ⵉⵛⴰⵄⵢⴰ
1
ⵜⴰⵎⴻⵥⵔⵉⵡⵜ ⵏ ⵉⵛⴰⵄⵢⴰ
1 ⵍⴻⵡⵃⵉⵢ ⵏ ⵉⵛⴰⵄⵢⴰ, ⵎⵎⵉⵙ ⵏ ⴰⵎⵓⵚ, ⵏⵏⵉ ⵉⵥⵔⴰ ⵅ ⵢⴰⵀⵓⴷⴰ ⴷ ⵓⵔⵛⴰⵍⵉⵎ, ⴷⴻⴳ ⵡⵓⵙⵙⴰⵏ ⵏ ⵄⵓⵣⵣⵉⵢⴰ, ⵢⵓⵜⴰⵎ, ⴰⵃⴰⵣ ⴷ ⵃⵉⵣⵇⵉⵢⴰ, ⵉⵊⴻⴵⵉⴷⴻⵏ ⵏ ⵢⴰⵀⵓⴷⴰ.
2 “ⵙⵍⴻⵎ, ⴰ ⵉⵊⴻⵏⵡⴰⵏ, ⵓⵛⴰ ⵙⵙⴻⵖⴷ, ⴰ ⵜⴰⵎⵎⵓⵔⵜ, ⵎⵉⵏⵣⵉ ⵙⵉⴷⵉ ⵉⵙⵙⴰⵡⴰⵍ: ‘ⵏⴻⵛⵛ ⵙⵙⴻⵢⵎⴻⵖ ⵉⵃⴻⵏⵊⵉⵔⴻⵏ ⵓ ⵙⵙⴻⵎⵖⴰⵔⴻⵖ ⵜⴻⵏ, ⵎⴰⵛⴰ ⵏⵉⵜⵏⵉ ⵖⴻⵡⵡⵖⴻⵏ ⵅⴰⴼⵉ.
3 ⴰⴼⵓⵏⴰⵙ ⵉⵙⵙⴻⵏ ⴱⴰⴱ ⵏⵏⴻⵙ ⴷ ⵓⵙⵏⵓⵙ ⵍⵎⴻⴷⵡⴻⴷ ⵏ ⵙⵉⴷⵉ ⵏⵏⴻⵙ, ⵎⴰⵛⴰ ⵉⵙⵔⴰⵉⵍ ⵡⴰⵔ ⵖⴰⵔⴻⵙ ⴱⵓ ⵜⵓⵙⵙⵏⴰ, ⵍⴳⴻⵏⵙ ⵉⵏⵓ ⵡⴰⵔ ⴷⴰⵢⴻⵙ ⵜⴻⴵⵉ ⵍⴻⴼⵀⴰⵎⴻⵜ.
4 ⵓⵛⵜ ⵅ ⵍⴳⴻⵏⵙ ⵉ ⵉⵅⴹⴰⵏ, ⵍⴳⴻⵏⵙ ⵉ ⵅ ⵉⴵⴰ ⴷⴷⵇⴻⵍ ⵏ ⵍⵎⵓⵄⵚⵉⵢⵢⴻⵜ, ⵣⵣⴰⵔⵉⵄⴻⵜ ⵏ ⵉⵄⴻⴼⴼⴰⵏⴻⵏ, ⵜⴰⵔⵡⴰ ⵏ ⵓⵙⵏⴻⵅⵍⵉⵄ. ⵏⵉⵜⵏⵉ ⵊⵊⵉⵏ ⵙⵉⴷⵉ, ⵙⵙⴻⵃⵇⴰⵔⴻⵏ ⴰⵎⵇⴻⴷⴷⴰⵙ ⵏ ⵉⵙⵔⴰⵉⵍ, ⴰⵔⵔⵉⵏ ⴰⵙ-ⴷⴷ ⵙ ⵡⴻⵄⵔⵓⵔ.
