3
ⵙⵙⵉⵔⵔ ⵏ ⵍⵎⴰⵙⵉⵃ
1 ⵅ ⵓⵢⴻⵏⵏⵉ ⵏⴻⵛⵛ, ⴱⵓⵍⵓⵙ, ⴰⵇⴰ ⴰⵢⵉ ⴷ ⴰⵎⴻⵃⴱⵓⵙ ⵏ ⵢⴰⵙⵓⵄ ⵍⵎⴰⵙⵉⵃ, ⵉ ⴽⴻⵏⵏⵉⵡ ⵉⵏⵏⵉ ⵉⴵⴰⵏ ⵣⵉ ⵍⴻⴳⵏⵓⵙ,
2 ⵎⴰⵍⴰ ⵣⴻⵄⵎⴰ ⴰⵇⴰ ⵜⴻⵙⵍⴰⵎ ⵅ ⵜⵙⴻⵅⵅⴰⵔⵜ ⵏ ⴰⵔⴹⴰ ⵏ ⴰⵔⴻⴱⴱⵉ ⵉ ⴷ ⴰⵢⵉ ⵉⵎⵎⴻⵡⵛⴻⵏ ⵊⴰⵔ ⴰⵡⴻⵎ,
3 ⴱⴻⵍⵍⵉ ⵉⵜⵜⵡⴰⵙⵙⴰⵔⴳⴻⴱ ⴰⵢⵉ-ⴷⴷ ⵙⵙⵉⵔⵔ, ⴰⵎ ⵉⵣⵣⴰⵔⴻⵖ ⵓⵔⵉⵖ ⴰⵡⴻⵎ-ⴷⴷ ⵙ ⴷⵔⵓⵙ.
4 ⵅⵎⵉ ⵖⴰ ⵜⵖⴰⵔⴻⵎ ⵎⴰⵏ ⴰⵢⴰ, ⵜⵣⴻⵎⵎⴰⵔⴻⵎ ⴰⴷ ⵜⴼⴻⵀⵎⴻⵎ ⵍⴻⴼⵀⴰⵎⴻⵜ ⵉⵏⵓ ⵏ ⵙⵙⵉⵔⵔ ⵏ ⵍⵎⴰⵙⵉⵃ,
5 ⵡⴻⵏⵏⵉ ⵡⴰⵔ ⵉⵜⵜⵡⴰⵙⵙⴰⵔⴳⴻⴱ ⵛⴰ ⴷⵉ ⵜⴰⵔⵡⴰ ⵏ ⴱⵏⴰⴷⴻⵎ ⴷⵉ ⵍⴻⵊⵢⵓⵍ ⵏⵏⴻⵖⵏⵉ, ⴰⵎ ⵎⴰⵎⵎⴻⵛ ⵉⵜⵜⵡⴰⵄⴰⵔⵔⴰ ⵅⴰⵙ ⵍⴻⵅⵅⵓ ⵙ ⴰⵔⵔⵓⵃ ⵉ ⵔⵔⵓⵙⵓⵍ ⵉⵎⵇⴻⴷⴷⴰⵙⴻⵏ ⵏⵏⴻⵙ ⵓ ⵉ ⵉⵏⴰⴱⵉⵢⵢⴻⵏ ⵏⵏⴻⵙ,
6 ⴰⵃⴻⵇⵇⴰ ⵉⵏⵏⵉ ⵣⵉ ⵍⴻⴳⵏⵓⵙ ⴰⴷ ⵉⵍⵉⵏ ⴷ ⵉⵡⵔⵉⵜⴻⵏ ⴰⴽⵉⴷⵙⴻⵏ ⴷ ⵉⵖⴻⵣⴷⵉⵙⴻⵏ ⴰⴽⵉⴷⵙⴻⵏ ⵏ ⴰⵔⵔⵉⵎⴻⵜ ⵏⵏⴻⵙ ⵓⵍⴰ ⴷ ⵉⵛⵔⵉⵛⴻⵏ ⵏ ⵍⵡⴰⵄⴷ ⵏⵏⵉ ⴷⴰⵢⴻⵙ ⵉⵎⵎⴻⵡⵛⴻⵏ ⵙ ⵍ’ⵉⵏⵊⵉⵍ,
7 ⵉ ⵣⵉ ⴷⴻⵡⵍⴻⵖ ⴷ ⴰⵎⵙⴻⵅⵅⴰⵔ ⵄⵍⴰⵃⵙⴰⴱ ⵜⴰⵡⵀⵉⴱⵜ ⵏ ⴰⵔⴹⴰ ⵏ ⴰⵔⴻⴱⴱⵉ ⵉ ⴷ ⴰⵢⵉ ⵉⵎⵎⴻⵡⵛⴻⵏ ⵄⵍⴰⵃⵙⴰⴱ ⵊⵊⴻⵀⴷ ⵏⵏⴻⵙ ⵉ ⴷⴰⵢⵉ ⵉⵅⴻⴷⴷⵎⴻⵏ.
