1 “ⵇⴰⵔⵔⴱⴻⵎ-ⴷⴷ, ⴰ ⵍⴻⴳⵏⵓⵙ, ⵎⴰⵃⴻⵏⴷ ⴰⴷ ⵜⴻⵙⵍⴻⵎ, ⴽⴻⵏⵏⵉⵡ ⴰ, ⵛⵛⵓⵄⵓⴱ, ⴰⵔⵔⴻⵎ-ⴷⴷ ⵍⴱⴰⵍ! ⵙⴻⵍ, ⴰ ⵜⴰⵎⵎⵓⵔⵜ ⴷ ⵎⴰⵔⵔⴰ ⵎⵉⵏ ⴷⴰⵢⴻⵙ, ⴷⴷⵓⵏⴻⵛⵜ ⴷ ⵎⴰⵔⵔⴰ ⵎⵉⵏ ⵣⵣⴰⵢⴻⵙ ⴷⴷ-ⵉⵙⵙⴼⵓⴼⴼⵓⵢⴻⵏ. 2 ⵎⴰⵖⴰⵔ ⴰⴷⵓⵇⵇⴻⵣ ⵏ ⵡⴻⵖⴹⴰⴱ ⵏ ⵙⵉⴷⵉ ⴰⴷ ⴷⴷ-ⵢⴰⵙ ⵅ ⵎⴰⵔⵔⴰ ⵍⴻⴳⵏⵓⵙ ⵓ ⴰⵙⵄⴰⵔ ⵅ ⵎⴰⵔⵔⴰ ⵍⵄⴻⵙⴽⴰⵔ ⵏⵙⴻⵏ. ⵏⴻⵜⵜⴰ ⵉⵃⴰⵔⵔⴻⵎ ⵉ-ⵜⴻⵏ ⵉ ⵓⵜⴻⵃⵃⵉ, ⴰⵇⴰ ⵉⴳⴳⴰ ⵉ-ⵜⴻⵏ ⵉ ⵜⵖⴰⵔⵚⵜ. 3 ⵉⵏⵏⵉ ⵣⵣⴰⵢⵙⴻⵏ ⵉⵜⵜⵡⴰⵏⵖⴻⵏ ⴰⴷ ⵜⴻⵏ ⵏⴹⴰⵔⴻⵏ, ⵓⵛⴰ ⴰⵔⵔⵉⵃⴻⵜ ⵏ ⵍⵅⴻⵛⴱⴰⵜ ⵏⵙⴻⵏ ⴰⴷ ⵜⴳⴻⵄⵄⴻⴷ. ⴰⴷ ⴼⴻⵙⵢⴻⵏ ⵉⴷⵓⵔⴰⵔ ⵙ ⵉⴷⴰⵎⵎⴻⵏ ⵏⵙⴻⵏ. 4 ⵎⴰⵔⵔⴰ ⵍⵄⴻⵙⴽⴰⵔ ⵏ ⵓⵊⴻⵏⵏⴰ ⴰⴷ ⵉⴼⵏⴰ ⵓⵛⴰ ⵉⵊⴻⵏⵡⴰⵏ ⴰⴷ ⵜⵜⵡⴰⵏⵏⴹⴻⵏ ⴰⵎ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ ⵓ ⴰⴷ ⵉⵡⴹⴰ ⵎⴰⵔⵔⴰ ⵍⵄⴻⵙⴽⴰⵔ ⵏⵙⴻⵏ ⴰⵎ ⵡⴰⴼⴰⵔ ⵅ ⵜⵣⴰⵢⴰⵔⵜ ⵓ ⴰⵎ ⵎⴰⵎⵎⴻⵛ ⴷⴷ-ⵜⴻⵡⴹⴰ ⵜⴰⵣⴰⵔⵜ ⵣⴻⴳ ⵡⴰⵔⵜⵓ.” ◘

5 “ⵎⴰⵖⴰⵔ ⵙⵙⵉⴼ ⵉⵏⵓ ⴰⴷ ⵉⵜⵜⵡⴰⵥⴰⵔ ⴷⴻⴳ ⵉⵊⴻⵏⵡⴰⵏ. ⵅⵣⴰⵔ, ⴰⴷ ⴷⴷ-ⵉⵀⵡⴰ ⵅ ⵉⴷⵓⵎ ⵓ ⵅ ⵍⴳⴻⵏⵙ ⵏⵏⵉ ⵃⴰⵔⵔⵎⴻⵖ ⵇⴰⵄ ⵉ ⵍⵃⵓⴽⵎ. 6 ⵙⵙⵉⴼ ⵏ ⵙⵉⴷⵉ ⵉⵛⵛⵓⵔ ⵙ ⵉⴷⴰⵎⵎⴻⵏ, ⵉⴷⵡⴻⵍ ⵉⵜⵜⴻⵃⵔⵓⴵⵓⴹ ⵙ ⵜⴰⴷⵓⵏⵜ, ⵙ ⵉⴷⴰⵎⵎⴻⵏ ⵏ ⵉⵣⵎⴰⵔⴻⵏ ⴷ ⵉⵖⴰⵢⴹⴻⵏ, ⵙ ⵜⴰⴷⵓⵏⵜ ⵏ ⵜⵉⵥⵥⴰⵍ ⵏ ⵉⵛⴰⵔⵔⵉⵢⵢⴻⵏ, ⵎⴰⵖⴰⵔ ⵙⵉⴷⵉ ⵉⴳⴳⴰ ⵉⵊⵊ ⵏ ⵍⵄⵉⴷ ⵏ ⵜⵖⴰⵔⵚⵜ ⴷⵉ ⴱⵓⵚⵔⴰ, ⴷ ⵉⵛⵜ ⵏ ⵜⵖⴰⵔⵚⵜ ⵜⴰⵎⴻⵇⵇⵔⴰⵏⵜ ⴷⵉ ⵜⴻⵎⵎⵓⵔⵜ ⵏ ⵉⴷⵓⵎ. ◼  ◘ 7 ⴰⴷ ⴽⵉⴷⵙⴻⵏ ⵡⴹⴰⵏ ⵉⵖⴰⵢⴹⴻⵏ ⵏ ⵍⴻⵅⵍⴰ ⴰⴽ-ⴷ ⵡⴰⵛⵛⴰⵡⴻⵏ ⵏⵙⴻⵏ ⴷ ⵉⵣⵉⵔⴰⵔⴻⵏ, ⵓⵛⴰ ⵓⵍⴰ ⴷ ⵉⴼⵓⵏⴰⵙⴻⵏ ⵉⵎⴻⵥⵢⴰⵏⴻⵏ ⵊⵎⵉⵄ ⴰⴽ-ⴷ ⵉⴼⵓⵏⴰⵙⴻⵏ ⵉⵊⴻⵀⴷⴻⵏ ⵓⵛⴰ ⵜⴰⵎⵎⵓⵔⵜ ⵏⵙⴻⵏ ⴰⴷ ⵜⵙⵓ ⵉⴷⴰⵎⵎⴻⵏ ⵓ ⴰⵛⴰⵍ ⵏ ⵜⴻⵎⵎⵓⵔⵜ ⴰⴷ ⵉⵊⵊⵡⴻⵏ ⵙ ⵜⴰⴷⵓⵏⵜ. 8 ⵎⴰⵖⴰⵔ ⴰⴷ ⵢⵉⵍⵉ ⵉⵊⵊ ⵏ ⵡⴰⵙⵙ ⵏ ⵏⵏⴻⵇⵎⴻⵜ ⵉ ⵙⵉⴷⵉ, ⵉⵊⵊ ⵏ ⵓⵙⴻⴳⴳⵯⴰⵙ ⵏ ⵓⵅⴻⴵⴻⵚ ⵉ ⴷⴷⴻⵄⵡⴻⵜ ⵏ ⵚⵉⵀⵢⵓⵏ. 9 ⵜⵉⵖⵣⴰⵔⵉⵏ ⵏ ⵉⴷⵓⵎ ⴰⴷ ⴷⴻⵡⵍⴻⵏⵜ ⴷ ⵜⵉⵣⴻⴼⵜ ⵓ ⴰⵛⴰⵍ ⵏⵏⴻⵙ ⴰⴷ ⵉⴷⵡⴻⵍ ⴷ ⵍⴻⵛⴱⴰⵔⵉⵢⵢⴻⵜ, ⵡⴰⵀ, ⵜⴰⵎⵎⵓⵔⵜ ⵏⵏⴻⵙ ⴰⴷ ⵜⴻⴷⵡⴻⵍ ⴷ ⵜⵉⵣⴻⴼⵜ ⵢⴰⵔⴻⵇⵇⴻⵏ. 