2 ⵉⵜⵉⵙⵙⴰⵍⵓⵏⵉⴽⵉⵢⵢⴻⵏ
1
ⴰⵙⴻⴵⴻⵎ ⵖⴰⵔ ⵓⵎⴻⵣⵡⴰⵔⵓ ⴷ ⵜⵥⴰⴵⵉⵜ ⵏ ⵓⵇⴰⴷⵉ
1 ⴱⵓⵍⵓⵙ ⴷ ⵙⵉⵍⵡⴰⵏⵓⵙ ⴷ ⵜⵉⵎⵓⵜⵉⵢⵓ, ⵉ ⵜⵎⴻⵙⵎⵓⵏⵜ ⵏ ⵉⵜⵉⵙⵙⴰⵍⵓⵏⵉⴽⵉⵢⵢⴻⵏ, ⵜⴻⵏⵏⵉ ⵉⴵⴰⵏ ⴷⵉ ⴰⵔⴻⴱⴱⵉ, ⴱⴰⴱⴰⵜⵏⴻⵖ, ⵓ ⴷⵉ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ.
2 ⴰⵔⴹⴰ ⴷ ⵍⴻⵀⵏⴰ ⵣⵉ ⴰⵔⴻⴱⴱⵉ, ⴱⴰⴱⴰⵜⵏⴻⵖ, ⵓ ⵣⵉ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⴰⴷ ⴽⵉⵡⴻⵎ ⵉⵍⵉⵏ.
3 ⵉⵛⵓⵡⵡⴰⵔ ⴰⴷ ⵏⵇⴰⴷⴰ ⴰⵔⴻⴱⴱⵉ ⵉ ⴽⴻⵏⵏⵉⵡ ⵍⴻⴱⴷⴰ, ⴰ ⴰⵢⵜⵎⴰ, ⴰⵎ ⵎⴰⵎⵎⴻⵛ ⵉⵜⵜⵍⵉⵇ, ⵎⵉⵏⵣⵉ ⵍ’ⵉⵎⴰⵏ ⵏⵡⴻⵎ ⵉⵎⴻⵇⵇⴰⵔ ⴰⵟⵟⴰⵙ, ⴰⵎ ⵎⴰⵎⵎⴻⵛ ⵓⵍⴰ ⴷ ⵜⴰⵢⵔⵉ ⵏ ⴽⵓⵍ ⵉⵊⵊⴻⵏ ⵣⵣⴰⵢⵡⴻⵎ ⵎⴰⵔⵔⴰ ⵉ ⵡⴻⵏⵏⵉ ⴷ ⴰⵙ ⵢⵓⴷⵙⴻⵏ ⵜⴰⵔⴻⵏⵏⵉ ⵜⵎⴻⵇⵇⴰⵔ ⴽⵜⴰⵔ,
4 ⴰⵍ ⵏⴻⵜⵜⴼⴻⵢⵢⴻⵛ ⵅⴰⵡⴻⵎ ⴷⵉ ⵜⵎⴻⵙⵎⵓⵏⵉⵏ ⵏ ⴰⵔⴻⴱⴱⵉ ⵅ ⵙⵙⵉⴱⴱⴻⵜ ⵏ ⵍ’ⵉⵎⴰⵏ ⵏⵡⴻⵎ ⴷ ⵚⵚⴱⴰⵔ ⵏⵡⴻⵎ ⴷⵉ ⵎⴰⵔⵔⴰ ⴰⴷⴰⵔⵔⴻⵛ ⵏⵡⴻⵎ ⴷ ⵍⴻⵎⵃⴰⵢⴻⵎ ⵏⵡⴻⵎ ⵏⵏⵉ ⵜⴻⴽⵙⵉⵎ.
5 ⵎⴰⵏ ⴰⵢⴰ ⴷ ⵍⴱⵓⵔⵀⴰⵏ ⵏ ⵍⵃⵓⴽⵎ ⵉⵙⵙⴻⴳⴳⴷⴻⵏ ⵏ ⴰⵔⴻⴱⴱⵉ, ⴰⵇⴰ ⵜᵉⵜⵜⵡⴰⵃⴰⵙⴱⴻⵎ ⵜⴻⵙⴷⴰⵀⴻⴵⴻⵎ ⵜⴰⴳⴻⵍⴷⵉⵜ, ⵜⴻⵏⵏⵉ ⵅⴻⴼ ⵜⴻⴽⵙⵉⵎ ⴰⵎⴰⵔⵔⴻⵜ.
