10
1 “ⵓⵛⵜ ⵅ ⵢⵉⵏⵏⵉ ⵉⵙⵙⵓⴼⴼⵓⵖⴻⵏ ⵍⵓⵎⵓⵔⴰⵜ ⵉⵖⴻⵛⵛⴻⵏ, ⵉⵏⵏⵉ ⵉⵜⵜⴰⵔⵉⵏ ⵜⵉⵡⴻⵚⵚⴰ ⵉⵜⵜⴹⴻⴵⴻⵏ
2 ⵃⵉⵎⴰ ⴰⴷ ⵙⵙⵃⴻⵢⵢⴷⴻⵏ ⵉⵎⴻⵣⵍⴰⴹ ⵅ ⵜⴻⵙⵖⴰⵔⵜ ⵏⵙⴻⵏ ⵓ ⵃⵉⵎⴰ ⴰⴷ ⴰⵛⴰⵔⴻⵏ ⵜⴰⵙⵖⴰⵔⵜ ⵏ ⵢⵉⵏⵏⵉ ⵉⵜⵜⵡⴰⵃⵚⴰⵔⴻⵏ ⵏ ⵍⴳⴻⵏⵙ ⵉⵏⵓ, ⴰⵍⴰⵎⵉ ⵖⴰ ⴷⴻⵡⵍⴻⵏⵜ ⵜⵉⵊⵊⴰⵍ ⴷ ⵜⴰⴽⴻⵛⵛⴰⴹⵜ ⵏⵙⴻⵏ ⵓ ⵉⵢⵓⵊⵉⵍⴻⵏ ⴷ ⵜⴰⵢⵎⴰⵔⵜ.
3 ⵎⴰⵛⴰ ⵎⵉⵏ ⵜⴻⵅⵙⴻⵎ ⴰⴷ ⵜⴻⴳⴳⴻⵎ ⴷⴻⴳ ⵡⴰⵙⵙ ⵏ ⵓⵅⴻⴵⴻⵚ ⵓ ⵖⴰⵔ ⵓⵔⴻⴷⴷⴻⴵ ⵏⵏⵉ ⴷⴷ ⵖⴰ ⵢⴰⵙⴻⵏ ⵣⵉ ⵍⴰⴳⴳⵯⴰⵊ? ⵡⵉ ⵖⴰⵔ ⵉ ⵖⴰ ⵜⴰⵔⴻⵡⵍⴻⵎ ⵃⵉⵎⴰ ⴰⴷ ⵜⴰⴼⴻⵎ ⵜⵡⵉⵣⴰ ⵓ ⵎⴰⵏⵉ ⵖⴰ ⵜⴻⵊⵊⴻⵎ ⴰⵄⵓⴵⵉ ⵏⵡⴻⵎ?
4 ⵡⴰⵔ ⴷⵉⵏ ⵎⵉⵏ ⵖⴰ ⴳⴳⴻⵏ ⵎⵖⵉⵔ ⴰⴷ ⵓⴹⴰⵔⴻⵏ ⵅ ⵉⴼⴰⴷⴷⴻⵏ ⵡⴰⵀⴰ ⵊⴰⵔ ⵉⵎⴻⵃⴱⴰⵙ ⵓ ⴰⴷ ⵡⴹⴰⵏ ⵊⴰⵔ ⵉⵏⵏⵉ ⵉⵜⵜⵡⴰⵏⵖⴻⵏ. ⵙ ⵎⴰⵔⵔⴰ ⴰⵢⴰ ⵡⴰⵔ ⵢⴰⵔⴻⵅⵅⵓ ⵡⴻⵖⴹⴰⴱ ⵏⵏⴻⵙ, ⵎⴰⵛⴰ ⴰⴼⵓⵙ ⵏⵏⴻⵙ ⵉⵇⵇⵉⵎ ⵉⵙⴰⵔⵔⴻⵃ.”
5 “ⵓⵛⵜ ⵅ ⴰⵛⵛⵓⵔ, ⴰⵣⴻⴵⴰⴹ ⵏ ⵡⴻⵖⴹⴰⴱ ⵉⵏⵓ, ⴰⵇⴰ ⴰⵙⵅⴻⴹ ⵉⵏⵓ ⴷ ⴰⵄⵎⵓⴷ ⴷⴻⴳ ⵉⴼⴰⵙⵙⴻⵏ ⵏⵙⴻⵏ!