5 ⵎⴰⵏⵉ ⵜᵉⵜⵜⴻⵅⵙⴻⵎ ⴰⴷ ⵜᵉⵜⵜⵡⴰⵡⵜⴻⵎ ⵄⴰⴷ, ⵓⵎⵉ ⴽⴻⵏⵏⵉⵡ ⵜⴻⵇⵇⵉⵎⴻⵎ ⵜᵉⵜⵜⵖⴻⵡⵡⴰⵖⴻⵎ. ⴰⵣⴻⴵⵉⴼ ⵎⴰⵔⵔⴰ ⵉⵀⵍⴻⵛ, ⵓⵍ ⵎⴰⵔⵔⴰ ⵢⵓⵀⴻⵍ ⴰⵟⵟⴰⵙ.
6 ⵣⵉ ⵜⵍⴻⵇⵇⴰ ⵏ ⵓⴹⴰⵔ ⴰⵍ ⴰⵣⴻⴵⵉⴼ ⵡⴰⵔ ⴷⴰⵢⴻⵙ ⵜᵉⵜⵜⵉⴼⴻⴷ ⵎⵉⵏ ⵉⵚⴻⴱⵃⴻⵏ! ⵎⵖⵉⵔ ⵉⵢⴻⵣⵣⵉⵎⴻⵏ, ⵟⵟⴻⵄⴱⴰⵢⴰⵔ ⴷ ⵉⵢⴻⵣⵣⵉⵎⴻⵏ ⵢⴰⵔⴻⵣⵎⴻⵏ, ⵡⴰⵔ ⵜⴻⵏ ⵀⴻⵏⵏⴹⴻⵏ, ⵡⴰⵔ ⵜⴻⵏ ⵙⵙⵢⴰⵔⴹⴻⵏ, ⵡⴰⵔ ⵜⴻⵏ ⵙⵙⴰⵔⴻⴹⴱⴻⵏ ⵙ ⵣⵣⴻⵛⵜ.
7 ⵜⴰⵎⵎⵓⵔⵜ ⵏⵡⴻⵎ ⵜⴻⵅⵍⴰ, ⵜⵉⵏⴻⴷⴷⴰⵎ ⵏⵡⴻⵎ ⵙⵙⵛⴻⵎⴹⴻⵏ ⵜⴻⵏⵜ ⵙ ⵜⵎⴻⵙⵙⵉ, ⵜⴰⵎⵎⵓⵔⵜ ⵏⵡⴻⵎ ⵚⵚⴰⵔⴷⴻⵏ ⵜⵜ ⵉⴱⴰⵔⵔⴰⵏⵉⵢⵢⴻⵏ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵡⴻⵎ, ⴰⵇⴰ-ⵜⵜ ⴷ ⵍⵅⵉⵔⴱⴻⵜ ⴰⵅⵎⵉ ⵙⵙⴻⵏⵇⴻⵍⴱⴻⵏ ⵜⵜ ⵉⴱⴰⵔⵔⴰⵏⵉⵢⵢⴻⵏ.
8 ⵢⴻⴵⵉⵙ ⵏ ⵚⵉⵀⵢⵓⵏ ⵜⴻⵇⵇⵉⵎ ⵖⴰⵔ ⴹⴻⴼⴼⴰⵔ ⴰⵎ ⵢⵉⵛⵜ ⵏ ⵜⵄⵉⵛⵛⵓⵜ ⴷⴻⴳ ⵓⵎⴰⵔⵊⴻⵄ ⵏ ⵓⴹⵉⵍ, ⴰⵎ ⵜⴻⵅⵅⴰⵏⵜ ⵏ ⵓⵄⴻⵙⵙⴰⵙ ⴷⴻⴳ ⵉⵢⵢⴰⵔ ⵏ ⵍⴻⵅⵢⴰⵔ, ⴰⵎ ⵜⴻⵏⴷⵉⵏⵜ ⵉⵜⵜⵡⴰⵃⵚⴰⵔⴻⵏ.