6 ⵓ ⵎⴰⵍⴰ ⵅⴻⵏⵏⵉ ⴷ ⵍⵃⴻⵇⵇ ⵣⵣⴰⵜ ⵉ ⴰⵔⴻⴱⴱⵉ ⵓⵎⵉ ⵖⴰ ⵉⵅⴻⴵⴻⵚ ⵙ ⵍⵎⴻⵃⵏⴻⵜ ⵉ ⵢⵉⵏⵏⵉ ⴽⴻⵏⵏⵉⵡ ⵉⵃⴻⵚⵚⴰⵔⴻⵏ,
7 ⵅⴻⵏⵏⵉ ⵏⴻⵜⵜⴰ ⴰⴷ ⴽⵉⴷⵏⴻⵖ ⵉⵙⵙⴻⴷⴷⴰⵔ ⵓⵍⴰ ⴷ ⴽⴻⵏⵏⵉⵡ ⵉⵏⵏⵉ ⵉⵜⵜⵡⴰⵃⵚⴰⵔⴻⵏ, ⵡⴰⵀ ⴰⴷ ⴰⵏⴻⵖ ⵉⵙⵙⴻⴷⴷⴰⵔ ⴰⴽⵉⴷⵡⴻⵎ ⵖⴰⵔ ⵓⵙⴰⵔⴳⴻⴱ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⵣⴻⴳ ⵓⵊⴻⵏⵏⴰ ⴰⴽ-ⴷ ⵍⵄⴻⵙⴽⴰⵔⴰⵜ ⵏ ⵍⵎⴰⵍⴰⴽⴰⵜ ⵏⵏⴻⵙ,
8 ⵅ ⵎⵉⵏⵏⵉ ⵉ ⵖⴰ ⵉⵏⵜⴰⵇⴻⵎ ⴷⵉ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ ⵅ ⵢⵉⵏⵏⵉ ⵡⴰⵔ ⵉⵙⵙⵉⵏⴻⵏ ⵛⴰ ⴰⵔⴻⴱⴱⵉ ⵓ ⵅ ⵢⵉⵏⵏⵉ ⵡⴰⵔ ⵅⵙⴻⵏ ⴰⴷ ⵛⴻⵀⴷⴻⵏ ⵙ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ.
9 ⵎⵉⵏⵣⵉ ⵉⵏⴰ ⴰⴷ ⵜⵜⵡⴰⵄⴰⵇⴱⴻⵏ ⴷⵉ ⵍⵃⵓⴽⵎ ⵙ ⵓⵀⴻⵍⵍⴻⴽ ⵉ ⵍⴻⴱⴷⴰ ⴰⵎ ⵢⴰⴳⴳⵡⴻⵊⴻⵏ ⵅ ⵡⵓⴷⴻⵎ ⵏ ⵙⵉⴷⵉⵜⵏⴻⵖ ⵓ ⵅ ⵓⵄⵓⴵⵉ ⵏ ⵊⵊⴻⵀⴷ ⵏⵏⴻⵙ,
10 ⵅⵎⵉ ⴷⴷ ⵖⴰ ⵢⴰⵙ ⵏⴻⵜⵜⴰ ⵃⵉⵎⴰ ⴰⴷ ⵉⵜⵜⵡⴰⵄⵓⴵⵉ ⴷⴻⴳ ⵡⴰⵙⵙ ⵏⵏⵉ ⴷⵉ ⵎⴰⵔⵔⴰ ⵉⵎⵇⴻⴷⴷⴰⵙⴻⵏ ⵏⵏⴻⵙ, ⵓ ⵃⵉⵎⴰ ⴰⴷ ⵉⵙⵙⵛⴻⵏ ⵍⴻⵄⵊⴰⵢⴻⴱ ⵏⵏⴻⵙ ⵙ ⵢⵉⵏⵏⵉ ⴷⴰⵢⴻⵙ ⵢⵓⵎⵏⴻⵏ, ⵎⵉⵏⵣⵉ ⵜⵓⵎⵏⴻⵎ ⵣⵉ ⵛⵛⵀⴰⴷⴻⵜ ⵏⵏⴻⵖ ⵉ ⴽⴻⵏⵏⵉⵡ ⴷⴻⴳ ⵡⴰⵙⵙ ⵏⵏⵉ.
11 ⵙ ⵓⵢⴻⵏⵏⵉ ⵏⴽⴻⵙⵙⵉ ⴰⵡⴻⵎ ⵍⵎⴻⵄⵔⵓⴼ ⵍⴻⴱⴷⴰ, ⵃⵉⵎⴰ ⴰⵔⴻⴱⴱⵉ ⵏⵏⴻⵖ ⴰⴷ ⴽⴻⵏⵏⵉⵡ ⵢⴻⴳⴳ ⴰⴷ ⵜⴻⵙⴷⴰⵀⴻⴵⴻⵎ ⵜⴰⵍⴰⵖⵉⵜ ⵏⵡⴻⵎ, ⵓ ⵃⵉⵎⴰ ⴰⴷ ⴽⴻⵏⵏⵉⵡ ⵉⵛⵛⵓⵔ ⵙ ⵊⵊⴻⵀⴷ ⵎⴰⵃⴻⵏⴷ ⴰⴷ ⵜⵉⵍⵉⵎ ⵜⵡⴻⵊⴷⴻⵎ ⵇⴰⵄ ⵉ ⵜⵎⴻⴳⴳⴰ ⵏ ⵜⵛⵓⵏⵉ ⵓ ⵉ ⵍⴻⵅⴷⴰⵢⴻⵎ ⵏ ⵍ’ⵉⵎⴰⵏ,
12 ⵃⵉⵎⴰ ⴰⴷ ⴷⴰⵢⵡⴻⵎ ⵉⵜⵜⵡⴰⵄⵓⴵⵉ ⵉⵙⴻⵎ ⵏ ⵙⵉⴷⵉⵜⵏⴻⵖ ⵢⴰⵙⵓⵄ, ⵓⵛⴰ ⵓⵍⴰ ⴷ ⴽⴻⵏⵏⵉⵡ ⴷⴰⵢⴻⵙ, ⵄⵍⴰⵃⵙⴰⴱ ⴰⵔⴹⴰ ⵏ ⴰⵔⴻⴱⴱⵉ ⵏⵏⴻⵖ ⴷ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ.