47
ⵅ ⵉⴼⵉⵍⵉⵙⵟⵉⵏⵉⵢⵢⴻⵏ
1 ⴰⵡⴰⵍ ⵏ ⵙⵉⴷⵉ ⵏⵏⵉ ⴷⴷ-ⵢⵓⵙⵉⵏ ⵖⴰⵔ ⵓⵏⴰⴱⵉ ⵉⵔⵎⵉⵢⴰ, ⴰⵡⴰⵍ ⵉ ⵉⵡⴻⵊⵊⵀⴻⵏ ⴹⵉⴷⴷ ⵉ ⵉⴼⵉⵍⵉⵙⵟⵉⵏⵉⵢⵢⴻⵏ ⵇⴱⴻⵍ ⵎⴰ ⵉⵡⵜⴰ ⴼⵉⵔⵄⵓⵏ ⵖⴰⵣⵣⴰ.
2 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⵅⵣⴰⵔ, ⴰⵎⴰⵏ ⴳⴻⵄⵄⴷⴻⵏ ⵣⵉ ⵛⵛⴰⵎⴰⵍ, ⴰⴷ ⴷⴻⵡⵍⴻⵏ ⴷ ⵉⵛⵜ ⵏ ⵜⴻⵖⵣⴰⵔⵜ ⵜⴻⵙⵙⴼⴰⵢ. ⴰⴷ ⵃⴻⵎⵍⴻⵏ ⵅ ⵜⴻⵎⵎⵓⵔⵜ ⵓ ⵅ ⵎⴰⵔⵔⴰ ⵎⵉⵏ ⴷⴰⵢⴻⵙ ⵉⴵⴰⵏ, ⵜⴰⵏⴷⵉⵏⵜ ⴷ ⵉⵎⴻⵣⴷⴰⵖ ⵏⵏⴻⵙ. ⴰⴷ ⵙⵖⵓⵢⴻⵏ ⵉⵡⴷⴰⵏ ⵓ ⵎⴰⵔⵔⴰ ⵉⵎⴻⵣⴷⴰⵖ ⵏ ⵜⴻⵎⵎⵓⵔⵜ ⴰⴷ ⵛⴻⴹⵏⴻⵏ ⴰⵟⵟⴰⵙ
3 ⵣⵉ ⵙⵙⵉⴱⴱⴻⵜ ⵏ ⵡⴻⵣⴱⴰⵔ ⵏ ⵜⴻⵛⵜⵉ ⵏ ⵜⵛⴻⴹⵢⵉⵏ ⵏ ⵢⴻⵢⵙⴰⵏ ⵉⵊⴻⵀⴷⴻⵏ, ⵣⵉ ⵙⵙⵉⴱⴱⴻⵜ ⵏ ⴷⴷⵔⵉⵣ ⵏ ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ ⴷ ⵓⵇⴰⵔⵇⴻⴱ ⵏ ⵜⵊⴰⵔⵔⴰⵔⵉⵏ. ⵄⴰⴷ ⵉⴱⴰⴱⴰⵜⴻⵏ ⵡⴰⵔ ⵃⴻⴽⴽⴰⵔⴻⵏ ⵛⴰ ⵉ ⵉⵃⴻⵏⵊⵉⵔⴻⵏ ⵏⵙⴻⵏ ⵎⴰⵖⴰⵔ ⵉⴼⴰⵙⵙⴻⵏ ⵏⵙⴻⵏ ⴷⴻⵡⵍⴻⵏ ⴰⵔⴻⵀⴼⴻⵏ
4 ⵣⵉ ⵙⵙⵉⴱⴱⴻⵜ ⵏ ⵡⴰⵙⵙ ⵉ ⴷⴷ ⵖⴰ ⵢⴰⵙⴻⵏ ⵃⵉⵎⴰ ⴰⴷ ⵜⵜⵡⴰⵜⴻⵃⵃⴰⵏ ⵎⴰⵔⵔⴰ ⴰⵢⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵃⵉⵎⴰ ⴰⴷ ⵉⵜⵜⵡⴰⴽⴽⴻⵙ ⵣⵉ ⵚⵓⵔ ⴷ ⵚⵉⴷⵓⵏ ⴽⵓⵍ ⴱⵓ-ⵜⵡⵉⵣⴰ ⵉ ⵢⴰⵔⴻⵡⵍⴻⵏ, ⵎⴰⵖⴰⵔ ⵙⵉⴷⵉ ⴰⴷ ⵉⵜⴻⵃⵃⴰ ⵉⴼⵉⵍⵉⵙⵟⵉⵏⵉⵢⵢⴻⵏ, ⵎⵉⵏ ⵉⵇⵇⵉⵎⴻⵏ ⵏ ⵜⴻⴳⵣⵉⵔⵜ ⵏ ⴽⴰⴼⵜⵓⵔ.
5 ⵜⵓⵙⴰ-ⴷⴷ ⵜⵇⴻⵛⵛⴰⵔⵜ ⵅ ⵖⴰⵣⵣⴰ, ⵜⴻⵙⵙⴻⵖⴷ ⵜⴻⵎⵎⵓⵔⵜ ⵏ ⴰⵛⵇⴰⵍⵓⵏ ⵊⵎⵉⵄ ⴰⴽ-ⴷ ⵎⵉⵏ ⵉⵇⵇⵉⵎⴻⵏ ⵏ ⵍⴻⵡⴹⴰ ⵏ ⵜⴻⵖⵣⵓⵔⵜ ⵏⵙⴻⵏ. ⴰⵍ ⵎⴻⵍⵎⵉ ⵖⴰ ⵜⴻⵇⵇⵉⵎⴻⴷ ⵄⴰⴷ ⵜⵅⴻⴱⴱⵛⴻⴷ ⵉⵅⴻⴼ ⵏⵏⴻⵎ?
6 ⵓⵛⵜ ⵅⴰⴽ, ⴰ ⵙⵙⵉⴼ ⵏ ⵙⵉⴷⵉ, ⴰⵍ ⵎⴻⵍⵎⵉ ⵉ ⵖⴰ ⵜⴻⵇⵇⵉⵎⴻⴷ ⵄⴰⴷ ⵏⴻⵀⵍⴰ ⴰⵔⵔⴰⵃⴻⵜ? ⴷⵡⴻⵍ-ⴷⴷ ⵖⴰⵔ ⴼⵓⵔⵔⵓ ⵏ ⵡⴻⵖⵍⴰⴼ ⵏⵏⴻⵛ, ⵇⵇⵉⵎ ⵡⴰⵔ ⵜⴻⵏⵀⴻⵣⵣⴰ!
7 ⵎⴰⵎⵎⴻⵛ ⵉ ⵖⴰ ⵜⴻⵇⵇⵉⵎⴻⴷ ⵜⴰⵔⵙⵉⴷ? ⴰⵇⴰ ⵙⵉⴷⵉ ⵢⵓⵎⵓⵔ ⵙⵙⵉⴼ ⴹⵉⴷⴷ ⵉ ⴰⵛⵇⴰⵍⵓⵏ ⵓ ⴹⵉⴷⴷ ⵉ ⵜⵎⴰ ⵏ ⵍⴻⴱⵃⴰⵔ, ⵉ ⵎⴰⵏⴰⵢⴻⵏⵏⵉ ⵉ ⵉⵜⵜⵡⴰⴳⴳ.’ ”