⵃⵉⵏ ⵏⵉⵖ ⵜⵏⴰⵢⴻⵏ ⵏ ⵉⴷⴱⵉⵔⴻⵏ ⵉⵎⴻⵥⵢⴰⵏⴻⵏ, ⵉⵊⵊⴻⵏ ⵉ ⵜⵖⴰⵔⵚⵜ ⵏ ⴷⴷⴻⵏⴱ ⵓ ⵉⵊⵊⴻⵏ ⵉ ⵜⵖⴰⵔⵚⵜ ⵏ ⵡⴻⵛⵎⴰⴹ.
8 ⴰⴷ ⵜⴻⵏ ⵢⴰⵡⵉ ⵖⴰⵔ ⵓⴽⴻⵀⵀⴰⵏ, ⵡⴻⵏⵏⵉ ⴷⴷ ⵖⴰ ⵢⴰⵡⵢⴻⵏ ⴷ ⴰⵎⴻⵣⵡⴰⵔⵓ ⵜⴰⵊⵍⵉⵍⵍⵉⵃⵜ ⵏⵉⵖ ⴰⴹⴱⵉⵔ ⵉ ⵉⴵⴰⵏ ⵉ ⵜⵖⴰⵔⵚⵜ ⵏ ⴷⴷⴻⵏⴱ ⵓⵛⴰ ⴰⴷ ⵉⴽⴽⴻⵙ ⴰⵣⴻⴵⵉⴼ ⵏⵏⴻⵙ ⵣⵉ ⵛⵡⴰⵢⵜ ⴰⵡⴰⵔⵏⵉ ⵢⵉⵔⵉ ⵏⵏⴻⵙ, ⵎⴰⵛⴰ ⵡⴰⵔ ⵜ ⵉⴱⴻⵟⵟⵉ ⵎⴰⵔⵔⴰ.
9 ⴰⴷ ⵉⵔⵓⵛⵛ ⵛⵡⴰⵢⵜ ⵏ ⵉⴷⴰⵎⵎⴻⵏ ⵖⴰⵔ ⵓⵖⴻⵣⴷⵉⵙ ⵏ ⵓⵄⴰⵍⵟⴰⵔ ⵓⵛⴰ ⵎⵉⵏ ⵉⵛⴻⵟⵟⴻⵏ ⵣⴻⴳ ⵉⴷⴰⵎⵎⴻⵏ, ⴰⴷ ⵜ ⵉⵥⴻⵎⵎ ⵖⴰⵔ ⵓⴹⴰⵔ ⵏ ⵓⵄⴰⵍⵟⴰⵔ. ⴰⵇⴰ-ⵜⵜ ⴷ ⵜⴰⵖⴰⵔⵚⵜ ⵏ ⴷⴷⴻⵏⴱ.
10 ⴰⴷ ⵉⵙⵙⴻⵡⵊⴻⴷ ⴰⵎⴻⴷⴷⴰⵔ ⵏⵏⴻⵖⵏⵉ ⴰⵎ ⵜⵖⴰⵔⵚⵜ ⵏ ⵡⴻⵛⵎⴰⴹ ⵄⵍⴰⵃⵙⴰⴱ ⵍⴼⴰⵔⵉⴹⴰ ⵓⵛⴰ ⴰⵎⵎⵓ ⵉ ⵅⴰⵙ ⵉ ⵖⴰ ⵢⴻⴳⴳ ⵓⴽⴻⵀⵀⴰⵏ ⴰⵚⵍⴰⵃ ⵅ ⴷⴷⴻⵏⴱ ⵏⵏⴻⵙ ⵉ ⵉⴳⴳⴰ ⵓⵛⴰ ⴰⴷ ⴰⵙ ⵉⵜⵜⵡⴰⵖⴼⴰⵔ.
