32
ⵉⵣⵍⵉ ⵏ ⵡⴻⵛⴹⴰⵏ ⵅ ⴼⵉⵔⵄⵓⵏ
1 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⴻⵏⵄⴰⵛ, ⴷⴻⴳ ⵓⵢⵓⵔ ⵡⵉⵙⵙ ⵜⴻⵏⵄⴰⵛ, ⴷⴻⴳ ⵡⴰⵙⵙ ⴰⵎⴻⵣⵡⴰⵔⵓ ⵏ ⵓⵢⵓⵔ ⵉⵎⵙⴰⵔ ⴱⴻⵍⵍⵉ ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:
2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵙⴳⴻⵄⵄⴻⴷ ⵉⵊⵊ ⵏ ⵢⴻⵣⵍⵉ ⵏ ⵡⴻⵛⴹⴰⵏ ⵅ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ, ⵓⵛⴰ ⵉⵏⵉ ⴰⵙ:
‘ⵜⵓⵖⴰ ⵛⴻⴽ ⴰⵎ ⵡⴻⵢⵔⴰⴷ ⴷ ⴰⵎⴻⵥⵢⴰⵏ
ⵊⴰⵔ ⵍⴻⴳⵏⵓⵙ
ⵓ ⵜⵓⵖⴰ ⵛⴻⴽ ⴰⵎ ⵍⵀⴰⵢⵛⴻⵜ ⴷⵉ ⵍⴻⴱⵃⵓⵔ.
ⵜⵖⴻⴹⵍⴻⴷ ⵉⵅⴻⴼ ⵏⵏⴻⵛ ⴷⴻⴳ ⵉⵖⴻⵣⵔⴰⵏ,
ⵜⴻⵙⵙⴻⵏⵀⴻⵣⵣⴻⴷ ⴰⵎⴰⵏ ⵙ ⵉⴹⴰⵔⴻⵏ ⵏⵏⴻⵛ
ⵓⵛⴰ ⵜⴻⵙⵙⴻⴼⵙⴰⴷ ⵉⵖⴻⵣⵔⴰⵏ ⵏⵙⴻⵏ.’
3 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
‘ⵏⴻⵛⵛ ⴰⴷ ⵅⴰⴽ ⵙⵙⵡⵉⵥⵥⴹⴻⵖ ⵜⵔⴰⵛⵛⴰ ⵉⵏⵓ,
ⵙ ⵢⵉⵊⵊ ⵏ ⵡⴻⴳⵔⴰⵡ ⵏ ⵍⴻⴳⵏⵓⵙ ⴰⵟⵟⴰⵙ.
ⵏⵉⵜⵏⵉ ⴰⴷ ⵛⴻⴽ ⵙⵙⵉⵍⵢⴻⵏ ⴰⴽ-ⴷ ⵜⵔⴰⵛⵛⴰ ⵉⵏⵓ.
4 ⵏⴻⵛⵛ ⴰⴷ ⵛⴻⴽ ⵊⵊⴻⵖ ⴷⵉ ⵜⴻⵎⵎⵓⵔⵜ,
ⴰⴷ ⵛⴻⴽ ⵏⴹⴰⵔⴻⵖ ⵅ ⵡⵓⴷⴻⵎ ⵏ ⵢⴻⵢⵢⴰⵔ.
ⴰⴷ ⵅⴰⴽ ⵙⵙⵣⴻⴷⵖⴻⵖ ⵎⴰⵔⵔⴰ ⵉⵊⴹⴰⴹ ⵏ ⵓⵊⴻⵏⵏⴰ
ⵓⵛⴰ ⴰⴷ ⵣⵣⴰⵢⴻⴽ ⵙⵙⵊⵉⵡⵏⴻⵖ ⵉⵎⵓⴷⴷⴰⵔⴻⵏ
ⵣⵉ ⵎⴰⵔⵔⴰ ⵜⴰⵎⵎⵓⵔⵜ.