9 ⵎⵍⵉ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵡⴰⵔ ⴷ ⴰⵏⴻⵖ ⵉⵊⵊⵉ ⴷⵔⵓⵙ ⵎⵉⵏ ⵢⴰⵔⴻⵡⵍⴻⵏ, ⵉⵍⵉ ⵏⴻⴷⵡⴻⵍ ⴰⵎ ⵙⴰⴷⵓⵎ, ⵉⵍⵉ ⵏⴻⴳⴳⴰ ⴰⵎ ⵄⴰⵎⵓⵔⵔⴰ.’ ”
10 “ⵙⵍⴻⵎ ⵉ ⵡⴰⵡⴰⵍ ⵏ ⵙⵉⴷⵉ, ⴰ ⵍⵃⵓⴽⴽⴰⵎ ⵏ ⵙⴰⴷⵓⵎ! ⵡⵛⴻⵎ ⴰⵎⴻⵣⵣⵓⵖ ⵉ ⵛⵛⴰⵔⵉⵄⴰ ⵏ ⴰⵔⴻⴱⴱⵉ, ⴰ ⵍⴳⴻⵏⵙ ⵏ ⵄⴰⵎⵓⵔⵔⴰ!
11 ⵎⵉⵏ ⵖⴰ ⴳⴳⴻⵖ ⵙ ⵜⵖⴰⵔⵚⵉ ⵏⵡⴻⵎ, ⵉⵇⵇⴰⵔ ⵙⵉⴷⵉ. ⵏⴻⵛⵛ ⵊⵊⵉⵡⵏⴻⵖ ⵣⵉ ⵜⵖⴰⵔⵚⴰ ⵏ ⵡⴻⵛⵎⴰⴹ ⵏ ⵉⵛⴰⵔⵔⵉⵢⵢⴻⵏ ⵓ ⵣⵉ ⵜⴰⴷⵓⵏⵜ ⵏ ⵍⵎⴰⵍ ⵉⵚⴻⵃⵃⴻⵏ. ⵉⴷⴰⵎⵎⴻⵏ ⵏ ⵉⴼⵓⵏⴰⵙⴻⵏ ⵉⵎⴻⵥⵢⴰⵏⴻⵏ ⴷ ⵢⴻⵣⵎⴰⵔⴻⵏ ⴷ ⵉⵖⴰⵢⴹⴻⵏ ⵡⴰⵔ ⴷ ⴰⵢⵉ ⵜⵜⴻⵄⵊⵉⴱⴻⵏ.
12 ⵅⵎⵉ ⴷⴷ-ⵜᵉⵜⵜⴰⵙⴻⵎ ⵃⵉⵎⴰ ⴰⴷ ⵜⴱⴰⵏⴻⵎ ⵣⵣⴰⵜ ⵉ ⵡⵓⴷⴻⵎ ⵉⵏⵓ, ⵡⵉ ⴽⴻⵏⵏⵉⵡ ⵉⵄⴰⵔⴹⴻⵏ ⵉ ⵓⵢⴰ, ⵎⴰⵃⴻⵏⴷ ⴰⴷ ⵜⵄⴻⴼⵙⴻⵎ ⵅ ⵍⴻⵎⵔⴰⵃⴰⵜ ⵉⵏⵓ?
13 ⵡⴰⵔ ⴷ ⴰⵢⵉ ⴷⴷ-ⵜⴰⵡⵢⴻⵎ ⵄⴰⴷ ⵜⴰⵡⵀⵉⴱⵜ ⵉⴱⴻⴹⵍⴻⵏ. ⵍⴻⴱⵅⵓⵔ ⵖⴰⵔⵉ ⴷ ⵏⵏⵄⵉ. ⵓⵙⵙⴰⵏ ⵏ ⵉⵢⵓⵔⴻⵏ ⵏ ⵊⴷⵉⴷ ⴷ ⵡⵓⵙⵙⴰⵏ ⵏ ⵙⵙⴻⴱⵜ ⴷ ⵓⵍⴰⵖⵉ ⵉ ⵜⵎⴻⵙⵎⵓⵏⵉⵏ ⵉⵇⴻⴷⴷⵙⴻⵏ ⵡⴰⵔ ⵣⴻⵎⵎⴰⵔⴻⵖ ⴰⴷ ⵃⴻⵎⵍⴻⵖ ⵎⴰⵔⵔⴰ ⴰⵢⴰ, ⴰⵇⴰ-ⵜ ⴷ ⵍⵎⵓⵄⵚⵉⵢⵢⴻⵜ, ⵄⴰⴷ ⵓⵍⴰ ⴷ ⴰⵎⵓⵏⵉ ⵉⴼⴰⵔⵣⴻⵏ.