6 ⴰⴷ ⵜ ⵙⵙⴻⴽⴽⴻⵖ ⵖⴰⵔ ⵍⴳⴻⵏⵙ ⵉⵛⵛⵓⵔⴻⵏ ⵙ ⵏⵏⵉⴼⴰⵇ ⵓ ⵏⴻⵛⵛ ⴰⴷ ⵜ ⵓⵎⵓⵔⴻⵖ ⵅ ⵍⴳⴻⵏⵙ ⵉ ⵅ ⵉⴷⴷⵓⵇⵇⴻⵣ ⵓⴼⵓⴳⴻⵎ ⵉⵏⵓ, ⵎⴰⵃⴻⵏⴷ ⴰⴷ ⴰⵛⴰⵔⴻⵏ ⵜⵓⴽⴽⴰⵔⴹⴰ ⵓ ⵎⴰⵃⴻⵏⴷ ⴰⴷ ⵜ ⴽⴻⵛⵛⴹⴻⵏ ⵇⴰⵄ ⵓ ⴰⴷ ⵜ ⵄⴰⵔⵔⴰⵏ ⵉ ⵓⵏⴻⵄⴼⴰⵙ ⴰⵎ ⵜⵄⴻⵊⵊⴰⵊⵜ ⵅ ⵉⵎⴻⵙⵔⴰⵇ.
7 ⵎⴰⵛⴰ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵡⴰⵔ ⴷ ⴰⵙ ⵉⵜⵜⵖⵉⵍ ⴰⵎⵎⵓ ⵓ ⵓⵍ ⵏⵏⴻⵙ ⵉⵜⵜⵅⴰⵔⵔⴻⵚ ⵎⴰⵎⵎⴻⵛ ⵏⵏⴻⵖⵏⵉ, ⵎⴰⵖⴰⵔ ⵏⴻⵜⵜⴰ ⵖⴰⵔⴻⵙ ⴷⴻⴳ ⵡⵓⵍ ⵎⵖⵉⵔ ⵍⴻⴽⵃⴻⴹ ⵓ ⵎⴰⵃⴻⵏⴷ ⴰⴷ ⵉⵇⴹⴰ ⵅ ⵍⴻⴳⵏⵓⵙ, ⵡⴰⵔ ⵉⴵⵉ ⴷⵔⵓⵙ.
8 ⵎⴰⵖⴰⵔ ⵉⵇⵇⴰⵔ: ‘ⵎⴰ ⵡⴰⵔ ⴵⵉⵏ ⵍⵃⵓⴽⴽⴰⵎ ⵉⵏⵓ ⴷ ⵉⵊⴻⴵⵉⴷⴻⵏ ⵎⴰⵔⵔⴰ?
9 ⵎⴰ ⵡⴰⵔ ⵉⵎⵙⴰⵔ ⵉ ⴽⴰⵍⵏⵓ ⴰⵎⴻⵛⵏⴰⵡ ⵎⵉⵏ ⵉⵎⵙⴰⵔⴻⵏ ⵉ ⴽⴰⵔⴽⴰⵎⵉⵛ? ⵎⴰ ⵡⴰⵔ ⵉⵎⵙⴰⵔ ⵉ ⵃⴰⵎⴰⵜ ⴰⵎⴻⵛⵏⴰⵡ ⵎⵉⵏ ⵉⵎⵙⴰⵔⴻⵏ ⵉ ⴰⵔⴼⴰⴷ? ⵎⴰ ⵡⴰⵔ ⵉⵎⵙⴰⵔ ⵉ ⵙⴰⵎⴰⵔⵢⴰ ⴰⵎ ⵎⵉⵏ ⵉⵎⵙⴰⵔⴻⵏ ⵉ ⴷⵉⵎⴰⵛⵇ?
10 ⴰⵎ ⵎⴰⵎⵎⴻⵛ ⴰⴼⵓⵙ ⵉⵏⵓ ⵉⵟⵟⴻⴼ ⵜⵉⴳⴻⵍⴷⴰⵡⵉⵏ ⵏ ⵍ’ⴰⵚⵏⴰⵎ ⵏⵏⵉ ⵣⵉ ⵄⴷⵓⵏⵜ ⵍⴻⵅⵢⴰⵍⴰⵜ ⵏⵙⴻⵏ ⵉⵏⴻⵇⵛⴻⵏ ⵍⴻⵅⵢⴰⵍⴰⵜ ⵏ ⵓⵔⵛⴰⵍⵉⵎ ⴷ ⵙⴰⵎⴰⵔⵢⴰ,
11 ⵎⴰ ⵡⴰⵔ ⵜⵜⴻⴳⴳⴻⵖ ⴰⵎⵎⵓ ⵄⴰⵡⴻⴷ, ⴰⵎ ⵎⴰⵎⵎⴻⵛ ⵉ ⵜ ⴳⴳⵉⵖ ⴰⴽ-ⴷ ⵙⴰⵎⴰⵔⵢⴰ ⴷ ⵍ’ⴰⵚⵏⴰⵎ ⵏⵏⴻⵙ, ⵓⵍⴰ ⴰⴽ-ⴷ ⵓⵔⵛⴰⵍⵉⵎ ⴷ ⵍⴻⵅⵢⴰⵍⴰⵜ ⵏⵏⴻⵙ ⵏ ⵍ’ⴰⵚⵏⴰⵎ?’ ”
12 “ⵎⴰⵛⴰ ⵅⵎⵉ ⵖⴰ ⵉⴽⴻⵎⵎⴻⵍ ⵙⵉⴷⵉ ⵎⴰⵔⵔⴰ ⵍⵅⴻⴷⵎⴻⵜ ⵏⵏⴻⵙ ⵅ ⵡⴻⴷⵔⴰⵔ ⵏ ⵚⵉⵀⵢⵓⵏ ⵓ ⴷⵉ ⵓⵔⵛⴰⵍⵉⵎ, ⵅⴻⵏⵏⵉ ⴰⴷ ⵅⴻⴵⵚⴻⵖ ⵏⴻⵛⵛ ⵍⵖⵉⴵⴻⵜ ⵏ ⵓⴽⴻⴱⴱⴰⵔ ⴷⴻⴳ ⵡⵓⵍ ⵏ ⵓⵊⴻⴵⵉⴷ ⵏ ⴰⵛⵛⵓⵔ ⵓⵍⴰ ⴷ ⴰⵄⴻⴼⴼⴰⵔ ⵢⵓⴼⴼⴻⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ,
13 ⵎⴰⵖⴰⵔ ⵏⴻⵜⵜⴰ ⵉⵏⵏⴰ: ‘ⴰⵢⴰ ⴳⴳⵉⵖ ⵜ ⵙ ⵓⴼⵓⵙ ⵉⵏⵓ ⵉⵊⴻⵀⴷⴻⵏ ⵓ ⵙ ⵜⵉⵖⵉⵜ ⵉⵏⵓ, ⵎⴰⵖⴰⵔ ⵏⴻⵛⵛ ⵖⴰⵔⵉ ⵍⴻⵄⵇⴻⵍ. ⵉⵢⵎⵉⵔⴻⵏ ⵏ ⵍⴻⴳⵏⵓⵙ ⴽⴽⵙⴻⵖ ⵜⴻⵏ, ⵓ ⵍⴻⵄⵡⴰⵢⴻⴹ ⵏⵙⴻⵏ ⴽⴻⵛⵛⴹⴻⵖ ⵜⴻⵏ, ⵓ ⴰⵎ ⵊⵊⵉⵀⴻⵍ ⵖⴻⴹⵍⴻⵖ ⵍⵃⵓⴽⴽⴰⵎ ⵏⵙⴻⵏ.
14 ⴰⵎ ⵍⵄⵓⵛⵛ, ⴰⵎⵎⵓ ⵢⵓⴼⴰ ⵓⴼⵓⵙ ⵉⵏⵓ ⴰⴳⵍⴰ ⵏ ⵍⴻⴳⵏⵓⵙ, ⵊⴰⵔⵡⴻⵖ ⵎⴰⵔⵔⴰ ⵜⴰⵎⵎⵓⵔⵜ ⴰⵎ ⵎⴰⵎⵎⴻⵛ ⵊⴰⵔⵡⴻⵏ ⵜⵉⵎⴻⴵⴰⵍⵉⵏ ⵉⵎⵎⴻⵏⴹⴰⵔⴻⵏ. ⵓⵍⴰ ⴷ ⵉⵊⵊ ⵡⴰⵔ ⵉⵙⵙⴻⵏⵀⴻⵣⵣⵉ ⴰⴼⵔⵉⵡⴻⵏ, ⵡⴰⵔ ⴷⵉⵏ ⵡⴻⵏⵏⵉ ⵢⴰⵔⴻⵣⵎⴻⵏ ⴰⵊⴻⵇⵎⵉⵎ ⵏⵉⵖ ⵉⵊⴰⵡ.’
15 ⵎⴰ ⵉⵜⵜⴼⴻⵢⵢⴻⵛ ⵛⵛⴰⵇⵓⵔ ⵇⵉⴱⴰⵍⵜ ⵉ ⵡⴻⵏⵏⵉ ⵣⵣⴰⵢⴻⵙ ⵉⵜⵜⵛⴻⵇⵇⴰⵔⴻⵏ? ⵏⵉⵖ ⵉⵜⵜⵏⴻⴼⴼⴻⵅ ⵍⵎⴻⵏⵛⴰⵔ ⵣⵣⴰⵜ ⵉ ⵡⴻⵏⵏⵉ ⵣⵣⴰⵢⴻⵙ ⵉⵜⵜⵇⴻⵙⵙⴻⵏ? ⴰⵢⴰ ⵉⵍⵉ ⴰⵅⵎⵉ ⴰⵄⵎⵓⴷ ⵉⵜⵜⵃⴻⵏⵏⴻⴹ ⴰⵔⵢⴰⵣ ⵏⵏⵉ ⵜ ⵉⵙⵙⴳⴻⵄⵄⴷⴻⵏ, ⵏⵉⵖ ⴰⵅⵎⵉ ⴰⵄⵎⵓⴷ ⵉⵙⵙⴳⴻⵄⵄⴻⴷ ⴱⴰⴱ ⵏⵏⴻⵙ ⵏⵏⵉ ⵡⴰⵔ ⵉⴵⵉⵏ ⴷ ⴰⴽⴻⵛⵛⵓⴹ.”
16 ⵙ ⵓⵢⴰ ⴰⴷ ⵉⵙⵙⴻⴽⴽ ⵙⵉⴷⵉ ⵉⵏⵓ, ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴱⵓ-ⴷⴻⴵⵉⵙ ⵊⴰⵔ ⵉⵔⵢⴰⵣⴻⵏ ⵏⵙⴻⵏ ⵉⵇⴻⴱⴱⵓⵣⴻⵏ ⵓ ⵏⴻⵜⵜⴰ ⴰⴷ ⵉⵙⵙⵉⵔⴻⵖ ⵜⵉⵎⴻⵙⵙⵉ ⵙⴰⴷⵓ ⴰⵄⵓⴵⵉ ⵏ ⴰⵛⵛⵓⵔ ⴰⵎ ⵢⵉⵊⵊ ⵏ ⵍⵃⴰⴷⵓⵇ ⵏ ⵜⵎⴻⵙⵙⵉ.
17 ⵜⴰⴼⴰⵡⵜ ⵏ ⵉⵙⵔⴰⵉⵍ ⴰⴷ ⵜⴻⴷⵡⴻⵍ ⴷ ⵜⵉⵎⴻⵙⵙⵉ ⵓ ⴰⵎⵇⴻⴷⴷⴻⵙ ⵏⵏⴻⵙ ⴷ ⴰⵛⴻⵄⵄⴰⵍ ⵏⵏⵉ ⵉ ⵖⴰ ⵉⵛⴻⵎⴹⴻⵏ ⵓ ⴰⴷ ⵜⴻⵛⵛ ⵉⵙⴻⵏⵏⴰⵏⴻⵏ ⴷ ⵜⵣⴻⴳⴳⵯⴰⵔⵜ ⵏⵏⴻⵙ ⴷⴻⴳ ⵉⵊⵊ ⵏ ⵡⴰⵙⵙ ⵡⴰⵀⴰ.
18 ⵏⴻⵜⵜⴰ ⴰⴷ ⵢⴻⵛⵛ ⴰⵄⵓⴵⵉ ⵏ ⵡⴻⵣⵖⴰⵔ ⵏⵏⴻⵙ ⵓ ⵏ ⵍⵄⵉⵔⵙⵜ ⵉⵚⴻⴱⵃⴻⵏ ⵏⵏⴻⵙ ⵙ ⵎⴰⵔⵔⴰ ⵍⴻⵄⵎⴰⵔ ⴷ ⵡⴻⵢⵙⵓⵎ ⵉ ⴷⴰⵢⵙⴻⵏ, ⵓⵛⴰ ⴰⴷ ⵢⵉⵍⵉ ⵓⵄⵓⴵⵉ ⵏⵏⴻⵙ ⴰⵎ ⵢⵉⵊⵊ ⵏ ⵓⵎⴻⵃⵍⵓⵛ ⵉⵜⵜⵔⴰⵃⴻⵏ ⵉⵖⴻⴵⵉ.
19 ⵎⵉⵏ ⵉⵇⵇⵉⵎⴻⵏ ⵏ ⵜⵛⴻⵊⵊⵓⵔⴰ ⵏ ⵡⴻⵣⵖⴰⵔ ⵏⵏⴻⵙ ⴰⴷ ⵢⵉⵍⵉ ⴷⵔⵓⵙ ⵡⴰⵀⴰ, ⵉⵊⵊ ⵏ ⵓⵃⵓⴷⵔⵉ ⵉⵣⴻⵎⵎⴰⵔ ⴰⴷ ⵜⴻⵏ ⵉⵃⵙⴻⴱ.”
20 “ⴷⴻⴳ ⵡⴰⵙⵙ ⵏⵏⵉ ⴰⴷ ⵢⵉⵍⵉ ⵎⵉⵏ ⵉⵇⵇⵉⵎⴻⵏ ⵏ ⵉⵙⵔⴰⵉⵍ ⴷ ⵉⵏⵏⵉ ⵉⵏⴻⵊⵎⴻⵏ ⵣⵉ ⵜⴰⴷⴷⴰⵔⵜ ⵏ ⵢⴰⵄⵇⵓⴱ ⵡⴰⵔ ⵜⵜⵄⴻⵎⵎⵉⴷⴻⵏ ⵄⴰⴷ ⵅ ⵡⴻⵏⵏⵉ ⵜⴻⵏ ⵉⵛⵛⴰⵜⴻⵏ, ⵎⴰⵛⴰ ⴰⴷ ⵉⵄⴻⵎⵎⴻⴷ ⵉⵙⵔⴰⵉⵍ ⵅ ⵙⵉⴷⵉ, ⴰⵎⵇⴻⴷⴷⴰⵙ ⵏ ⵉⵙⵔⴰⵉⵍ, ⵙ ⵍⴰⵎⴰⵏ ⵉⵛⵛⵓⵔ.
21 ⵎⵉⵏ ⵉⵇⵇⵉⵎⴻⵏ ⴰⴷ ⴷⴷ-ⵉⴷⵡⴻⵍ, ⵎⵉⵏ ⵉⵇⵇⵉⵎⴻⵏ ⵏ ⵢⴰⵄⵇⵓⴱ ⴰⴷ ⴷⴷ-ⵉⴷⵡⴻⵍ ⵖⴰⵔ ⴰⵔⴻⴱⴱⵉ ⵉⵊⴻⵀⴷⴻⵏ.
22 ⴰ ⵉⵙⵔⴰⵉⵍ, ⵡⴰⵅⵅⴰ ⵍⴳⴻⵏⵙ ⵏⵏⴻⵛ ⴰⵎⵎⵓ ⵉⵡⵙⴻⵄ ⴰⵎ ⵢⵉⴵⵉ ⵏ ⵍⴻⴱⵃⴰⵔ, ⴰⴷ ⵣⵣⴰⵢⵙⴻⵏ ⴷⴷ-ⵉⴷⵡⴻⵍ ⵎⵖⵉⵔ ⵎⵉⵏ ⵉⵛⴻⵟⵟⴻⵏ. ⴰⴽⴻⵃⵃⴻⴹ ⴱⴰⵢⴻⵏ, ⵜⴰⵙⴻⴳⴷⴰ ⵜⴻⵡⵙⴻⵄ.