5 ⴰⴷ ⴳⴳⴻⵖ ⵡⴻⵢⵙⵓⵎ ⵏⵏⴻⵛ ⵅ ⵉⴷⵓⵔⴰⵔ
ⵓⵛⴰ ⴰⴷ ⵛⵛⵓⵔⴻⵖ ⵜⵉⵖⵣⵓⵔⵉⵏ
ⵙ ⵍⴻⴳⵄⵓⴷⵉ ⵏ ⵡⴰⵔⵔⴰⵢⴻⵎ ⵏⵏⴻⵛ.
6 ⵏⴻⵛⵛ ⴰⴷ ⵙⵙⴻⵙⵡⴻⵖ ⵜⴰⵎⵎⵓⵔⵜ ⴰⵍ ⵉⴷⵓⵔⴰⵔ,
ⵙ ⵓⴼⴻⵢⵢⴻⴹ ⵏ ⵉⴷⴰⵎⵎⴻⵏ ⵏⵏⴻⵛ,
ⵓⵛⴰ ⵜⵉⵖⴻⵣⵔⴰⵜⵉⵏ ⴰⴷ ⵛⵛⵓⵔⴻⵏⵜ ⵣⵣⴰⵢⴻⴽ.’
7 ‘ⵏⴻⵛⵛ ⴰⴷ ⵙⵙⴷⵓⵔⵢⴻⵖ ⴰⵊⴻⵏⵏⴰ
ⵅⵎⵉ ⵛⴻⴽ ⵖⴰ ⵙⵙⵅⴻⵙⵢⴻⵖ.
ⴰⴷ ⵙⵙⴱⴰⵔⵔⴻⵛⵏⴻⵖ ⵉⵜⵔⴰⵏ ⵏⵏⴻⵙ,
ⴰⴷ ⵙⵙⴷⵓⵔⵢⴻⵖ ⵜⴰⴼⵓⵛⵜ ⵙ ⵉⵙⴻⵢⵏⵓⵜⴻⵏ,
ⵓⵛⴰ ⵜⴰⵣⵉⵔⵉ ⵡⴰⵔ ⵜⵜⴻⵊⵊⵉ ⵄⴰⴷ
ⴰⴷ ⵜⴰⵔⵖⴰ ⵜⴼⴰⵡⵜ ⵏⵏⴻⵙ.
8 ⵎⴰⵔⵔⴰ ⵜⵉⴼⴰⵡⵉⵏ ⵢⴰⵔⴻⵇⵇⴻⵏ ⴷⴻⴳ ⵓⵊⴻⵏⵏⴰ
ⴰⴷ ⵜⴻⵏⵜ ⵙⵙⴱⴰⵔⵔⴻⵛⵏⴻⵖ ⴷⵉ ⵟⵟⵡⴻⵄ ⵏⵏⴻⵛ
ⵓⵛⴰ ⴰⴷ ⵙⵙⴻⴽⴽⴻⵖ ⵜⴰⴵⴻⵙⵜ ⵅ ⵜⴻⵎⵎⵓⵔⵜ ⵏⵏⴻⵛ!’,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.
9 ‘ⵏⴻⵛⵛ ⴰⴷ ⵖⴻⵣⵣⵉⵖ ⵓⵍ ⵏ ⵡⴰⵟⵟⴰⵙ ⵏ ⵍⴻⴳⵏⵓⵙ,
ⵓⵎⵉ ⵉ ⵖⴰ ⵢⴰⵡⵢⴻⵖ ⵍⴻⵅⴱⴰⵔ ⵏ ⵜⵔⴻⵥⵥⵉⵜ ⵏⵏⴻⵛ
ⵖⴰⵔ ⵍⴻⴳⵏⵓⵙ, ⵖⴰⵔ ⵜⴻⵎⵎⵓⵔⴰ
ⵉ ⵡⴰⵔ ⵜⴻⵏⵜ ⵜⴻⵙⵙⵉⵏⴻⴷ ⵛⴰ.