10 ⵡⴰⵔ ⵜⵜⵅⴻⵙⵙⵉ ⵜⵎⴻⵙⵙⵉ ⵏⵏⴻⵙ ⵙ ⴵⵉⵍⴻⵜ ⵓⵍⴰ ⵙ ⵡⴰⵙⵙ, ⴷⴷⴻⵅⵅⴰⵏ ⵏⵏⴻⵙ ⴰⴷ ⵉⴳⴻⵄⵄⴻⴷ ⵉ ⵍⴻⴱⴷⴰ. ⵣⵉ ⵊⵊⵉⵍ ⴰⵍ ⵊⵊⵉⵍ ⴰⴷ ⵜⵉⵍⵉ ⵜⴻⵎⵎⵓⵔⵜ ⵜᵉⵜⵜⵡⴰⵔⴻⴷⴷⴻⴵ, ⵉ ⵍⴻⴱⴷⴰ ⵏ ⵍⴻⴱⴷⴰⵜ ⵄⴻⵎⵎⴰⵔⵚ ⵡⴰⵔ ⵜⵜ ⵉⵥⵡⵉ ⵓⵍⴰ ⴷ ⵉⵊⵊ. ◘ 11 ⴱⵓ-ⵓⵄⵓⵇⵇⵉ ⴷ ⵜⵡⵓⵛⵜ ⵏ ⴵⵉⵍⴻⵜ ⴰⴷ ⵜⵜ ⵟⵟⴼⴻⵏ ⴷ ⵜⴰⵙⵖⴰⵔⵜ, ⴱⵓ-ⵓⵙⵓⴹⵉ ⵏ ⵍⵎⴻⵡⵜ ⴷ ⵓⴱⴰⵖⴻⵍ ⴰⴷ ⴷⴰⵢⴻⵙ ⵣⴻⴷⵖⴻⵏ. ⵏⴻⵜⵜⴰ ⴰⴷ ⵅⴰⵙ ⵉⵎⵃⴻⴹ ⴰⴼⵉⵍⵓ ⵏ ⵍⴻⵄⴱⴰⵔ ⵏ ⵍⴻⵅⵍⴰ ⵓ ⴰⴷ ⵉⵙⵙⴰⵔⵙ ⴱⵍⵓⵎⵓ ⵏ ⵍⵅⴰⵡⵉ. ◘ 12 ⵜⴰⵔⵡⴰ ⵏⵏⴻⵙ ⵏ ⵜⴰⵚⵉⵍⴻⵜ? ⵡⴰⵔ ⴷⵉⵏ ⵜⴻⴵⵉ ⴱⵓ ⵜⴳⴻⵍⴷⴰ ⴰⵍⴰⵎⵉ ⵣⵣⴰⵢⴻⵙ ⵉ ⵖⴰ ⴱⴰⵔⵔⵃⴻⵏ ⵓ ⵎⴰⵔⵔⴰ ⵍⵃⵓⴽⴽⴰⵎ ⵏⵏⴻⵙ ⵇⴹⴰⵏ. 13 ⴷⵉ ⵍⴻⵇⵚⵓⵔ ⵏⵏⴻⵙ ⴰⴷ ⵉⴳⴻⵄⵄⴻⴷ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ, ⵉⵔⴻⵣⵣⴰⵣⴻⵏ ⴷ ⵜⴰⴱⵖⴰ ⵏ ⵓⵙⴻⵏⵏⴰⵏ ⴰⴷ ⵖⴻⵎⵢⴻⵏ ⴷⵉ ⵍⵇⴻⵍⵄⴰⵜ ⵏⵏⴻⵙ. ⵜⴰⵎⵎⵓⵔⵜ ⴰⴷ ⵜⴻⴷⵡⴻⵍ ⴷ ⵜⴰⵣⴻⴷⴷⵉⵖⵜ ⵉ ⵡⵓⵛⵛⴰⵏⴻⵏ ⵏ ⵍⴻⵅⵍⴰ, ⴷ ⵉⵊⵊ ⵏ ⵡⴻⵃⵡⵉⵛ ⵉ ⵢⴻⵙⵙⵉⵙ ⵏ ⵏⵏⵄⴰⵎⴻⵜ. 14 ⵍⴻⵡⵃⵓⵛ ⵏ ⵍⴻⵅⵍⴰ ⴰⴷ ⵎⵎⴻⵍⵇⴰⵏ ⴰⴽ-ⴷ ⵉⴼⵉⵙⴻⵏ ⵓⵛⴰ ⴰⵎⵢⴰⵏ ⵉⵊⴻⵏⵏⴻⵏ ⴰⴷ ⵉⵍⴰⵖⴰ ⵉ ⵓⵎⵄⴰⵛⴰⵔ ⵏⵏⴻⵙ, ⵡⴰⵀ, ⵍⵡⴻⵃⵛ ⵏ ⴵⵉⵍⴻⵜ ⴰⴷ ⵢⴰⵔⴻⵢⵢⴻⵃ ⴷⵉⵏⵏⵉ, ⴰⴷ ⵢⴰⴼ ⴰⵖⵉⵎⵉ ⵉ ⵢⵉⵅⴻⴼ ⵏⵏⴻⵙ. 15 ⴷⵉⵏⵏⵉ ⴰⴷ ⵜⴻⵙⵙⴰⵔⵙ ⵜⴼⵉⵖⴰⵔⵜ ⵏ ⴼⵍⵉⵜⵛⴰ ⵍⵄⵓⵛⵛ ⵏⵏⴻⵙ, ⴰⴷ ⵜⴻⵙⵙⴰⵔⵙ ⵜⵉⵎⴻⴵⴰⵍⵉⵏ, ⴰⴷ ⵜⴻⵏⵜ ⵜⴻⵙⵙⴼⵔⵓⵔⵉⵢ ⵓⵛⴰ ⴷⵉ ⵜⵉⵍⵉ ⵏⵏⴻⵙ ⴰⴷ ⵜⵀⵉⵍⵍⴰ ⴷⴻⴳ ⵉⵎⴻⵥⵢⴰⵏⴻⵏ ⵏⵏⴻⵙ, ⵡⴰⵀ, ⴷⵉⵏⵏⵉ ⴰⴷ ⵎⵓⵏⴻⵏ ⵉⵊⴹⴰⴹ ⵉⵜⵜⴽⴻⵛⵛⴰⴹⴻⵏ. 16 ⴰⵔⵣⵓⵎ ⴷⴻⴳ ⵡⴻⴷⵍⵉⵙ ⵏ ⵙⵉⴷⵉ ⵓ ⵖⴰⵔⴻⵎ ⵣⵣⴰⵢⴻⵙ: ‘ⵓⵍⴰ ⴷ ⵉⵊⵊ ⵣⵉ ⵍⴻⵡⵃⵓⵛ-ⴰ ⵉⵣⴻⵎⵎⴰⵔ ⴰⴷ ⵣⵣⴰⵢⴻⵙ ⵉⵏⵇⴻⵚ, ⵓⵍⴰ ⴷ ⵉⵊⵊ ⵡⴰⵔ ⵢⴰⵔⴻⵣⵣⵓ ⵅ ⵡⴻⵄⵛⵉⵔ ⵏⵏⴻⵙ!’, ⵎⴰⵖⴰⵔ ⴰⵇⴻⵎⵎⵓⵎ ⵉⵏⵓ ⵢⵓⵔⴰ ⵉ-ⵜ, ⵓⵛⴰ ⴰⵔⵔⵓⵃ ⵏⵏⴻⵙ ⴷ ⵡⴻⵏⵏⵉ ⵜⴻⵏ ⵉ ⵖⴰ ⵉⵙⵙⵎⵓⵏⴻⵏ. 17 ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ ⵉⵏⴹⴰⵔ ⵜⴰⵇⴻⴷⴷⵓⵃⵜ ⴷⵉ ⵟⵟⵡⴻⵄ ⵏⵙⴻⵏ, ⵓⵛⴰ ⴰⴼⵓⵙ ⵏⵏⴻⵙ ⵉⴱⴹⴰ ⴰⵙⴻⵏ ⵜⴰⵎⵎⵓⵔⵜ ⵙ ⵓⴼⵉⵍⵓ ⵏ ⵍⴻⵄⴱⴰⵔ. ⵏⵉⵜⵏⵉ ⴰⴷ ⵜⵜ ⵡⴰⵔⵜⴻⵏ ⵉ ⵍⴻⴱⴷⴰ, ⵣⵉ ⵊⵊⵉⵍ ⴰⵍ ⵊⵊⵉⵍ ⴰⴷ ⴷⴰⵢⴻⵙ ⵣⴻⴷⵖⴻⵏ.”