8 ⴰⵇⴰ ⵉⵎⵎⴻⵡⵛ ⴰⵢⵉ ⴰⵔⴹⴰ-ⵢⴰ, ⵉ ⵏⴻⵛⵛ ⴷ ⴰⵎⵓⵇⵍⵉⵍ ⵇⴰⵄ ⵊⴰⵔ ⵎⴰⵔⵔⴰ ⵉⵎⵇⴻⴷⴷⴰⵙⴻⵏ, ⵃⵉⵎⴰ ⴰⴷ ⴱⴰⵔⵔⵃⴻⵖ ⵙ ⵍⴻⵅⴱⴰⵔ ⴰⵚⴻⴱⵃⴰⵏ, ⵉⵡⴰ ⴰⴳⵍⴰ ⵏ ⵍⵎⴰⵙⵉⵃ ⵉ ⵡⴰⵔ ⵏⵣⴻⵎⵎⴰⵔ ⴰⴷ ⵏⴻⴼⵀⴻⵎ,
9 ⵓ ⵃⵉⵎⴰ ⴰⴷ ⵙⵙⵓⴼⴼⵖⴻⵖ ⵖⴰⵔ ⵜⴼⴰⵡⵜ ⵉ ⵎⴰⵔⵔⴰ, ⵎⵉⵏ ⵉⵅⵙ ⴰⴷ ⵢⵉⵏⵉ ⵓⵡⴻⴽⴽⴻⵍ ⵏ ⵙⵙⵉⵔⵔ ⵉ ⵜⵓⵖⴰ ⵉⵏⵓⴼⴼⴰⵔⴻⵏ ⴷⵉ ⵣⵣⵎⴰⵏⴰⵜ ⵏ ⵣⵉⵛ ⴷⵉ ⴰⵔⴻⴱⴱⵉ, ⵡⴻⵏⵏⵉ ⵉ ⴷⴷ-ⵉⵅⴻⵍⵇⴻⵏ ⴽⵓⵍⵛⵉ,
10 ⵃⵉⵎⴰ ⵜⵉⵖⵉⵜ ⵏ ⴰⵔⴻⴱⴱⵉ ⴰⴽ-ⴷ ⵡⴰⵟⵟⴰⵙ ⵏ ⵉⵖⴻⵣⴷⵉⵙⴻⵏ ⵏⵏⴻⵙ ⴰⴷ ⵜⵉⵍⵉ ⵜᵉⵜⵜⵡⴰⵙⵙⵏⴻⵏ ⵙ ⵜⵎⴻⵙⵎⵓⵏⵜ ⵖⴰⵔ ⵍⴻⵃⴽⴰⵎⴰⵜ ⴷ ⵚⵚⵓⵍⴰⵟⴰⵜ ⴷⴻⴳ ⵉⵊⴻⵏⵡⴰⵏ,
11 ⵜⵉⵖⵉⵜ ⵉ ⵜⵓⵖⴰ ⵉⵙⵙⴻⵡⵊⴻⴷ ⵏⴻⵜⵜⴰ ⵣⵉ ⵣⵣⵎⴰⵏ ⵓⵛⴰ ⵉⴽⴻⵎⵎⴻⵍ ⵉ-ⵜⵜ ⴷⵉ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ,
12 ⵡⴻⵏⵏⵉ ⴷⴰⵢⴻⵙ ⴰⵇⴰ ⵖⴰⵔⵏⴻⵖ ⵜⴰⵔⵢⴰⵙⵜ ⴷ ⵡⴰⴷⴰⴼ ⴰⴽ-ⴷ ⵜⵜⵉⵇⴻⵜ ⵙ ⵍ’ⵉⵎⴰⵏ ⵣⵣⴰⵢⴻⵙ.
13 ⵙ ⵓⵢⴻⵏⵏⵉ ⵜⵜⵣⴰⵡⴰⴳⴻⵖ ⴽⴻⵏⵏⵉⵡ, ⵎⴰⵃⴻⵏⴷ ⵡⴰⵔ ⵜⵜⵉⵃⵍⴻⵎ ⵛⴰ ⵙ ⵍⴻⵎⵃⴰⵢⴻⵎ ⵉⵏⵓ ⴷⵉ ⵟⵟⵡⴻⵄ ⵏⵡⴻⵎ. ⴰⵇⴰ ⵎⴰⵏ ⴰⵢⴰ ⵉ ⵓⵄⵓⴵⵉ ⵉ ⴽⴻⵏⵏⵉⵡ.
ⵜⴰⵥⴰⴵⵉⵜ ⵏ ⴱⵓⵍⵓⵙ ⵅ ⵉⴼⴰⵙⵓⵙⵉⵢⵢⴻⵏ
14 ⴰⴷ ⴰⴷⴰⵔⴻⵖ ⵙ ⵉⴼⴰⴷⴷⴻⵏ ⵉⵏⵓ ⵣⵣⴰⵜ ⵉ ⴱⴰⴱⴰⵙ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ,
15 ⵉ ⵡⴻⵏⵏⵉ ⵓⵎⵉ ⵙⴻⵎⵎⴰⵏ ⴽⵓⵍ ⵉⵊⵊ ⵏ ⵜⴱⴰⴱⴰⵜ ⵉ ⵉⴵⴰⵏ ⴷⴻⴳ ⵉⵊⴻⵏⵡⴰⵏ ⴷ ⵜⴻⵎⵎⵓⵔⵜ,
16 ⵃⵉⵎⴰ ⴰⴷ ⴰⵡⴻⵎ ⵉⵡⵛ ⵄⵍⴰⵃⵙⴰⴱ ⴰⴳⵍⴰ ⵏ ⵓⵄⵓⴵⵉ ⵏⵏⴻⵙ ⵓ ⵃⵉⵎⴰ ⴰⴷ ⵜᵉⵜⵜⵡⴰⵙⵙⵊⴻⵀⴷⴻⵎ ⵙ ⵊⵊⴻⵀⴷ ⵙ ⴰⵔⵔⵓⵃ ⵏⵏⴻⵙ ⴷⵉ ⴱⵏⴰⴷⴻⵎ ⵏⵡⴻⵎ ⵏ ⴷⴰⵅⴻⵍ.
17 ⵃⵉⵎⴰ ⵍⵎⴰⵙⵉⵃ ⴰⴷ ⵉⵣⴷⴻⵖ ⴷⴻⴳ ⵡⵓⵍⴰⵡⴻⵏ ⵏⵡⴻⵎ ⵙ ⵍ’ⵉⵎⴰⵏ, ⵙ ⵜⴰⵢⵔⵉ, ⵅ ⵎⵉⵏⵏⵉ ⵜⴻⵛⵛⴰⵜⴻⵎ ⵉⵥⴻⵡⵔⴰⵏ ⵓ ⴷⵙⴰⵙ ⵏⵡⴻⵎ ⴰⴷ ⵢⵉⵍⵉ ⵉⵎⵜⴻⵏ,
18 ⵃⵉⵎⴰ ⴰⴷ ⵜⵣⴻⵎⵎⴰⵔⴻⵎ ⴰⴷ ⵜⴼⴻⵀⵎⴻⵎ ⴰⴽ-ⴷ ⵎⴰⵔⵔⴰ ⵉⵎⵇⴻⴷⴷⴰⵙⴻⵏ ⵎⵉⵏ ⵜⴻⵄⵏⴰ ⵜⵉⵔⵓ ⴷ ⵜⵓⵣⵣⴻⴳⴳⴰⵔⵜ ⴷ ⵍⵓⵄⵍⴰ ⴷ ⵍⴰⴵⴰⵖ,
19 ⵓ ⴰⴷ ⵜⴻⵙⵙⵏⴻⵎ ⵄⴰⵡⴻⴷ ⵍⴻⵎⵖⴰⵔⴻⵜ ⵏ ⵜⵓⵙⵙⵏⴰ ⵏ ⵜⴰⵢⵔⵉ ⵏ ⵍⵎⴰⵙⵉⵃ, ⵓⵛⴰ ⴰⴷ ⵜⵉⵍⵉⵎ ⵜⵄⴻⵎⵎⴰⵔⴻⵎ ⵙ ⵎⴰⵔⵔⴰ ⴰⵄⴻⵎⵎⴰⵔ ⵏ ⴰⵔⴻⴱⴱⵉ.
20 ⵎⴰⵛⴰ ⵉ ⵏⴻⵜⵜⴰ ⵓⵎⵉ ⵖⴰⵔⴻⵙ ⵜⵉⵣⴻⵎⵎⴰⵔ ⵉⴼⴻⵢⵢⴹⴻⵏ ⵃⵉⵎⴰ ⴰⴷ ⵉⴳⴳ ⴷⵉ ⵟⵟⵡⴻⵄ ⵏⵏⴻⵖ ⵙⴻⵏⵏⴻⵊ ⵉ ⵎⵉⵏ ⵏⴻⵜⵜᵉⵜⵜⴰⵔ ⵏⵉⵖ ⵏⴻⵜⵜⵅⴰⵔⵔⴻⵚ, ⵄⵍⴰⵃⵙⴰⴱ ⵊⵊⴻⵀⴷ ⵏⵏⴻⵙ ⵉ ⵉⵅⴻⴷⴷⵎⴻⵏ ⴷⴰⵢⵏⴻⵖ,
21 ⵉ ⵏⴻⵜⵜⴰ ⵉⴽⴽⴰⵔ ⴰⵙ-ⴷⴷ ⵓⵄⵓⴵⵉ ⴷⵉ ⵜⵎⴻⵙⵎⵓⵏⵜ ⵏⵏⴻⵙ, ⴷⵉ ⵢⴰⵙⵓⵄ ⵍⵎⴰⵙⵉⵃ, ⴷⵉ ⵎⴰⵔⵔⴰ ⵍⴻⵊⵢⵓⵍ ⵉ ⵍⴻⴱⴷⴰ ⵇⴰⵄ. ⴰⵎⵉⵏ.