23 ⵎⴰⵖⴰⵔ ⵙⵉⴷⵉ ⵉⵏⵓ, ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⴷ ⵉⵇⴹⴰ ⵅ ⵎⴰⵏ ⴰⵢⴰ ⵓⵛⴰ ⴰⴷ ⵉⴳⴳ ⵎⵉⵏ ⵢⵓⵔⴰⵏ ⴷⵉ ⵎⴰⵔⵔⴰ ⵜⴰⵎⵎⵓⵔⵜ.”
24 “ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ‘ⴰ ⵍⴳⴻⵏⵙ ⵉⵏⵓ ⵏⵏⵉ ⵉⵣⴻⴷⴷⵖⴻⵏ ⴷⵉ ⵚⵉⵀⵢⵓⵏ, ⵡⴰⵔ ⵜⵜⴻⴳⴳⵯⴻⴷ ⵛⴰ ⵣⵉ ⴰⵛⵛⵓⵔ ⵅⵎⵉ ⵛⴻⴽ ⵉⵛⵛⴰⵜ ⵙ ⵓⵣⴻⴵⴰⴹ ⵓⵛⴰ ⵉⵙⵙⴳⴻⵄⵄⴻⴷ ⵅⴰⴽ ⴰⵄⵎⵓⴷ, ⴰⵎ ⵎⴰⵎⵎⴻⵛ ⵉⵎⵙⴰⵔ ⴷⵉ ⵎⵉⵚⵔⴰ.
25 ⵎⴰⵖⴰⵔ ⵄⴰⴷ ⵎⵖⵉⵔ ⵛⵡⴰⵢⵜ, ⵅⴻⵏⵏⵉ ⴰⴷ ⵉⴽⴻⵎⵎⴻⵍ ⵎⴽⵓⵍ ⵡⴻⵙⵅⴻⴹ ⵏⵏⵉ ⵓⵛⴰ ⴰⴷ ⵢⵉⵍⵉ ⵡⴻⵖⴹⴰⴱ ⵉⵏⵓ ⵅ ⵓⵔⴻⴷⴷⴻⴵ ⵏⵙⴻⵏ.
26 ⵎⴰⵖⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴰⴷ ⵉⵃⴻⵏⵏⴻⴹ ⵜⵉⵡⴰ ⵏⵏⴻⵙ ⴰⵔⴻⴽⴽⵓⴹ, ⴰⵎ ⵎⴰⵎⵎⴻⵛ ⵉⵡⵜⴰ ⵎⵉⴷⵢⴰⵏ ⵖⴰⵔ ⵜⴻⵚⴹⴰⵔⵜ ⵏ ⵖⵓⵔⴰⴱ. ⵜⴰⵖⵖⴰⵔⵛⵜ ⵏⵏⴻⵙ ⴰⴷ ⵜⵉⵍⵉ ⵜⴻⵙⵙⵡⵉⵥⵥⴰⴹ ⵜⵉⵡⴰ ⵉ ⵍⴻⴱⵃⴰⵔ ⵓ ⵏⴻⵜⵜⴰ ⴰⴷ ⵜⵜ ⵉⵙⵙⴳⴻⵄⵄⴻⴷ ⴰⵎ ⵎⴰⵎⵎⴻⵛ ⵜ ⵉⴳⴳⴰ ⴷⵉ ⵎⵉⵚⵔⴰ.
27 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵡⴹⴰ ⵍⴻⵃⵎⴻⵍ ⵏ ⴰⵛⵛⵓⵔ ⵅ ⵜⴻⵖⵔⵓⴹⵜ ⵏⵏⴻⵛ ⵓ ⵜⴰⵖⵏⴰⵛⵜ ⵏⵏⴻⵙ ⵅ ⵢⵉⵔⵉ ⵏⵏⴻⵛ. ⴰⵣⴰⵢⵍⵓ ⴰⴷ ⵉⵜⵜⵡⴰⴱⴻⵟⵟⴻⵍ ⵙ ⵉⵊⵉⵎⴰⵏ ⵏⵏⵉ ⵉⵚⴻⵃⵃⴻⵏ.”
