11
ⴰⴱⴰⵔⵔⴻⵃ ⵙ ⵊⵊⵔⵉⵃⴻⵛⵜ ⵡⵉⵙⵙ ⵄⴻⵛⵔⴰ
1 ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴰⴷ ⵍⴻⵇⴼⴻⵖ ⵄⴰⴷ ⵎⵖⵉⵔ ⵙ ⵢⵉⵛⵜⴻⵏ ⵊⵊⵔⵉⵃⴻⵛⵜ ⵅ ⴼⵉⵔⵄⵓⵏ ⴷ ⵎⵉⵚⵔⴰ. ⴰⵡⴰⵔⵏⵉ ⵜⴰ ⴰⴷ ⴽⴻⵏⵏⵉⵡ ⵉⵙⵙⴻⴽⴽ ⵙⵙⴰ. ⵖⴰⵔ ⵓⵏⴻⴳⴳⴰⵔ ⵅⵎⵉ ⴽⴻⵏⵏⵉⵡ ⵖⴰ ⵢⴻⵊⵊ ⴰⴷ ⵜⵔⵓⵃⴻⵎ ⵎⴰⵔⵔⴰ, ⴰⴷ ⵅⴰⵡⴻⵎ ⵢⴰⵥⵥⴻⵍ ⵙⵙⴰ ⵙ ⵜⵉⴷⴻⵜⵜ.
2 ⵙⵉⵡⴻⵍ ⵅⴻⵏⵏⵉ ⴷⴻⴳ ⵉⵎⴻⵣⵣⵓⵖⴻⵏ ⵏ ⵍⴳⴻⵏⵙ ⵎⴰⵃⴻⵏⴷ ⴰⴷ ⵉⵜⵜⴰⵔ ⴽⵓⵍ ⴰⵔⵢⴰⵣ ⵣⴻⴳ ⵡⴰⵊⵊⴰⵔ ⵏⵏⴻⵙ ⵓ ⴽⵓⵍ ⵜⴰⵎⵖⴰⵔⵜ ⵣⵉ ⵜⴰⵊⵊⴰⵔⵜ ⵏⵏⴻⵙ ⵍⴻⵇⵛⵓⵄ ⵏ ⵏⵏⵓⵇⴰⵔⵜ ⴷ ⵡⵓⵔⴻⵖ.”
3 ⵙⵉⴷⵉ ⵉⵡⵛⴰ ⴰⵙ ⵉ ⵍⴳⴻⵏⵙ ⴰⵔⴹⴰ ⴷⵉ ⵜⵉⵟⵟⴰⵡⵉⵏ ⵏ ⵉⵎⵉⵚⵔⵉⵢⵢⴻⵏ. ⵄⴰⵡⴻⴷ ⵜⵓⵖⴰ ⵎⵓⵙⴰ ⴷ ⵉⵊⵊ ⵡⴻⵔⵢⴰⵣ ⵙ ⵛⵛⴰⵏ ⴰⵎⴻⵇⵇⵔⴰⵏ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⴷⵉ ⵜⵉⵟⵟⴰⵡⵉⵏ ⵏ ⵍⴳⴻⵏⵙ ⵓ ⴷⵉ ⵜⵉⵟⵟⴰⵡⵉⵏ ⵏ ⵉⵎⵙⴻⵅⵅⴰⵔⴻⵏ ⵏ ⴼⵉⵔⵄⵓⵏ.
4 ⵉⵏⵏⴰ ⵎⵓⵙⴰ: “ⴰⵎⵎⵓ ⵉ ⵉⵏⵏⴰ ⵙⵉⴷⵉ: ‘ⵖⴰⵔ ⵡⴻⵣⵢⴻⵏ ⵏ ⴵⵉⵍⴻⵜ ⵏⴻⵛⵛ ⴰⴷ ⵄⴷⵓⵖ ⴷⵉ ⵍⵡⴻⵙⵟ ⵏ ⵎⵉⵚⵔⴰ
5 ⵓⵛⴰ ⴰⴷ ⵉⵎⵎⴻⵜ ⴽⵓⵍ ⴰⵎⴻⵏⵣⵓ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵣⴻⴳ ⵓⵎⴻⵏⵣⵓ ⵏ ⴼⵉⵔⵄⵓⵏ, ⵡⴻⵏⵏⵉ ⵉⵇⵇⵉⵎⴻⵏ ⵅ ⵍⵄⴰⵔⵛ ⵏ ⵜⴳⴻⵍⴷⵉⵜ, ⴰⵍ ⴰⵎⴻⵏⵣⵓ ⵏ ⵜⴰⵢⵢⴰ, ⵜⴻⵏⵏⵉ ⵉⵇⵇⵉⵎⴻⵏ ⴰⵡⴰⵔⵏⵉ ⵉ ⵜⵙⵉⵔⵜ ⵜⵃⴰⵔⵔⵉ ⵉⵎⴻⵏⴷⵉ, ⵓⵍⴰ ⴷ ⴽⵓⵍ ⴰⵎⴻⵏⵣⵓ ⵣⵉ ⵍⴻⴱⵀⴰⵢⴻⵎ.
