28
ⵜⴰⵔⴻⵡⵍⴰ ⵏ ⵢⴰⵄⵇⵓⴱ ⴷ ⵜⴰⵔⵊⵉⵜ ⵏⵏⴻⵙ ⴷⵉ ⴱⴰⵢⵜ-ⵉⵍ
1 ⵉⵍⴰⵖⴰ ⵉⵙⵃⴰⵇ ⵉ ⵢⴰⵄⵇⵓⴱ, ⵉⴱⴰⵔⴻⴽ ⵉ-ⵜ ⵓⵛⴰ ⵉⵙⵙⴻⴽⴽ ⵉ-ⵜ, ⵉⵏⵏⴰ ⴰⵙ: “ⵡⴰⵔ ⵜⵜⴰⵡⵉ ⵜⴰⵎⵖⴰⵔⵜ ⵣⵉ ⵢⴻⵙⵙⵉⵙ ⵏ ⴽⴻⵏⵄⴰⵏ.
2 ⴽⴽⴰⵔ, ⵔⵓⵃ ⵖⴰⵔ ⴼⴰⴷⴰⵏ-ⴰⵔⴰⵎ, ⵖⴰⵔ ⵜⴰⴷⴷⴰⵔⵜ ⵏ ⴱⵉⵜⵓⵡⵉⵍ, ⴱⴰⴱⴰⵙ ⵏ ⵢⴻⵎⵎⴰⵛ, ⵓⵛⴰ ⴰⵡⵉ-ⴷⴷ ⵙⵙⴻⵏⵏⵉ ⵜⴰⵎⵖⴰⵔⵜ ⵉ ⵛⴻⴽ ⵣⴻⴳ ⵢⴻⵙⵙⵉⵙ ⵏ ⵍⴰⴱⴰⵏ, ⵓⵎⴰⵙ ⵏ ⵢⴻⵎⵎⴰⵛ.
3 ⴰⵔⴻⴱⴱⵉ, ⴰⵎⵣⴻⵎⵎⴰⵔ ⵅ ⴽⵓⵍⵛⵉ, ⴰⴷ ⵛⴻⴽ ⵉⴱⴰⵔⴻⴽ ⵓ ⴰⴷ ⴰⵛ ⵉⵡⵛ ⵍⵖⵉⴵⴻⵜ ⵓⵛⴰ ⴰⴷ ⵛⴻⴽ ⵉⴽⴻⵜⵜⴰⵔ ⴰⵍ ⵖⴰ ⵜⴷⴻⵡⵍⴻⴷ ⴷ ⵉⵊⵊ ⵏ ⵡⴻⴳⵔⴰⵡ ⵏ ⵍⴻⴳⵏⵓⵙ.
4 ⵉⵍⵉ ⵏⴻⵜⵜⴰ ⴰⴷ ⴰⵛ ⵉⵡⵛ ⵍⴱⴰⵔⴰⴽⴰ ⵏ ⵉⴱⵔⴰⵀⵉⵎ, ⵉ ⵛⴻⴽ ⵓ ⵉ ⵣⵣⴰⵔⵉⵄⴻⵜ ⵏⵏⴻⵛ ⴰⴽⵉⴷⴻⴽ, ⵃⵉⵎⴰ ⴰⴷ ⵜⵡⴰⵔⵜⴻⴷ ⵜⴰⵎⵎⵓⵔⵜ ⵏⵏⵉ ⴷⵉ ⵜⵣⴻⴷⴷⵖⴻⴷ ⴰⵎ ⵓⴱⴰⵔⵔⴰⵏⵉ, ⵜⴻⵏⵏⵉ ⵉⵡⵛⴰ ⴰⵔⴻⴱⴱⵉ ⵉ ⵉⴱⵔⴰⵀⵉⵎ.”
5 ⵅⴻⵏⵏⵉ ⵉⵙⵙⴻⴽⴽ ⵉⵙⵃⴰⵇ ⵢⴰⵄⵇⵓⴱ. ⵓⵛⴰ ⵏⴻⵜⵜⴰ ⵉⵔⵓⵃ ⵖⴰⵔ ⴼⴰⴷⴷⴰⵏ-ⴰⵔⴰⵎ, ⵖⴰⵔ ⵍⴰⴱⴰⵏ, ⵎⵎⵉⵙ ⵏ ⴱⵉⵜⵓⵡⵉⵍ, ⴰⵔⴰⵎⵉⵢⵓ, ⵓⵎⴰⵙ ⵏ ⵔⵉⴼⵇⴰ, ⵢⴻⵎⵎⴰⵙ ⵏ ⵢⴰⵄⵇⵓⴱ ⴷ ⵄⵉⵙⵓ.