11 ⵎⴰⵍⴰ ⴰⴼⵓⵙ ⵏⵏⴻⵙ ⵡⴰⵔ ⵖⴰⵔⴻⵙ ⵎⵉⵏ ⵉⵇⴻⴷⴷⴻⵏ ⵉ ⵜⵏⴰⵢⴻⵏ ⵏ ⵜⴻⵊⵍⵉⵍⵍⵉⵃⵉⵏ ⵏⵉⵖ ⵉ ⵜⵏⴰⵢⴻⵏ ⵏ ⵉⴷⴱⵉⵔⴻⵏ ⵉⵎⴻⵥⵢⴰⵏⴻⵏ, ⵅⴻⵏⵏⵉ ⵡⴻⵏⵏⵉ ⵉⵅⴹⴰⵏ, ⴰⴷ ⵢⴰⵡⵉ ⴰⵎ ⵜⴻⵡⵀⵉⴱⵜ ⵏⵏⴻⵙ ⵜⴰⵄⵛⴰⵔⵜ ⵏ ⵉⵊⵊ ⵏ ⵉⴼⴰ ⵏ ⵡⴰⵔⴻⵏ ⴰⵣⴷⴰⴷ ⴷ ⵜⴰⵡⵀⵉⴱⵜ ⵏ ⴷⴷⴻⵏⴱ. ⵡⴰⵔ ⵅⴰⵙ ⵉⵜⵜⴻⴳⴳ ⵣⵣⴻⵛⵜ ⵓⵍⴰ ⵡⴰⵔ ⵅⴰⵙ ⵉⵙⵙⵔⵓⵙⵉ ⵊⵊⴰⵡⵉ, ⵎⵉⵏⵣⵉ ⴰⵇⴰ-ⵜⵜ ⴷ ⵜⴰⵖⴰⵔⵚⵜ ⵏ ⴷⴷⴻⵏⴱ.
12 ⴰⴷ ⵜⵜ ⵢⴰⵡⵉ ⵖⴰⵔ ⵓⴽⴻⵀⵀⴰⵏ ⵓⵛⴰ ⴰⴽⴻⵀⵀⴰⵏ ⴰⴷ ⵣⵣⴰⵢⴻⵙ ⵉⴽⵙⵉ ⵉⵊⵊ ⵏ ⵡⵓⵔⵓ ⵉⵛⵛⵓⵔ ⵓⵛⴰ ⴰⴷ ⵉⵙⵙⴱⴻⵅⵅⴰⵔ ⴰⵢⴰ ⴰⵎ ⵍⵉⴷⴰⵔⴻⵜ ⴷⴰⵢⴻⵙ ⵅ ⵓⵄⴰⵍⵟⴰⵔ, ⵅ ⵜⴻⵡⵀⵉⴱⵉⵏ ⵏ ⵜⵎⴻⵙⵙⵉ ⵉ ⵙⵉⴷⵉ. ⴰⵇⴰ-ⵜⵜ ⴷ ⵜⴰⵖⴰⵔⵚⵜ ⵏ ⴷⴷⴻⵏⴱ.
13 ⴰⵎⵎⵓ ⵉ ⵅⴰⵙ ⵖⴰ ⵢⴻⴳⴳ ⵓⴽⴻⵀⵀⴰⵏ ⴰⵚⵍⴰⵃ ⵅ ⴷⴷⴻⵏⴱ ⵏⵏⴻⵙ ⵏⵏⵉ ⵉⴳⴳⴰ ⵣⵉ ⵊⵊⵉⵀⴻⵜ ⵏ ⵉⵛⵜⴻⵏ ⵣⵉ ⵜⵎⴻⵙⵍⴰⵢⵉⵏ-ⴰ ⵓⵛⴰ ⴰⴷ ⴰⵙ ⵉⵜⵜⵡⴰⵖⴼⴰⵔ. ⵎⵉⵏ ⵉⵛⴻⵟⵟⴻⵏ ⴰⴷ ⵢⵉⵍⵉ ⵉ ⵉⴽⴻⵀⵀⴰⵏⴻⵏ ⴰⵎ ⵎⴰⵎⵎⴻⵛ ⵉ ⵢⴻⴵⴰⵏ ⴰⴽ-ⴷ ⵜⴻⵡⵀⵉⴱⵜ ⵏ ⵍⵖⵉⴵⴻⵜ.”
