☰ 1 ⵢⵓⵃⴰⵏⵏⴰ 4
4
ⵇⴻⴵⴱⴻⵎ ⴰⵔⵔⵓⵃⴰⵜ
1 ⴰ ⵉⵎⵄⵉⵣⵣⴻⵏ ⵉⵏⵓ, ⵡⴰⵔ ⵜⵜⵉⵇⵇⴻⵎ ⵛⴰ ⴷⵉ ⵎⴰⵔⵔⴰ ⴰⵔⵔⵓⵃⴰⵜ, ⵎⴰⵛⴰ ⵇⴻⴵⴱⴻⵎ ⴰⵔⵔⵓⵃⴰⵜ, ⵎⴰ ⵣⵉ ⴰⵔⴻⴱⴱⵉ ⵉ ⵉⴵⴰⵏ, ⵎⵉⵏⵣⵉ ⴰⵟⵟⴰⵙ ⵏ ⵉⵏⴰⴱⵉⵢⵢⴻⵏ ⵉⵙⵙⵅⴰⵔⵔⵉⵇⴻⵏ ⴰⵇⴰ ⴼⴼⵖⴻⵏ-ⴷⴷ ⵖⴰⵔ ⴷⴷⵓⵏⴻⵛⵜ. ◘ 2 ⵙ ⵎⴰⵏ ⴰⵢⴰ ⴰⴷ ⵜⴻⵙⵙⵏⴻⵎ ⴰⵔⵔⵓⵃ ⵏ ⴰⵔⴻⴱⴱⵉ: ⵎⴰⵔⵔⴰ ⴰⵔⵔⵓⵃ ⵡⴻⵏⵏⵉ ⵉⵛⴻⵀⵀⴷⴻⵏ ⴱⴻⵍⵍⵉ ⵢⴰⵙⵓⵄ ⵍⵎⴰⵙⵉⵃ ⵢⵓⵙⴰ-ⴷⴷ ⴷⵉ ⴷⴷⴰⵜ ⴰⵇⴰ ⵏⴻⵜⵜⴰ ⵣⵉ ⴰⵔⴻⴱⴱⵉ. 3 ⵎⴰⵔⵔⴰ ⴰⵔⵔⵓⵃ ⵡⴻⵏⵏⵉ ⵡⴰⵔ ⵉⵛⴻⵀⵀⴷⴻⵏ ⴱⴻⵍⵍⵉ ⵢⴰⵙⵓⵄ ⵢⵓⵙⴰ-ⴷⴷ ⴷⵉ ⴷⴷⴰⵜ, ⵡⴰⵔ ⵉⴵⵉ ⵛⴰ ⵣⵉ ⴰⵔⴻⴱⴱⵉ, ⵎⴰⵛⴰ ⵣⵉ ⴰⵔⵔⵓⵃ ⵏ ⵍⵎⴰⵙⵉⵃ ⴰⴼⴰⵍⵙⵓ ⵡⴻⵏⵏⵉ ⵉ ⵅⴻⴼ ⵜⴻⵙⵍⴰⵎ ⴰⴷ ⴷⴷ-ⵢⴰⵙ, ⴰⵇⴰ ⵏⴻⵜⵜⴰ ⴷⴰ ⵍⴻⵅⵅⵓ ⴷⵉ ⴷⴷⵓⵏⴻⵛⵜ. ◼  ◘ 4 ⵎⴰⵛⴰ ⴽⴻⵏⵏⵉⵡ ⴷ ⵜⴰⵔⵡⴰ ⵏ ⴰⵔⴻⴱⴱⵉ ⵉ ⵜⴻⴵⴰⵎ, ⴰⵇⴰ ⵜⵖⴻⵍⵍⴱⴻⵎ ⵅⴰⵙⴻⵏ, ⵎⵉⵏⵣⵉ ⴷ ⵡⴻⵏⵏⵉ ⵉⴵⴰⵏ ⴷⴰⵢⵡⴻⵎ ⴷ ⴰⵎⴻⵇⵇⵔⴰⵏ ⵅ ⵡⴻⵏⵏⵉ ⵉⴵⴰⵏ ⴷⵉ ⴷⴷⵓⵏⴻⵛⵜ. ◘ 5 ⵏⵉⵜⵏⵉ ⵣⵉ ⴷⴷⵓⵏⴻⵛⵜ, ⵙ ⵓⵢⴻⵏⵏⵉ ⵙⵙⴰⵡⴰⵍⴻⵏ ⵣⵉ ⴷⴷⵓⵏⴻⵛⵜ ⵓⵛⴰ ⴷⴷⵓⵏⴻⵛⵜ ⵜᵉⵜⵜⴻⵙⵍⴰ ⴰⵙⴻⵏ-ⴷⴷ. 6 ⴰⵇⴰ ⴰⵏⴻⵖ ⵣⵉ ⴰⵔⴻⴱⴱⵉ. ⵡⴻⵏⵏⵉ ⵉⵙⵙⵏⴻⵏ ⴰⵔⴻⴱⴱⵉ, ⵉⵜⵜⴻⵙⵍⴰ ⴰⵏⴻⵖ. ⵡⴻⵏⵏⵉ ⵡⴰⵔ ⵉⴵⵉⵏ ⵣⵉ ⴰⵔⴻⴱⴱⵉ ⵡⴰⵔ ⴷ ⴰⵏⴻⵖ ⵉⵜⵜⴻⵙⵍⵉ ⵛⴰ. ⵙ ⵎⴰⵏ ⴰⵢⴰ ⵉ ⵖⴰ ⵏⴻⵙⵙⴻⵏ ⴰⵔⵔⵓⵃ ⵏ ⵜⵉⴷⴻⵜⵜ ⴷ ⴰⵔⵔⵓⵃ ⵏ ⵓⵡⴻⴷⴷⴰⵔ. ◘
 
ⴰⵔⴻⴱⴱⵉ ⴷ ⵜⴰⵢⵔⵉ
7 ⴰ ⵉⵎⵄⵉⵣⵣⴻⵏ ⵉⵏⵓ, ⴻⵊⵊ ⴰⵏⴻⵖ ⴰⴷ ⵏⴻⵅⵙ ⴰⵢⴰⵡⵢⴰ, ⵎⵉⵏⵣⵉ ⵜⴰⵢⵔⵉ ⵣⵉ ⴰⵔⴻⴱⴱⵉ, ⵓ ⵎⴰⵔⵔⴰ ⵡⴻⵏⵏⵉ ⵉⵜⵜⴻⵅⵙⴻⵏ, ⴷ ⵏⴻⵜⵜⴰ ⵉⵜⵜⵡⴰⵅⵍⴻⵇ-ⴷⴷ ⵣⵉ ⴰⵔⴻⴱⴱⵉ ⵓⵛⴰ ⵉⵙⵙⴻⵏ ⴰⵔⴻⴱⴱⵉ. 8 ⵎⵉⵏⵣⵉ ⴰⵔⴻⴱⴱⵉ ⴷ ⵜⴰⵢⵔⵉ, ⵓ ⵡⴻⵏⵏⵉ ⵡⴰⵔ ⵉⵜⵜⴻⵅⵙⴻⵏ, ⵡⴰⵔ ⵉⵙⵙⵉⵏ ⵛⴰ ⴰⵔⴻⴱⴱⵉ. 9 ⵙ ⵎⴰⵏ ⴰⵢⴰ ⵜⴻⴹⵀⴰⵔ ⴰⵏⴻⵖ-ⴷⴷ ⵜⴰⵢⵔⵉ ⵏ ⴰⵔⴻⴱⴱⵉ, ⴱⴻⵍⵍⵉ ⴰⵔⴻⴱⴱⵉ ⴰⵇⴰ ⵉⵙⵙⴻⴽⴽ-ⴷⴷ ⴰⵢⴻⵏⵏⵉ ⵏ ⵎⵎⵉⵙ ⵉ ⵖⴰⵔⴻⵙ ⵖⴰⵔ ⴷⴷⵓⵏⴻⵛⵜ, ⵃⵉⵎⴰ ⴰⴷ ⵣⵣⴰⵢⴻⵙ ⵏⴻⴷⴷⴰⵔ. ◘ 10 ⴷⵉ ⵎⴰⵏ ⴰⵢⴰ ⵉ ⵜⴻⴵⴰ ⵜⴰⵢⵔⵉ, ⵡⴰⵔ ⵉⴵⵉ ⴱⴻⵍⵍⵉ ⵏⴻⵛⵛⵉⵏ ⵏᵉⵜⵜⴻⵅⵙ ⴰⵔⴻⴱⴱⵉ, ⵎⴰⵛⴰ ⴱⴻⵍⵍⵉ ⵏⴻⵜⵜⴰ ⵉⵜⵜⴻⵅⵙ ⴰⵏⴻⵖ ⵓⵛⴰ ⵉⵙⵙⴻⴽⴽ-ⴷⴷ ⵎⵎⵉⵙ ⴷ ⴰⵚⵍⴰⵃ ⵅ ⴷⴷⵏⵓⴱ ⵏⵏⴻⵖ. ◘