6 ⵓⵎⵉ ⵉⵥⵔⴰ ⵄⵉⵙⵓ ⴱⴻⵍⵍⵉ ⵉⵙⵃⴰⵇ ⵉⴱⴰⵔⴻⴽ ⵢⴰⵄⵇⵓⴱ ⵓⵛⴰ ⵉⵙⵙⴻⴽⴽ ⵉ-ⵜ-ⵉ-ⴷⴷ ⵖⴰⵔ ⴼⴰⴷⴷⴰⵏ-ⴰⵔⴰⵎ ⵃⵉⵎⴰ ⴰⴷ ⵢⴰⵡⵉ ⵉ ⵢⵉⵅⴻⴼ ⵏⵏⴻⵙ ⵜⴰⵎⵖⴰⵔⵜ ⵙⵙⴻⵏⵏⵉ, ⵓ ⵍⴰⵎⵉ ⵜ ⵉⴱⴰⵔⴻⴽ, ⵢⵓⵎⵓⵔ ⵉ-ⵜ, ⵉⵏⵏⴰ ⴰⵙ: “ⵡⴰⵔ ⴽⴻⵙⵙⵉ ⵜⴰⵎⵖⴰⵔⵜ ⵣⴻⴳ ⵢⴻⵙⵙⵉⵙ ⵏ ⴽⴻⵏⵄⴰⵏ!”,
7 ⵓⵛⴰ ⵉⵥⵔⴰ ⵄⴰⵡⴻⴷ ⴱⴻⵍⵍⵉ ⵢⴰⵄⵇⵓⴱ ⵉⵟⴰⵄ ⴱⴰⴱⴰⵙ ⴷ ⵢⴻⵎⵎⴰⵙ, ⵉⵔⵓⵃ ⵖⴰⵔ ⴼⴰⴷⴷⴰⵏ-ⴰⵔⴰⵎ,
8 ⵅⴻⵏⵏⵉ ⵉⵜⵡⴰⵍⴰ ⵄⵉⵙⵓ ⴱⴻⵍⵍⵉ ⵢⴻⵙⵙⵉⵙ ⵏ ⴽⴻⵏⵄⴰⵏ ⴷ ⵜⵉⵄⴻⴼⴼⴰⵏⵉⵏ ⴷⵉ ⵜⵉⵟⵟⴰⵡⵉⵏ ⵏ ⴱⴰⴱⴰⵙ ⵉⵙⵃⴰⵇ.
9 ⵅⴻⵏⵏⵉ ⵉⵔⵓⵃ ⵄⵉⵙⵓ ⵖⴰⵔ ⵉⵙⵎⴰⵄⵉⵍ ⵓⵛⴰ ⵢⵉⵡⵉ ⵎⴰⵃⴰⵍⴰⵜ ⴷ ⵜⴰⵎⵖⴰⵔⵜ ⵉ ⵢⵉⵅⴻⴼ ⵏⵏⴻⵙ, ⵢⴰⵔⵏⵉ ⵜⵜ-ⵉ-ⴷⴷ ⵖⴰⵔ ⵜⴻⵎⵖⴰⵔⵉⵏ ⵏⵏⴻⵖⵏⵉ. ⵏⴻⵜⵜⴰⵜ ⵜⵓⵖⴰ-ⵜⵜ ⴷ ⵢⴻⴵⵉⵙ ⵏ ⵉⵙⵎⴰⵄⵉⵍ, ⵎⵎⵉⵙ ⵏ ⵉⴱⵔⴰⵀⵉⵎ, ⵓⵍⵜⵎⴰⵙ ⵏ ⵏⴰⴱⴰⵢⵓⵜ.
10 ⵓⵛⴰ ⵉⴼⴼⴻⵖ ⵢⴰⵄⵇⵓⴱ ⵣⵉ ⴱⵉ’ⵔ-ⵙⴻⴱⵄⴰ, ⵉⵔⵓⵃ ⵖⴰⵔ ⵃⴰⵔⴰⵏ.
11 ⵢⵉⵡⴻⴹ ⵖⴰⵔ ⵉⵊⵊ ⵏ ⵡⴻⵎⵛⴰⵏ ⵎⴰⵏⵉ ⵢⴻⵏⵙⴰ, ⵎⵉⵏⵣⵉ ⵜⵓⵖⴰ ⵜⴰⴼⵓⵛⵜ ⵜⴻⵖⵔⵉ. ⵉⴽⵙⵉ ⵣⴻⴳ ⵢⴻⵥⵔⴰ ⵏ ⵡⴻⵎⵛⴰⵏ ⵏⵏⵉ, ⵉⵙⵙⴰⵔⵙ ⵉ-ⵜⴻⵏ ⵙⴰⴷⵓ ⵓⵣⴻⴵⵉⴼ ⵏⵏⴻⵙ ⵓⵛⴰ ⵉⵡⴹⴰ ⵉⵟⵟⴻⵚ ⴷⴻⴳ ⵡⴻⵎⵛⴰⵏ ⵏⵏⵉ.
12 ⵢⵓⵔⵊⴰ, ⴰⵇⴰ ⵉⵊⵊ ⵏ ⴷⴷⵔⵓⵊ ⵉⴱⴻⴷⴷ ⵅ ⵜⴻⵎⵎⵓⵔⵜ ⵓⵛⴰ ⵉⵜⵜⵃⴰⴷⴰ ⵉⵅⴻⴼ ⵏ ⴷⴷⵔⵓⵊ ⴰⵊⴻⵏⵏⴰ, ⵓ ⵅⵣⴰⵔ, ⵍⵎⴰⵍⴰⴽⴰⵜ ⵏ ⴰⵔⴻⴱⴱⵉ ⵜⵜⴰⵍⵢⴻⵏⵜ ⵀⴻⴽⴽⵡⴰⵏⵜ ⵣⵣⴰⵢⴻⵙ.
13 ⵓ ⵅⵣⴰⵔ, ⵙⵉⴷⵉ ⵉⴱⴻⴷⴷ ⵅⴰⵙ, ⵉⵏⵏⴰ: “ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏ ⴱⴰⴱⴰⵛ ⵉⴱⵔⴰⵀⵉⵎ, ⴷ ⴰⵔⴻⴱⴱⵉ ⵏ ⵉⵙⵃⴰⵇ. ⵜⴰⵎⵎⵓⵔⵜ ⵉ ⵅⴻⴼ ⵜᵉⵟⵟⵚⴻⴷ ⴰⴷ ⴰⵛ ⵜⵜ ⵡⵛⴻⵖ ⵉ ⵛⴻⴽ ⵓ ⵉ ⵣⵣⴰⵔⵉⵄⴻⵜ ⵏⵏⴻⵛ.
14 ⴰⴷ ⵜⵉⵍⵉ ⵣⵣⴰⵔⵉⵄⴻⵜ ⵏⵏⴻⵛ ⴰⵎ ⵓⵛⴰⵍ ⵏ ⵜⴻⵎⵎⵓⵔⵜ ⵓⵛⴰ ⴰⴷ ⵜⵉⵔⵉⵡⴻⴷ ⵖⴰⵔ ⵍⵖⴰⵔⴱ ⴷ ⵛⵛⴰⵔⵇ, ⵖⴰⵔ ⵛⵛⴰⵎⴰⵍ ⴷ ⵍⵊⴰⵏⵓⴱ. ⴷⴰⵢⴻⴽ ⵓ ⴷⵉ ⵣⵣⴰⵔⵉⵄⴻⵜ ⵏⵏⴻⵛ ⴰⴷ ⵜⵜⵡⴰⴱⴰⵔⴽⴻⵏⵜ ⵎⴰⵔⵔⴰ ⵍⴰⴵⴰⵜ ⵏ ⵜⴻⵎⵎⵓⵔⵜ.
15 ⴰⵇⴰ ⴰⵢⵉ ⵏⴻⵛⵛ ⴰⴽⵉⴷⴻⴽ ⵓ ⵏⴻⵛⵛ ⴰⴷ ⵛⴻⴽ ⵃⴹⵉⵖ ⵇⴰⵄ ⵎⴰⵏⵉ ⵉ ⵖⴰ ⵜⵔⴰⵃⴻⴷ, ⴰⴷ ⵛⴻⴽ ⴰⵔⵔⴻⵖ ⵖⴰⵔ ⵜⴻⵎⵎⵓⵔⵜ-ⴰ, ⵎⵉⵏⵣⵉ ⵏⴻⵛⵛ ⵡⴰⵔ ⵛⴻⴽ ⵜⵜⴻⵊⵊⵉⵖ ⴰⵍ ⵖⴰ ⴽⴻⵎⵎⵍⴻⵖ ⵎⵉⵏ ⴷ ⴰⵛ ⵏⵏⵉⵖ.”