ⵜⵉⵖⴰⵔⵚⴰ ⵏ ⵓⵎⴰⵔⵡⴰⵙ
14 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:
15 “ⵎⴰⵍⴰ ⵉⴳⴳⴰ ⵃⴻⴷ ⵙ ⵍⴻⵖⴷⴰⵔ ⵓⵛⴰ ⵉⵅⴹⴰ ⵙ ⵓⵡⴻⴷⴷⴰⵔ ⴷⵉ ⵜⵎⴻⵙⵍⴰⵢⵉⵏ ⵉⵇⴻⴷⴷⵙⴻⵏ ⵏ ⵙⵉⴷⵉ, ⵉⵜⵜⵅⴻⵚⵚⴰ ⴰⴷ ⵢⴰⵡⵉ ⵉⵛⴰⵔⵔⵉ ⵉⵛⵏⴰⵏ ⵇⴰⵄ ⵣⴻⴳ ⵡⵓⴵⵉ ⴷ ⵜⴰⵖⴰⵔⵚⵜ ⵏ ⵓⵎⴰⵔⵡⴰⵙ ⵉ ⵙⵉⴷⵉ. ⴰⴷ ⵜⵉⵍⵉ ⵍⵇⵉⵎⴻⵜ ⵏⵏⴻⵙ ⵄⵍⴰⵃⵙⴰⴱ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ ⴷⴻⴳ ⵉⵛⵉⵇⵍⵓⵜⴻⵏ ⵏ ⵏⵏⵓⵇⴰⵔⵜ ⵄⵍⴰⵃⵙⴰⴱ ⵛⵉⵇⵍⵓ ⵏ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ. ⴰⵇⴰ ⴷ ⵜⴰⵖⴰⵔⵚⵜ ⵏ ⵓⵎⴰⵔⵡⴰⵙ.
16 ⵣⵉ ⵜⵎⴻⵙⵍⴰⵢⵉⵏ ⵉⵇⴻⴷⴷⵙⴻⵏ ⴰⴷ ⵢⴰⵔⵔ ⴷⵉ ⵎⵉⵏ ⴷⵉ ⵉⵅⴹⴰ ⵇⴱⴻⵍ, ⵓⵛⴰ ⴰⴷ ⴷⴰⵢⴻⵙ ⵢⴰⵔⵏⵉ ⵍⴻⵅⵎⵓⵙ. ⵓⵛⴰ ⴰⴷ ⵉⵡⵛ ⵎⴰⵏ ⴰⵢⴰ ⵉ ⵓⴽⴻⵀⵀⴰⵏ ⵓⵛⴰ ⴰⴽⴻⵀⵀⴰⵏ ⴰⴷ ⵜ ⵉⵙⵙⴻⵚⵍⴻⵃ ⵙ ⵉⵛⴰⵔⵔⵉ ⵏ ⵜⵖⴰⵔⵚⵜ ⵏ ⵓⵎⴰⵔⵡⴰⵙ ⵓⵛⴰ ⴰⴷ ⴰⵙ ⵉⵜⵜⵡⴰⵖⴼⴰⵔ.
17 ⵎⴰⵍⴰ ⵉⵅⴹⴰ ⵃⴻⴷ ⵓⵛⴰ ⵉⴳⴳⴰ ⵉⵛⵜ ⵏ ⵜⵎⴻⵙⵍⴰⵛⵜ ⵉ ⵡⴰⵔ ⵜᵉⵜⵜⵛⵓⵡⵡⴰⵔ ⴰⴷ ⵜᵉⵜⵜⵡⴰⴳⴳ, ⴰⵎ ⴷⴷ-ⵉⴼⴼⴻⵖ ⴷⴻⴳ ⵉⵛⵜ ⵏ ⵜⵎⴻⵙⵍⴰⵛⵜ ⵣⵉ ⵜⵡⴻⵚⵚⴰ ⵏ ⵙⵉⴷⵉ, ⵓⵛⴰ ⵜⵓⵖⴰ ⵜⵏⵓⴼⴼⴰⵔ ⵅⴰⵙ, ⴰⴷ ⴷⴰⵢⴻⵙ ⵢⵉⵍⵉ ⵓⵎⴰⵔⵡⴰⵙ ⵓⵛⴰ ⴰⴷ ⵢⴰⵔⴱⵓ ⵍⵎⵓⵄⵚⵉⵢⵢⴻⵜ ⵏⵏⴻⵙ.
18 ⴰⴷ ⵢⴰⵡⵉ ⵉⵊⵊ ⵏ ⵉⵛⴰⵔⵔⵉ ⵉⵛⵏⴰⵏ ⵇⴰⵄ ⵣⴻⴳ ⵡⵓⴵⵉ ⵖⴰⵔ ⵓⴽⴻⵀⵀⴰⵏ ⵉ ⵜⵖⴰⵔⵚⵜ ⵏ ⵓⵎⴰⵔⵡⴰⵙ, ⴰⴷ ⵜⵉⵍⵉ ⵍⵇⵉⵎⴻⵜ ⵏⵏⴻⵙ ⵄⵍⴰⵃⵙⴰⴱ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ ⵓⵛⴰ ⴰⴷ ⵜ ⵉⵙⵙⴻⵚⵍⴻⵃ ⵓⴽⴻⵀⵀⴰⵏ ⵅ ⵓⵡⴻⴷⴷⴰⵔ ⵏⵏⴻⵙ ⵉ ⴷⵉ ⵉⵡⴻⴷⴷⴰⵔ ⴰⵎ ⵡⴰⵔ ⵜ ⵉⵙⵙⵉⵏ ⵓⵛⴰ ⴰⴷ ⴰⵙ ⵉⵜⵜⵡⴰⵖⴼⴰⵔ.
19 ⴰⵇⴰ ⴷ ⵜⴰⵖⴰⵔⵚⵜ ⵏ ⵓⵎⴰⵔⵡⴰⵙ. ⵙ ⵜⵉⴷⴻⵜⵜ ⵜⵓⵖⴰ ⴷⴰⵢⴻⵙ ⴰⵎⴰⵔⵡⴰⵙ ⵣⵣⴰⵜ ⵉ ⵙⵉⴷⵉ.”
20 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:
21 “ⵎⴰⵍⴰ ⵉⵅⴹⴰ ⵃⴻⴷ ⵓⵛⴰ ⵉⵖⴷⴰⵔ ⵙⵉⴷⵉ ⴰⵎ ⵉⵙⵙⵅⴰⵔⵔⵉⵇ ⵅ ⵊⵊⴰⵔ ⵏⵏⴻⵙ ⵅ ⵎⵉⵏ ⴷ ⴰⵙ ⵉⵎⵎⴻⵡⵛⴻⵏ, ⵎⴰⵃⴻⵏⴷ ⴰⴷ ⵜ ⵉⵃⴹⴰ, ⵏⵉⵖ ⵅ ⵎⵉⵏ ⵉⵊⵊⴰ ⴷⴻⴳ ⵓⴼⵓⵙ ⵏⵏⴻⵙ, ⵏⵉⵖ ⵅ ⵎⵉⵏ ⵅⴰⵙ ⵢⵓⵛⴰⵔⴻⵏ, ⵏⵉⵖ ⵅ ⵛⴰ ⵏ ⵓⴱⴻⵄⵄⴻⵊ ⵉ ⵉⴳⴳⴰ ⵉ ⵊⵊⴰⵔ ⵏⵏⴻⵙ,
22 ⵏⵉⵖ ⴰⵎ ⵉⵙⵙⵅⴰⵔⵔⵉⵇ ⵅ ⵛⴰ ⵎⵉⵏ ⵉⵡⴻⴷⴷⴰⵔⴻⵏ ⵉ ⵛⴰ ⵏ ⵢⵉⵊⵊⴻⵏ ⵓ ⵉⵜⵜⵡⴰⴼ ⵣⵣⴰⵢⴻⵙ ⵓⵛⴰ ⵅⴻⵏⵏⵉ ⵏⴻⵜⵜⴰ ⵉⵊⵊⵓⴵ ⵥⵓⵔ, ⵡⴰⵀ, ⴰⵎ ⵉⵙⵙⵅⴰⵔⵔⵉⵇ ⵏⴻⵜⵜⴰ ⵅ ⵉⵛⵜⴻⵏ ⵣⵉ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ ⵏⵏⵉ ⵉⵜⵜⴻⴳⴳ ⴱⵏⴰⴷⴻⵎ ⴰⵍⴰⵎⵉ ⵉⵅⴻⵟⵟⴰ ⵙ ⵎⴰⵏ ⴰⵢⴰ,
23 ⵅⴻⵏⵏⵉ ⵉⵜⵜⵅⴻⵚⵚⴰ, ⵓⵎⵉ ⵉⵅⴹⴰ ⵓⵛⴰ ⵉⴷⵡⴻⵍ ⴷⴰⵢⴻⵙ ⵓⵎⴰⵔⵡⴰⵙ, ⴰⵇⴰ ⵏⴻⵜⵜⴰ ⴰⴷ ⴷⴷ-ⵢⴰⵔⵔ ⵜⵓⵛⴻⴼⴼⴰⵔⵜ ⵏⵏⵉ ⵢⵓⵛⴰⵔ, ⵏⵉⵖ ⵎⵉⵏ ⵉⵜⵜⵡⴰⴽⴽⵙⴻⵏ ⵏⵏⵉ ⵉⴽⵙⵉ ⵏⴻⵜⵜⴰ ⵙ ⵓⵖⵉⵍ, ⵏⵉⵖ ⵎⵉⵏ ⵜⵓⵖⴰ ⵉⵃⴹⴰ ⵏⵏⵉ ⴷ ⴰⵙ ⵉⵎⵎⴻⵡⵛⴻⵏ ⵎⴰⵃⴻⵏⴷ ⴰⴷ ⵜⵜ ⵉⵃⴹⴰ, ⵏⵉⵖ ⵎⵉⵏ ⵉⵡⴻⴷⴷⴰⵔⴻⵏ ⵏⵏⵉ ⵢⵓⴼⴰ.