10 ⵏⴻⵛⵛ ⴰⴷ ⵙⵙⵏⴻⵅⵍⵄⴻⵖ ⴰⵟⵟⴰⵙ ⵏ ⵍⴻⴳⵏⵓⵙ
ⴷⵉ ⵙⵙⵉⴱⴱⴻⵜ ⵏⵏⴻⵛ
ⵓ ⴰⵛⵓⵡⵡⴰⴼ ⵏ ⵉⵊⴻⴵⵉⴷⴻⵏ ⵏⵙⴻⵏ
ⴰⴷ ⴳⴻⵄⵄⴷⴻⵏ ⵣⴻⴳ ⵡⴰⵔⵊⴻⴼ ⴷⵉ ⵟⵟⵡⴻⵄ ⵏⵏⴻⵛ,
ⵅⵎⵉ ⵖⴰ ⵙⵙⴻⵏⵀⴻⵣⵣⴻⵖ ⵙⵙⵉⴼ ⵉⵏⵓ ⵙⵙⴰ ⴷ ⵙⵙⴰ
ⵣⵣⴰⵜ ⵉ ⵡⵓⴷⵎⴰⵡⴻⵏ ⵏⵙⴻⵏ.
ⵏⵉⵜⵏⵉ ⴰⴷ ⴰⵔⵊⵉⵊⴻⵏ ⵍⴻⴱⴷⴰ,
ⴽⵓⵍ ⵉⵊⵊ ⴷⵉ ⵙⵙⵉⴱⴱⴻⵜ ⵏ ⵜⵓⴷⴰⵔⵜ ⵏⵏⴻⵙ,
ⴷⴻⴳ ⵡⴰⵙⵙ ⵏ ⵓⵡⴻⵟⵟⵓ ⵏⵏⴻⵛ.’
11 ⵎⵉⵏⵣⵉ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
‘ⵙⵙⵉⴼ ⵏ ⵓⵊⴻⴵⵉⴷ ⵏ ⴱⴰⴱⵉⵍ ⴰⴷ ⵅⴰⴽ ⵢⴻⵎⵎⴰⵔⵙ.
12 ⵙ ⵍⴻⵙⵢⵓⴼ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ
ⴰⴷ ⵖⴻⴹⵍⴻⵖ ⵍⵖⴰⵛⵉ ⵏⵏⴻⵛ ⵉⵏⵀⴻⵡⵍⴻⵏ.
ⴰⵇⴰ-ⵜⴻⵏ ⵍⴻⴳⵏⵓⵙ ⵉⵇⴻⵙⵃⴻⵏ ⴰⵟⵟⴰⵙ ⵎⴰⵔⵔⴰ,
ⵏⵉⵜⵏⵉ ⴰⴷ ⵇⴹⴰⵏ ⵅ ⵏⵏⴼⴰⵅⴻⵜ ⵏ ⵎⵉⵚⵔⴰ
ⵓⵛⴰ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ
ⴰⴷ ⵉⵜⵜⵡⴰⵜⴻⵃⵃⴰ.
13 ⵏⴻⵛⵛ ⴰⴷ ⵇⴹⵉⵖ ⵅ ⵉⵎⵓⴷⴷⴰⵔⴻⵏ ⵏⵏⴻⵙ
ⵉⵏⵏⵉ ⵉⴵⴰⵏ ⵖⴰⵔ ⵡⴰⵟⵟⴰⵙ ⵏ ⵡⴰⵎⴰⵏ,
ⵓⵍⴰ ⴷ ⵉⵊⵊ ⵏ ⵓⴹⴰⵔ ⵏ ⴱⵏⴰⴷⴻⵎ
ⴰⴷ ⵜⴻⵏ ⵉⵙⵙⴰⵔⵡⵉ ⵄⴰⵡⴻⴷ
ⵓⵛⴰ ⵓⵍⴰ ⴷ ⵉⵛⵜ ⵏ ⵜⴻⵛⴹⴻⵛⵜ ⵏ ⵍⵎⴰⵍ
ⴰⴷ ⵜⴻⵏ ⵜⴻⵙⵙⴰⵔⵡⵉ ⵄⴰⴷ.’