16 ⵍⴰⵎⵉ ⴷⴷ-ⵉⴼⴰⵇ ⵢⴰⵄⵇⵓⴱ ⵣⴻⴳ ⵢⵉⴹⴻⵚ ⵏⵏⴻⵙ, ⵉⵏⵏⴰ: “ⵙ ⵜⵉⴷⴻⵜⵜ, ⵙⵉⴷⵉ ⴰⵇⴰ-ⵜ ⴷⴻⴳ ⵡⴻⵎⵛⴰⵏ-ⴰ ⵓ ⵏⴻⵛⵛ ⵡⴰⵔ ⵙⵙⵉⵏⴻⵖ!”
17 ⵜⵓⵖⴰ ⵉⴳⴳⵯⴻⴷ ⴰⵟⵟⴰⵙ, ⵉⵏⵏⴰ: “ⵎⴻⵛⵃⴰⵍ ⵉⵙⵙⴰⴳⴳⵯⴰⴷ ⵡⴻⵎⵛⴰⵏ-ⴰ! ⴰⵇⴰ ⵜⴰ ⵎⵖⵉⵔ ⴷ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵓ ⵜⴰⵏⵉⵜⴰ ⴷ ⵜⴰⵡⵡⴰⵔⵜ ⵏ ⵓⵊⴻⵏⵏⴰ!”
18 ⵉⴽⴽⴰⵔ ⵢⴰⵄⵇⵓⴱ ⵓⵛⴰ ⵉⴽⵙⵉ ⴰⵥⵔⵓ ⵏⵏⵉ ⵜⵓⵖⴰ ⵉⵙⵙⴰⵔⵙ ⵙⴰⴷⵓ ⵓⵣⴻⴵⵉⴼ ⵏⵏⴻⵙ, ⵉⴳⴳⴰ ⵉ-ⵜ ⴰⵎ ⵢⵉⵊⵊ ⵏ ⵡⴻⵥⵔⵓ ⵏ ⵍⵉⴷⴰⵔⴻⵜ ⵓⵛⴰ ⵉⴼⴰⵔⵔⴻⵖ ⵣⵣⴻⵛⵜ ⵅ ⵓⵣⴻⴵⵉⴼ ⵏ ⵡⴻⵥⵔⵓ.
19 ⵉⴳⴳⴰ ⴰⵎⵛⴰⵏ ⵏⵏⵉ ⴱⴰⵢⵜ-ⵉⵍ, ⵎⴰⵛⴰ ⵣⴻⴳ ⵓⵎⴻⵣⵡⴰⵔⵓ ⵜⵓⵖⴰ ⵉⵙⴻⵎ ⵏ ⵡⴻⵎⵛⴰⵏ ⵏⵏⵉ ⵍⵓⵣ.
20 ⵓⵛⴰ ⵉⵡⴰⵄⴷ ⵢⴰⵄⵇⵓⴱ, ⵉⵏⵏⴰ: “ⵎⴰⵍⴰ ⴰⵔⴻⴱⴱⵉ ⴰⵇⴰ-ⵜ ⴰⴽⵉⴷⵉ ⵓⵛⴰ ⴰⴷ ⴰⵢⵉ ⵉⵃⴹⴰ ⴷⴻⴳ ⵡⴻⴱⵔⵉⴷ ⵉ ⵖⴰ ⵓⵢⵓⵔⴻⵖ, ⴰⴷ ⴰⵢⵉ ⵉⵡⵛ ⴰⵖⵔⵓⵎ ⵃⵉⵎⴰ ⴰⴷ ⵛⵛⴻⵖ, ⴷ ⵡⴰⵔⵔⵓⴹ ⵃⵉⵎⴰ ⴰⴷ ⴰⵔⴹⴻⵖ
21 ⵓ ⵎⴰⵍⴰ ⴷⴻⵡⵍⴻⵖ ⵖⴰⵔ ⵜⴰⴷⴷⴰⵔⵜ ⵏ ⴱⴰⴱⴰ ⴷⵉ ⵍⴰⵎⴰⵏ, ⵅⴻⵏⵏⵉ ⵙⵉⴷⵉ ⴰⴷ ⵢⵉⵍⵉ ⴷ ⴰⵔⴻⴱⴱⵉ ⵉ ⵏⴻⵛⵛ.
22 ⵓⵛ ⴰⵥⵔⵓ-ⵢⴰ ⵉ ⴳⴳⵉⵖ ⴷ ⴰⵥⵔⵓ ⵏ ⵍⵉⴷⴰⵔⴻⵜ, ⴰⴷ ⵢⵉⵍⵉ ⴷ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵓ ⵣⵉ ⵎⴰⵔⵔⴰ ⵎⵉⵏ ⴷ ⴰⵢⵉ ⵖⴰ ⵜⴻⵡⵛⴻⴷ, ⴰⴷ ⴰⵛ ⵡⵛⴻⵖ ⵍⴻⵄⵛⵓⵔ!”