24 ⵓⵛⴰ ⵎⴰⵔⵔⴰ ⵎⵉⵏ ⵅⴻⴼ ⵉⵊⵊⵓⴵ ⵥⵓⵔ, ⴰⴷ ⴷⴷ-ⵢⴰⵔⵔ ⵍⵇⵉⵎⴻⵜ ⵏⵏⴻⵙ ⵜⵎⵓⵏ ⵓⵛⴰ ⴰⴷ ⵢⴰⵔⵏⵉ ⵍⴻⵅⵎⵓⵙ. ⵏⴻⵜⵜⴰ ⴰⴷ ⵜ ⵉⵡⵛ ⵉ ⵡⴻⵏⵏⵉ ⵓⵎⵉ ⴷⴷ-ⵜⵓⵙⴰ ⴷⴻⴳ ⵡⴰⵙⵙ ⵏ ⵜⵖⴰⵔⵚⵜ ⵏⵏⴻⵙ ⵏ ⵓⵎⴰⵔⵡⴰⵙ.
25 ⵏⴻⵜⵜⴰ ⴰⴷ ⵢⴰⵡⵉ ⵜⴰⵖⴰⵔⵚⵜ ⵏⵏⴻⵙ ⵏ ⵓⵎⴰⵔⵡⴰⵙ ⵖⴰⵔ ⵙⵉⴷⵉ, ⵉⵊⵊ ⵏ ⵉⵛⴰⵔⵔⵉ ⵉⵛⵏⴰⵏ ⵇⴰⵄ ⵣⴻⴳ ⵡⵓⴵⵉ, ⵡⴻⵏⵏⵉ ⵍⵇⵉⵎⴻⵜ ⵏⵏⴻⵙ ⴰⴷ ⵜⵉⵍⵉ ⵄⵍⴰⵃⵙⴰⴱ ⵍⵇⵉⵎⴻⵜ ⵉ ⵜⵇⴻⴷⴷⴰⵔⴻⴷ ⵛⴻⴽ, ⴰⴷ ⵜⵉⵍⵉ ⴷ ⵜⴰⵖⴰⵔⵚⵜ ⵏ ⵓⵎⴰⵔⵡⴰⵙ, ⵓⵛⴰ ⴰⴷ ⵜ ⵢⴰⵡⵉ ⵖⴰⵔ ⵓⴽⴻⵀⵀⴰⵏ.
26 ⵅⴻⵏⵏⵉ ⴰⴽⴻⵀⵀⴰⵏ ⴰⴷ ⵅⴰⵙ ⵉⴳⴳ ⴰⵙⵍⴰⵃ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵓⵛⴰ ⴰⴷ ⴰⵙ ⵉⵜⵜⵡⴰⵖⴼⴰⵔ ⵅ ⵎⵉⵏ ⵉⴳⴳⴰ, ⵎⴰⵍⴰ ⵉⴷⵡⴻⵍ ⴷⴰⵢⴻⵙ ⴰⵎⴰⵔⵡⴰⵙ ⵙ ⵉⵛⵜ ⵏ ⵜⵎⴻⵙⵍⴰⵛⵜ ⵣⵉ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ-ⴰ.”