14 ‘ⵅⴻⵏⵏⵉ ⴰⴷ ⵙⵙⴻⵀⵡⵉⵖ ⴰⵎⴰⵏ ⵏⵙⴻⵏ
ⴰⵍⴰⵎⵉ ⵉ ⵖⴰ ⵚⴼⴰⵏ
ⵓ ⵏⴻⵛⵛ ⴰⴷ ⴳⴳⴻⵖ ⵉⵖⴻⵣⵔⴰⵏ ⵏⵙⴻⵏ
ⴰⴷ ⵙⵙⵉⵣⵣⵍⴻⵏ ⴰⵎ ⵣⵣⴻⵛⵜ!’,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.
15 ‘ⴰⵍⴰⵎⵉ ⴳⴳⵉⵖ ⵜⴰⵎⵎⵓⵔⵜ ⵏ ⵎⵉⵚⵔⴰ ⴷ ⴰⵔⴻⴷⴷⴻⴵ
ⵓⵛⴰ ⴰⴷ ⵜⵉⵍⵉ ⵜⴻⵎⵎⵓⵔⵜ ⵜᵉⵜⵜⵡⴰⵔⴻⴷⴷⴻⴵ,
ⵜⴻⵃⴼⴰ ⵣⵉ ⵎⴰⵔⵔⴰ ⵎⵉⵏ ⴷⴰⵢⴻⵙ,
ⴰⵍⴰⵎⵉ ⵡⵜⴻⵖ ⵎⴰⵔⵔⴰ ⵉⵏⵏⵉ ⴷⴰⵢⴻⵙ ⵉⵣⴻⴷⴷⵖⴻⵏ,
ⵅⴻⵏⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.’ ”
16 “ⵡⴰ ⴷ ⵉⵣⵍⵉ ⵏ ⵡⴻⵛⴹⴰⵏ ⵓⵛⴰ ⴰⴷ ⵜ ⵖⴻⵏⵏⵊⴻⵏ ⴰⵎ ⵢⴻⵣⵍⵉ ⵏ ⵡⴻⵛⴹⴰⵏ, ⵢⴻⵙⵙⵉⵜⵙⴻⵏⵜ ⵏ ⵜⴻⵎⵎⵓⵔⴰ ⴰⴷ ⵜ ⵖⴻⵏⵏⵊⴻⵏⵜ ⴰⵎ ⵢⴻⵣⵍⵉ ⵏ ⵡⴻⵛⴹⴰⵏ, ⴰⴷ ⵜ ⵖⴻⵏⵏⵊⴻⵏⵜ ⴰⵎ ⵢⴻⵣⵍⵉ ⵏ ⵡⴻⵛⴹⴰⵏ ⵅ ⵎⵉⵚⵔⴰ ⵓ ⵅ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ!, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.”
ⵉⵥⵔⵉ ⵏ ⵡⴻⵛⴹⴰⵏ ⵖⴰⵔ ⵡⴻⵏⴹⴻⵍ ⵏ ⴼⵉⵔⵄⵓⵏ ⴰⴽ-ⴷ ⵓⴱⴰⵔⵔⵓ ⵏⵏⴻⵙ
17 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⴻⵏⵄⴰⵛ, ⴷⴻⴳ ⵓⵢⵓⵔ ⵡⵉⵙⵙ ⵜⴻⵏⵄⴰⵛ, ⴷⴻⴳ ⵡⴰⵙⵙ ⵡⵉⵙⵙ ⵅⴻⵎⵎⴻⵙⵟⴰⵛ ⵏ ⵓⵢⵓⵔ ⵉⵎⵙⴰⵔ ⴱⴻⵍⵍⵉ ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:
18 “ⴰ ⵎⵎⵉⵙ ⵏ ⴱⵏⴰⴷⴻⵎ,
ⵡⵡⴻⵜ ⴰⴳⴻⵊⴷⵓⵔ ⵅ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵎⵉⵚⵔⴰ.
ⴻⵊⵊ ⵉ-ⵜ ⴰⴷ ⵉⵀⵡⴰ,
ⵎⵉⵚⵔⴰ ⴰⴽ-ⴷ ⵢⴻⵙⵙⵉⵙ ⵏ ⵍⴻⴳⵏⵓⵙ ⵉⵊⴻⵀⴷⴻⵏ,
ⴷⵉ ⵍⴰⴵⴰⵖ ⵏ ⵜⴻⵎⵎⵓⵔⵜ,
ⴰⴽ-ⴷ ⵢⵉⵏⵏⵉ ⵉⵀⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.
19 ⵎⴰ ⵛⴻⴽ ⵉⵄⵉⵣⵣⴻⵏ ⵅ ⵎⴰⵏ ⵎⵎⴰ?
ⵀⵡⴰ, ⴻⵊⵊ ⴰⴷ ⵛⴻⴽ ⵙⵙⴰⵔⵙⴻⵏ
ⴰⴽ-ⴷ ⵢⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ.
20 ⴰⴷ ⵡⴹⴰⵏ ⴷⵉ ⵍⵡⴻⵙⵟ
ⵏ ⵢⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ.
ⴰⵇⴰ ⵉⵎⵎⴻⵡⵛ ⵙⵙⵉⴼ.
ⵊⴰⵔⵔ ⵎⵉⵚⵔⴰ ⵣⴻⴳ ⵡⴻⴱⵔⵉⴷ
ⴰⴽ-ⴷ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ.
21 ⵉⵏⵏⵉ ⵖⴰⵔ ⵜⴻⴵⴰ ⵚⵚⵓⵍⵟⴰ ⴰⵟⵟⴰⵙ
ⵣⴻⴳ ⴰⵢⵜ ⵏ ⴱⵓ-ⵜⴻⵖⵔⵓⴹⵜ
ⴰⴷ ⵙⵙⵉⵡⵍⴻⵏ ⴰⴽⵉⴷⴻⵙ
ⵓ ⴰⴽ-ⴷ ⵢⵉⵏⵏⵉ ⵜ ⵉⵄⴰⵡⴰⵏⴻⵏ
ⵣⵉ ⵍⵡⴻⵙⵟ ⵏ ⵍⴰⵅⴰⵔⵜ.
ⵀⵡⴰⵏ ⵏⵉⵜⵏⵉ, ⴰⵇⴰ ⵣⵣⵍⴻⵏ ⴷⵉⵏⵏⵉ,
ⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ,
ⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ.’
22 ‘ⴷⵉⵀⴰ ⵉⴵⴰ ⴰⵛⵛⵓⵔ ⴰⴽ-ⴷ ⵎⴰⵔⵔⴰ ⴰⴳⵔⴰⵡ ⵏⵏⴻⵙ,
ⵏⵏⴹⴻⵏ ⴰⵙ-ⴷⴷ ⵉⵎⴻⴹⵍⴰⵏ ⵏⵏⴻⵙ.
ⵎⴰⵔⵔⴰ ⵏⵉⵜⵏⵉ ⵜⵜⵡⴰⵏⵖⴻⵏ, ⵡⴹⴰⵏ ⵙ ⵙⵙⵉⴼ.