28 “ⴰⴷ ⴷⴷ-ⵢⴰⵙ ⵖⴰⵔ ⵄⴰⵢⵢⴰⵜ, ⵉⵄⴷⵓ ⵅ ⵎⵉⵊⵔⵓⵏ, ⵉⵙⵙⴰⵔⵙ ⴷⴷⵓⵣⴰⵏ ⵏⵏⴻⵙ ⴷⵉ ⵎⵉⵅⵎⴰⵛ.
29 ⵏⵉⵜⵏⵉ ⵄⴻⴷⴷⵓⵏ ⵅ ⵡⴻⴱⵔⵉⴷ ⵏ ⵓⵥⴻⴽⴽⵡⵓ ⵅ ⵉⴷⵓⵔⴰⵔ, ⴰⴷ ⵙⵙⴻⵏⵙⴻⵏ ⴷⵉ ⵊⴰⴱⴰⵄ. ⵔⴰⵎⴰ ⵜᵉⵜⵜⴰⵔⵊⵉⵊⵉ, ⵜⴰⵔⵡⴻⵍ ⵊⵉⴱⵄⴰ ⵏ ⵛⴰⵡⵓⵍ.
30 ⵙⵖⵓⵢⵢ ⵙ ⵜⵎⵉⵊⵊⴰ ⵉⵊⴻⵀⴷⴻⵏ, ⴰ ⵢⴻⴵⵉⵙ ⵏ ⵊⴰⵍⵍⵉⵎ! ⴰⵔⵔ ⵍⴱⴰⵍ, ⵍⴰⵢⵛⴰ, ⴰ ⵛⴻⵎ ⵄⴰⵏⴰⵜⵓⵜ, ⵎⴻⵙⴽⵉⵏⴰ!
31 ⵜⴰⵏⴷⵉⵏⵜ ⵏ ⵎⴰⴷⵎⵉⵏⴰ ⵜⴰⵔⵡⴻⵍ, ⵉⵎⴻⵣⴷⴰⵖ ⵏ ⵊⵉⴱⵉⵎ ⴼⴼⵖⴻⵏ ⵎⴰⵃⴻⵏⴷ ⴰⴷ ⴰⴼⴻⵏ ⵍⴰⵎⴰⵏ.
32 ⴰⵙⵙ-ⴰ ⵄⴰⴷ ⴰⴷ ⵉⴱⴻⴷⴷ ⴷⵉ ⵏⵓⴱ. ⵏⴻⵜⵜⴰ ⴰⴷ ⵉⴽⵙⵉ ⴰⴼⵓⵙ ⵏⵏⴻⵙ ⵉⵙⵙⴰⴳⴳⵯⴰⴷ ⵖⴰⵔ ⵡⴻⴷⵔⴰⵔ ⵏ ⵢⴻⴵⵉⵙ ⵏ ⵚⵉⵀⵢⵓⵏ, ⵖⴰⵔ ⵜⴻⵡⵔⵉⵔⵜ ⵏ ⵓⵔⵛⴰⵍⵉⵎ.”
33 “ⵅⵣⴰⵔ, ⵙⵉⴷⵉ, ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⴷ ⵉⵇⴻⵙⵙ ⵍⴻⴼⵔⵓⵄ ⵙ ⵓⵖⵉⵍ. ⵉⵏⵏⵉ ⵙ ⵜⵉⴷⴷⵉ ⵢⵓⵄⵍⴰⵏ ⴰⴷ ⵜⵜⵡⴰⵣⴻⴷⵎⴻⵏ, ⵓⵛⴰ ⵉⵏⵏⵉ ⵉⵙⵙⴳⴻⵄⵄⴷⴻⵏ ⵉⵅⴻⴼ ⵏⵙⴻⵏ ⴰⴷ ⵜⵜⵡⴰⵙⵙⴻⵀⵡⴰⵏ.
34 ⵛⴱⴰⵔⵇ ⵏ ⵡⴻⵣⵖⴰⵔ ⴰⴷ ⵉⵜⵜⵡⴰⵇⵍⴻⵄ ⵙ ⵡⵓⵣⵣⴰⵍ ⵓⵛⴰ ⵍⵓⴱⵏⴰⵏ ⴰⴷ ⵉⵡⴹⴰ ⵙ ⵓⴼⵓⵙ ⵏ ⵓⵎⵣⴻⵎⵎⴰⵔ.”