11 ⴰ ⵉⵎⵄⵉⵣⵣⴻⵏ ⵉⵏⵓ, ⵎⴰⵍⴰ ⵜⵓⵖⴰ ⴰⵔⴻⴱⴱⵉ ⵉⵜⵜⴻⵅⵙ ⴰⵏⴻⵖ ⴰⵎⵎⵓ, ⵉⵜⵜⵅⴻⵚⵚⴰ ⴰⵏⴻⵖ ⵄⴰⵡⴻⴷ ⴰⴷ ⵏⴻⵅⵙ ⵉⵊⵊ ⵡⴻⵏⵏⴻⵖⵏⵉ. 12 ⵓⵍⴰ ⴷ ⵉⵊⵊⴻⵏ ⵎⴰ ⵉⵥⵔⴰ ⴰⵔⴻⴱⴱⵉ. ⵎⴰⵛⴰ ⵎⴰⵍⴰ ⵏᵉⵜⵜⴻⵅⵙ ⴰⵢⴰⵡⵢⴰ, ⴰⵔⴻⴱⴱⵉ ⴰⴷ ⴷⴰⵢⵏⴻⵖ ⵉⵇⵇⵉⵎ, ⵓⵛⴰ ⵜⴰⵢⵔⵉ ⵏⵏⴻⵙ ⴰⵇⴰ ⵜⴻⴷⵡⴻⵍ ⵜⴻⴽⵎⴻⵍ ⴷⴰⵢⵏⴻⵖ. ◘
13 ⵣⵉ ⵎⴰⵏ ⴰⵢⴰ ⵏⴻⵙⵙⴻⵏ ⴱⴻⵍⵍⵉ ⵏⴻⵜⵜⵖⵉⵎⴰ ⴷⴰⵢⴻⵙ ⵓ ⵏⴻⵜⵜⴰ ⴷⴰⵢⵏⴻⵖ, ⵎⵉⵏⵣⵉ ⵏⴻⵜⵜⴰ ⵉⵡⵛⴰ ⴰⵏⴻⵖ ⵣⵉ ⴰⵔⵔⵓⵃ ⵏⵏⴻⵙ. 14 ⴰⵇⴰ ⵏⴻⵥⵔⴰ ⵓ ⵏⵛⴻⵀⵀⴻⴷ ⴱⴻⵍⵍⵉ ⴱⴰⴱⴰⵙ ⵉⵙⵙⴻⴽⴽ-ⴷⴷ ⵎⵎⵉⵙ ⴷ ⴰⵎⵙⴻⵏⵊⴻⵎ ⵏ ⴷⴷⵓⵏⴻⵛⵜ. 15 ⵎⴰⵔⵔⴰ ⵡⴻⵏⵏⵉ ⵉⵛⴻⵀⵀⴷⴻⵏ ⴱⴻⵍⵍⵉ ⵢⴰⵙⵓⵄ ⴷ ⵎⵎⵉⵙ ⵏ ⴰⵔⴻⴱⴱⵉ, ⴰⵔⴻⴱⴱⵉ ⴰⴷ ⴷⴰⵢⴻⵙ ⵉⵣⴷⴻⵖ ⵓ ⵏⴻⵜⵜⴰ ⴰⴷ ⵉⵣⴷⴻⵖ ⴷⵉ ⴰⵔⴻⴱⴱⵉ. 16 ⴰⵇⴰ ⵏⴻⵛⵛⵉⵏ ⵏⵓⵎⴻⵏ ⵓ ⵏⴻⵙⵙⴻⵏ ⵜⴰⵢⵔⵉ ⵜⴻⵏⵏⵉ ⵉⴵⴰⵏ ⵖⴰⵔ ⴰⵔⴻⴱⴱⵉ ⵉ ⵏⴻⵛⵛⵉⵏ. ⴰⵔⴻⴱⴱⵉ ⴷ ⵜⴰⵢⵔⵉ ⵓ ⵡⴻⵏⵏⵉ ⵉ ⵖⴰ ⵉⵇⵇⵉⵎⴻⵏ ⴷⵉ ⵜⴰⵢⵔⵉ, ⴰⴷ ⵉⵇⵇⵉⵎ ⴷⵉ ⴰⵔⴻⴱⴱⵉ.
17 ⴷⵉ ⵎⴰⵏ ⴰⵢⴰ ⵜᵉⵜⵜⵡⴰⴽⴻⵎⵎⴻⵍ ⵜⴰⵢⵔⵉ ⵏⵏⴻⵙ ⴷⴰⵢⵏⴻⵖ, ⴰⵍⴰⵎⵉ ⴰⴷ ⵖⴰⵔⵏⴻⵖ ⵜⵉⵍⵉ ⵜⵜⵉⵇⵇⴻⵜ ⴷⴻⴳ ⵡⴰⵙⵙ ⵏ ⵍⵃⵉⵙⴰⴱ, ⵎⵉⵏⵣⵉ ⴰⵎ ⵎⴰⵎⵎⴻⵛ ⵉⴵⴰ ⵏⴻⵜⵜⴰ, ⴰⴷ ⵏⵉⵍⵉ ⵏⴻⵛⵛⵉⵏ ⵄⴰⵡⴻⴷ ⴷⵉ ⴷⴷⵓⵏⴻⵛⵜ-ⴰ. 18 ⴷⵉ ⵜⴰⵢⵔⵉ ⵡⴰⵔ ⵜᵉⵜⵜⵉⵍⵉ ⵜⵉⴳⴳⵯⵓⴷⵉ, ⵎⴰⵛⴰ ⵜⴰⵢⵔⵉ ⵏⵉⵛⴰⵏ ⵜⴻⵙⵙⵓⴼⴼⵓⵖ ⵜⵉⴳⴳⵯⵓⴷⵉ, ⵎⵉⵏⵣⵉ ⵜⵉⴳⴳⵯⵓⴷⵉ ⵜᵉⵜⵜⴰⵙ-ⴷⴷ ⴰⴽ-ⴷ ⵓⵏⴻⵅⵍⵉⵄ. ⵡⴻⵏⵏⵉ ⵉⵜⵜⴻⴳⴳⵯⴻⴷⴻⵏ, ⵡⴰⵔ ⵉⵜⵜⵉⵍⵉ ⵉⴽⵎⴻⵍ ⴷⵉ ⵜⴰⵢⵔⵉ. 19 ⵅ ⵓⵢⴰ ⴰⴷ ⵏⴻⵅⵙ ⴰⵔⴻⴱⴱⵉ, ⵎⵉⵏⵣⵉ ⵏⴻⵜⵜⴰ ⵜⵓⵖⴰ ⵉⵜⵜⴻⵅⵙ ⴰⵏⴻⵖ ⴷ ⴰⵎⴻⵣⵡⴰⵔⵓ. 20 ⵎⴰⵍⴰ ⵛⴰ ⵏ ⵉⵊⵊⴻⵏ ⵉⵇⵇⴰⵔ: “ⵏⴻⵛⵛ ⵜⵜⴻⵅⵙⴻⵖ ⴰⵔⴻⴱⴱⵉ!”, ⴰⵎ ⵉⵛⴰⵔⵔⴻⵀ ⵓⵎⴰⵙ, ⴰⵇⴰ ⵏⴻⵜⵜⴰ ⴷ ⴱⵓ-ⵉⵅⴰⵔⵔⵉⵇⴻⵏ. ⵎⵉⵏⵣⵉ ⵡⴻⵏⵏⵉ ⵡⴰⵔ ⵉⵜⵜⴻⵅⵙⴻⵏ ⵓⵎⴰⵙ ⵡⴻⵏⵏⵉ ⵉⵜⵜⵡⴰⵍⴰ, ⵅⴻⵏⵏⵉ ⵎⴰⵎⵎⴻⵛ ⵖⴰ ⵢⴻⴳⴳ ⴰⴷ ⵉⵅⵙ ⴰⵔⴻⴱⴱⵉ ⵡⴻⵏⵏⵉ ⵡⴰⵔ ⵉⵜⵜⵡⵉⵍⵉ. ◘ 21 ⴰⵇⴰ ⵜⴰⵡⵚⴻⵢⵢⴻⵜ-ⴰ ⵏⴻⵟⵟⴻⴼ ⵉ-ⵜⵜ ⵣⵣⴰⵢⴻⵙ, ⴱⴻⵍⵍⵉ ⴽⵓⵍ ⵉⵊⵊⴻⵏ ⵉ ⵉⵜⵜⴻⵅⵙⴻⵏ ⴰⵔⴻⴱⴱⵉ, ⴰⴷ ⵉⵅⵙ ⵓⵍⴰ ⴷ ⵓⵎⴰⵙ. ◘
 
 
◘ 4:1 ⵉⵔⵎ. 29:8; ⵎⵜ. 7:15, 16; 24:4, 5, 24; 1 ⴽⵓⵔ. 14:29; ⴰⴼⴰ. 5:6; ⴽⵓⵍ. 2:18; 2 ⴱⵟ. 2:1; 2 ⵢⵃ. 7. ◼ 4:3 ⵍⵎⴰⵙⵉⵃ ⴰⴼⴰⵍⵙⵓ-ⵅⵥⴰⵔ 1 ⵢⵓⵃ. 2:18, 22; 4:3. ⴰⵇⴰ ⴷⵉⵏ ⴰⵟⵟⴰⵙ ⵏ ⵉⵡⴷⴰⵏ ⵉⵏⵏⵉ ⵉⵇⵇⴰⵔⴻⵏ: ‘ⵍⵎⴰⵙⵉⵃ ⵡⴰⵔ ⵉⴵⵉ ⴷ ⴰⵔⴻⴱⴱⵉ! ⵏⴻⵜⵜⴰ ⴷ ⴰⵏⴰⴱⵉ!’ ⵎⴰⵏ ⴰⵢⴰ ⵉⵅⵙ ⴰⴷ ⵢⵉⵏⵉ ⴱⴻⵍⵍⵉ ⵏⵉⵜⵏⵉ ⵡⴰⵔ ⵙⵙⵜⴻⵄⵜⴰⵔⵉⴼⴻⵏ ⵓ ⵡⴰⵔ ⵏⴻⵄⵄⵎⴻⵏ ⵛⴰ, ⴰⵇⴰ ⴰⵔⴻⴱⴱⵉ ⵢⵓⵙⴰ-ⴷⴷ ⴷⵉ ⴰⵔⵔⵉⵎⴻⵜ ⵏ ⵢⴰⵙⵓⵄ ⵍⵎⴰⵙⵉⵃ ⴰⵎ ⵎⴰⵎⵎⴻⵛ ⵉ ⴷ ⴰⵏⴻⵖ ⵉⵙⵙⴻⵍⵎⴻⴷ ⵡⴻⴷⵍⵉⵙ ⵉⵇⴻⴷⴷⵙⴻⵏ. ⵙ ⵓⵢⴻⵏⵏⵉ ⵜⵜⴻⴳⴳⴻⵏ ⵏⵉⵜⵏⵉ ⴰⵎ ⵎⴰⵎⵎⴻⵛ ⵉⵜⵜⴻⴳⴳ ⵍⵎⴰⵙⵉⵃ ⴰⴼⴰⵍⵙⵓ, ⵡⴰⵔ ⵛⴻⵀⵀⴷⴻⵏ ⵛⴰ ⴰⵇⴰ ⵢⴰⵙⵓⵄ ⵍⵎⴰⵙⵉⵃ ⵢⵓⵙⴰ-ⴷⴷ ⴷⵉ ⴰⵔⵔⵉⵎⴻⵜ. ⵙ ⵓⵢⴻⵏⵏⵉ ⴹⴻⴼⴼⴰⵔⴻⵏ ⵜ ⴷⴻⴳ ⵉⵅⴰⵔⵔⵉⵇⴻⵏ ⵏⵏⴻⵙ, ⵏⵉⵜⵏⵉ ⴷ ⵉⵃⴻⵏⵊⵉⵔⴻⵏ ⵏ ⴷⴷⴻⵊⵊⴰⵍ. ◘ 4:3 2 ⵜⵙ. 2:7; 1 ⵢⵃ. 2:18, 22. ◘ 4:4 2 ⵉⵊ. 6:16; 2 ⵉⵎ. 32:7; ⵢⵃ. 16:33 ◘ 4:6 ⵢⵃ. 8:47; 10:27. ◘ 4:9 ⵢⵃ. 3:16; ⵔⵓⵎ. 5:8. ◘ 4:10 ⵔⵓⵎ. 3:24, 25; 2 ⴽⵓⵔ. 5:19; ⴽⵓⵍ. 1:19; 1 ⵢⵃ. 2:2. ◘ 4:12 ⵓⴼ. 33:20; ⴰⵄⵡⴷ. 4:12; ⵢⵃ. 1:18; 1 ⵜⵉⵎ. 1:17; 6:16; 1 ⵢⵃ. 3:24. ◘ 4:20 1 ⵢⵃ. 2:4. ◘ 4:21 ⵍⴰⵡⵉ 19:18; ⵎⵜ. 22:39; ⵢⵃ. 13:34; 15:12; ⴰⴼⴰ. 5:2; 1 ⵜⵙ. 4:9; 1 ⴱⵟ. 4:8; 1 ⵢⵃ. 3:23.
☰