23 ⵉⵎⴻⴹⵍⴰⵏ ⵏⵏⴻⵙ ⴰⵇⴰ ⴰⵜⴻⵏ ⴷⵉ ⵜⵖⴻⵎⵎⴰⵔ
ⵏ ⵡⴻⵃⴼⵓⵔ ⵏ ⵡⴻⵏⴹⴻⵍ
ⵓ ⴰⴳⵔⴰⵡ ⵏⵏⴻⵙ ⴰⵇⴰ-ⵜ ⴷⴻⴳ ⵡⴻⵏⵏⴻⴹ ⵏ ⵡⴻⵏⴹⴻⵍ ⵏⵏⴻⵙ.
ⵎⴰⵔⵔⴰ ⵏⵉⵜⵏⵉ ⵜⵜⵡⴰⵙⵙⵏⵓⵇⵇⴱⴻⵏ,
ⵡⴹⴰⵏ ⵙ ⵙⵙⵉⴼ,
ⵉⵏⵏⵉ ⵜⵓⵖⴰ ⵉⵙⵙⴰⴳⴳⵯⴰⴷⴻⵏ
ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.’
24 ‘ⴷⵉⵀⴰ ⵄⵉⵍⴰⵎ ⴷ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ
ⴷⴻⴳ ⵡⴻⵏⵏⴻⴹ ⵏ ⵡⴻⵏⴹⴻⵍ ⵏⵏⴻⵙ.
ⵎⴰⵔⵔⴰ ⵏⵉⵜⵏⵉ ⵜⵜⵡⴰⵙⵙⵏⵓⵇⵇⴱⴻⵏ, ⵡⴹⴰⵏ ⵙ ⵙⵙⵉⴼ,
ⵀⵡⴰⵏ ⴱⵍⴰ ⴰⵅⵜⴰⵏ ⴷⵉ ⵍⴰⴵⴰⵖ ⵏ ⵜⴻⵎⵎⵓⵔⵜ,
ⵉⵏⵏⵉ ⵜⵓⵖⴰ ⵉⵙⵙⴰⴳⴳⵯⴰⴷⴻⵏ
ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.
ⵏⵉⵜⵏⵉ ⵉⵡⵢⴻⵏ ⵍⴻⴼⴹⵉⵃⴻⵜ ⵏⵙⴻⵏ ⴰⴽⵉⴷⵙⴻⵏ,
ⴰⴽ-ⴷ ⵢⵉⵏⵏⵉ ⵉⵀⴻⴽⴽⵡⴰⵏ
ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.
25 ⴳⴳⵉⵏ ⴰⵙ ⵉⵊⵊ ⵏ ⵡⴻⵎⵛⴰⵏ ⵏ ⴰⵔⵔⴰⵃⴻⵜ
ⴷⵉ ⵍⵡⴻⵙⵜ ⵏ ⵢⵉⵏⵏⵉ ⵉⵜⵜⵡⴰⵏⵖⴻⵏ,
ⵖⴰⵔ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ.
ⵉⵎⴻⴹⵍⴰⵏ ⵏⵏⴻⵙ ⵏⵏⴹⴻⵏ ⴰⵙ-ⴷⴷ.
ⵎⴰⵔⵔⴰ ⵏⵉⵜⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ,
ⵡⴹⴰⵏ ⵙ ⵙⵙⵉⴼ,
ⵎⵉⵏⵣⵉ ⵜⵓⵖⴰ ⵙⵙⴰⴳⴳⵯⴰⴷⴻⵏ ⵉⵡⴷⴰⵏ
ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.
ⵏⵉⵜⵏⵉ ⵉⵡⵢⴻⵏ ⵍⴻⴼⴹⵉⵃⴻⵜ ⵏⵙⴻⵏ ⴰⴽⵉⴷⵙⴻⵏ,
ⵊⵎⵉⵄ ⴰⴽ-ⴷ ⵢⵉⵏⵏⵉ ⵉⵀⴻⴽⴽⵡⴰⵏ
ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.
ⴰⵇⴰ ⵏⴻⵜⵜⴰ ⵉⵜⵜⵡⴰⵙⵙⴰⵔⵙ
ⴷⵉ ⵍⵡⴻⵙⵜ ⵏ ⵢⵉⵏⵏⵉ ⵉⵜⵜⵡⴰⵏⵖⴻⵏ.’
26 ⴷⵉⵀⴰ ⵎⴰⵛⵉⵅ-ⵜⵓⴱⴰⵍ
ⴷ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ.
ⵏⵏⴹⴻⵏ ⴰⵙ-ⴷⴷ ⵉⵎⴻⴹⵍⴰⵏ ⵏⵏⴻⵙ.
ⵎⴰⵔⵔⴰ ⵏⵉⵜⵏⵉ ⵡⴰⵔ ⵜⵜⵡⴰⵅⴻⵜⵏⴻⵏ,
ⵜⵜⵡⴰⵙⵙⵏⵓⵇⵇⴱⴻⵏ ⵙ ⵙⵙⵉⴼ,
ⵎⴰⵖⴰⵔ ⵏⵉⵜⵏⵉ ⵜⵓⵖⴰ ⵙⵙⴰⴳⴳⵯⴰⴷⴻⵏ ⵉⵡⴷⴰⵏ
ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.
27 ⵉⵏⵏⵉ ⵉⵡⴹⴰⵏ ⵣⴻⴳ ⵢⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ
ⵡⴰⵔ ⵣⵣⵉⵍⴻⵏ ⴰⴽ-ⴷ ⴰⵢⵜ ⵏ ⴱⵓ-ⵜⴻⵖⵔⵓⴹⵜ
ⵏⵏⵉ ⵉⵀⵡⴰⵏ ⵖⴰⵔ ⵍⴰⵅⴰⵔⵜ
ⴰⴽ-ⴷ ⵍⴻⵙⵏⴰⵃ ⵏⵙⴻⵏ ⵏ ⵓⵎⴻⵏⵖⵉ.
ⵎⵎⴰⵔⵙⴻⵏ ⵍⴻⵙⵢⵓⴼ ⵏⵙⴻⵏ ⵙⴰⴷⵓ ⵉⵣⴻⴵⵉⴼⴻⵏ ⵏⵙⴻⵏ
ⵓⵛⴰ ⵍⵎⵓⵄⵚⵉⵢⵢⴻⵜ ⵏⵙⴻⵏ ⴰⵇⴰ-ⵜⵜ ⵅ ⵢⴻⵢⵙⴰⵏ ⵏⵙⴻⵏ,
ⵡⴰⵅⵅⴰ ⵜⵓⵖⴰ ⵏⵉⵜⵏⵉ ⴷ ⵜⵉⴳⴳⵯⵓⴷⵉ ⵉ ⴰⵢⵜ ⵏ ⴱⵓ-ⵜⴻⵖⵔⵓⴹⵜ
ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.
28 ⵓⵍⴰ ⴷ ⵛⴻⴽ ⴰⴷ ⵜⵉⵍⵉⴷ ⵜⴰⵔⵥⴻⴷ
ⴷⵉ ⵍⵡⴻⵙⵟ ⵏ ⵢⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ
ⵓⵛⴰ ⴰⴷ ⵜⴻⵣⵣⵍⴻⴷ
ⴰⴽ-ⴷ ⵢⵉⵏⵏⵉ ⵉⵜⵜⵡⴰⵙⵙⵏⵓⵇⴱⴻⵏ ⵙ ⵙⵙⵉⴼ.’
29 ‘ⴷⵉⵀⴰ ⵉⴷⵓⵎ, ⵉⵊⴻⴵⵉⴷⴻⵏ ⵏⵏⴻⵙ ⴷ ⵎⴰⵔⵔⴰ ⵍⵃⵓⴽⴽⴰⵎ ⵏⵏⴻⵙ,
ⵉⵏⵏⵉ ⵉ ⴷⵉⵏ ⵉⵜⵜⵡⴰⴳⴳⴻⵏ
ⵙ ⵎⴰⵔⵔⴰ ⵚⵚⵓⵍⵜⴰ ⵏⵙⴻⵏ
ⴰⴽ-ⴷ ⵢⵉⵏⵏⵉ ⵉⵜⵜⵡⴰⵙⵙⵏⵓⵇⵇⴱⴻⵏ ⵙ ⵙⵙⵉⴼ.