6 ⴰⴷ ⴷⵉⵏ ⵜⵉⵍⵉ ⵉⵛⵜ ⵏ ⵜⵖⵓⵢⵢⵉⵜ ⴷ ⵜⴰⵎⴻⵇⵇⵔⴰⵏⵜ ⵅ ⵎⴰⵔⵔⴰ ⵜⴰⵎⵎⵓⵔⵜ ⵏ ⵎⵉⵚⵔⴰ ⵉ ⵡⴰⵔ ⵜⵓⵖⵉ ⵄⴻⵎⵎⴰⵔⵚ ⵏⵉⵖ ⵄⴻⵎⵎⴰⵔⵚ ⵄⴰⴷ ⴰⴷ ⵜⵉⵍⵉ.
7 ⵎⴰⵛⴰ ⵖⴰⵔ ⵎⴰⵔⵔⴰ ⴰⵢⵜ ⵏ ⵉⵙⵔⴰⵉⵍ, ⵡⴰⵔ ⵉⵜⵜⵥⵓ ⵓⵍⴰ ⴷ ⵉⵊⵊ ⵏ ⵡⴻⵇⵣⵉⵏ ⵅ ⵉⵡⴷⴰⵏ ⵓⵍⴰ ⵅ ⵍⵎⴰⵍ, ⵎⴰⵃⴻⵏⴷ ⴰⴷ ⵜⴻⵙⵙⵏⴻⵎ, ⴱⴻⵍⵍⵉ ⵙⵉⴷⵉ ⵉⵜⵜⴻⴳⴳ ⵍⴼⴰⵔⵣ ⵊⴰⵔ ⵉⵎⵉⵚⵔⵉⵢⵢⴻⵏ ⴷ ⵉⵙⵔⴰⵉⵍ.’
8 ⵅⴻⵏⵏⵉ ⴰⴷ ⵖⴰⵔⵉ ⴷⴷ-ⵀⵡⴰⵏ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⵛ, ⴰⴷ ⴰⵢⵉ ⴱⴻⵏⴷⵇⴻⵏ, ⴰⴷ ⵉⵏⵉⵏ: ‘ⴼⴼⴻⵖ ⵛⴻⴽ ⴷ ⵎⴰⵔⵔⴰ ⵍⴳⴻⵏⵙ ⵉ ⵛⴻⴽ ⵉⴹⴻⴼⴼⴰⵔⴻⵏ ⴷⴻⴳ ⵉⵚⵓⵔⴰⴼ ⵏⵏⴻⵛ!’ ⴰⵡⴰⵔⵏⵉ ⵎⴰⵏ ⴰⵢⴰ ⵏⴻⵛⵛ ⴰⴷ ⴼⴼⵖⴻⵖ.’ ” ⵓⵛⴰ ⵉⴼⴼⴻⵖ ⵅ ⴼⵉⵔⵄⵓⵏ, ⵜⴻⴽⴽⴰⵔ ⴷⴰⵢⴻⵙ ⵜⵎⴻⵙⵙⵉ ⵙ ⵓⵅⴻⵢⵢⴻⵇ.
9 ⴰⵇⴰ ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴼⵉⵔⵄⵓⵏ ⵡⴰⵔ ⴷ ⴰⵡⴻⵎ ⵉⵜⵜⴻⵙⵍⵉ ⵛⴰ, ⵃⵉⵎⴰ ⴰⴷ ⵎⵖⴰⵔⴻⵏⵜ ⵍⴻⵄⵍⴰⵎⴰⵜ ⵉⵏⵓ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ.”
10 ⴰⵇⴰ ⵎⵓⵙⴰ ⴷ ⵀⴰⵔⵓⵏ ⴳⴳⵉⵏ ⵎⴰⵔⵔⴰ ⵍⴻⵄⵍⴰⵎⴰⵜ-ⴰ ⵣⵣⴰⵜ ⵉ ⵡⵓⴷⴻⵎ ⵏ ⴼⵉⵔⵄⵓⵏ, ⵎⴰⵛⴰ ⵙⵉⴷⵉ ⵜⵓⵖⴰ ⵉⵙⵙⴻⵇⵙⴻⵃ ⵓⵍ ⵏ ⴼⵉⵔⵄⵓⵏ ⴰⵍⴰⵎⵉ ⵡⴰⵔ ⵉⵊⵊⵉ ⴰⴷ ⴼⴼⵖⴻⵏ ⴰⵢⵜ ⵏ ⵉⵙⵔⴰⵉⵍ ⵣⵉ ⵜⴻⵎⵎⵓⵔⵜ ⵏⵏⴻⵙ.