14 ⵍⴻⵄⵎⴰⵔ ⵉⵏⵓ ⵉⵛⴰⵔⵔⴻⵀ ⵓⵙⵙⴰⵏ ⵏ ⵓⵢⵓⵔ ⵏ ⵊⴷⵉⴷ ⵏⵡⴻⵎ ⴷ ⵍⴻⵄⵢⵓⴷⴰⵜ ⵏⵡⴻⵎ ⵉⵜⵜⵡⴰⴳⴳⴻⵏ. ⴰⵇⴰ ⴰⵜⴻⵏ ⴷⴻⵡⵍⴻⵏ ⵖⴰⵔⵉ ⴷ ⵍⴻⵃⵎⴻⵍ, ⵏⴻⵛⵛ ⵓⵃⵍⴻⵖ ⴰⴷ ⵜⴻⵏ ⴰⵔⴱⵓⵖ.
15 ⵅⵎⵉ ⵜᵉⵜⵜⵙⴰⵔⵔⴰⵃⴻⵎ ⵉⴼⴰⵙⵙⴻⵏ ⵏⵡⴻⵎ, ⵜⵜⵍⴻⵃⵃⴼⴻⵖ ⵉ ⵜⵉⵟⵟⴰⵡⵉⵏ ⵉⵏⵓ ⵣⵣⴰⵢⵡⴻⵎ. ⵄⴰⴷ ⵎⴰⵍⴰ ⴽⴻⵏⵏⵉⵡ ⵜⴰⵔⵏⵉⵎ ⴷⵉ ⵜⵥⴰⴵⵉⵜ, ⵏⴻⵛⵛ ⵡⴰⵔ ⵜⵜ ⵜⵜⴻⵙⵍⵉⵖ, ⵎⴰⵖⴰⵔ ⵉⴼⴰⵙⵙⴻⵏ ⵏⵡⴻⵎ ⵄⴻⵎⵎⴰⵔⴻⵏ ⵙ ⵉⴷⴰⵎⵎⴻⵏ.
16 ⵙⵉⵔⴷⴻⵎ, ⵙⵉⵣⴷⴻⴳⴻⵎ ⵉⵅⴻⴼ ⵏⵡⴻⵎ, ⵙⵙⵉⴳⴳⵯⴻⵊⴻⵎ ⵜⵓⵄⴻⴼⴼⵏⴰ ⵏ ⵜⵎⴻⴳⴳⴰ ⵏⵡⴻⵎ ⵣⵉ ⵣⵣⴰⵜ ⵏ ⵜⵉⵟⵟⴰⵡⵉⵏ ⵉⵏⵓ. ⵙⴱⴻⴷⴷⴻⵎ ⵣⵉ ⵍⵖⴰⵔ ⵉ ⵜᵉⵜⵜⴻⴳⴳⴻⵎ.
17 ⵍⴻⵎⴷⴻⵎ ⴰⴷ ⵜⴻⴳⴳⴻⵎ ⵎⵉⵏ ⵉⵚⴻⴱⵃⴻⵏ, ⴰⵔⵣⵓⵎ ⵅ ⵍⵃⴻⵇⵇ, ⵡⵛⴻⵎ ⴰⴼⵓⵙ ⵉ ⵡⴻⵏⵏⵉ ⵉⵃⵙⴰⵔⴻⵏ, ⴳⴳⴻⵎ ⵜⴰⵙⵖⴰⵔⵜ ⵉ ⵓⵢⵓⵊⵉⵍ, ⵡⵜⴻⵎ ⵅ ⵜⴰⵊⵊⴰⵍⵜ.”