ⵣⵣⵍⴻⵏ ⴷⵉⵏⵏⵉ ⴰⴽ-ⴷ ⵢⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ
ⵓ ⴰⴽ-ⴷ ⵢⵉⵏⵏⵉ ⵉⵀⵡⴰⵏ
ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ’.
30 ‘ⴷⵉⵀⴰ ⴰⵢⵜ ⵏ ⴱⵓ-ⵚⵚⵓⵍⵟⴰ ⵣⵉ ⵛⵛⵎⴰⵍ,
ⵎⴰⵔⵔⴰ ⵏⵉⵜⵏⵉ, ⵓ ⵎⴰⵔⵔⴰ ⴰⵢⵜ ⵏ ⵚⵉⴷⵓⵏ,
ⵉⵏⵏⵉ ⵉⵀⵡⴰⵏ ⴰⴽ-ⴷ ⵢⵉⵏⵏⵉ ⵉⵜⵜⵡⴰⵏⵖⴻⵏ.
ⴰⵇⴰ ⵜⵜⵙⴻⴹⵃⴰⵏ ⴷⵉⵏⵏⵉ,
ⵡⴰⵅⵅⴰ ⵜⵓⵖⴰ ⵙⵙⴰⴳⴳⵯⴰⴷⴻⵏ ⵉⵡⴷⴰⵏ
ⵙ ⵜⴻⵔⵢⴰⵙⵜ ⵏⵙⴻⵏ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ.
ⴰⵇⴰ ⵣⵣⵍⴻⵏ ⴷⵉⵏⵏⵉ ⴱⵍⴰ ⴰⵅⵜⴰⵏ
ⴰⴽ-ⴷ ⵢⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ
ⵓⵛⴰ ⴰⵔⴻⴱⴱⵓⵏ ⵍⴻⴼⴹⵉⵃⴻⵜ ⵏⵙⴻⵏ
ⴰⴽ-ⴷ ⵢⵉⵏⵏⵉ ⵉⵀⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.’
31 ‘ⴼⵉⵔⵄⵓⵏ ⴰⴷ ⵜⴻⵏ ⵉⵥⴰⵔ ⵓⵛⴰ ⴰⴷ ⵉⵜⵜⵡⴰⵙⵙⴼⴻⵡⵡⴻⵊ
ⵣⵉ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ,
ⵉⵏⵏⵉ ⵉⵜⵜⵡⴰⵙⵙⵏⵓⵇⵇⴱⴻⵏ ⵙ ⵙⵙⵉⴼ,
ⴼⵉⵔⵄⵓⵏ ⴷ ⵎⴰⵔⵔⴰ ⵍⵄⴻⵙⴽⴰⵔ ⵏⵏⴻⵙ,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ,
32 ‘ⵎⵉⵏⵣⵉ ⵏⴻⵛⵛ ⵊⵊⵉⵖ ⵜ ⴰⴷ ⵉⵙⵙⵉⴳⴳⵯⴻⴷ
ⵉⵏⵏⵉ ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.
ⵏⴻⵜⵜⴰ ⴰⴷ ⵉⵎⵎⴰⵔⵙ ⴷⵉ ⵍⵡⴻⵙⵟ
ⵏ ⵢⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ,
ⵖⴰⵔ ⵢⵉⵏⵏⵉ ⵉⵜⵜⵡⴰⵙⵙⵏⵓⵇⵇⴱⴻⵏ ⵙ ⵙⵙⵉⴼ,
ⴼⵉⵔⵄⵓⵏ ⴷ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ,’
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.”