18 “ⴰⵙⴻⵜⵜⵉⵡ-ⴷⴷ ⵓ ⴻⵊⵊ ⴰⵏⴻⵖ ⴰⴷ ⵏᵉⵜⵜⴻⵎⵃⴰⴽⴻⵎ ⴰⴽ-ⴷ ⵡⴰⵢⴰⵡⵢⴰ!, ⵉⵇⵇⴰⵔ ⵙⵉⴷⵉ. ⵡⴰⵅⵅⴰ ⴷⴷⵏⵓⴱ ⵏⵏⴻⵛ ⴷ ⵉⵣⴻⴳⴳⵯⴰⵖⴻⵏ ⴰⵎ ⵓⵣⴻⴳⴳⵯⴰⵖ ⵉⵃⴻⴷⵇⴻⵏ, ⴰⴷ ⴷⴻⵡⵍⴻⵏ ⴷ ⵉⵛⴻⵎⵍⴰⵔⴻⵏ ⴰⵎ ⵡⴻⴷⴼⴻⵍ, ⵡⴰⵅⵅⴰ ⴷ ⵉⵣⴻⴳⴳⵯⴰⵖⴻⵏ ⴰⵎ ⵓⵣⴻⴳⴳⵯⴰⵖ ⵢⵓⴵⵖⴻⵏ, ⴰⴷ ⴷⴻⵡⵍⴻⵏ ⴷ ⵉⵛⴻⵎⵍⴰⵍⴻⵏ ⴰⵎ ⵜⴹⵓⴼⵜ.
19 ⵎⴰⵍⴰ ⴽⴻⵏⵏⵉⵡ ⵜⵄⴻⵡⵡⵍⴻⵎ, ⵓ ⴰⴷ ⵜⴻⵙⵍⴻⵎ, ⵅⴻⵏⵏⵉ ⴰⴷ ⵜⴻⵛⵛⴻⵎ ⵎⵉⵏ ⵉⵚⴻⴱⵃⴻⵏ ⵏ ⵜⴻⵎⵎⵓⵔⵜ,
20 ⵎⴰⵛⴰ ⵎⴰⵍⴰ ⴽⴻⵏⵏⵉⵡ ⵜⵓⴳⵉⵎ ⵓⵛⴰ ⴰⴷ ⵜⵖⴻⵡⵡⵖⴻⵎ, ⴰⴷ ⴽⴻⵏⵏⵉⵡ ⵢⴻⵛⵛ ⵙⵙⵉⴼ, ⵎⴰⵖⴰⵔ ⴰⵇⴻⵎⵎⵓⵎ ⵏ ⵙⵉⴷⵉ ⴰⵇⴰ ⵉⵙⵙⵉⵡⴻⵍ!”
21 “ⵎⴰⵎⵎⴻⵛ ⵜⴻⴷⵡⴻⵍ ⵜⴻⵏⴷⵉⵏⵜ
ⵏⵏⵉ ⴷⴰⵢⴻⵙ ⵍⴰⵎⴰⵏ
ⴷ ⵜⴰⵎⵖⴰⵔⵜ ⵏ ⴼⴰⵔⵇ-ⵛⵛⵖⴻⵍ!
ⵏⴻⵜⵜⴰⵜ ⵜⵓⵖⴰ ⵜⴻⵛⵛⵓⵔ ⵙ ⵍⵃⴻⵇⵇ,
ⵜⴰⵙⴻⴳⴷⴰ ⵜⵓⵖⴰ ⵜᵉⵜⵜⵏⵓⵙⴰ ⴷⴰⵢⴻⵙ,
ⵎⴰⵛⴰ ⵍⴻⵅⵅⵓ ⵉⵇⴻⵜⵜⴰⵍⴻⵏ.
22 ⵏⵏⵓⵇⴰⵔⵜ ⵏⵏⴻⵎ ⵜⴻⴷⵡⴻⵍ ⴷ ⴽⵓⴼⴼⵓ,
ⴱⵉⵏⵓ ⵏⵏⴻⵎ ⵚⵚⵓⵔⴻⵏ ⵜ ⴰⴽ-ⴷ ⵡⴰⵎⴰⵏ.
23 ⵍⵃⵓⴽⴽⴰⵎ ⵏⵏⴻⵎ ⵜⵜⵖⴻⵡⵡⵖⴻⵏ,
ⴰⵇⴰ ⴳⴳⵉⵏ ⵉⵅⴻⵡⵡⴰⵏⴻⵏ ⴷ ⵉⵎⴻⴷⴷⵓⴽⴽⴰⵍ ⵏⵙⴻⵏ,
ⵎⴰⵔⵔⴰ ⵜⵜⴻⵅⵙⴻⵏ ⵜⵉⵔⵣⵉⴼⵉⵏ
ⵓⵛⴰ ⴰⵔⴻⵣⵣⵓⵏ ⵅ ⴰⵔⵔⴻⵛⵡⴻⵜ.
ⵏⵉⵜⵏⵉ ⵡⴰⵔ ⵜⵜⵉⵖⴻⵏ ⵉ ⵓⵢⵓⵊⵉⵍ ⵜⴰⵙⵖⴰⵔⵜ ⵏⵏⴻⵙ,
ⴷⴷⴻⵄⵡⴻⵜ ⵏ ⵜⵉⵊⵊⴰⵍ ⵡⴰⵔ ⵜⴻⵏ ⵜᵉⵜⵜⵉⴽⴽⵡⵉⴹ.”
24 “ⵙ ⵓⵢⴰ ⵉⵇⵇⴰⵔ ⵙⵉⴷⵉ, ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⵎⵣⴻⵎⵎⴰⵔ ⵏ ⵉⵙⵔⴰⵉⵍ: ‘ⵓⵛⵜ ⵅⴰⵡⴻⵎ! ⵏⴻⵛⵛ ⴰⴷ ⵙⵙⴼⴻⵡⵡⵊⴻⵖ ⵉⵅⴻⴼ ⵉⵏⵓ ⵙ ⵉⵖⵔⵉⵎⴻⵏ ⵉⵏⵓ, ⵏⴻⵛⵛ ⴰⴷ ⵅⴻⵍⴼⴻⵖ ⵉⵅⴻⴼ ⵉⵏⵓ ⵣⵉ ⵍⵄⴻⴷⵢⴰⵏ ⵉⵏⵓ.
25 ⵏⴻⵛⵛ ⴰⴷ ⵡⵜⴻⵖ ⴰⴼⵓⵙ ⵉⵏⵓ ⵅⴰⵡⴻⵎ, ⴰⴷ ⴽⴻⵏⵏⵉⵡ ⵚⴻⴼⴼⵉⵖ ⴰⴽ-ⴷ ⵍⵍⵉⵅⵉⵢⵢⴰ ⵓⵛⴰ ⵎⴰⵔⵔⴰ ⵍⴻⵅⴼⵉⴼ ⵏⵏⴻⵎ ⴰⴷ ⵜ ⵡⴻⴷⴷⴰⵔⴻⵖ.
26 ⵏⴻⵛⵛ ⴰⴷ ⴰⵎ ⵡⵛⴻⵖ ⵄⴰⵡⴻⴷ ⵍⵇⵓⴹⴰⵜ ⵏⵏⴻⵎ ⴰⵎ ⵖⴰⵔ ⵓⵎⴻⵣⵡⴰⵔⵓ, ⴷ ⴰⵢⵜ ⵏ ⵛⵛⵡⴰⵔ ⵏⵏⴻⵎ ⴰⵎ ⵖⴰⵔ ⵓⵎⴻⵣⵡⴰⵔⵓ. ⴰⵡⴰⵔⵏⵉ ⴰⵢⴰ ⴰⴷ ⴰⵎ ⵍⴰⵖⴰⵏ: ‘ⵜⴰⵏⴷⵉⵏⵜ ⵏ ⵜⵙⴻⴳⴷⴰ!’ ⴷ ‘ⵜⴻⵏⴷⵉⵏⵜ ⴷⴰⵢⴻⵙ ⵍⴰⵎⴰⵏ!’
27 ⵚⵉⵀⵢⵓⵏ ⴰⴷ ⵜᵉⵜⵜⵡⴰⵙⵙⴻⵏⵊⴻⵎ ⵙ ⵍⵃⴻⵇⵇ ⴷ ⵢⵉⵏⵏⵉ ⵣⵣⴰⵢⴻⵙ ⵉⵜⵜⵓⴱⴻⵏ ⴰⴷ ⵜⵜⵡⴰⵙⵙⴻⵏⵊⵎⴻⵏ ⵙ ⵜⵙⴻⴳⴷⴰ,
28 ⵎⴰⵛⴰ ⵉⵎⵖⴻⵡⵡⵖⴻⵏ ⴷ ⵉⵎⴻⴷⵏⴰⴱ ⴰⴷ ⵜⵜⵡⴰⵔⵥⴻⵏ ⵊⵎⵉⵄ, ⵓⵛⴰ ⵉⵏⵏⵉ ⵉ ⵖⴰ ⵉⵃⴻⵢⵢⴷⴻⵏ ⵅ ⵙⵉⴷⵉ, ⴰⴷ ⵜⵜⵡⴰⵇⴹⴰⵏ.
29 ⵏⵉⵜⵏⵉ ⴰⴷ ⵙⴻⴹⵃⴰⵏ ⵣⵉ ⵙⵙⵉⴱⴱⴻⵜ ⵏ ⵜⵛⴻⵊⵊⵓⵔⴰ ⵏ ⵍ’ⴰⵚⵏⴰⵎ ⵏⵏⵉ ⴷⵉ ⵜⴻⵎⵎⴻⵥⵔⴻⵎ ⵓⵛⴰ ⴽⴻⵏⵏⵉⵡ ⴰⴷ ⵜⵙⴻⴹⵃⴰⵎ ⵣⵉ ⵙⵙⵉⴱⴱⴻⵜ ⵏ ⵉⵃⵡⵉⵛⴻⵏ ⵏⵏⵉ ⵜⵉⵅⴹⴰⵔⴻⵎ ⴽⴻⵏⵏⵉⵡ.
30 ⵎⴰⵖⴰⵔ ⴽⴻⵏⵏⵉⵡ ⴰⴷ ⵜⵉⵍⵉⵎ ⴰⵎ ⵜⵛⴻⵊⵊⴰⵔⵜ ⵏ ⵢⵉⴳⴳ ⵉ ⵣⵉ ⴰⴼⴰⵔ ⵏⵏⴻⵙ ⵉⵙⵍⴰⵡ, ⵓ ⴰⵎ ⵡⴻⵃⵡⵉⵛ ⵉ ⵡⴰⵔ ⵖⴰⵔ ⴵⵉⵏ ⵡⴰⵎⴰⵏ.
31 ⴰⴷ ⵉⴷⵡⴻⵍ ⵡⴻⵏⵏⵉ ⵉⵊⴻⵀⴷⴻⵏ ⴷ ⵉⵊⵊ ⵏ ⵓⴼⵉⵍⵓ ⵏ ⵜⵉⴼⴼⴻⵙⵜ ⵓ ⵍⵅⴻⴷⵎⴻⵜ ⵏⵏⴻⵙ ⴷ ⵉⵛⵜ ⵏ ⵜⴼⴻⵟⵟⵓⵜ, ⴰⴷ ⴰⵔⵖⴻⵏ ⵙ ⵜⵏⴰⵢⴻⵏ ⵉⴷⵙⴻⵏ ⵎⵓⵏⴻⵏ ⵓⵛⴰ ⵡⴰⵔ ⴷⵉⵏ ⵉⴵⵉ ⵓⵍⴰ ⴷ ⵉⵊⵊ ⵡⵉ ⵖⴰ ⵉⵙⵙⵅⴻⵙⵢⴻⵏ.’ ”